Ezequiel

21 Nigruígú mbu̱júu̱ ajngóo Jeobá. Niʼthúnʼ: 2 “A̱ʼdióo xa̱biya̱, atanga̱án matiejxi̱ náa Jerusalén, aratá dí magíʼnuu náa dí mikaʼwu ga̱jma̱a̱ aratáríya̱ʼ dí magíʼnuu ku̱ba̱ʼ ndrígóo Israel. 3 Aratháán rígi̱ ku̱ba̱ʼ ndrígóo Israel: ‹Rígi̱ dí naʼthí Jeobá: “Gi̱i̱ xtáá mu maxmína̱ʼ ga̱jma̱á nindxa̱a̱ʼ, maríya̱ʼ espádóʼ náa xtóo, maxíyáa xa̱bu̱ májáanʼ ga̱jma̱a̱ bi̱ ra̱májáanʼ bi̱ xtáa náa ikháán. 4 Numuu dí ikhúún maxíyáa xa̱bu̱ májáanʼ ga̱jma̱a̱ bi̱ ra̱májáanʼ, maríya̱ʼ espádóʼ náa xtóo mu magudíin mbá xúgíinʼ,* magi̱ʼdu̱u̱ náa sur asndu náa norte. 5 Xúgíinʼ xa̱bu̱ maguánú mbuyáá dí ikhúún, Jeobá niríya̱ʼ espádóʼ náa xtóo. Ga̱jma̱a̱ espada rígi̱ xájnguáan náa xtóo”›.

6 Ikháán a̱ʼdióo xa̱biya̱, asndu naguáʼáán* dí namíñáaʼ gátatsi̱ná. Xúʼko̱, asndu ngíná gátatsi̱ná náa inún. 7 Á mu nurajxa̱a̱ʼ ‹Náá numuu dí natatsíná rá.›, atriʼñún ‹Ga̱jma̱a̱ numuu mbá ajngáa dí nidxawuun›. Numuu dí gajkhun ma̱ʼkha̱, a̱jkiu̱ún mbá xúgíinʼ makáguabaaʼ, ni xágiʼdoo tsiaki̱i̱ ñawúúnʼ, mbá xúgíinʼ* makáguabiinʼ ga̱jma̱a̱ mbá xúgíʼ ragómiu̱ún magajtaa iyaʼ.* ‹Atayáá, gajkhun ma̱ʼkha̱, mambanúu›, eʼthí Tátá Jeobá bi̱ itháán mba̱a̱”.

8 Nigruígú mbu̱júu̱ ajngóo Jeobá. Niʼthúnʼ: 9 “A̱ʼdióo xa̱biya̱, aratáríya̱ʼ rígi̱: ‹Rígi̱ dí naʼthí Jeobá: “Marata̱: ‹¡Mbá espada! Mbá espada dí xíníʼ ga̱jma̱a̱ nigájnáa rawuunʼ. 10 Mixíníʼ mu magudíin mbaʼin xa̱bu̱, nigájnáa rawuunʼ mu mambiʼi xóo agiuuʼ a̱jkhu̱u̱n›”›”.*

Xa̱bu̱ xuajin nirajxi̱: “Lá ragíʼmaa dí maʼdxulu ráʼ.”

Mú Dios niʼthí: “‹Lá ikhaa* xáʼndoo gáʼyoo ixi̱ ñajunʼ ndrígóo a̱ʼdióʼ, xó má eʼni ga̱jma̱a̱ asndu ndiéjunʼ má ixi̱ xáʼ.

11 Nijuixnájxi̱ mu magajnáa rawuunʼ mu xúʼko̱ ma̱ndoo majmúún. Espada rígi̱ nindxu̱u̱ xíníʼ ga̱jma̱a̱ nigájnáa rawuunʼ mu magudíin mbaʼin xa̱bu̱.

