Ezequiel

16 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, atani̱ mbuyáá xa̱bu̱ Jerusalén xúgíʼ rí xkawiʼ rí nuni̱. 3 Marata̱: ‹Rígi̱ dí Tátá Jeobá bi̱ itháán mba̱a̱ naʼthúu̱n Jerusalén: “Na̱dxa̱ʼ náa ku̱bu̱únʼ cananeos ga̱jma̱a̱ ikhí nigumán. Ana̱a̱ʼ* nindxu̱u̱ xa̱bu̱ amorreo ga̱jma̱a̱ ru̱dáaʼ* nindxu̱u̱ a̱ʼgú hitita. 4 Mbiʼi dí nigumán ga̱jma̱a̱ mbiʼi dí niraxtaa, na̱nguá nirujturígú rumia̱a̱ʼ, tútsuwán mu maʼni kaʼwíín, na̱nguá nixtiguíín idú ga̱jma̱a̱ túmbraʼáán xtíin. 5 Nimbáa tágáwíinʼ a̱jkiu̱u̱n kaʼyaaʼ dí maʼniaaʼ xígi̱ kaʼnii. Nimbáa táxmiéjuunʼ kaʼyaaʼ. Dí nini̱ nida̱a̱nʼ xanáá, numuu dí niwiñu̱u̱nʼ kuyaaʼ asndu nákha niraxtaa.

6 Índo̱ ikhúún xtáá ranújngoʼ ikhí, ndi̱yo̱o̱ dí kua̱ʼa̱a̱n ratajngupráʼa náa eʼdiaaʼ. Ga̱jma̱a̱ índo̱ ndi̱yo̱o̱ kua̱ʼa̱a̱n náa eʼdiaaʼ, ikhúún ni̱tha̱a̱nʼ: ‹¡Araxtaa má xúʼko̱!›. Xúʼko̱, ikhúún ni̱tha̱a̱nʼ índo̱ ndi̱yo̱o̱ kua̱ʼa̱a̱n náa eʼdiaaʼ: ‹¡Araxtaa má xúʼko̱!›. 7 Ni̱ni̱ rí maʼni mbaʼáanʼla, xóo iná dí nakráʼáan xanáá, ikháán ndija̱a̱n ga̱jma̱a̱ niwájxi̱i̱n, nijmaaʼ xúgíʼ rí mitsaanʼ.* Cháʼdáaʼ niʼni mba̱ʼu̱ ga̱jma̱a̱ ndiʼya edxa̱a̱ʼ, mú kaʼníí jngrui̱ga̱a̱ʼ tsaʼtsáánʼ ga̱jma̱a̱ nda̱a̱ xtíñaaʼ”›.

8 ‹Índo̱ ikhúún xtáá ranújngoʼ ikhí, ndiya̱a̱ʼ, ikhú nijkhánú ndi̱yo̱o̱ dí xtaʼdáá má tsiguaaʼ dí maʼndaaʼ xtayáá xa̱bu̱. Ikha jngóo nimbríya̱ʼ xtíñúʼ* ga̱jma̱a̱ nixtrámááʼ, ni̱rugoo dí tsaʼtsáánʼ, nixna̱ ajngóʼ ma̱ngaa nimbánuʼ ga̱jma̱á nindxa̱a̱ʼ, eʼthí Tátá Jeobá bi̱ itháán mba̱a̱, ga̱jma̱a̱ ikháán ni̱dxu̱ʼnú ninindxa̱a̱ʼ a̱ʼgiu̱ʼ. 9 Ma̱ngaa nitsuwán, ga̱jma̱a̱ nijñárígúu eʼdiaaʼ ma̱ngaa niʼgíinʼ aceite. 10 Ni̱xna̱a̱ʼ mataguʼwáanʼ vestido dí kiʼxmí, ni̱xna̱a̱ʼ matajngráʼaaʼ raxtá* dí niguma ga̱jma̱a̱ xtá dí itháan májánʼ,* nimbráʼáán xtíin lino dí itháan májánʼ ga̱jma̱a̱ ni̱xna̱a̱ʼ mataʼgíʼ xtíin dí itháan numuu. 11 Ni̱xna̱a̱ʼ dí mitsaanʼ: Náa ñawáanʼ nigruáʼa̱ xábí, ga̱jma̱a̱ náa aphaaʼ nira̱ʼnga̱a̱ʼ xábí. 12 Ma̱ngaa náa rakháaʼ nigídáʼ xábí, ga̱jma̱a̱ nijngrígú xábí náa cháʼwáanʼ ga̱jma̱a̱ náa edxa̱a̱ʼ nigrígu mbá corona rí mitsaanʼ. 13 Nitani̱ tsiʼyáminaʼ ga̱jma̱a̱ oro ma̱ngaa plata, ga̱jma̱a̱ natagíʼ xtíin lino dí itháan májánʼ, ma̱ngaa dí niguma ga̱jma̱a̱ dí itháan numuu ga̱jma̱a̱ natagíʼ vestido dí kiʼxmí. Ganitsu ndrígáaʼ nindxu̱u̱ harina dí itháan májánʼ, jyááʼ ga̱jma̱a̱ aceite, ni̱jkha̱nú niʼni mitsiʼñán ga̱jma̱a̱ niraxtaa xawii mani̱ndxa̱a̱ʼ reina›”.

