Ezequiel

6 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, atanga̱án matiejxi̱ náa kúbá dí rígá náa Israel ga̱jma̱a̱ aratáríya̱ʼ dí magíʼnuu. 3 Gíʼmaa dí marata̱: ‹Kúbá dí rígá náa Israel, gudxawíínla ajngóo Tátá Jeobá bi̱ itháán mba̱a̱. Rígi̱ dí Tátá Jeobá bi̱ itháán mba̱a̱ naʼthúún kúbá, bíjní, iyaʼ dí gíʼdoo jxu̱u̱ʼ ga̱jma̱a̱ mata:* “¡Gu̱ya̱a̱la! Makuʼmá mbá espada náa ikháanʼla ga̱jma̱a̱ ma̱ni̱ gámbáa mbá xúgíʼ náa rí mitsídánʼ. 4 Majmigu̱u̱ náa nuxnajxí tsigijñaʼ ndrígala, maguma gámbáa náa nutsikarámáʼ rí ndataun, bi̱ gákháñún náa ikháanʼ madi̱i̱nʼ náa inún xándiala bi̱ xkawi̱i̱nʼ.* 5 Xa̱bu̱ xuajin Israel bi̱ gákháñún madi̱i̱nʼ náa inún xándiala bi̱ xkawi̱i̱nʼ ga̱jma̱a̱ maxidíí i̱tsu̱ún náa mbájndi rí nuxnajxí tsigijñaʼ. 6 Náa mbá xúgíʼ dí kuwáanʼla ga̱jma̱a̱ xúgíʼ xuajin maguma gámbáa, ma̱ngaa náa rí mitsídánʼ majmigu̱u̱ ga̱jma̱a̱ maguma gámbáa. Náa dí nuxnajxí tsigijñaʼ maguma gámbáa ga̱jma̱a̱ majmigu̱u̱, xándiala bi̱ xkawi̱i̱nʼ maguma gámbíin, náa nutsikarámáʼ rí ndataun maguma gámbáa ga̱jma̱a̱ xúgíʼ rí nuni̱ majngudi̱i̱. 7 Makhañún xa̱bu̱ náa majñala, ga̱jma̱a̱ ikháanʼla mbu̱ya̱a̱ dí ikhúún nindxu̱ʼ Jeobá.

8 Mú maniʼñúúnʼ mbá nguéjmi̱i̱n, numuu dí tikhuáanʼ dí ikháanʼla makáwáanʼ náa espada índo̱ gákuwáanʼla náa majñu̱únʼ xa̱bu̱ xuajin, náa gájuadráʼáanʼla. 9 Bi̱ gákáwíin marmáʼáan a̱jkiu̱ún kuyoʼ índo̱ gákúwíin náa majñu̱únʼ xa̱bu̱ xuajin náa ni̱jkha̱ kiʼdiin. Maguánú mbuyáá dí nini̱ magawúnʼ índo̱ ikhiin táguájun jmbu ga̱jma̱a̱ nini̱ tsíngumijná náa ikhúún, ma̱ngaa dí ra̱ʼkhá tháán nigua̱ʼa̱ rí mbuyamajkún* xándú bi̱ xkawi̱i̱nʼ. Mati̱ñu̱u̱nʼ ga̱jma̱a̱ mawiñu̱u̱nʼ gáʼni mbá xúgíʼ dí ra̱májánʼ ga̱jma̱a̱ rí tsaga dí nini̱. 10 Ikhiin maguánú mbuyáá rí ikhúún nindxu̱ʼ Jeobá, índo̱ ninimiñún dí makuʼmá gamiéjunʼ náa inún, nindxu̱u̱ gajkhun dí ni̱thu̱u̱n”›.

11 Rígi̱ dí naʼthí Tátá Jeobá bi̱ itháán mba̱a̱: ‹Araxnáá ñawáanʼ ga̱jma̱a̱ atajngúpri̱ga̱ mbayííʼ, agáwíinʼ a̱jkia̱a̱nʼ gáʼni mbá xúgíʼ dí xkawiʼ ma̱ngaa dí tsaga dí nini̱ bi̱ kúwá náa goʼwóo Israel, numuu dí makhañún ga̱jma̱a̱ espada, ewiʼ ga̱jma̱a̱ nandii. 12 Bi̱ xtáa mitsínguánʼ makhañúu ga̱jma̱a̱ nandii, bi̱ xtáa mijngii makhañúu ga̱jma̱a̱ espada, ga̱jma̱a̱ mbá xúgíinʼ bi̱ gákáwíin makhañún ga̱jma̱a̱ ewiʼ. Makuʼmá rí nakásngañu̱ʼ náa ikhiin. 13 Ikháanʼla mu̱ʼgua̱nú mbu̱ya̱a̱ dí ikhúún nindxu̱ʼ Jeobá índo̱ gúya̱a̱ rí bi̱ gákháñún náa ikháanʼla jngútigi̱i̱n náa inún xándiala bi̱ xkawi̱i̱nʼ, náa mbájndi rí nuxnajxí tsigijñaʼ, náa mbá xúgíʼ bíjní rí mitsídánʼ, náa mbá xúgíʼ inuu kúbá, náa agoo mbá xúgíʼ ixi̱ mba̱ʼu̱ rí maxaʼ ga̱jma̱a̱ náa agoo ñawúunʼ ixi̱ mba̱ʼu̱ náa dí ikháanʼ nuxnajxí tsigijñaʼ rí ndataun mu mu̱ni̱ dí xákiʼníin xándiala bi̱ xkawi̱i̱nʼ. 14 Makruíya̱ʼ ñawúnʼ náa ikhiin mu ma̱ni̱ ngíníi, ma̱ni̱ dí ku̱ba̱ʼ maguanáa, náa mbá xúgíʼ ku̱ba̱ʼ dí kúwíin maguaná jchíi itháan ki xóo ku̱ba̱ʼ mijxooʼ* dí rígá náa mijngii Diblá. Maguánú mbuyáá dí ikhúún nindxu̱ʼ Jeobá›”.