12 Atatsaʼwá ga̱jma̱a̱ agáwíinʼ a̱jkia̱a̱nʼ a̱ʼdióo xa̱biya̱, numuu dí espada ni̱ʼkha̱ mu magudíin xa̱bu̱ xuajñunʼ ga̱jma̱a̱ magudíin mbá xúgíinʼ bi̱ kuya̱ edxu̱u̱ náa Israel. Espada magudíin bi̱ kuya̱ edxu̱u̱ ga̱jma̱a̱ xa̱bu̱ xuajñunʼ. Ikha jngóo araxnáá xtiyaaʼ xóo tsinaʼ dí na̱ʼkhu̱. 13 Numuu rí nijuiʼyáá májánʼ, ndiéjunʼ gárígá á mu espada tsíyoo gáʼyoo ixi̱ ñajunʼ rá. Ixi̱ ñajunʼ ni xárígá›, eʼthí Tátá Jeobá bi̱ itháán mba̱a̱.

14 Ikháán a̱ʼdióo xa̱biya̱, aratáríya̱ʼ, araxnáá ñawáanʼ ga̱jma̱a̱ atanga̱án marata̱ ajtsú nuthu: ‹¡Mbá espada!›. Nindxu̱u̱ espada dí nagudíin xa̱bu̱, espada dí nagudíin mbaʼin xa̱bu̱, espada dí naruguamiʼíin. 15 A̱jkiu̱ún mbá xúgíinʼ makáguabaaʼ, mbaʼin makhañún náa xkrugoo xuajñún, magúdíin mbaʼin ga̱jma̱a̱ espada. Xúʼko̱, ¡maxpíbínʼ xóo agiuuʼ a̱jkhu̱u̱n ga̱jma̱a̱ nigájnáa rawuunʼ mu magudíin mbaʼin! 16 Espada dí mixíníʼ, ¡atrujtu xígií náa níjñu májáanʼ! ¡Araxnáá náa níjñu xti̱ya̱a̱ʼ! ¡Ayuʼ náa na̱jkha̱ inaaʼ! 17 Ikhúún ma̱ngaa maxnu̱u̱ ñawúnʼ ga̱jma̱a̱ maxidíí mbá xúgíʼ dí nakásngañu̱ʼ. Ikhúún Jeobá, nindxu̱ʼ bi̱ ni̱tha̱ rígi̱”.

18 Nigruígú mbu̱júu̱ ajngóo Jeobá. Niʼthúnʼ: 19 “Ikháán, a̱ʼdióo xa̱biya̱ atani̱ mbá nájma̱ kamba̱a̱ mu xúʼko̱ ma̱ndoo manújngoo espádóo rey ndrígóo Babilonia. Náa ikháá ku̱ba̱ʼ magajnúu mbá nájma̱ kamba̱a̱. Gíʼmaa dí mataʼgíʼ mbá tsinaʼ* náa mawiʼtáa, ikhí magajnúu maʼga náa mbá nájma̱ xuajin. 20 Atríya̱ʼ mbá kamba̱a̱ mu maʼga espada náa Rabá náa kúwá ammonitas, ga̱jma̱a̱ i̱mba̱ kamba̱a̱ mu maʼga náa xuajin dí kúgumaʼá náa Jerusalén, náa Judá. 21 Numuu dí rey ndrígóo Babilonia niwi̱ji̱ náa nawiʼtáa mbá nájma̱ kamba̱a̱ mu marajxu̱u̱n bi̱ nuni̱ xawan. Ikhaa nixprígúu flecha, nirajxu̱u̱n xándiúu̱* ga̱jma̱a̱ ndiʼyoo xkígóo xujkhúʼ. 22 Náa ñawún mújúunʼ kayá dí nixtiʼña̱a̱ dí nirajxu̱u̱n xa̱bu̱ xawan dí naʼni jmbuu náa Jerusalén, náa nikuʼma dí mundri̱ga̱ ajua̱nʼ dí naʼni gámbóo, nikuʼma dí muradíin xa̱bu̱, mundxa̱ʼwa̱ dí muxmijná, dí mundri̱ga̱ ajua̱nʼ rí maʼni gámbóo xkrugua, dí muxu̱jxi̱ mbá rí matu̱ʼu̱u̱n ga̱jma̱a̱ mu muni̱ gámbáa, ma̱ngaa dí muni̱ xtájtsí rí muruguama̱ʼa̱n ga̱jma̱a̱. 23 Mú bi̱ nixna ajngún* náa ikhaa, maguánú mbuyáá dí nindxu̱u̱ xóo mbá xawan dí minduwaʼ. Mú ikhaa narmáʼáan a̱jkiu̱u̱n dí nikiéʼkhúún ga̱jma̱a̱ maguguiin.

