Ndíjkha rí gíʼmaa magimbáanʼ mu mbuʼyamajkuíí Dios rá.

1-3. a) Xú káʼnii eʼyáá rí reunión nigiʼdoo wéñuʼ numuu náa cristianos rá. (Atayáá timbá xtiʼkhu.) b) Ndiéjunʼ guʼyáá náa imbo̱o̱ artículo rá.

CORINNA gíʼdoo 17 tsiguʼ índo̱ rudúu nirugua ga̱jma̱a̱ nigún ku̱ya̱a̱ guʼwá ejuanʼ mitsínguanʼ wéñuʼ mu maʼni ñajunʼ gakhii. Nda̱wa̱á nigún ku̱ya̱a̱ Corinna náa Siberia, rí naguanu mitsínguanʼ wéñuʼ náa goʼwóo. Ikhí nini rí mañajunʼ náa mbá granja ga̱jma̱a̱ nini gínáa wéñuʼ. Nguáná nutsudaa mañajunʼ rexa̱a̱ náa naʼni miguwan wéñuʼ ga̱jma̱a̱ na̱nguá exná chamarra. Maski ajndu xúʼko̱, Corinna ga̱jma̱a̱ imba̱a̱ Testigo nithi rí muni xó má eʼngoo mu magún mbá reunión dí naguanu tsínguanʼ náa granja.

² Najmiin nigún mbá wakhi ga̱jma̱a̱ nigún mbá 25 kilómetros (15 millas) asndu náa naguiji tren. Corinna niʼthí: “Tren nigájnuu a las dos rí mbruʼun, ga̱jma̱a̱ ndijyuʼ mbá majun hora. Índo̱ niguájtaxo ndiyóoʼ muʼguáxú mbá 10 kilómetros [6 millas] asndu náa narígá reunión”. Corinna tagáwinʼ a̱jkiu̱u̱n rí nijkha mitsínguanʼ wéñuʼ. Ikhaa niʼthí: “Náa reunión ninigajmaaxu i̱yi̱i̱ʼ Bi̱ Nayejngoo ga̱jma̱a̱ ninixu ajmúú ndrígóo Reino. Rígi̱ nixnuxú wéñuʼ tsiakii ga̱jma̱a̱ niʼni itháán mba̱a̱ fe ndrígúxúʼ”. Ajtsú mbiʼi nda̱wa̱á nitangiin náa granja. Ga̱jma̱a̱ bi̱ kayá edxu̱u̱ náa granja nitháan táʼyoo rí ikhiin nigájnun.

³ Reunión nigiʼdoo má xúʼko̱ numuu náa xa̱bi̱i̱ Dios. Mbá xkri̱da, timbíi̱n cristianos ninigunʼ wéñuʼ rí magimbiin mu mbuyamajkuíí Jeobá ga̱jma̱a̱ rí majmañún numuu ikhaa (Hech. 2:42). Xúgiáanʼ nanigulúʼ mu̱ʼgua̱ reunión. Mú mbáa tikhuan naʼniulú mingíjyúuʼ mu̱ʼgua̱ xúgíʼ. Mbáa ndayóoʼ muñajunʼ mbaʼa horas, mbáa kuaʼdáá mbaʼa rí muʼni o neʼngulú wéñuʼ. Ndiéjunʼ gambáyulú mu xandatigulú reunión rá.^[1] (Atayáá nota rí na̱ʼkha̱ náa námbá artículo). Xú káʼnii gándoo gumbaʼñúún bi̱ nuʼnigajmaa gajmiúlú ga̱jma̱a̱ eʼwíínʼ xa̱bu̱ mu magún reunión rá. Náa artículo guʼyáá ajtsú eni. Timbá, náa numuu rí májánʼ mu̱ʼgua̱ reunión. Raga̱jma̱, náa numuu rí nambáñunʼ eʼwíínʼ rí muʼgua reunión. Ga̱jma̱a̱ ragajtsú, náa numuu rí Jeobá naniguʼ rí mu̱ʼgua̱ reunión^[2] (atayáá nota rí na̱ʼkha̱ náa námbá artículo).

