Ezequiel

40 Índo̱ niʼni tsiguʼ 25 dí ni̱jkha̱ kiʼdáanʼxu, índo̱ nagi̱ʼdu̱u̱ tsiguʼ, gu̱wa̱ʼ mbiʼi dí gu̱nʼ rúʼko̱, 14 tsiguʼ nda̱wa̱á dí niguma gámbáa xuajin, mbiʼi má rúʼko̱, tsiaki̱i̱ ndrígóo Jeobá* nirígá náa ikhúún ga̱jma̱a̱ ni̱jkha̱ kañún náa xuajin. 2 Náa rí nisngájmuʼ Dios,* ikhaa ni̱jkha̱ kañún náa ku̱ba̱ʼ Israel ga̱jma̱a̱ nitsiajún náa kúbá rí itháán mitsídánʼ, ikhí ndi̱yo̱o̱ mbá tsinaʼ dí nakujmaa xóo xuajin dí naguanúu náa xígií sur.

3 Índo̱ ni̱jkha̱ kañún ikhí, ndi̱yo̱o̱ mbáa xa̱biya̱ bi̱ xóo cobre kaʼnii. Náa ñawúunʼ kayá mbá cuerda dí lino ga̱jma̱a̱ mbá ixi̱ dí naxtagiéwan* ga̱jma̱a̱, wíji̱ náa riejuun. 4 Xa̱biya̱ niʼthúnʼ: “A̱ʼdióo xa̱biya̱, atayáá májánʼ, atadxawíín ga̱jma̱a̱ atagíʼ májánʼ edxa̱a̱ʼ* náa mbá xúgíʼ dí gásngajmáaʼ, ikhaa rúʼko̱ numuu dí ni̱ʼkhá ka̱ña̱a̱n gi̱i̱. Arathún bi̱ kúwá náa goʼwóo Israel mbá xúgíʼ dí gáta̱ya̱a̱”.

5 Ndi̱yo̱o̱ mbá xtájtsí dí kúgumaʼá ga̱jma̱a̱ guʼwá náa nduyamajkuíí Dios.* Xa̱biya̱ kayá mbá ixi̱ dí nugiewan ga̱jma̱a̱, dí mbaʼ naʼni ajtsú metro.* Ikhú ikhaa nigíʼdu̱u̱ nigiéwan xtájtsí, rí ma̱ja̱nʼ naʼni mbá ixi̱ ga̱jma̱a̱ xúʼko̱ má rí mitsídánʼ.

6 Ikhú nikuʼmaminaʼ náa xkrugua* dí naʼni inuu xígií náa nagájnuu a̱jkha̱ʼ* ga̱jma̱a̱ nitsimuu náa escalón. Nigiéwan riejuun xkrugua, dí ma̱ja̱nʼ naʼni mbá ixi̱ ga̱jma̱a̱ xúʼko̱ má i̱mba̱ riejuun xkrugua ma̱ngaa. 7 Mámbá cuarto náa kúwá bi̱ nuñewa̱a̱n xkrugua, dí mbaʼ naʼni mbá ixi̱ xúʼko̱ má dí ma̱ja̱nʼ ma̱ngaa naʼni a̱jma̱ metro tikhu* dí náa nagi̱ʼdu̱u̱ imbo̱o̱ cuarto. Riejuun xkrugua dí nanújngoo xígií náa níjniúu pórtico,* náa xkrugua dí gíʼma awúún naʼni mbá ixi̱.

8 Ikhaa nigiéwan pórtico dí gíʼ náa xkrugua dí nato̱ʼo̱o̱ awúún ga̱jma̱a̱ naʼni mbá ixi̱. 9 Ikhaa nigiéwan pórtico dí gíʼ náa xkrugua, naʼni a̱jkhu̱ metro* dí ma̱ja̱nʼ ga̱jma̱a̱ nigiéwan columna ndrígóo pórtico, naʼni mbá metro* dí mba̱a̱. Pórtico dí gíʼ náa níjniúu xkrugua dí na̱jkha̱ xígií awúún.

10 Rígá mbá ajtsú cuarto náa kúwá bi̱ nuñewa̱a̱n xkrugua, dí rígá náa níjniúu xkrugua dí gíʼma xígií náa nagájnuu a̱jkha̱ʼ. Mbá nájtsú ikháá má mba̱ʼu̱, ga̱jma̱a̱ columna mbrígúú mbi̱jua̱.

11 Ikhú nigiéwan rí ma̱ja̱nʼ riejuun xkrugua, naʼni witsu metro,* ga̱jma̱a̱ rí mbaʼ naʼni majun metro tikhu.*

12 Cuarto dí kúgumaʼá dí tri̱ga̱ náa inuu cuarto náa kúwá bi̱ nuñewa̱a̱n xkrugua dí rígá náa mbá nájma̱ níjniúu, naʼni 50 centímetros.* Cuarto náa kúwá bi̱ nuñewa̱a̱n xkrugua dí tri̱ga̱ náa mbá nájma̱ níjniúu, naʼni ajtsú metro.