14 “‹Numaaʼ* nigi̱ʼdu̱u̱ niwán ri̱go̱o̱ náa mbá xúgíʼ xuajin ga̱jma̱a̱ numuu dí mitsiʼñán, niʼni mitsiʼñán numuu dí ikhúún ni̱ni̱ dí maʼni xúʼko̱›, eʼthí Tátá Jeobá bi̱ itháán mba̱a̱”.

15 “‹Mú ikháán nitagíʼdi̱i̱ nitanimbamínáʼ ga̱jma̱a̱ numuu rí mitsiʼñán, ma̱ngaa ga̱jma̱a̱ numuu rí najmaʼnííʼ, ni̱dxu̱ʼnú ninindxa̱a̱ʼ mbáa a̱ʼgu̱ bi̱ nagujuamínáʼ. Raʼkháa awa̱án etagujuamínáʼ náa asndu tsáá bi̱ nanújngoo ikhí ga̱jma̱a̱ naraxnáximinaʼ náa ikhaa. 16 Nida nguáthá xtíñaaʼ, nitani̱ ga̱jma̱a̱ náa rí mitsídánʼ dí gakhi̱i̱ color, ga̱jma̱a̱ ikhí natagujuamínáʼ. Rígi̱ ragíʼmaa marigá, nditháan ragíʼmaa marigá. 17 Ma̱ngaa nida xábiáaʼ dí mitsaanʼ dí niguma ga̱jma̱a̱ oro ma̱ngaa plata dí ikhúún ni̱xna̱a̱ʼ, rúʼko̱ nitani̱ ga̱jma̱a̱ xtiʼkúún xa̱bekha,* ga̱jma̱a̱ nitagujuamínáʼ gajmiáanʼ. 18 Nida vestídia̱a̱ʼ dí kiʼxmí, ikhaa nitaxtrámíiʼ* ga̱jma̱a̱ niraxnáxi̱ náa ikhiin aceitiuʼ ga̱jma̱a̱ rí ndataun. 19 Pan dí ikhúún ni̱xna̱a̱ʼ mu miʼtsu, pan dí niguma ga̱jma̱a̱ harina dí itháan májánʼ, aceite ga̱jma̱a̱ jyááʼ, ikháán niraxnáxi̱ náa ikhiin xóo mbá rí mitsaanʼ ndataun.* Rúʼko̱ dí nirígá›, eʼthí Tátá Jeobá bi̱ itháán mba̱a̱”.

