Ezequiel

42 Ikhú niríñu̱u̱nʼ náa kidxuuʼ guʼwá dí rígá xígií náa norte, ga̱jma̱a̱ ni̱jkha̱ kañún náa i̱mba̱ guʼwá náa rígá cuarto rí nuphiʼtsu dí rígá náa paʼtati̱ga̱, náa níjniúu guʼwá dí rígá xígií náa norte. 2 Dí nagi̱ʼdu̱u̱ náa riejun dí gíʼma xígií náa norte, dí mbaʼ naʼni 50 metro* ga̱jma̱a̱ dí ma̱ja̱nʼ naʼni 25 metro.* 3 Guʼwá rígi̱ rígá náa rexo̱o̱ guʼwá dí awúún, dí ma̱ja̱nʼ naʼni gu̱wa̱ʼ metro,* ga̱jma̱a̱ náa tsu̱du̱u̱ piso dí rígá náa rexo̱o̱ guʼwá. Ikhí ma̱ngaa rígá guʼwá dí gíʼdoo mbá ajtsú piso dí gíʼdoo náa nagún kruámúnʼ ga̱jma̱a̱, tri̱ga̱ náa mámbá ridoo. 4 Náa ta̱pho̱o̱ cuarto dí nuphiʼtsu rígá mbá náa nagún ga̱jma̱a̱ dí naʼni witsu metro* dí ma̱ja̱nʼ ga̱jma̱a̱ naʼni 50 metro* rí mbaʼ, riejuun naʼni inuu xígií náa norte. 5 Náa cuarto dí nuphiʼtsu dí rígá rijma̱a̱ na̱nguá ma̱ja̱nʼ ki xóo dí rígá agoo ga̱jma̱a̱ dí ta̱pho̱o̱, numuu dí itháan ma̱ja̱nʼ náa dí nagún kruámúnʼ ga̱jma̱a̱. 6 Maski ajndu gíʼdoo ajtsú piso, mú na̱nguá gíʼdoo rajkhúu xóo dí gíʼdoo náa rexo̱o̱. Ikha jngóo dí náa iwáá piso na̱nguá ma̱ja̱nʼ ki xóo piso dí rígá ta̱pha̱ ga̱jma̱a̱ náa piso dí mbayííʼ.

7 Náa mijngii cuarto dí nuphiʼtsu dí rígá náa rexo̱o̱ guʼwá ga̱jma̱a̱ náa ridoo náa dí tri̱ga̱ i̱ʼwáʼ cuarto dí nuphiʼtsu, ikhí rígá mbá xtájtsí dí niguma ga̱jma̱a̱ itsí, dí mbaʼ naʼni 25 metro. 8 Cuarto náa dí nuphiʼtsu dí rígá náa rexo̱o̱ guʼwá dí mbaʼ naʼni 25 metro, mú dí tri̱ga̱ mijngii náa gíʼ guʼwá dí nduyamajkuíí Dios naʼni 50 metro dí mbaʼ. 9 Riejun dí natu̱ʼu̱u̱n ga̱jma̱a̱ náa cuarto dí nuphiʼtsu gíʼma xígií náa nagájnuu a̱jkha̱ʼ* náa rexo̱o̱ guʼwá.

10 Ma̱ngaa náa awúu̱n xtájtsí dí niguma ga̱jma̱a̱ itsí dí rígá náa rexo̱o̱ guʼwá, ikhí ma̱ngaa rígá cuarto náa nuphiʼtsu dí naʼni inuu xígií náa nagájnuu a̱jkha̱ʼ, náa mijngii paʼtati̱ga̱ ga̱jma̱a̱ náa gíʼ guʼwá. 11 Náa ta̱pho̱o̱ cuarto dí nuphiʼtsu rígá mbá náa dí nanújngúún ga̱jma̱a̱, nindxu̱u̱ ikháá má dí xóo rígá náa norte. Ikháá má dí mbaʼ ga̱jma̱a̱ dí ma̱ja̱nʼ, mbrígúú má nindxu̱u̱ náa dí nagájni̱ín ga̱jma̱a̱ ma̱ngaa mbóó xóo niguma. Riejuun xkrugoo guʼwá náa nuphiʼtsu dí rígá xígií náa norte 12 nindxu̱u̱ ikháá má xóo riejuun cuarto náa nuphiʼtsu dí rígá xígií náa sur. Náa dí nagún ga̱jma̱a̱ ikhí gíʼma mbá riejuun, dí rígá náa ridoo xtájtsí dí niguma ga̱jma̱a̱ itsí dí rígá xígií náa nagájnuu a̱jkha̱ʼ náa dí ma̱ndoo mata̱ʼa̱a̱ʼ.

13 Nda̱wa̱á ikhaa niʼthúnʼ: “Cuarto náa nuphiʼtsu dí rígá xígií náa norte ga̱jma̱a̱ dí rígá xígií náa sur dí rígá náa paʼtati̱ga̱, nindxu̱u̱ cuarto náa nuphiʼtsu dí nindxu̱u̱ mikaʼwu, ikhí ndxajkun bi̱ nuxuʼmamijná muni̱ ñajuunʼ Jeobá naʼphu̱ tsigijñaʼ dí mikaʼwu. Ikhí nundra̱ma̱ʼ tsigijñaʼ dí mikaʼwu, tsigijñaʼ rí tsígáʼ, tsigijñaʼ ga̱jma̱a̱ numuu aʼkhá ma̱ngaa tsigijñaʼ ga̱jma̱a̱ numuu rí nakiéʼkúún, numuu dí ikhí nindxu̱u̱ mikaʼwu. 14 Índo̱ ndxajkun gátu̱ʼu̱u̱n ikhí, xáʼyóoʼ magajníín náa dí mikaʼwu á mu dí kugíʼ xtíin dí nuñejunʼ ga̱jma̱a̱, numuu dí nindxu̱u̱ mikaʼwu. Ndayóoʼ muriʼkhu̱u̱ xtíñún mu magajnáán rexa̱a̱ náa kúwá xa̱bu̱”.

15 Índo̱ niguámbóo nigiéwan náa rígá guʼwá dí awúún, ni̱jkha̱ kañún rexa̱a̱ náa gíʼma xkrugua dí naʼni inuu xígií náa nagájnuu a̱jkha̱ʼ ga̱jma̱a̱ nigiéwan mbá xúgíʼ ikhí.

16 Nigiéwan níjniúu xígií náa nagájnuu a̱jkha̱ʼ ga̱jma̱a̱ ixi̱ dí nugiewan ga̱jma̱a̱,* ikhí naʼni 500 ixi̱, nigiéwan náa nagi̱ʼdu̱u̱ eskíniu̱u̱ asndu náa i̱mba̱ eskíniu̱u̱.

17 Nigiéwan níjniúu xígií náa norte: Naʼni 500 ixi̱.

18 Nigiéwan níjniúu xígií náa sur: Naʼni 500 ixi̱.

19 Nitanga̱yi̱i̱ mu magiéwan níjniúu xígií náa narámaaʼ a̱jkha̱ʼ.* Naʼni 500 ixi̱.

20 Nigiéwan náa mbá nájkhu̱ níjniúu. Náa mbá tuaʼáan rígá mbá xtájtsí, naʼni 500 ixi̱ dí mbaʼ ga̱jma̱a̱ xúʼko̱ má dí ma̱ja̱nʼ, mu marui̱ʼta̱a̱ náa dí mikaʼwu ga̱jma̱a̱ náa dí na̱nguá mikaʼwu.