Ezequiel

20 Juwan tsiguʼ dí witsu gu̱nʼ, dí gu̱wa̱ʼ mbiʼi dí gu̱nʼ rúʼko̱, tikhuun bi̱ kuya̱ edxu̱u̱ náa Israel niguwáʼ ga̱jma̱a̱ nitri̱gi̱i̱n náa inuʼ mu marajxu̱u̱ Jeobá. 2 Ikhú nigruígú ajngóo Jeobá. Niʼthúnʼ: 3 “A̱ʼdióo xa̱biya̱, aratamíjná gajmiáanʼ bi̱ kuya̱ edxu̱u̱ náa Israel ga̱jma̱a̱ arathún: ‹Rígi̱ dí naʼthí Tátá Jeobá bi̱ itháán mba̱a̱: “Naguwa̱ʼla gúrajxuʼ ráʼ. ‹Xó má ikhúún gajkhun xtáá, xáriʼñala›, eʼthí Tátá Jeobá bi̱ itháán mba̱a̱”›.

4 Lá xtaa xawii matanimbaníí numún xáʼ. A̱ʼdióo xa̱biya̱, xtaa xawii matanimbaníí numún xáʼ. Atani̱ mbuyáá xúgíʼ rí tsaga nini̱ wajin xiʼñúúnʼ. 5 Arathún: ‹Rígi̱ dí naʼthí Tátá Jeobá bi̱ itháán mba̱a̱: “Mbiʼi dí niraʼwi̱i̱ Israel, ma̱ngaa nixna̱ ajngóʼ* náa bi̱ naguwáʼ náa goʼwóo Jacob ga̱jma̱a̱ ni̱ni̱ rí muniʼniúnʼ náa ku̱ba̱ʼ ndrígóo Egipto. Xúʼko̱ nixna̱ ajngóʼ ga̱jma̱a̱ ni̱thu̱u̱n: ‹Ikhúún nindxu̱ʼ Jeobá Dios ndrígala›. 6 Nákha mbiʼi rúʼko̱ nixna̱ ajngóʼ dí magúwíin náa ku̱ba̱ʼ ndrígóo Egipto ga̱jma̱a̱ maʼgá kagui̱i̱n náa mbá ku̱ba̱ʼ dí ikhúún niraʼwi̱i̱,* náa mbá ku̱ba̱ʼ dí rígá wéñuuʼ yaʼdú ga̱jma̱a̱ jyááʼ. Náa mbá xúgíʼ ku̱ba̱ʼ rúʼko̱ nindxu̱u̱ dí itháán mitsaanʼ.* 7 Ikhú ni̱thu̱u̱n: ‹Mámbáa dí ikháanʼla gáʼni gámbóo xúgíʼ dí tsaga dí nagua̱ʼa̱ mu̱nila, xúni̱ gachímijnála gajmiála xándú bi̱ xkawi̱i̱nʼ bi̱ kúwá náa Egipto. Ikhúún nindxu̱ʼ Jeobá Dios ndrígala›.

8 Mú ikhiin nixujximíjna̱ náa ikhúún ga̱jma̱a̱ táʼndún gúdxawunʼ ga̱jma̱a̱ na̱nguá nini̱ gámbáa xúgíʼ enii rí tsaga dí nagua̱ʼa̱ muni̱ ga̱jma̱a̱ túniña̱a̱ʼ ruyamajkhún xándú xkawi̱i̱nʼ bi̱ kúwá náa Egipto. Ikha jngóo nixna̱ ajngóʼ dí maxidirámuuʼ náa ikhiin dí nakásngañu̱ʼ ga̱jma̱a̱ maxidirámuuʼ xúgíʼ dí nakásngañu̱ʼ náa ikhiin náa ku̱ba̱ʼ ndrígóo Egipto. 9 Ni̱ni̱ rígi̱ ga̱jma̱a̱ numuu mbiʼyuʼ, mu xúʼko̱ xáguma gachíí náa xa̱bu̱ xuajin náa majñu̱u̱ʼ rí ikhiin nikúwá.* Numuu rí ni̱ni̱ muniʼniúnʼ náa inún xa̱bu̱ xuajin índo̱ nigúwíin náa Egipto. 10 Ikha jngóo nigúwíin náa ku̱ba̱ʼ ndrígóo Egipto ga̱jma̱a̱ ni̱jkhá kagui̱i̱n náa ku̱ba̱ʼ mijxooʼ.*

