Jesús nakujmaa náa gajtiin rurawíin e̱gi̱ʼ

Mbiʼi nda̱wa̱á dí Jesús nikujmaa náa apóstoles, Pedro ni̱jkha̱ náa lamáa ndrígóo Galilea. Tomás, Santiago, Juan ga̱jma̱a̱ eʼwíínʼ discípulos nigún gajmiún ikhaa. Kañiʼ mbruʼun ndiñíinʼ e̱gi̱ʼ, mú nimbáa turtuwiin.

I̱mba̱ néjtsuu, miʼcha̱, ndiyáá mbáa xa̱bu̱ wíji̱ náa rawunʼ iyaʼ. Asndu náa rawunʼ iyaʼ niraxu̱u̱n: “Lá nirugui̱i̱n e̱gi̱ʼ ráʼ.” Ikhiin niriʼña̱a̱ : “Nánguá”. Xa̱bu̱ niʼthúún: “Guxuʼmánʼ amaʼ náa i̱mba̱ níjniúu barca”. Nda̱wa̱á rí nixu̱ma̱ʼ amaʼ, nijtíin e̱gi̱ʼ ga̱jma̱a̱ asndu tséʼngu̱u̱n gúxuda̱a̱nʼ náa barca. Mbá nacha̱, Juan ndiʼyoo rí xa̱bu̱ buʼko̱ nindxu̱u̱ Jesús ga̱jma̱a̱ niʼthí: “¡Nindxu̱u̱ Señor!”. Pedro nijngúun náa iyaʼ mbá nacha̱ ga̱jma̱a̱ niʼniuu nadar asndu náa rawuunʼ iyaʼ. Eʼwíínʼ discípulos nigún náa barca.

Índo̱ niguánu náa rawuunʼ iyaʼ, ndiyáá rí nakha aguʼ. Trámiinʼ e̱gi̱ʼ náa inuu aguʼ ga̱jma̱a̱ pan. Jesús niʼthúún rí maguwáʼ kudiin tikhun e̱gi̱ʼ mu muni míjiinʼ. Ga̱jma̱a̱ niʼthúún: “Aguwaʼ guphiʼtsula”.

Índo̱ niguámbóo nikuiʼtsu, Jesús niraxu̱u̱ Pedro: “Lá nandaʼ xta̱yo̱ʼ itháan ki xóo e̱gi̱ʼ bugi̱ ráʼ.” Pedro niriʼñuu: “Xúʼko̱, Señor, ikháánʼ má natayáá rí ikhúúnʼ nandoo ka̱ya̱ʼ”. Jesús niʼthí: “Á mu xúʼko̱, ataxníʼtsuun mugiu̱ʼ”. Mbu̱júu̱ʼ, Jesús niraxu̱u̱: “Pedro, lá nandaʼ xta̱yo̱ʼ ráʼ.” Pedro niriʼñuu: “Señor, ikháánʼ natayáá rí nandoʼ ka̱ya̱ʼ”. Jesús niʼthúu̱n: “Atiewu̱u̱n mugiu̱ʼ”. Jesús niraxu̱u̱ ikháá má rí maʼni ajtsú nuthu. Pedro nixtáa gíná wéñuʼ ga̱jma̱a̱ niriʼñuu: “Señor, ikháánʼ natayáá xúgíʼ. Natayáá rí nandoʼ ka̱ya̱”. Jesús nindo̱ʼo̱o̱: “Ataxníʼtsuun mugiu̱ʼ”. Ga̱jma̱a̱ nda̱wa̱á niʼthúunʼ: “Ayi̱ má xúʼko̱ ki̱dxu̱ʼ”.