13 Nda̱wa̱á nigíʼdúu nigiéwan xkrugua ninújngoo náa mbá cuarto dí náa kúwá bi̱ nuñewa̱a̱n xkrugua,* nirtumuu asndu náa i̱mba̱ cuarto, naʼni 12 metro tikhu* dí ma̱ja̱nʼ ga̱jma̱a̱ riejuun naʼni jmbuu inuu náa i̱mba̱ riejun. 14 Ikhú nigíʼdúu nigiéwan columna ndrígóo riejuun guʼwá, dí mitsídánʼ naʼni 30 metro,* ga̱jma̱a̱ nigiéwan columna ndrígóo xkrugua dí wájun níjniúu dí rígá náa mbájndi rexo̱o̱ guʼwá. 15 Nigíʼdúu nigiéwan náa riejuun xkrugua asndu náa inuu pórtico, náa xkrugua dí na̱jkha̱ xígií awúún naʼni 25 metro.*

16 Náa awúu̱n xkrugua náa cuarto dí kúwá bi̱ nuñewa̱a̱n xkrugua, rígá columna ga̱jma̱a̱ náa mámbá níjniúu gíʼdoo ventana náa rawuunʼ dí na̱jkha̱ raguaja̱n. Ga̱jma̱a̱ náa awúu̱n pórtico ikhí ma̱ngaa rígá ventana náa mámbá níjniúu, náa columna kiʼniwíi palmera.

17 Nda̱wa̱á ni̱jkha̱ kañún náa rexo̱o̱ dí kidxuuʼ ga̱jma̱a̱ ndi̱yo̱o̱ dí náa nuphiʼtsu náa mbájndi rexo̱o̱ gíʼdoo piso. Náa tsu̱du̱u̱ piso rúʼko̱ rígá mbá 30 cuartos náa dí nuphiʼtsu. 18 Piso rígá náa níjniúu xkrugua, dí ma̱ja̱nʼ ikháá má xóo mbaʼ xkrugua, piso rígi̱, rígá agoo.

19 Nda̱wa̱á nigíʼdúu nigiéwan xkrugua dí rexa̱a̱ asndu náa xkrugua dí na̱jkha̱ náa rexo̱o̱ guʼwá dí awúún. Dí mbaʼ naʼni 50 metro,* dí naguanúu xígií náa nagájnuu a̱jkha̱ʼ ga̱jma̱a̱ xígií náa norte.

20 Náa rexo̱o̱ guʼwá dí kidxuuʼ gíʼdoo xkrugua dí na̱jkha̱ xígií náa norte, ikhaa nigiéwan nguáthá dí mbaʼ ga̱jma̱a̱ dí ma̱ja̱nʼ. 21 Náa mámbá níjniúu rígá ajtsú cuarto náa kúwá bi̱ nuñewa̱a̱n xkrugua. Columna ga̱jma̱a̱ pórtico, ikháá má mba̱ʼu̱ xó má dí rígá náa timbá xkrugua rí mbi̱jua̱ naʼni 25 metro ga̱jma̱a̱ dí ma̱ja̱nʼ naʼni 12 metro tikhu. 22 Ventana, pórtico ga̱jma̱a̱ xtiʼkhuu palmera dí kiʼniwíi, nindxu̱u̱ ikháá má xóo dí tima náa xkrugua dí naguanúu xígií náa nagájnuu a̱jkha̱ʼ. Xa̱bu̱ naguáʼnú ikhí, natsimún mbá juwan escalón ga̱jma̱a̱ índo̱ nakríʼíin, náa inuu gíʼ pórtico.

23 Náa rexo̱o̱ guʼwá dí awúún, rígá mbá xkrugua dí naʼni inuu náa xkrugua dí rígá xígií náa norte ga̱jma̱a̱ i̱mba̱ xkrugua naʼni inuu náa xkrugua dí gíʼma xígií náa nagájnuu a̱jkha̱ʼ. Nigiéwan náa mbá nájma̱ inuu xkrugua dí naʼni 50 metro.