20 “‹E̱ji̱nʼ jiámá ga̱jma̱a̱ wa̱ʼxa̱ʼ* bi̱ niraʼdiin niraxnájxi̱i̱n náa xándú mu muphu̱u̱n... Lá tséʼngo̱o̱ dí i̱ndó natagujuamínáʼ tayáá ráʼ. 21 Niradíin e̱ji̱nʼ índo̱ niraxnájxi̱i̱n* mu mikhiin. 22 Índo̱ natani̱ xúgíʼ dí tsaga rúʼko̱ ga̱jma̱a̱ natagujuamínáʼ, na̱nguá nirmáʼáan a̱jkia̱a̱nʼ nákha mbiʼi dí ninindxa̱a̱ʼ dxáʼgú, nákha tsaʼtsáánʼ nda̱a̱ nditháan xtíñaaʼ, ga̱jma̱a̱ natajngupráʼa kua̱ʼa̱a̱n náa awúu̱n eʼdiaaʼ. 23 Nda̱wa̱á dí nitani̱ mbá xúgíʼ dí ra̱májánʼ, ngínáá, ngínáá lá ikháán, eʼthí Tátá Jeobá bi̱ itháán mba̱a̱. 24 Nitani̱ mbá náa mbuyamajkún xándú ga̱jma̱a̱ nitani̱ rí mitsídánʼ náa mámbá xuáá. 25 Nitani̱ dí mitsídánʼ ndrígáaʼ náa itháán pa̱jnu̱ náa mámbá kamba̱a̱, nitani̱ dí mitsiʼñán maʼni mbá rí xkawiʼ índo̱ naraxnáximinaʼ* náa mámbáa bi̱ nanújngoo ikhí, nitani̱ rí mbajoo dí natagujuamínáʼ. 26 Natabáaʼ gajmiáanʼ xa̱bu̱ egipcios, ga̱jma̱a̱ xa̱bu̱ bi̱ kúwá mijngii náa xtaa bi̱ ra̱ʼkhá tháán egua̱ʼa̱ dí mata̱ba̱a̱ʼ gajmiáanʼ, nitani̱ rí makásnga̱ñu̱ʼ ga̱jma̱a̱ numuu dí ra̱ʼkhá tháán etagujuamínáʼ. 27 Dí xúgi̱ makruíya̱ʼ ñawúnʼ mu ma̱ni̱ dí matamíniiʼ, ma̱ni̱ dí ni xáraʼdáá wéñuuʼ ganitsu ga̱jma̱a̱ maxnajxíín náa gu̱ʼu̱ bi̱ nawiñu̱u̱nʼ kuyaaʼ mu munia̱a̱ʼ dí má eñún ikhiin, wa̱ʼxiúnʼ filisteos bi̱ naxúwu̱únʼ eʼni rí natani̱.

28 Numuu rí nditháan tségiʼmaaʼ, ikha jngóo nitabáaʼ gajmiáanʼ xa̱bu̱ Asiria. Mú nda̱wa̱á dí nitabáaʼ gajmiáanʼ, xóó tségiʼmaaʼ. 29 Ikha jngóo nitabáaʼ xóó itháan gajmiáanʼ xa̱bu̱ bi̱ kúwá náa ku̱ba̱ʼ ndrígu̱ún xa̱bu̱ bi̱ nugujua̱,* ma̱ngaa gajmiáanʼ caldeos. Mú, maski ajndu nitabáaʼ gajmiáanʼ, xóó tsíyoo gágiʼmaaʼ. 30 ¡Táʼngo̱o̱ kayuuʼ a̱jkia̱a̱nʼ, eʼthí Tátá Jeobá bi̱ itháán mba̱a̱, mu matani̱ xúgíʼ rúʼko̱ dí naʼni mbáa a̱ʼgu̱ bi̱ nagujuamínáʼ, bi̱ nditháan tséti̱yu̱u̱ʼ! 31 Mú índo̱ natani̱ náa rí mbuyamajkún xándú náa itháan pa̱jnu náa mámbá kamba̱a̱, ma̱ngaa natani̱ rí mitsídánʼ ndrígáaʼ náa mámbá xuáá, tátani̱ xóo eʼni mbáa a̱ʼgu̱ bi̱ nagujuamínáʼ, numuu dí tsétrigú dí nuni̱ numaaʼ. 32 ¡Nindxa̱a̱ʼ mbáa a̱ʼgu̱ bi̱ naʼni aʼkhá gajmíi̱n eʼwíinʼ, bi̱ nagruiguíin xa̱bu̱ bi̱ naguwaáʼ, raʼkháa ajmbio̱o̱!* 33 Xúgíinʼ gu̱ʼu̱ bi̱ nugujuamíjna̱ nundrigú regalo, mú ikháán, ikháán eraxnún regalo bi̱ ra̱ʼkhá tháán egua̱ʼa̱ mata̱ba̱a̱ʼ gajmiáanʼ, ga̱jma̱a̱ natani̱ numún mu maguwáʼ asndu náá bi̱ mata̱ba̱a̱ʼ gajmiáanʼ. 34 Mixtiʼkhu xóo etani̱ ikháán ki xóo gu̱ʼu̱ bi̱ nugujuamíjna̱. ¡Nimbáa tségujuamínáʼ xóo etani̱ ikháán! Ikháán natani̱ numún eʼwíinʼ, raʼkháa ikhiin eni̱ numaaʼ. Mixtiʼkhu xóo etani̱›.