NÁA NUMUU RÍ MÁJÁNʼ MU̱ʼGUA̱ REUNIÓN

4. Xú káʼnii embáyulú reunión mu muniʼnííʼ itháán májánʼ Jeobá rá.

⁴ Náa reunión najuiʼsngulú. Ikhí nambáyulúʼ muniʼniiʼ itháán májánʼ Jeobá. Xú káʼnii rá. Mbá xkri̱da, mbaʼa congregación dí rígá náa numbaaʼ ninigajmaa xíjkho̱o̱ libro Acerquémonos a Jehová náa reunión. Ndiéjunʼ nikumulú índo̱ niʼthá xú káʼnii nindxu̱u̱ Dios ga̱jma̱a̱ índo̱ niʼdxawíín xú káʼnii kumún a̱ngiu̱lú ga̱jma̱a̱ numuu ikhaa. Mbáa niʼni rí maʼndulú kuʼyáá itháán Jeobá. Ma̱ngaa, náa reunión najmañulú itháán ga̱jma̱a̱ numuu Biblia índo̱ nudxaʼwíín discursos, demostración ga̱jma̱a̱ texto rí nuraxnulú (Neh. 8:8). Ga̱jma̱a̱ xúgíʼ xmáná nuxkaʼmaa rí gíʼdoo wéñuʼ numuu índo̱ nuʼniratamijná rí magixnuu náa Biblia ma̱ngaa nudxaʼwíín rí nuthi a̱ngiu̱lú.

5. Xú káʼnii nimbáyaʼ reunión náa marataráʼa ga̱jma̱a̱ xóo maraxtaa rá.

⁵ Reunión xóo náa nuʼnigajmaa i̱yi̱i̱ʼ Bi̱ Nayejngoo naʼsngúlúʼ muʼni rí najmañulú náa Biblia (1 Tes. 4:9, 10). Mbá xkri̱da, mbáa nguáná niʼnigajmaa̱ mbá artículo rí nixnulú tsiakii mu muʼni itháán ñajunʼ Jeobá, muʼtajkhan itháán májánʼ o muʼni mba̱a̱ a̱jkiulú kuʼyáá mbá ndxájulú bi̱ niʼningawúlú. Ga̱jma̱a̱ náa reunión rí kuaʼdáá náa xmáná najmañulú xóo muʼtáraʼa ga̱jma̱a̱ xóo muʼsngúun eʼwíínʼ xa̱bu̱ rí gajkhun rí naʼsngáa náa Biblia (Mat. 28:19, 20).

6. Xú káʼnii exnulú tsiakii reunión rá.

⁶ Náa numuu rí reunión naxnúlú tsiakii. Numbaaʼ ndrígóo Satanás naʼni makaguabaʼ fe ndrígúlú ga̱jma̱a̱ rí makuwanʼ gíná. Mú reunión naxnúlú tsiakii mu muʼni má xúʼko̱ ñajunʼ Jeobá (atraxnuu Hechos 15:30-32). Mbaʼa ikhoo ikhí nuʼthá xú káʼnii nimbánuu rí kiʼtáriyaʼ náa Biblia. Rígi̱ nambáyulúʼ itháán mu mbuʼyáá gajkhun rí Jeobá maʼni mbanuu rí nikudaminaʼ. Ma̱ngaa, a̱ngiu̱lú nuxnulú tsiakii índo̱ nuxná discursos ga̱jma̱a̱ demostración, mú ma̱ngaa índo̱ nuthi rí nijmañún ga̱jma̱a̱ índo̱ nuni ajmúú náa Jeobá ga̱jma̱a̱ xúgíʼ a̱jkiún (1 Cor. 14:26). Imbo̱ʼ rí naxnúlú tsiakii nindxu̱u̱ rí muʼthámijna gajmiúlú ikhiin nakha xóó tsigiʼduu ga̱jma̱a̱ nda̱wa̱á rí nijngoo reunión, numuu rí nduʼyáá rí kuaʼdiin mbaʼin bi̱ naxmiéjunʼ kuyulúʼ (1 Cor. 16:17, 18).

