Ezequiel

46 “Rígi̱ dí naʼthí Tátá Jeobá bi̱ itháán mba̱a̱: ‹Xkrugua dí gíʼma náa rexo̱o̱ guʼwá dí awúún, dí naʼni inuu xígií náa nagájnuu a̱jkha̱ʼ* gíʼmaa magugóo náa mbá majun mbiʼi dí nuñajunʼ, mú gíʼmaa mambaʼtoo sábado ga̱jma̱a̱ mbiʼi dí nagi̱ʼi̱ gu̱nʼ rudiiʼ. 2 Bi̱ kayá edxu̱u̱ mato̱ʼo̱o̱ náa xkrugoo pórtico* dí gíʼma kidxuuʼ ga̱jma̱a̱ mawi̱ji̱ náa xi̱gu̱u̱ xkrugua. Ndxajkun muxnajxi̱ tsigijñaʼ dí nakarámáʼ ga̱jma̱a̱ tsigijñaʼ dí tsímáá* ndrígóo bi̱ kayá edxu̱u̱, ikhaa masmbáti̱go̱o̱ náa riejuun xkrugua ga̱jma̱a̱ ikhú magajnáa. Mú, xkrugua gíʼmaa mambaʼtoo má xúʼko̱ asndu wakhííʼ. 3 Xa̱bu̱ xuajin mangiin musmbati̱gu̱u̱n náa inuu Jeobá, náa riejuun xkrugua dí mbiʼi sábado ga̱jma̱a̱ índo̱ nagi̱ʼi̱ gu̱nʼ rudiiʼ.

4 Tsigijñaʼ gamajkhu dí nakarámáʼ dí bi̱ kayá edxu̱u̱ maxnájxi̱ náa inuu Jeobá dí mbiʼi sábado, gíʼmaa maʼni mbá majuiin mugu̱ bi̱ míjíinʼ ga̱jma̱a̱ mbáa mugu̱ e̱jmba̱a̱. 5 Tsigijñaʼ dí tsígáʼ gíʼmaa maʼni mbá efá* índo̱ gáxnájxi̱i̱ mugu̱ e̱jmba̱a̱ ga̱jma̱a̱ índo̱ gáxnájxi̱i̱n mugu̱, gáxná rí gáʼngo̱o̱ má, ma̱ngaa gíʼmaa maʼni mbá ajtsú litro tikhu* aceite dí mámbá efá. 6 Mbiʼi dí nagi̱ʼi̱ gu̱nʼ rudiiʼ, náa tsigijñaʼ gíʼmaa mixnájxi̱i̱ mbáa a̱ʼdá xédí bi̱ májáanʼ, ga̱jma̱a̱ majuiin mugu̱ ga̱jma̱a̱ mbáa mugu̱ e̱jmba̱a̱ gíʼmaa maʼni míjíinʼ. 7 Índo̱ gáxnájxi̱ xóo tsigijñaʼ rí tsígáʼ, gaxnájxi̱ mbá efá dí mbáa a̱ʼdá xédí, índo̱ gáxnájxi̱i̱ mugu̱ e̱jmba̱a̱ gaxná mbá efá ga̱jma̱a̱ índo̱ gáxnájxi̱i̱n mugu̱ gaxná rí gáʼngo̱o̱ má maxná. Ma̱ngaa gaxná mbá ajtsú litro tikhu aceite dí mámbá efá.

8 Índo̱ bi̱ kayá edxu̱u̱ gáto̱ʼo̱o̱, gíʼmaa mato̱ʼo̱o̱ náa pórtico dí gíʼma náa riejuun, ga̱jma̱a̱ índo̱ gágájnáa magajnáa má náa nito̱ʼo̱o̱ ga̱jma̱a̱. 9 Índo̱ xa̱bu̱ xuajin gátu̱ʼu̱u̱n náa inuu Jeobá mu mbuyamajkuíí índo̱ gárígá ndxa̱a̱, bi̱ gátu̱ʼu̱u̱n náa xkrugua dí gíʼmaa xígií náa norte magajníín náa xkrugua dí gíʼma xígií náa sur, ga̱jma̱a̱ bi̱ gátu̱ʼu̱u̱n náa xkrugua dí gíʼma xígií náa sur magajníín náa xkrugua dí gíʼma xígií náa norte. Nimbáa xágájnáa náa xkrugua dí náa má nito̱ʼo̱o̱, xúgíinʼ magajníín náa imbo̱o̱ xkrugua. 10 Bi̱ kayá edxu̱u̱ bi̱ xtáa náa majñu̱únʼ ikhiin, gato̱ʼo̱o̱ índo̱ ikhiin gátu̱ʼu̱u̱n ga̱jma̱a̱ gagajnáa índo̱ ikhiin gágájna̱án. 11 Mbiʼi dí nagumariya̱a̱ʼ ndxa̱a̱ dí mba̱ʼu̱ ga̱jma̱a̱ i̱ʼwáʼ ndxa̱a̱, índo̱ gáxnájxi̱ tsigijñaʼ rí tsígáʼ, gaxnájxi̱ mbá efá dí mbáa a̱ʼdá xédí, índo̱ gáxnájxi̱i̱ mugu̱ e̱jmba̱a̱ gíʼmaa maʼni mbá efá, ga̱jma̱a̱ índo̱ gáxnájxi̱i̱n eʼwíinʼ mugu̱, gáxná má rí gáʼngo̱o̱, ma̱ngaa gíʼmaa maʼni mbá ajtsú litro tikhu aceite dí mámbá efá.