35 Ikha jngóo, ikháán a̱ʼgu̱ bi̱ nagujuamínáʼ, atadxawíín ajngóo Jeobá. 36 Rígi̱ dí naʼthí Tátá Jeobá bi̱ itháán mba̱a̱: ‹Dí ra̱ʼkhá tháán egua̱ʼa̱ mata̱ba̱a̱ʼ gajmiáanʼ xa̱bu̱ nikujmaa pa̱jnu ga̱jma̱a̱ dí tsaʼtsáánʼ niʼni pa̱jnu índo̱ natabáaʼ gajmiáanʼ ñawaanʼ ma̱ngaa gajmiáanʼ mbá xúgíinʼ xándú xkawi̱i̱nʼ ga̱jma̱a̱ bi̱ tsagiin, bi̱ náa ni̱dxu̱ʼnú niraxnáxi̱ eʼdiún ejña̱a̱nʼ xóo tsigijñaʼ. 37 Ikha jngóo magímbíin mbá xúgíinʼ ñawaanʼ bi̱ nitabáaʼ gajmiáanʼ, mbá xúgíinʼ bi̱ nindaaʼ xtañún ga̱jma̱a̱ bi̱ niwiya̱a̱ʼ xtañún. Magímbíin bi̱ kúwá asndu náá mu ma̱ni̱ rí matamíniiʼ ga̱jma̱a̱ ma̱ni̱ rí makujmaa pa̱jnu rí tsaʼtsáánʼ, tsaʼtsáánʼ mbá kayuuʼ gúyaaʼ.

38 Ga̱jma̱a̱ ma̱ni̱ rí matamíniiʼ xóo gúmíniiʼ gu̱ʼu̱ bi̱ nuni̱ aʼkhá gajmiún eʼwíinʼ ga̱jma̱a̱ gu̱ʼu̱ bi̱ nuxidíí eʼdi, ma̱ni̱ rí magadíí eʼdiaaʼ numuu rí nakásngañu̱ʼ ga̱jma̱a̱ dí naxíyúʼ. 39 Maxnajxíín náa ñawúúnʼ ñawaanʼ. Ikhiin muni̱ gámbáa rí nitani̱ náa mbiʼyamajkhúún xándú ga̱jma̱a̱ muni̱ nga̱jxi̱i̱ rí mitsídánʼ rí nitani̱, murawíi xtíñaaʼ, magún kudúún xábiáaʼ dí mitsaanʼ ga̱jma̱a̱ tsaʼtsáánʼ gúniña̱a̱nʼ, nándáa xtíñaaʼ. 40 Maguwáʼ kudiin mbaʼin xa̱bu̱ muni̱ gínáán, muxnaaʼ ga̱jma̱a̱ itsí ga̱jma̱a̱ muxiñán ga̱jma̱a̱ espada. 41 Mutsikha̱a̱ guʼwáaʼ ga̱jma̱a̱ majmiuʼ mu ma̱ni̱ rí matamíniiʼ mu mbuyáá mbaʼin gu̱ʼu̱, ma̱ni̱ gámbáa rí natagujuamínáʼ ga̱jma̱a̱ ni xátani̱ numa. 42 Maxidirámuuʼ náa ikháán rí nakásngañu̱ʼ ga̱jma̱a̱ dí nakiʼnún matsíngúunʼ náa ikháán, maʼni̱i̱ a̱jkiu̱nʼ ga̱jma̱a̱ ni xákiʼnún›.

43 ‹Numuu dí tármáʼáan a̱jkia̱a̱nʼ eʼni mbiʼi nákha ikháán nindxa̱a̱ʼ mbáa dxáʼgú, ga̱jma̱a̱ nitani̱ rí makásnga̱ñu̱ʼ índo̱ nitani̱ xúgíʼ rúʼko̱, ikha jngóo ma̱ni̱ rí matamíniiʼ ga̱jma̱a̱ numuu rí tsaga rí nitani̱, eʼthí Tátá Jeobá bi̱ itháán mba̱a̱, ga̱jma̱a̱ ni xátani̱ itháan rí mitsaga, ni má rí xkawiʼ.