24 Nda̱wa̱á ni̱jkha̱ kañún xígií náa sur ga̱jma̱a̱ ikhí ndi̱yo̱o̱ mbá xkrugua dí gíʼma ikhí, columna ga̱jma̱a̱ pórtico, ikháá má mba̱ʼu̱ xó má i̱ʼwáʼ. 25 Tima ventana náa mámbá níjniúu xkrugua ga̱jma̱a̱ náa pórtico, nindxu̱u̱ ikháá má xóo i̱ʼwáʼ ventana. Rí mbaʼ xkrugua naʼni 25 metro ga̱jma̱a̱ dí ma̱ja̱nʼ naʼni 12 metro tikhu. 26 Mu mi̱dxu̱ʼnú ikhí, mbaʼyóoʼ matatsimaaʼ mbá juwan escalón ga̱jma̱a̱ índo̱ nakráʼáán inuu gíʼ pórtico. Náa mámbá columna kiʼniwíi palmera, xúʼko̱ kaʼnii náa mámbá níjniúu.

27 Náa rexo̱o̱ guʼwá dí awúún, rígá mbá xkrugua dí na̱jkha̱ xígií náa sur, nigiéwan mbá nájma̱ xkrugua rígi̱, naʼni 50 metro. 28 Nda̱wa̱á ni̱jkha̱ kañún náa xkrugua dí gíʼma xígií náa sur, dí nato̱ʼo̱o̱ náa rexo̱o̱ guʼwá dí awúún, nigiéwan xkrugua rúʼko̱ ikháá má mbaʼ xó má i̱ʼwáʼ. 29 Cuarto náa kúwá bi̱ nuñewa̱a̱n xkrugua ga̱jma̱a̱ columna ma̱ngaa pórtico ikháá má mba̱ʼu̱ xó má i̱ʼwáʼ. Tima ventana náa mbá nájma̱ níjniúu ga̱jma̱a̱ xúʼko̱ má náa pórtico. Dí mbaʼ xkrugua naʼni 25 metro ga̱jma̱a̱ dí ma̱ja̱nʼ naʼni 12 metro tikhu. 30 Náa mbájndi rígá pórtico, dí mbaʼ naʼni 12 metro tikhu ga̱jma̱a̱ dí ma̱ja̱nʼ naʼni a̱jma̱ metro tikhu. 31 Pórtico dí rígá ikhí, naʼni inuu rexa̱a̱ ga̱jma̱a̱ ikhí rígá columnas, náa kiʼniwíi xtiʼkhu palmera, mu mi̱dxu̱ʼnú ikhí mbaʼyóoʼ matatsimaaʼ mbá migiñuʼ escalón.

32 Ni̱jkha̱ kañún náa rexo̱o̱ guʼwá dí awúún dí na̱jkha̱ xígií náa nagájnuu a̱jkha̱ʼ ga̱jma̱a̱ nigiéwan xkrugua rúʼko̱: Ikháá má mba̱a̱ xó má i̱ʼwáʼ xkrugua. 33 Cuarto náa kúwá bi̱ nuñewa̱a̱n xkrugua ga̱jma̱a̱ columna ma̱ngaa pórtico ikháá má mba̱ʼu̱ xó má i̱ʼwáʼ, tima ventana náa mbá nájma̱ níjniúu ga̱jma̱a̱ xúʼko̱ má náa pórtico ma̱ngaa. Dí mbaʼ xkrugua naʼni 25 metro ga̱jma̱a̱ dí ma̱ja̱nʼ naʼni 12 metro tikhu. 34 Pórtico dí rígá ikhí naʼni inuu rexa̱a̱ ga̱jma̱a̱ náa mbá nájma̱ níjniúu columna kiʼniwíi xtiʼkhu palmera, mu mi̱dxu̱ʼnú ikhí, ndayóoʼ matatsimaaʼ mbá migiñuʼ escalón.

35 Ikhú ni̱jkha̱ kañún náa xkrugua dí gíʼma xígií náa norte ga̱jma̱a̱ nigiéwan: Ikháá má mba̱a̱ xó má i̱ʼwáʼ xkrugua. 36 Cuarto náa kúwá bi̱ nuñewa̱a̱n xkrugua, ga̱jma̱a̱ columna ma̱ngaa pórtico ikháá má mba̱ʼu̱ xó má i̱ʼwáʼ. Náa xkrugua tima ventana náa mbá nájma̱ níjniúu. Dí mbaʼ xkrugua naʼni 25 metro ga̱jma̱a̱ dí ma̱ja̱nʼ naʼni 12 metro tikhu. 37 Columna naʼni inuu xígií náa rexa̱a̱ ga̱jma̱a̱ náa mbá nájma̱ níjniúu columna kiʼniwíi xtiʼkhuu palmera, mu mi̱dxu̱ʼnú ikhí, mbaʼyóoʼ matatsimaaʼ mbá migiñuʼ escalón.

38 Náa mijngii columna dí rígá náa xkrugua, ikhí rígá mbá cuarto náa nuphiʼtsu ga̱jma̱a̱ gíʼdoo riejuun, ikhí nujña̱a̱ tsigijñaʼ dí nakarámáʼ.