12 Á mu bi̱ kayá edxu̱u̱ maxná tsigijñaʼ dí nakarámáʼ o tsigijñaʼ dí tsímáá xóo tsigijñaʼ rí maxnúu Jeobá, gíʼmaa mambaʼtoo xkrugua dí gíʼma xígií náa nagájnuu a̱jkha̱ʼ mu mato̱ʼo̱o̱, ikhaa maxná tsigijñaʼ dí nakarámáʼ ga̱jma̱a̱ tsigijñaʼ dí tsímáá xó má naʼni mbiʼi sábado. Nda̱wa̱á índo̱ ikhaa gágájnáa gíʼmaa maguguáa xkrugua.

13 Mámbá mbiʼi gíʼmaa maraxnajxíi mbáa mugu̱ bi̱ májáanʼ bi̱ niʼni mbá tsiguuʼ xóo tsigijñaʼ gamajkhu dí nakarámáʼ náa inuu Jeobá. Xígi̱ kaʼnii gíʼmaa matani̱ mámbá miʼcha̱. 14 Ma̱ngaa mámbá miʼcha̱ maraxna̱ rígi̱ xóo tsigijñaʼ rí tsígáʼ: Mbá sexta parte dí mbá efá ga̱jma̱a̱ nújngoó dí mbá litro aceite mu muxijyááʼ ga̱jma̱a̱ harina dí itháán májánʼ. Xígi̱ kaʼnii gájuixnájxi̱ tsigijñaʼ rí tsígáʼ náa inuu Jeobá, rígi̱ nindxu̱u̱ mbá kiʼtáñajunʼ dí mbajyúuʼ mba̱yu̱u̱ʼ. 15 Mugu̱, tsigijñaʼ dí tsígáʼ ga̱jma̱a̱ aceite mixná mambá miʼcha̱ xóo tsigijñaʼ dí nakarámáʼ›.

16 Rígi̱ dí naʼthí Tátá Jeobá bi̱ itháán mba̱a̱: ‹Á mu bi̱ kayá edxu̱u̱ naxnún e̱ji̱i̱n mbá regalo xóo herencia, rígi̱ maʼni ndrígu̱ún e̱ji̱i̱n. Herencia dí gúndrigúu mani̱ndxu̱u̱ ndrígu̱ún ikhiin. 17 Mú á mu naxnúu mbá chíʼgíiʼ* herencia xóo mbá regalo mbáa bi̱ nindxu̱u̱ xa̱bi̱i̱, mani̱ndxu̱u̱ ndrígóo ikhaa asndu índo̱ gáʼga̱nú tsiguʼ dí maguma kríya̱a̱ʼ,* ga̱jma̱a̱ ikhú matanga̱a̱ mani̱ndxu̱u̱ ndrígóo bi̱ kayá edxu̱u̱ mbu̱júu̱. Herencia dí nindrigúu e̱ji̱i̱n mani̱ndxu̱u̱ má xúʼko̱ ndrígu̱ún ikhiin. 18 Bi̱ kayá edxu̱u̱ ragíʼmaa marígú káñún’ xa̱bu̱ xuajin nimbá herencia dí nindrigúu rí matsudiin magajnún náa mbañúúnʼ. Herencia dí maxnún e̱ji̱i̱n maxnún mbayuuʼ ikhaa, mu xúʼko̱ nimbáa xa̱bu̱ xuajñunʼ xájuaxkriya̱a̱ʼ náa ku̱bo̱o̱ʼ›”.

19 Nda̱wa̱á xa̱biya̱ ni̱jkha̱ kañún náa riejuun dí naguanúu náa níjniúu xkrugua dí náa natu̱ʼu̱u̱n ga̱jma̱a̱, náa cuarto dí kaʼwu náa nuphiʼtsu ndxajkun, rí naʼni inuu xígií náa norte, ga̱jma̱a̱ ikhí ndi̱yo̱o̱ mbá náa kidxuuʼ náa narámaaʼ a̱jkha̱ʼ.* 20 Niʼthúnʼ: “Gi̱i̱ nindxu̱u̱ náa ndxajkun mbuji̱i̱ tsigijñaʼ ga̱jma̱a̱ numuu rí nikiéʼkhúún, ma̱ngaa tsigijñaʼ ga̱jma̱a̱ numuu aʼkhá ga̱jma̱a̱ náa muxumbu̱ʼ tsigijñaʼ rí tsígáʼ, mu xúʼko̱ xúri̱ya̱ʼ nimbá rexa̱a̱ ga̱jma̱a̱ xúni̱ rí xa̱bu̱ maʼni mikaʼwiin”.

21 Ikhaa niríñu̱u̱nʼ náa rexo̱o̱ guʼwá dí kidxuuʼ ga̱jma̱a̱ ni̱jkha̱ kañún náa mbá nájkhu̱ eskíniu̱u̱ rexo̱o̱ guʼwá ga̱jma̱a̱ ndi̱yo̱o̱ dí gíʼdoo mbá cuarto náa mbá a̱jkhu̱ eskíniu̱u̱. 22 Náa mbá nájkhu̱ eskíniu̱u̱ rígá cuarto, dí mbaʼ naʼni 20 metro* ga̱jma̱a̱ dí ma̱ja̱nʼ naʼni 15 metro,* mbá nájkhu̱ cuarto ikháá má mba̱ʼu̱.* 23 Náa mbájndi awúu̱n cuarto rígá banco dí niguma ga̱jma̱a̱ itsí, ga̱jma̱a̱ mbayííʼ náa mijngii banco rígá náa ma̱ndoo mbuji̱i̱ tsigijñaʼ. 24 Ikhú ikhaa niʼthúnʼ: “Rígi̱ nindxu̱u̱ cuarto náa nduji̱i̱ tsigijñaʼ ndrígu̱ún xa̱bu̱ xuajin, bi̱ nuñajunʼ náa guʼwá rí nduyamajkuíí Dios”.