7. Ndíjkha rí gíʼdoo wéñuʼ numuu makuwáanʼ náa reunión rá.

⁷ Náa numuu rí náa reunión Dios nambáyulú ga̱jma̱a̱ xi̱ʼ kaʼwu ndrígóo. Jesús najmuu xi̱ʼ kaʼwu ndrígóo Dios mu maxnún ikha congregación. Ikha niʼthí rí gíʼmaa muʼdxuun ‹rí xi̱ʼ naʼthúu̱n congregación› (Rev. 2:7). Xi̱ʼ kaʼwu ma̱ndoo mambáyulú mu muraʼníí tsáʼkhá, xamiñulú mutaráʼa ga̱jma̱a̱ muraʼwíí májánʼ rí muʼni. Ikha jngó gíʼdoo wéñuʼ numuu rí muʼni xúgíʼ rí naʼngoo mu makuwáanʼ má xúʼko̱ náa Reunión. Xúʼko̱ Dios mambáyulúʼ ga̱jma̱a̱ xi̱ʼ kaʼwu ndrígóo.

NÁA NUMUU RÍ NAMBÁÑUN EʼWÍÍNʼ RÍ MU̱ʼGUA̱ NÁA REUNIÓN

8. Xú káʼnii embáʼñúún eʼwíínʼ rí najkualú náa reunión rá. (Atayáá kúgumaʼá “Xtáá itháán májánʼ nda̱wa̱á rí nijngoo reunión”.)

⁸ Náa reunión ma̱ndoo musngajmá rí nandulúʼ kuʼñúún a̱ngiu̱lú. Mbaʼin a̱ngiu̱lú naʼnguun nuraʼníí xkujndu rí gakhii wéñuʼ. Apóstol Pablo niʼniramaʼ: “Gíʼmaa muniʼnúnʼ májánʼ wéñuʼ eʼwíínʼ” (Heb. 10:24, 25). Ga̱jma̱a̱ ajngáa rígi̱, Pablo nindoo gáʼthi rí gíʼmaa maxmiéjunluʼ kuʼñúún eʼwíínʼ. Mbá rí xó ma̱ndoo muʼni nindxu̱u̱ rí magimbánʼlu mu muxnamíjnálu tsiakii. Índo̱ na̱jkhua̱ náa reunión, nusngajmún a̱ngiu̱lú rí nandulú makuwanʼ gajmiúlú ikhiin, mu muʼtamijna gajmiúlú ga̱jma̱a̱ rí mbuʼyáá xú káʼnii kúwi̱i̱n. Ma̱ngaa nuxnún tsiakii índo̱ nuʼthá rí najmañulúʼ ga̱jma̱a̱ índo̱ nuʼni ajmúú náa Jeobá ga̱jma̱a̱ xúgíʼ a̱jkiu̱lú (Col. 3:16).

9, 10. a) Ndíjkha rí naxkaxanʼ muʼgua reunión ajngáa rí niʼthí Jesús náa Juan 10:16 rá. b) Xú káʼnii embáñuun a̱ngiu̱lú bi̱ na̱nguá guaʼdiin a̱ngiu̱ún bi̱ nunigajmaa índo̱ najkhua reunión rá.