11 Nda̱wa̱á nixnu̱u̱n kiʼtáñajunʼ ndrígóʼ ga̱jma̱a̱ ni̱ni̱ rí muniʼnuuʼ xtángoo ndrígóʼ, mu xúʼko̱ xa̱bu̱ bi̱ gáʼnimbánuu maxtáa má xúʼko̱. 12 Ma̱ngaa ni̱ni̱ rí mbiʼi sábado mani̱ndxu̱u̱ mbá tsinaʼ náa ikhiin ga̱jma̱a̱ náa ikhúún, mu xúʼko̱ mbuyáá rí ikhúún Jeobá, nindxu̱ʼ bi̱ naʼni kaʼwi̱ín.

13 Mú bi̱ kúwá náa goʼwóo Israel nixujximíjna̱ náa ikhúún náa ku̱ba̱ʼ mijxooʼ. Túni̱ xó má eʼthí náa kiʼtáñajunʼ ndrígóʼ ga̱jma̱a̱ nini̱ gaʼduunʼ xtángoo ndrígóʼ, dí niraʼwi̱i̱ ma̱ni̱, á mu mbáa xa̱bu̱ naʼnimbánuu, maxtáa. Ikhiin nini̱ gachíí mbiʼi sábado ndrígóʼ. Ikha jngóo nixna̱ ajngóʼ dí maxidirámuuʼ náa ikhiin dí nakásngañu̱ʼ náa ku̱ba̱ʼ mijxooʼ mu ma̱ni̱ gámbíin. 14 Ni̱ni̱ rígi̱ ga̱jma̱a̱ numuu mbiʼyuʼ, mu xúʼko̱ xáguma gachíí náa xa̱bu̱ xuajin, numuu rí ndiyáá índo̱ nigúwíin. 15 Náa ku̱ba̱ʼ mijxooʼ ma̱ngaa nixna̱ ajngóʼ dí xáʼgá kagui̱i̱n náa ku̱ba̱ʼ dí nitha̱ maxnu̱u̱n, náa mbá ku̱ba̱ʼ dí rígá wéñuuʼ yaʼdú ga̱jma̱a̱ jyááʼ, náa mbá xúgíʼ ku̱ba̱ʼ rúʼko̱ nindxu̱u̱ dí itháán mitsaanʼ,* 16 numuu rí nini̱ gaʼduunʼ xtángoo ndrígóʼ ga̱jma̱a̱ túni̱ xó má eʼthí náa kiʼtáñajunʼ ndrígóʼ ga̱jma̱a̱ nini̱ gachíí mbiʼi sábado ndrígóʼ, numuu rí ikhiin nandún mbuyamajkún xándú bi̱ xkawi̱i̱nʼ.

17 Mú nigáwíinʼ a̱jkiu̱nʼ* ka̱ñu̱u̱n ga̱jma̱a̱ na̱nguá ni̱ni̱ gámbíin, na̱nguá nigúdíin náa ku̱ba̱ʼ mijxooʼ. 18 Ni̱thu̱u̱n e̱jñu̱ún náa ku̱ba̱ʼ mijxooʼ: ‹Xúnimbáníí ikha ndrígu̱ún wajin xiʼñála, ni má xúnimbala xtángoo ndrígu̱ún ga̱jma̱a̱ xúyamajkún xándú bi̱ xkawi̱i̱nʼ. 19 Ikhúún nindxu̱ʼ Jeobá Dios ndrígala. Gunimbáníí kiʼtáñajunʼ ndrígóʼ, gu̱nimba̱la xtángoo ndrígóʼ ga̱jma̱a̱ gunimbáníí. 20 Gu̱ni̱ kaʼwi̱i̱ sábado ndrígóʼ, ga̱jma̱a̱ rígi̱ mani̱ndxu̱u̱ mbá tsinaʼ náa ikháanʼla ga̱jma̱a̱ ikhúún, mu ikháanʼ mbu̱ya̱a̱ dí ikhúún nindxu̱ʼ Jeobá Dios ndrígala›.