39 Náa níjniúu pórtico dí rígá náa xkrugua, wájun a̱jma̱ mesa ikhí nuradíin xujkhúʼ mu muxnajxi̱i̱n náa tsigijñaʼ dí nakarámáʼ, tsigijñaʼ ga̱jma̱a̱ numuu aʼkhá ma̱ngaa tsigijñaʼ dí nakiéʼkúún. 40 Índo̱ natatsimaaʼ mi̱dxu̱ʼ náa xkrugua dí gíʼma xígií náa norte, náa níjniúu wájun a̱jma̱ mesa ma̱ngaa rígá a̱jma̱ mesa náa imbo̱o̱ níjniúu pórtico náa gíʼma xkrugua. 41 Rígá mbá a̱jkhu̱ mesa náa mámbá níjniúu xkrugua, rí mbá xúgíʼ naʼni mbá migiñuʼ mesa, ikhí nuradíin xujkhúʼ mu muxnajxi̱i̱n tsigijñaʼ. 42 Mbá a̱jkhu̱ mesa dí najmún náa tsigijñaʼ dí nakarámáʼ niguma ga̱jma̱a̱ itsí dí niwiʼtá. Dí mbaʼ naʼni 75 centímetros* ga̱jma̱a̱ xúʼko̱ má dí ma̱ja̱nʼ ma̱ngaa, dí mitsídánʼ naʼni 50 centímetros. Náa mesa rúʼko̱ nuniña̱a̱nʼ dí najmún náa dí nuradíin ga̱jma̱a̱ xujkhúʼ mu muxnajxi̱i̱n náa tsigijñaʼ dí nakarámáʼ ga̱jma̱a̱ i̱ʼwáʼ tsigijñaʼ. 43 Náa mbájndi pared rí awúún jngútáʼa̱ náa nusnguta̱ma̱ʼ dí najmún, dí ma̱ja̱nʼ naʼni juwan centímetro* ga̱jma̱a̱ xuwiʼ rí nuxnajxi̱ náa tsigijñaʼ nugrigu náa mesa.

44 Náa níjniúu xkrugua dí gíʼma awúún rígá cuarto náa nuphiʼtsu bi̱ nuni̱ ajmúú, cuarto rígi̱, rígá náa rexo̱o̱ guʼwá dí awúún náa mijngii xkrugua dí gíʼma xígií náa norte, dí naʼni inuu xígií náa sur. Ga̱jma̱a̱ rígá i̱mba̱ cuarto dí rígá mijngii náa xkrugua dí gíʼma xígií náa nagájnuu a̱jkha̱ʼ, naʼni inuu xígií náa norte.

45 Ikhaa niʼthúnʼ: “Cuarto rígi̱ náa nuphiʼtsu, dí naʼni inuu xígií náa sur, nindxu̱u̱ náa nuphiʼtsu ndxajkun bi̱ nuñajunʼ náa guʼwá rí nduyamajkuíí Dios. 46 Cuarto náa nuphiʼtsu dí naʼni inuu xígií náa norte, náa nuphiʼtsu ndxajkun bi̱ nuñajunʼ náa najuixnájxi̱ tsigijñaʼ. Ikhiin nindxu̱ún bi̱ naguwáʼ náa Sadoc, bi̱ nindxu̱ún levitas, nindxu̱ún bi̱ nitri̱gi̱i̱n mu muxuʼmamijná náa Jeobá mu muni̱ ñajuunʼ”.

47 Nda̱wa̱á nigiéwan rexo̱o̱ guʼwá dí awúún. Nindxu̱u̱ cuadrado, dí mbaʼ naʼni 50 metro xúʼko̱ má dí ma̱ja̱nʼ ma̱ngaa. Náa najuixnájxi̱ tsigijñaʼ gíʼ náa inuu guʼwá rí nduyamajkuíí Dios.

48 Nda̱wa̱á ni̱jkha̱ kañún náa pórtico dí rígá náa guʼwá rí nduyamajkuíí Dios ma̱ngaa nigiéwan columna ndrígóo pórtico, mbá níjniúu naʼni a̱jma̱ metro tikhu ga̱jma̱a̱ xúʼko̱ má i̱mba̱ níjniúu ma̱ngaa. Dí ma̱ja̱nʼ xkrugua naʼni mbá metro tikhu* ga̱jma̱a̱ xúʼko̱ má i̱mba̱ níjniúu ma̱ngaa.

49 Dí ma̱ja̱nʼ pórtico naʼni gu̱wa̱ʼ metro* ga̱jma̱a̱ dí mbaʼ naʼni witsu metro tikhu.* Mu maguánú xa̱bu̱ ikhí natsimún mbá nguáthá escalón. Rígá columna náa mámbá níjniúu pared rí wájun.