Ezequiel

41 Ikhú ni̱jkha̱ kañún náa rí mikaʼwu* ga̱jma̱a̱ nigiéwan columna, dí ma̱ja̱nʼ náa níjniúu naʼni ajtsú metro* ga̱jma̱a̱ xúʼko̱ má náa i̱mba̱ níjniúu ma̱ngaa. 2 Dí ma̱ja̱nʼ riejun naʼni witsu metro* ga̱jma̱a̱ náa mbá nájma̱ níjniúu pared náa dí gíʼma riejun naʼni a̱jma̱ metro tikhu,* xúʼko̱ má náa i̱mba̱ níjniúu ma̱ngaa. Ikhaa nigiéwan náa rí mikaʼwu, dí mbaʼ naʼni 20 metro* ga̱jma̱a̱ dí ma̱ja̱nʼ naʼni gu̱wa̱ʼ metro.*

3 Ikhú nito̱ʼo̱o̱* ga̱jma̱a̱ nigiéwan columna, dí mi̱du̱ naʼni mbá metro,* ga̱jma̱a̱ riejun naʼni ajtsú metro dí ma̱ja̱nʼ. Pared ndrígóo guʼwá rí wájun náa riejun* naʼni ajtsú metro tikhu.* 4 Nda̱wa̱á nigiéwan cuarto dí rígá náa inuu rí mikaʼwu, naʼni gu̱wa̱ʼ metro dí mbaʼ ga̱jma̱a̱ xúʼko̱ má dí ma̱ja̱nʼ ma̱ngaa, niʼthúnʼ: “Rígi̱ nindxu̱u̱ náa dí phú Mikaʼwu”.

5 Ikhú nigiéwan pared ndrígóo guʼwá náa nduyamajkuíí Dios, naʼni ajtsú metro dí mi̱du̱, cuarto dí rígá níjniúu náa mbájndi guʼwá naʼni a̱jma̱ metro* dí ma̱ja̱nʼ. 6 Cuarto dí rígá náa níjniúu, rígá náa mbá nájtsú piso, mámbá cuarto rígá náa tsu̱du̱u̱ i̱mba̱ cuarto, mbá 30 cuarto rígá náa mámbá piso, náa pared niguanúu náa majngutaʼmáʼ ixi̱ rí mbi̱jua̱ náa cuarto dí rígá náa mbájndi níjniúu. Ikha jngóo ixi̱ mbi̱jua̱ na̱nguá juádáʼ náa pared ndrígóo guʼwá. 7 Náa mbá nájma̱ níjniúu guʼwá rí nduyamajkuíí Dios rígá escalera,* dí naʼni ma̱ja̱nʼ xóo ejkha̱ ratsimuu, smídú náa mbayííʼ, índo̱ nakráʼáan náa raga̱jma̱ piso naʼni ma̱ja̱nʼ, ga̱jma̱a̱ naʼni itháán ma̱ja̱nʼ índo̱ natsimuu náa ragajtsú piso.

8 Ndi̱yo̱o̱ mbá náa nagún kruámúnʼ náa mbájndi rawuunʼ guʼwá náa rajkhúu cuarto dí rígá náa mbájndi níjniúu asndu náa eskíniu̱u̱ dí nagún kruámúnʼ, dí ma̱ja̱nʼ naʼni xóo mbá ixi̱ rí naʼni ajtsú metro. 9 Náa pared dí kidxuuʼ cuarto dí rígá náa mbájndi guʼwá, naʼni a̱jma̱ metro tikhu dí ma̱ja̱nʼ. Náa kidxuuʼ cuarto dí rígá náa mbájndi rawuunʼ guʼwá ikhí rígá mbá náa dí paʼtati̱ga̱.*

10 Náa ta̱pho̱o̱ guʼwá náa rí nduyamajkuíí Dios ga̱jma̱a̱ náa cuarto rí nupiʼtsu, rígá mbá náa dí paʼtati̱ga̱ náa mámbá níjniúu naʼni gu̱wa̱ʼ metro dí ma̱ja̱nʼ. 11 Xígií náa norte, rígá mbá riejun náa ta̱pho̱o̱ cuarto dí rígá níjniúu, ga̱jma̱a̱ ikhí rígá mbá náa dí paʼtati̱ga̱, ma̱ngaa rígá mbá riejun náa níjniúu xígií náa sur. Náa dí paʼtati̱ga̱ naʼni a̱jma̱ metro tikhu rí ma̱ja̱nʼ náa mbájndi rawuunʼ guʼwá náa nagún kruámúnʼ.

12 Guʼwá dí kri̱ga̱ kidxuuʼ xígií náa narámaaʼ a̱jkha̱ʼ,* dí rígá náa inuu náa dí paʼtati̱ga̱, naʼni 36 metro* dí ma̱ja̱nʼ ga̱jma̱a̱ dí mbaʼ naʼni 46 metro,* pared ndrígóo guʼwá naʼni a̱jma̱ metro tikhu dí mi̱du̱ náa mbájndi.