21 Mú e̱jñu̱ún nigíʼdi̱i̱ nixujximíjna̱ náa ikhúún. Túni̱ xó má eʼthí náa kiʼtáñajunʼ ndrígóʼ, túnimbu̱u̱n ga̱jma̱a̱ túnimbaníí xtángoo ndrígóʼ dí niraʼwi̱i̱ ma̱ni̱, á mu mbáa xa̱bu̱ naʼnimbánuu, maxtáa. Ikhiin nini̱ gachíí mbiʼi sábado ndrígóʼ. Ikha jngóo nixna̱ ajngóʼ dí maxidirámuuʼ náa ikhiin dí nakásngañu̱ʼ náa ku̱ba̱ʼ mijxooʼ. 22 Mú niʼngo̱o̱ a̱jkiu̱nʼ, ni̱ni̱ ga̱jma̱a̱ numuu mbiʼyuʼ, mu xúʼko̱ xáguma gachíí náa xa̱bu̱ xuajin, numuu rí ndiyáá índo̱ nigúwíin.* 23 Ma̱ngaa ikhúún nixna̱ ajngóʼ náa ku̱ba̱ʼ mijxooʼ dí ma̱ni̱ majuadríʼiin náa majñu̱únʼ xa̱bu̱ xuajin ga̱jma̱a̱ náa i̱ʼwáʼ xuajin. 24 Numuu rí na̱nguá ninimbaníí xtángoo ndrígóʼ ga̱jma̱a̱ nini̱ gaʼduunʼ kiʼtáñajunʼ ndrígóʼ ma̱ngaa nini̱ gachíí mbiʼi sábado ndrígóʼ, ndiyamajkhún* xándú bi̱ xkawi̱i̱nʼ bi̱ ndiyamajkhún wajin xiʼñúúnʼ. 25 Niniʼñúúnʼ má munimbaníí ikha dí na̱nguá májánʼ, ga̱jma̱a̱ xtángoo rí maʼni dí xákúwá. 26 Niniʼñúúnʼ dí muni̱ tsagamijná ga̱jma̱a̱ tsigijñaʼ ndrígu̱ún, índo̱ nutsikhi̱i̱n e̱jín gíʼniún náa aguʼ, mu magáwíinʼ a̱jkiu̱ún ga̱jma̱a̱ xúʼko̱ mbuyáá dí ikhúún nindxu̱ʼ Jeobá”›.

27 Ikháán a̱ʼdióo xa̱biya̱, arathún rígi̱ bi̱ kúwá náa goʼwóo Israel: ‹Rígi̱ dí naʼthí Tátá Jeobá bi̱ itháán mba̱a̱: “Wajin xiʼñála nitha̱ wéñúʼ xígi̱ kaʼnii, ga̱jma̱a̱ táguájun jmbu náa ikhúún. 28 Ikhúún ni̱jkhá kagui̱i̱n náa ku̱ba̱ʼ rí nitha̱ maxnu̱u̱n. Ga̱jma̱a̱ índo̱ ikhiin ndiyáá bíjní rí mitsídánʼ ga̱jma̱a̱ xúgíʼ enii ixi̱ maxaʼ rí mba̱ʼu̱, ikhú nigi̱ʼdi̱i̱ nixnajxi̱ tsigijñaʼ, ma̱ngaa tsigijñaʼ rí naʼni makásnga̱ñu̱ʼ. Nixnajxi̱ tsigijñaʼ rí ndataun ga̱jma̱a̱ nijngatra̱ma̱ʼ tsigijñaʼ dí nagadirámuuʼ. 29 Ikhú nirajxu̱u̱n: ‹Ndiéjunʼ lá eyoo gáʼthúu̱n náa mitsídánʼ dí na̱jkua̱la rá.› (Asndu rí mbiʼi xúgi̱ nagumbiʼyuu náa rí Mitsídánʼ)”›.