44 Atayáá, xúgíinʼ xa̱bu̱ muthi ajngáa rígi̱ ga̱jma̱a̱ numaaʼ: “Xó má ru̱dúu̱, xúʼko̱ kaʼnii dxáʼgú”. 45 Xóo ru̱dáaʼ kaʼníí, bi̱ niwiyu̱u̱ʼ kaʼyoo ajmbio̱o̱ ga̱jma̱a̱ e̱ji̱i̱n. Ga̱jma̱a̱ xóo a̱ngia̱a̱nʼ kaʼníí, bi̱ niwiñu̱u̱nʼ kuñúún ajmbiu̱ún ga̱jma̱a̱ e̱jñu̱ún. Ru̱dála nindxu̱u̱ a̱ʼgú hitita ga̱jma̱a̱ ana̱la nindxu̱u̱ xa̱bu̱ amorreo›”.

46 “‹Ndxájuaaʼ dxáʼgú giʼnii nindxu̱u̱ Samaria, bi̱ xtáa gajmíi̱n waʼxiinʼ* xígií náa ñawún xti̱ya̱a̱ʼ, ga̱jma̱a̱ gi̱ʼtia̱a̱ʼ dxáʼgú gi̱ʼtaá nindxu̱u̱ Sodoma, bi̱ xtáa gajmíi̱n waʼxiinʼ náa ñawún májáanʼ. 47 Raʼkháa i̱ndó nijngrui̱ga̱a̱ʼ náa kambu̱ún ga̱jma̱a̱ nitayaridáá rí tsaga rí nuni̱, ma̱ngaa tájyúuʼ mba̱yu̱u̱ʼ rí nitani̱ dí itháan xkawiʼ ki xóo rí nuni̱ ikhiin. 48 Xó má ikhúún gajkhun xtáá, eʼthí Tátá Jeobá bi̱ itháán mba̱a̱, gi̱ʼtia̱a̱ʼ bi̱ nindxu̱u̱ Sodoma gajmíi̱n waʼxiinʼ túni̱ dí ikháán gajmiáanʼ waʼxiaanʼ nitani̱. 49 Atayáá, rígi̱ dí raʼkhí niʼni gi̱ʼtia̱a̱ʼ bi̱ nindxu̱u̱ Sodoma. Ikhaa gajmíi̱n waʼxiinʼ nuni̱ mbaʼumíjna̱, ra̱ʼkhá tháán niguáʼdáá ganitsu ga̱jma̱a̱ nda̱a̱ rí niʼni maxmiéjúúnʼ, mú maski ajndu xúʼko̱, túmbañún bi̱ numíniiʼ ga̱jma̱a̱ bi̱ ngíníi. 50 Túniña̱a̱ʼ runi̱ mbaʼumíjna̱ ga̱jma̱a̱ nini̱ má xúʼko̱ rí xkawiʼ náa inuʼ, ikha jngóo ni̱ni̱ gámbíin, nándáa i̱mba̱ rí ma̱ni̱.

51 Ni má Samaria tákudaminaʼ ni mbá ta̱pha̱ aʼkhá xóo rí ikháán nitaxúdaminaʼ. Nitani̱ rí xkawiʼ rí natani̱ maʼni mba̱a̱, itháan ki xóo dí nini̱ ikhiin, ra̱ʼkhá tháán mba̱a̱ rí xkawiʼ rí nitani̱, ikha jngóo asndu xóo májánʼ má rí nini̱ a̱ngia̱a̱nʼ kujmaa. 52 Dí xúgi̱ rá, magajnúu gamajkuaaʼ numuu dí májánʼ má nitayáá dí nini̱ a̱ngia̱a̱nʼ. Ga̱jma̱a̱ numuu aʼkhá rí nitani̱ ma̱ngaa dí nitani̱ rí itháan xkawiʼ ki xóo ikhiin, ikhiin nindxu̱ún itháan xa̱bu̱ míjíinʼ ki xóo ikháán. Ikha jngóo dí xúgi̱ rá, gati̱ya̱a̱ʼ ga̱jma̱a̱ gagajnúu gamajkuaaʼ numuu rí nitani̱ rí makujmiin dí míjíinʼ a̱ngia̱a̱nʼ›.

