Ezequiel

35 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, atanga̱án matiejxi̱ náa kúbá Seír ga̱jma̱a̱ aratáríya̱ʼ dí magíʼnuu. 3 Aratháán: ‹Rígi̱ dí naʼthí Tátá Jeobá bi̱ itháán mba̱a̱: “Gi̱i̱ xtáá mu maxmína̱ʼ ga̱jma̱á nindxa̱a̱ʼ, kúbá Seír. Makruíya̱ʼ ñawúnʼ mu ma̱ni̱ ngínáá ga̱jma̱a̱ ma̱ni̱ dí mani̱ndxa̱a̱ʼ xóo mbá ku̱ba̱ʼ mijxooʼ* dí niguanáa. 4 Ma̱ni̱ gámbáa xuajñaanʼ ga̱jma̱a̱ ikháán mi̱dxu̱ʼnú mani̱ndxa̱a̱ʼ mbá ku̱ba̱ʼ mijxooʼ dí niguanáa, mi̱dxu̱ʼnú ma̱ta̱ya̱a̱ dí ikhúún nindxu̱ʼ Jeobá. 5 Ga̱jma̱a̱ numuu dí niraʼdaminaʼ má xúʼko̱ sia̱nʼ gajmiáanʼ xa̱bu̱ Israel, niraxnájxi̱i̱n makhañún mbiʼi dí niguma ngíníi”›.

6 ‹Ikha jngóo, xó má ikhúún gajkhun xtáá, eʼthí Tátá Jeobá bi̱ itháán mba̱a̱, niraʼwi̱i̱ má dí makhañáaʼ ga̱jma̱a̱ xáguma kríña̱a̱nʼ. Numuu dí nindaaʼ maradíin bi̱ niwiya̱a̱ʼ xtañún, ikha jngóo dí xúgi̱ makhañáaʼ má tsiaki̱i̱. 7 Ma̱ni̱ dí kúbá Seír mani̱ndxu̱u̱ xóo mbá ku̱ba̱ʼ mijxooʼ dí niguanáa, ga̱jma̱a̱ maxíyáa bi̱ gáʼga ikhí ga̱jma̱a̱ bi̱ gáʼkha̱a̱. 8 Ma̱ni̱ majtíin bi̱ nikháñún náa kúbá ndrígáaʼ, bi̱ nikháñún ga̱jma̱a̱ espada majngutaʼmíinʼ náa bíjní ndrígáaʼ, náa mata* ga̱jma̱a̱ náa mbá xúgíʼ dí na̱jkha̱ kúʼúun iyaʼ. 9 Ma̱ni̱ dí mani̱ndxa̱a̱ʼ mbá mbaaʼ dí maguanáa mbá kayuuʼ ga̱jma̱a̱ náa xuajñaanʼ ni xákúwá xa̱bu̱. Ikháanʼla muʼgua̱nú mbu̱ya̱a̱ dí ikhúún nindxu̱ʼ Jeobá›.

10 Numuu dí ikháán niratá ‹Mbá nájma̱ xuajin ga̱jma̱a̱ nájma̱ ku̱ba̱ʼ rígi̱ mani̱ndxu̱u̱ ndrígóʼ, ga̱jma̱a̱ mbá nájma̱ mundrígúuxu› maski ajndu Jeobá xtáa ikhí, 11 ‹ikha jngóo, xó má ikhúún gajkhun xtáá, eʼthí Tátá Jeobá bi̱ itháán mba̱a̱, makásnga̱ñu̱ʼ ka̱ya̱a̱ʼ ga̱jma̱a̱ maxi̱ʼgúʼ ka̱ya̱a̱ʼ xó má ikháán nitani̱, numuu dí ra̱ʼkhá tháán niwiya̱a̱ʼ xtañún, ikha jngóo masngajmáminaʼ náa majñu̱únʼ ikhiin índo̱ gánimbánuu numaaʼ. 12 Ikhú muʼgua̱nú mbu̱ya̱a̱ dí ikhúún, Jeobá nidxawuun xóo ni̱tha̱ wéñííʼ kúbá dí rígá náa Israel, índo̱ ni̱tala “Niguanáa ga̱jma̱a̱ nijuixnájxulu mu mu̱ʼni̱ gámbáa”.* 13 Índo̱ ni̱ni̱ mbaʼumíjna̱la ni̱tha̱ dí raʼkhí ga̱jma̱a̱ numuʼ ga̱jma̱a̱ ni̱tawéñuʼ má xúʼko̱. Ikhúún nidxawuun xúgíʼ dí ni̱tala›.

14 Rígi̱ dí naʼthí Tátá Jeobá bi̱ itháán mba̱a̱: ‹Xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ maʼdxúún índo̱ gáni̱ dí ikháán mani̱ndxa̱a̱ʼ xóo mbá ku̱ba̱ʼ mijxooʼ dí niguanáa. 15 Ikháán ra̱ʼkhá tháán nidxaanʼ, índo̱ ku̱ba̱ʼ dí nindrigúu bi̱ kúwá náa goʼwóo Israel niguanáa. Ikha jngóo ikhúún ma̱ngaa mania̱a̱ʼ xúʼko̱ kaʼnii. Maguma gámbáan kúbá Seír, xúʼko̱, xúgíʼ Edom. Ga̱jma̱a̱ muʼgua̱nú mbu̱ya̱a̱ dí ikhúún nindxu̱ʼ Jeobá›”.