30 Rí xúgi̱, arathún rígi̱ bi̱ kúwá náa goʼwóo Israel: ‹Rígi̱ dí naʼthí Tátá Jeobá bi̱ itháán mba̱a̱: “Lá kuwáanʼ runi̱ tsagamijnála ikháá má xóo nini̱ tsagamijná wajin xiʼñála índo̱ nigún kidxúúnʼ xándú bi̱ xkawi̱i̱nʼ ga̱jma̱a̱ ndiyamajkhún ráʼ.* 31 Lá kuwáanʼ ru̱ni̱ tsagamijná má xúʼko̱ asndu rí mbiʼi xúgi̱, índo̱ nuxnajxí tsigijñaʼ náa inún xúgíinʼ xándú bi̱ xkawi̱i̱nʼ ga̱jma̱a̱ índo̱ nutsikhi̱i̱n e̱jña̱la náa aguʼ ráʼ. Ikha jngóo ikháanʼ bi̱ kuwáanʼ náa goʼwóo Israel, lá gíʼmúún mariʼñala dí nurajxu̱ʼla ráʼ.”›

‹Xó má ikhúún gajkhun xtáá, eʼthí Tátá Jeobá bi̱ itháán mba̱a̱, xáriʼñala dí nurajxi̱. 32 Nditháan xárígá xó má ikháanʼ nundxa̱ʼwa̱míjna̱, índo̱ nu̱ta̱ “Ganindxu̱lú xó má xa̱bu̱ xuajin, xó má xa̱bu̱ bi̱ kúwá náa i̱ʼwáʼ xuajin, bi̱ nduyamajkuíí* ixi̱ ga̱jma̱a̱ itsí”›”.

33 “‹Xó má ikhúún gajkhun xtáá, eʼthí Tátá Jeobá bi̱ itháán mba̱a̱, matañájuanla ga̱jma̱a̱ ñawúnʼ dí gíʼdoo tsiaki̱i̱ ga̱jma̱a̱ maxidírígú dí nakásngañu̱ʼ. 34 Majmuʼ ñawúnʼ dí gíʼdoo tsiaki̱i̱, ga̱jma̱a̱ maxidírígú dí nakásngañu̱ʼ, mu magúwáanʼ náa xuajin, náa ku̱ba̱ʼ dí nijuadráʼáan ga̱jma̱a̱ magímbáanʼla. 35 Maʼgá kaguáanʼ náa ku̱ba̱ʼ mijxooʼ dí rígá náa xuajin ga̱jma̱a̱ ikhí gánimbánuu numala.

36 Xó má ninimbánuu numún wajin xiʼñála náa ku̱ba̱ʼ mijxooʼ, dí rígá náa ku̱ba̱ʼ ndrígóo Egipto, xúʼko̱ gánimbánuu numala mangáanʼ, eʼthí Tátá Jeobá bi̱ itháán mba̱a̱. 37 Ma̱ni̱ rí manújngala náa agoo ixu̱u̱ baxtúu ga̱jma̱a̱ ma̱ni̱ rí munimbáníí tsiaki̱i̱ rí nimbánulú. 38 Mú ma̱ni̱ wájíinʼ náa ikháanʼla bi̱ tsénimbu̱u̱n ga̱jma̱a̱ bi̱ nuxudamíjna̱ aʼkhá náa ikhúún. Numuu rí magúwáanʼla náa ku̱ba̱ʼ náa kuwáanʼ xóo xa̱bu̱ bi̱ naguwaáʼ, mú xáta̱ʼa̱a̱ʼla náa ku̱ba̱ʼ ndrígóo Israel. Ikháanʼ muʼgua̱nú mbu̱ya̱a̱ dí ikhúún nindxu̱ʼ Jeobá›.

39 Mú ikháanʼla bi̱ kuwáanʼ náa goʼwóo Israel, rígi̱ dí naʼthí Tátá Jeobá bi̱ itháán mba̱a̱: ‹Mámbáa dí ikháanʼla, gaʼga̱a̱ gáʼyamajkuu xándiúu̱ bi̱ xkawi̱i̱ʼ. Mú nda̱wa̱á, á mu tsédxawunʼla, ni xándoo mu̱ni̱ gachíí itháán mbiʼyuʼ rí kaʼwu ga̱jma̱a̱ numuu tsigijñaʼ rí nuxnajxíla ma̱ngaa índo̱ nduyamajkhún xándiala bi̱ xkawi̱i̱nʼ›.