53 ‹Magímbíin bi̱ ni̱jkha̱ kiʼdiin, xa̱bu̱ Sodoma gajmiún wa̱ʼxiúnʼ, xa̱bu̱ Samaria gajmiún wa̱ʼxiúnʼ bi̱ ni̱jkha̱ kiʼdiin, magímbíin gajmiún xa̱bia̱a̱ʼ bi̱ ni̱jkha̱ kiʼdiin 54 mu magajnúu gamajkuaaʼ ga̱jma̱a̱ maguma majti̱i̱nʼ ga̱jma̱a̱ numuu rí nitani̱, dí nitani̱ maʼni̱i̱ a̱jkiu̱ún. 55 Gi̱ʼtia̱a̱ʼ Sodoma gajmíi̱n waʼxiinʼ matangi̱ín mani̱ndxu̱ún xóo nákha ginii, ndxájuaaʼ Samaria gajmíi̱n waʼxiinʼ matangi̱ín mani̱ndxu̱ún xóo nákha ginii, ga̱jma̱a̱ ikháán gajmiáanʼ waʼxiaanʼ matangáanʼla mani̱ndxa̱la xóo nákha ginii. 56 Nda̱a̱ numuu matríya̱ʼ mbiʼyuu gi̱ʼtia̱a̱ʼ Sodoma nákha mbiʼi dí natanimbamínaʼ 57 nákha xóó tsékujmaa pa̱jnu dí ra̱májánʼ dí natani̱. Dí xúgi̱ wa̱ʼxiúnʼ xa̱bu̱ Siria gajmiún bi̱ kúwá mijngii náa ikhiin nuta wéñaaʼ, ga̱jma̱a̱ wa̱ʼxiúnʼ filisteos, bi̱ kúwá mijngii náa xtaa, nutsijmáán. 58 Matani̱ numa̱a̱ dí tsaga dí nitani̱ ga̱jma̱a̱ dí xkawiʼ›, eʼthí Jeobá”.

59 “Numuu dí rígi̱ dí naʼthí Tátá Jeobá bi̱ itháán mba̱a̱: ‹Mania̱a̱ʼ xó má dí ikháán nitaniuʼ, numuu rí índo̱ tátanimbaníí rí nimbánulú, nitatsijmaa rí nixna̱ ajngóʼ. 60 Mú ikhúún marmáʼáan a̱jkiu̱nʼ dí nimbánuʼ ga̱jma̱á nindxa̱a̱ʼ, nákha ikháán nindxa̱a̱ʼ mbáa dxáʼgú ga̱jma̱a̱ mambanúʼ mbu̱júu̱ ga̱jma̱á nindxa̱a̱ʼ mbá rí mbajyúuʼ asndu kámuu. 61 Marmáʼáan a̱jkia̱a̱nʼ dí xóo nitani̱ ga̱jma̱a̱ matiya̱a̱ʼ índo̱ gátriguíin a̱ngia̱a̱nʼ, xó má bi̱ guanii ga̱jma̱a̱ gua̱ʼta̱á, ga̱jma̱a̱ maxnia̱a̱ʼ ikhiin xóo waʼxiaanʼ maski ajndu raʼkháa mbá dí xóo nimbánuʼ ga̱jma̱á nindxa̱a̱ʼ›.

62 ‹Ga̱jma̱a̱ ikhúún mínuuʼ mambanúʼ ga̱jma̱á nindxa̱a̱ʼ, ga̱jma̱a̱ mi̱dxu̱ʼnú ma̱ta̱ya̱a̱ dí ikhúún nindxu̱ʼ Jeobá. 63 Ikhú índo̱ gáni̱ mba̱a̱ a̱jkiu̱nʼ ka̱ya̱a̱ʼ, maski ajndu ra̱ʼkhá tháán mbaʼa dí ra̱májánʼ nitani̱, marmáʼáan a̱jkia̱a̱nʼ dí nitani̱ ga̱jma̱a̱ ra̱ʼkhá tháán gáti̱ya̱a̱ʼ rí asndu xáʼndaaʼ gátambáʼtáá rawaanʼ, ga̱jma̱a̱ numuu dí ra̱ʼkhá tháán nigájnuu gamajkuaaʼ›, eʼthí Tátá Jeobá bi̱ itháán mba̱a̱”.