Kíxnuu 18

Gumbaxulúʼ májánʼ gajmiulúʼ Dió kámuu mbiʼi

Giʼmáanʼ muñajunʼ mú maguaʼda mbáá bí mambaxulúʼ májánʼ gajmiulúʼ mangoo mambaxún má xúʼko gajmiulúʼ. Rí natagimináʼ mambaxa̱ʼ má xúʼkhii̱n ga̱jma̱ʼ Dió mba̱a̱ wéñuʼ rí májánʼ ga̱ʼkha̱ náa ikháánʼ. Jesús niʼthún bí nunimbu̱u̱n ná ikhaa: «Gako maʼnejawinaʼla» (Juan 8:32). Káʼnii lá nindoo gaʼthi ríʼkhín.

Mandoo muʼnikriamijna̱ xúgi̱. Mandoo muʼni kriamijna̱ ga̱jma̱a̱ kiʼsngáá dí ragajkhun jma̱a̱ ndu̱wa̱ʼ rí nijuadraʼa Gixa̱a̱. Rí xú kuwi̱i̱n mbíʼín xa̱bu̱ bí tseniʼníí Jeobá nda̱a̱ rí guaʼti̱i̱n, ikháanʼ mandoo muʼni kawanmijna ikhí (Romanos 8:22). Bí nambáxu̱u̱n májánʼ gajmiún Dió nangua kaxmajmii jma̱a̱ «gamíí rí makañun» (Hebreos 2:14, 15).

Ná numbaa nuxi̱ʼ ndrigóó Dió mandoo makuwánʼ náa ní xáʼni kaxmajmaʼ. ¡Ra̱ʼkhá tháán tsímáá gakuwanʼ nda̱wa̱á numuu rí nánguá kaxtuʼajmáán gaʼni! Índo̱ ku̱ba̱ʼ gaʼni̱i̱ mitsaan, ní xarígá agu̱ʼ, nandii, delito. Ni xarígá tsingíná ndi ewiʼ ná xaganianʼ ná xakañulúʼ, xúʼkhii̱n má rí ná xamiñulúʼ, ná xa̱jma̱gináanʼ, ná xuniulúʼ dí ra̱májánʼ. Ná Biblia naʼthi: «Xógíʼ rí mejanʼ kámí káxi rí guaxnaʼlu, ikhaa ríʼkui e̱ʼkha̱ rijma̱a̱ náa Dió» (Santiago 1:17).

Bí nambáxu̱u̱n májánʼ gajmiún Dió makuwá kámuu mbiʼi. Bí nduyááʼ mumbaxún májánʼ gajmiún Dió ikhaa gaminu̱nʼ rí giʼdo wéñuʼ numuu, makuwá kámuu mbiʼi (Romanos 6:23). Atatsawáminaʼ mbá xngaa káʼnii eyo gaʼthi rí maraxtaa kámuu mbiʼi.

Maríga̱ mbiʼi muʼni mbaʼa rí enigulúʼ. Mbáá ajndu maʼndulúʼ ma̱jma̱ñulúʼ muʼdi̱i̱ mbóó ajua̱nʼ, muʼni mixtiúu náa i̱yi̱i̱ʼ kámí muʼthaa xajpa. Mbáá maʼndulúʼ muʼniga̱jma̱a̱ xú ekúwi̱i̱n xujkú ga̱jma̱a̱ xú e̱jkha̱ ragaja̱a̱ xúgíʼ ri̱ʼi̱. Mbáá ajndu maʼndulúʼ muʼgua muniʼnu̱ʼ imbá ni̱ʼkha̱ xuajen xúʼkhii̱n má xa̱bu̱. Numuu rí makuwánʼ kámuu mbiʼi, mandoo muʼni xúgíʼ rígi̱.

Maguapháanʼlú mambaxulúʼ májánʼ gajmiulúʼ mbíʼín. Numuu rí mukuwá kámuu mbiʼi, mandoo muniʼnúnʼ mbíʼín bí nambáxu̱u̱n májánʼ gajmiún Dió. Muniʼnu̱ʼ rí ejmañún nuni mangoo xú xa̱bu̱ nindxu̱u̱n, xúʼkhii̱n má mangoo mumbaxulúʼ májánʼ gajmiulúʼ. Maʼndulúʼ kuʼñún, mangiin maʼndún kuyulúʼ (1 Corintios 13:8). Numuu rí makuwánʼ kámuu mbiʼi, mandoo mumbaxulúʼ májánʼ gajmiulúʼ xúgínʼ xa̱bu̱ numbaa. Dí itháan májánʼ gaʼni, índo̱ ga̱ʼga̱ rakrujngoo tsiguʼ rí nambáxulúʼ májánʼ gajmiulúʼ Jeobá ma̱ʼga̱ rajo̱o̱ itháan. ¡Gambaxulúʼ májánʼ gajmiulúʼ Dió kámuu mbiʼi!