Lá natayáá má ráʼ.

Xú káʼnii eskama̱a̱ aguʼ xa̱bu̱ nákha wajyúúʼ índo̱ nagájnún nagún rá.

NÁA Génesis, naʼthí rí Dios nikunguanʼ Abrahán mu maʼga̱ mitsínguánʼ mu maxnáxi̱ mbá tsigijñaʼ. Ikhí naʼthí: “Abrahán ndiyá ixi̱ rí maxnáxi̱ ga̱jma̱a̱ tsigijñaʼ ikhú nixnúu magu a̱ʼdióo Isaac, ga̱jma̱a̱ ikhaa ndiyá aguʼ ga̱jma̱a̱ chílú náa mbá ñawúunʼ ikhú nigún mbá nájmi̱i̱n” (Gén. 22:6).

Náa Biblia tséʼthi xú káʼnii eskama̱a̱ aguʼ xa̱bu̱ wajyúúʼ. Mú lá niskámuu aguʼ Abrahán ga̱jma̱a̱ Isaac ga̱jma̱a̱ nda̱wa̱á nigún ku̱ñu̱u̱n xáʼ. Mbáa xa̱bu̱ bi̱ nakro̱ʼo̱o̱ májánʼ xú káʼnii eʼthí Biblia niʼthí rí mbáa túniñanʼ rí majuiʼyúʼ aguʼ náa xúgíʼ kamba̱a̱ náa nigún. Ikhaa naku̱mu̱u̱ rí Abrahán ga̱jma̱a̱ a̱ʼdióo kuda nigún xúgíʼ rí gáʼñúnʼ mu muskama̱a̱ aguʼ.

Mú eʼwíínʼ nuthi rí nákha wajyúúʼ naʼni gakhi̱i̱ muskamaa aguʼ. Mbáa xa̱bu̱ nuskama̱a̱ aguʼ ga̱jma̱a̱ xa̱mbu̱ʼ dí rígá má. Mbáa najmún xa̱mbu̱ʼ ndrígóo imba̱a̱ xa̱bu̱. Mbaʼin bi̱ najmañún nakumu̱ún rí Abrahán ndiyáá asndu nákha wapháá xa̱mbu̱ʼ índo̱ inuu magajnúu. Nakumu̱ún rí niguejkha náa mbá daan rí kandrajka ga̱jma̱a̱ cadena (Is. 30:14). Mbáa Abrahán nijmuu xa̱mbu̱ʼ ga̱jma̱a̱ ixi̱ ma̱jkha̱ʼ índo̱ ndiyóoʼ maskámuu aguʼ.