24 Ikha jngóo, rígi̱ dí naʼthí Tátá Jeobá bi̱ itháán mba̱a̱: ‹Ikháanʼla ni̱ni̱ dí marmáʼáan a̱jkiu̱nʼ dí nikiéʼkala, índo̱ ni̱nila rí makujmaa dí ra̱májánʼ dí ni̱nila ga̱jma̱a̱ índo̱ ni̱ni̱ dí makujmaa aʼkhála náa mbá xúgíʼ dí ni̱nila. Xúgi̱ dí nirmáʼáan a̱jkiu̱ún kuyala magún kudáanʼ ga̱jma̱a̱ tsiaki̱i̱›.*

25 Ni̱ʼkha̱nú má mbiʼi ndrígáaʼ, ikháán bi̱ inu makhañúu, bi̱ ra̱májáanʼ bi̱ kayá edxu̱u̱ náa Israel. Ni̱ʼkha̱nú má mbiʼi rí matamíniiʼ. 26 Rígi̱ dí naʼthí Tátá Jeobá bi̱ itháán mba̱a̱: ‹Atrígúu xtíin dí grígu náa edxa̱a̱ʼ ga̱jma̱a̱ corona. Ni xánindxa̱a̱ʼ xóo nákha ginii. Atagríguii rijma̱a̱ bi̱ gíʼ mbayííʼ ga̱jma̱a̱ atagíiʼ mbayííʼ bi̱ grígu rijma̱a̱. 27 ¡Maguma gámbáa! ¡Maguma gámbáa! ¡Ma̱ni̱ gámbáa! Xánindxu̱u̱ ndrígóo nimbáa asndu índo̱ gáʼkha̱ bi̱ kaʼyoo maʼtáñajunʼ, ikhaa gáxnu̱u̱›.

28 Ikháán a̱ʼdióo xa̱biya̱, aratáríya̱ʼ rígi̱: ‹Rígi̱ dí naʼthí Tátá Jeobá bi̱ itháán mba̱a̱ ga̱jma̱a̱ numún ammonitas ma̱ngaa ga̱jma̱a̱ numuu rí nutawéñííʼ›. Marata̱: ‹¡Mbá espada! Mbá espada nigájnuu náa xtóo mu magudíin mbaʼin xa̱bu̱, nigájnáa rawuunʼ mu magudíin mbaʼin xa̱bu̱ ga̱jma̱a̱ maxpíbínʼ xóo agiuuʼ a̱jkhu̱u̱n. 29 Maski ajndu ndiyáá rí niwasngájmún* rí nindxu̱u̱ nduwaʼ, ma̱ngaa nini̱ xawan rí nduwaʼ ga̱jma̱a̱ numaaʼ,* muta̱ma̱a̱ʼ náa tsu̱du̱ún bi̱ nikháñún,* xa̱bu̱ ra̱míjíinʼ bi̱ ni̱ʼkha̱nú má mbiʼi ndrígu̱ún, mbiʼi dí maguma ngíníi. 30 Ataxúma̱a̱ʼ espada náa xtóo. Manimbánuu numaaʼ náa niraxtaa, náa ku̱ba̱ʼ dí nigumán. 31 Maxidirámuuʼ náa ikháán dí nakiʼnún. Mandijmuu náa ikháán aguʼ dí nakásngañu̱ʼ ga̱jma̱a̱ maxnajxíín náa ñawúúnʼ xa̱bu̱ ra̱míjíinʼ bi̱ najmañún nuni̱ gámbáa. 32 Mi̱ʼdxu̱nú mani̱ndxa̱a̱ʼ xóo rajxa̱ dí mi̱kha ga̱jma̱a̱ aguʼ, magadíí eʼdiaaʼ náa tsu̱du̱u̱ ku̱ba̱ʼ, ni xármáʼáan a̱jkiu̱ún kuyaaʼ, numuu dí ikhúún, Jeobá, ni̱tha̱ rígi̱›”.