40 ‹Numuu dí kúbá ndrígóʼ rí kaʼwu, náa mbá kúbá mitsídánʼ dí rígá náa Israel, eʼthí Tátá Jeobá bi̱ itháán mba̱a̱, mbá xúgíinʼ bi̱ kúwá náa goʼwóo Israel, xúʼko̱, mbá xúgíinʼ mu̱ni̱ ñajunʼ. Ikhí maʼdxuu a̱jkiu̱nʼ ka̱ñu̱u̱n ga̱jma̱a̱ mandu̱ʼu̱u̱n rí muxna dí guáʼdáá ma̱ngaa dí najma̱a̱ ginii dí nuxnajxí náa tsigijñaʼ, xúgíʼ dí kaʼwu dí guáʼdáá. 41 Ga̱jma̱a̱ numuu rí mitsaanʼ* ndataun, maʼdxuun a̱jkiu̱nʼ ka̱ya̱la, índo̱ gágúwáanʼla náa mbaʼa xuajin, náa ku̱ba̱ʼ dí nijuadráʼáanʼ ga̱jma̱a̱ índo̱ gágímbáanʼla, ikhú ma̱ni̱ kaʼwumina̱a̱ʼ, náa majñala náa inún xa̱bu̱ xuajin›.

42 ‹Ikháanʼ muʼgua̱nú mbu̱ya̱a̱ dí ikhúún nindxu̱ʼ Jeobá, índo̱ gáʼgá kaguáanʼ náa ku̱ba̱ʼ ndrígóo Israel, náa ku̱ba̱ʼ rí nixna̱ ajngóʼ dí maxnu̱u̱n wajin xiʼñála. 43 Ikhí marmáʼáan a̱jkia̱la gáʼni mbá xúgíʼ dí ni̱nila, ma̱ngaa rí ni̱ni̱ tsagamijnála ga̱jma̱a̱ mawi̱yala gáʼni* mbá xúgíʼ dí ra̱májánʼ dí ni̱nila. 44 Ikháanʼla bi̱ kuwáanʼ náa goʼwóo Israel, muʼgua̱nú mbu̱ya̱a̱ dí ikhúún nindxu̱ʼ Jeobá, índo̱ gániala rígi̱ ga̱jma̱a̱ numuu mbiʼyuʼ ga̱jma̱a̱ xániala xó má ra̱májánʼ dí ni̱nila o raʼkhí dí ni̱ni̱›, eʼthí Tátá Jeobá bi̱ itháán mba̱a̱”.

45 Nigruígú mbu̱júu̱ ajngóo Jeobá. Niʼthúnʼ: 46 “A̱ʼdióo xa̱biya̱, atanga̱án matiejxi̱ xígií náa sur, ga̱jma̱a̱ aratá mbá dí marigá náa sur, ma̱ngaa aratáríya̱ʼ dí magíʼnuu xaxi̱ náa ku̱ba̱ʼ dí rígá xígií náa sur. 47 Aratháán rígi̱ xaxi̱ dí rígá xígií náa sur: ‹Atadxawíín ajngóo Jeobá. Rígi̱ dí naʼthí Tátá Jeobá bi̱ itháán mba̱a̱: “Atayáá, magídooʼ aguʼ náa ikháán, mu mikha̱a̱ xúgíʼ ixi̱ dí rígá náa ikháán, xó má ixi̱ maxaʼ ga̱jma̱a̱ dí nijndooʼ. Xájuíyuuʼ riʼyu̱u̱ aguʼ, bi̱ kúwá náa sur asndu náa norte mbuyáá rí mijkha. 48 Ga̱jma̱a̱ xúgíinʼ xa̱bu̱* mbuyáá rí ikhúún mínuuʼ Jeobá niskamúu mu xúʼko̱ xájuíyuuʼ”›”.

49 Ikhúún nitha̱: “¡Ay, Tátá Jeobá bi̱ itháán mba̱a̱! Jngruigu̱u̱n ruthi ‹¡Ikhaa i̱ndó naʼthí ajngáa xkri̱da!›”.*