Ezequiel

10 Índo̱ xtáá rayejxi̱, ndi̱yo̱o̱ mbá dí xóo itsí zafiro kaʼnii dí rígá náa tsu̱du̱u̱ edxu̱ún querubines, náa tsu̱du̱u̱ piso dí kaʼmáʼ náa tsu̱du̱u̱ edxu̱ún, nakujmaa dí nindxu̱u̱ xóo xílí* náa nutañajunʼ. 2 Ikhú ikhaa* niʼthúu̱n xa̱biya̱ bi̱ kagíʼ xtíin lino: “Ata̱ʼa̱a̱ʼ náa llanta dí xóo ajua̱nʼ kaʼnii, náa agoo wájun querubín, ada chámbuʼ dí nakha dí matrawíi náa majñu̱únʼ querubines ga̱jma̱a̱ atada̱ʼ náa xuajin”. Índo̱ ikhúún xtáá ra̱yo̱o̱, ikhaa nito̱ʼo̱o̱.

3 Querubines wájun náa níjñú mújúunʼ guʼwá, índo̱ xa̱biya̱ nito̱ʼo̱o̱ ga̱jma̱a̱ du̱u̱n nijnííʼ náa rexo̱o̱ guʼwá rí awúún. 4 Ga̱jma̱a̱ aguʼ ndrígóo Jeobá dí naxpíbínʼ nitu̱jxu̱u̱ asndu náa wájun querubines asndu náa riejuun xkrugoo guʼwá, ga̱jma̱a̱ náa guʼwá ni̱jkha̱ rajnííʼ du̱u̱n, ga̱jma̱a̱ náa rexo̱o̱ nijnííʼ agiuuʼ Jeobá rí naxpíbínʼ. 5 Aʼwóo xpíjpiúún querubines, nawáán asndu náa rexo̱o̱ dí kidxuuʼ, xóo aʼwóo Dios bi̱ gíʼdoo xúgíʼ tsiaki̱i̱ índo̱ naʼthí.

6 Ikhú ikhaa niʼtáñajuunʼ maʼni xa̱biya̱ bi̱ kagíʼ xtíin lino: “Ayá aguʼ dí rígá náa majñu̱u̱ʼ llanta dí xóo ajua̱nʼ kaʼnii dí rígá náa majñu̱únʼ querubines”. Ga̱jma̱a̱ ikhaa nito̱ʼo̱o̱ ga̱jma̱a̱ niwi̱ji̱ náa níjniúu mbá llanta dí xóo ajua̱nʼ kaʼnii. 7 Nda̱wa̱á, mbáa querubín nikruiyaʼ ñawúunʼ náa aguʼ dí rígá náa majñu̱únʼ querubines. Ndiyá mbá chíʼgíiʼ* ga̱jma̱a̱ nigrígu náa ñawúunʼ xa̱biya̱ bi̱ kagíʼ xtíin lino. Ikhaa ndiyá ga̱jma̱a̱ nigájnáa ikhí. 8 Náa agoo xpíjpiúún querubines, rígá mbá dí nakujmaa xóo ñawúunʼ xa̱bu̱ kaʼnii.

9 Índo̱ xtáá rayejxi̱, ndi̱yo̱o̱ mbá a̱jkhu̱ dí xóo llanta ajua̱nʼ kaʼnii, náa mámbá níjñún querubines, mámbá dí xóo llanta kaʼnii rígá náa níjniúu mámbáa querubín, ga̱jma̱a̱ llanta nambiʼi xóo crisólito. 10 Dí xóo niguma, mbá nájkhu̱ mbríguu, nindxu̱u̱ asndu xóo dí náa awúu̱n llanta rígi̱, gídáʼ i̱mba̱ llanta. 11 Índo̱ nagún, ma̱ndoo magún asndu náá má rí mbá nájkhu̱ níjniúu ga̱jma̱a̱ tséngutuíʼíin índo̱ nagún, numuu rí nagún náa naʼni jmbuu inún querubines. 12 Mbá kañiiʼ xuñúnʼ querubines, tsu̱du̱ún, ñawúúnʼ ga̱jma̱a̱ náa xpíjpiúún guáʼdáá idún, ga̱jma̱a̱ mbá nájkui̱i̱n querubines, náa níjñún guáʼdáá llántóo xúʼko̱ má mbá nájkhu̱ tima iduu. 13 Náa llanta dí xóo ajua̱nʼ kaʼnii, ikhí nidxawuun mbá aʼwá gakhi̱i̱ dí niʼthí: “¡Gajngutuáʼáanla!”.

14 Mámbáa* gíʼdoo a̱jkhu̱ inuu. Timbá inuu, nindxu̱u̱ inuu mbáa querubín, dí maʼni a̱jma̱ inuu nindxu̱u̱ inuu mbáa xa̱biya̱, dí maʼni ajtsú inuu nindxu̱u̱ inuu mbáa león, ga̱jma̱a̱ dí maʼni a̱jkhu̱ inuu nindxu̱u̱ inuu mbáa bi̱yú.

15 Querubines natujxu̱u̱n, nindxu̱ún ikhiin má ángeles bi̱ ndi̱ñu̱u̱n náa mijngii rawuunʼ mañu Kebar, 16 índo̱ querubines nagún, llanta na̱jkha̱ náa nagún, ga̱jma̱a̱ índo̱ querubines nuxujxi̱ xpíjpiúún mu magún rijma̱a̱, llanta asndu tséjngutuáʼáan mu maʼga níjní ni má tséʼni tsínguminaʼ náa níjñún. 17 Índo̱ ikhiin naguájun, llanta ma̱ngaa naguájun, ga̱jma̱a̱ índo̱ ikhiin natujxu̱u̱n llanta natu̱jxu̱u̱ ma̱ngaa, numuu dí tsiaki̱i̱ ndrígóo Dios dí rígá náa ángeles* rígá náa llanta ma̱ngaa.

18 Ikhú aguʼ rí naxpíbínʼ ndrígóo Jeobá, ni̱jkha̱ kruámuuʼ náa tsu̱du̱u̱ riejuun xkrugoo guʼwá ga̱jma̱a̱ niwi̱ji̱ náa tsu̱du̱ún querubines. 19 Querubines nixujxi̱ xpíjpiúún ga̱jma̱a̱ nitujxu̱u̱n nigún rijma̱a̱, índo̱ ikhúún xtáá rayejxi̱. Llanta ma̱ngaa dí rígá náa níjñún ni̱jkha̱. Niguájun náa riejuun xkrugoo guʼwá rí naguanúu xígií náa nagájnuu a̱jkha̱ʼ* náa goʼwóo Jeobá, ga̱jma̱a̱ agiuuʼ Dios ndrígóo Israel rígá náa ikhiin.

20 Bugi̱ nindxu̱ún ángeles bi̱ ikhúún ndi̱ñu̱u̱n, náa agoo xíliu̱u̱ Dios ndrígóo Israel náa mijngii rawuunʼ mañu Kebar, xúʼko̱ ni̱jkhánú ndi̱yo̱o̱ dí ikhiin nindxu̱ún querubines. 21 Mbá nájkui̱i̱n guáʼdáá a̱jkhu̱ inún ga̱jma̱a̱ a̱jkhu̱ xpíjpiúún, ma̱ngaa náa agoo xpíjpiúún rígá mbá dí xóo ñawúunʼ xa̱bu̱ kaʼnii. 22 Ma̱ngaa inún nindxu̱u̱ ikháá má xóo inún bi̱ ndi̱ñu̱u̱n náa mijngii rawuunʼ mañu Kebar. Mámbáa na̱jkha̱ mbájmbu.