13 Nigiéwan guʼwá náa rí nduyamajkuíí Dios, naʼni 50 metro* dí mbaʼ. Náa dí paʼtati̱ga̱, náa guʼwá dí kri̱ga̱* ga̱jma̱a̱ pared ndrígóo guʼwá naʼni 50 metro dí mbaʼ. 14 Náa inuu guʼwá rí nduyamajkuíí Dios dí rígá xígií náa nagájnuu a̱jkha̱ʼ,* ma̱ngaa náa dí paʼtati̱ga̱ naʼni 50 metro dí ma̱ja̱nʼ.

15 Ikhaa nigiéwan guʼwá dí mbaʼ dí kri̱ga̱ náa dí paʼtati̱ga̱, dí mbá xúgíʼ asndu mbá nájma̱ rawuunʼ guʼwá náa nagún xa̱bu̱ naʼni 50 metro.

Ma̱ngaa nigiéwan náa rí mikaʼwu ga̱jma̱a̱ náa rí phú mikaʼwu, ma̱ngaa náa pórtico* dí gíʼ náa rexo̱o̱. 16 Xúʼko̱ má riejun ga̱jma̱a̱ ventánúu guʼwá dí gíʼdoo rawuunʼ dí na̱jkha̱ ragua̱ja̱n, ma̱ngaa náa nagún ga̱jma̱a̱ xa̱bu̱ dí rígá náa mbá nájtsú cuarto. Náa mijngii riejun nigúgoo ga̱jma̱a̱ ixi̱, nagi̱ʼdu̱u̱ mbayííʼ asndu náa tima ventana ga̱jma̱a̱ rígá dí kúgoo ga̱jma̱a̱ ventana. 17 Nixtagiéwan náa tsu̱du̱u̱ riejun, náa awúún ga̱jma̱a̱ náa kidxuuʼ guʼwá rí nduyamajkuíí Dios ga̱jma̱a̱ náa mbájndi pared. 18 Kiʼniwíin querubín ma̱ngaa palmera, rígá mámbá palmera náa majñu̱únʼ a̱jmi̱i̱n querubín ga̱jma̱a̱ mámbáa querubín gíʼdoo a̱jma̱ inuu. 19 Inuu xa̱bu̱ nayejxi̱ náa palmera dí wíji̱ níjniúu, ga̱jma̱a̱ inuu león* nayejxi̱ náa palmera dí wíji̱ náa i̱mba̱ níjniúu, mbá xúgíʼ rígi̱ kiʼniwíi náa mbájndi guʼwá rí nduyamajkuíí Dios. 20 Náa pared ndrígóo cuarto náa rí mikaʼwu, nagi̱ʼdu̱u̱ mbayííʼ asndu náa tsu̱du̱u̱ riejun, kiʼniwíin querubín ga̱jma̱a̱ palmera.

21 Xi̱gu̱u̱ xkrugoo guʼwá náa rí nduyamajkuíí Dios nindxu̱u̱ cuadrado. Náa inuu rí mikaʼwu rígá mbá 22 náa nakarámáʼ rí ndataun dí niguma ga̱jma̱a̱ ixi̱, dí naʼni mbá metro tikhu* dí mitsídánʼ ga̱jma̱a̱ naʼni mbá metro dí mbaʼ, náa mámbá eskíniu̱u̱ gíʼdoo rajkhúu, dí mbayííʼ ga̱jma̱a̱ dí níjniúu niguma ga̱jma̱a̱ ixi̱. Ikhú ikhaa niʼthúnʼ: “Mesa rígi̱ dí wíji̱ náa inuu Jeobá”.

23 Xó má náa rí mikaʼwu ga̱jma̱a̱ náa rí phú mikaʼwu, rígá xkrugua dí a̱jma̱ nambaʼtoo. 24 Xkrugua nawiʼtáa a̱jma̱, xúʼko̱ kaʼnii mbá nájma̱ xkrugua. 25 Kiʼniwíin querubín ga̱jma̱a̱ palmera náa xkrugoo guʼwá náa rí nduyamajkuíí Dios, xúʼko̱ má náa pared ndrígóo. Ma̱ngaa pórtico gíʼdoo rawuunʼ* dí niguma ga̱jma̱a̱ ixi̱ dí gíʼma rexa̱a̱. 26 Ma̱ngaa rígá ventánúu guʼwá rí gíʼdoo rawuunʼ dí na̱jkha̱ ragua̱ja̱n ga̱jma̱a̱ kiʼniwíi palmera náa mbá nájma̱ níjniúu pórtico, ga̱jma̱a̱ xúʼko̱ má náa mbá xúgíʼ cuarto dí rígá níjniúu náa guʼwá rí nduyamajkuíí Dios ga̱jma̱a̱ náa rawuunʼ guʼwá.