⁹ Índo̱ najkhua náa reunión nuñambá mu makuwáá mbá kambaxun náa congregación (atraxnuu Juan 10:16). Jesús niʼthí rí ikhaa nindxu̱u̱ xóo mbáa báxtúu ga̱jma̱a̱ rí xa̱bi̱i̱ ni̱ndxu̱ún xóo mbá jnduʼ mugu̱. Náa mbá jnduʼ mugu̱, kuwa má xúʼko̱ jnduʼ ga̱jma̱a̱ nagún kidxu̱u̱ báxtúu. Á mu a̱jmi̱i̱n mugu̱ kuwa náa mbá kúbá, a̱jmi̱i̱n mugu̱ kuwa náa mbá matha ga̱jma̱a̱ i̱mbaa mugu̱ xtáa imba niʼkhá, lá ma̱ndoo muʼthá rí witsiin mugu̱ buʼko̱ kuwa jnduʼ ráʼ. Xúʼko̱ má káʼnii nindxu̱u̱, á mu nandulúʼ manindxulú ‹mbá jnduʼ mugu̱› bi̱ nagún kidxu̱u̱ ‹mbáwíi báxtúu›, gíʼmaa muʼgua má xúʼko̱ reunión mú makuwáanʼ mbá jnduʼ gajmiúlú a̱ngiu̱lú.

¹⁰ Reunión nambáyulú makuwanʼ mbá kambáxulú ga̱jma̱a̱ manindxulúʼ xóo mbá guʼwáanʼ bi̱ nandulúʼ kuyamijná (Sal. 133:1). Tikhun a̱ngiu̱lú nimininʼ numuu rí anún o a̱ngiu̱ún nánguá eñún kuñún numuu rí ni̱ndxu̱ún xa̱bi̱i̱ Jeobá. Mú Jesús nikudaminaʼ rí maxnún bi̱ maʼndún kuñún ga̱jma̱a̱ bi̱ mañeun (Mar. 10:29, 30). Á mu tsetigulú reunión, a̱ngiu̱lú bugi̱ ma̱ndoo mbuyulú xóo anún o a̱ngiu̱ún ga̱jma̱a̱ maxnún tsiakii. Á mu nundxaʼwamijna rígi̱, mbáa muʼni xó má eʼngoo mu xandátigulú nimbá reunión.

NÁA NUMUU RÍ JEOBÁ NANIGUʼ MU̱ʼGUA̱ REUNIÓN

11. Xú káʼnii embáyulú reunión mu muxnáa Jeobá rí kaʼyoo rá.

¹¹ Numuu rí náa reunión nuxnáa Jeobá rí kaʼyoo. Numuu rí Jeobá niʼniáanʼ, kaʼyoo rí muxnáa numaʼ ga̱jma̱a̱ rí mbuyamajkuíí ma̱ngaa rí muʼni mba̱a̱ (atraxnuu Revelación 7:12).a Rígi̱ nuʼni náa reunión índo̱ nuʼtajkhan, nuʼni ajmúú ga̱jma̱a̱ índo̱ nuʼthá ga̱jma̱a̱ numuu ikhaa. Xúgíʼ xmáná ma̱ndoo muʼni mba̱a̱ Jeobá.

12. Xú káʼnii eku̱mu̱u̱ Jeobá índo̱ nunimbulú xtángoo rí muʼgualú reunión rá.

¹² Numuu rí Jeobá niʼniáanʼ, gíʼmaa munimbulú kuʼyáá. Ikhaa naʼthulú rí magimbáan má xúʼko̱, itháán rí na̱ʼkha̱ rajngiyuu fin. Jeobá xtáa gagi índo̱ nuʼnimbanii xtángoo rúʼko̱ (1 Juan 3:22). Ikhaa ndaʼyoo tsiakii rí nuʼni mu muʼgualú reunión ga̱jma̱a̱ ndaʼyoo rí gíʼdoo numuu (Heb. 6:10).

13, 14. Xú káʼnii embáyulú reunión mú mu̱ʼgua̱ kanuu náa Jeobá ga̱jma̱a̱ náa Jesús rá.

¹³ Índo̱ nagimbánlú nusngajmá Jeobá rí nandulúʼ mu̱ʼgua̱ kanuu itháan náa ikhaa ga̱jma̱a̱ náa A̱ʼdióo. Náa reunión nuʼnigajmaa Biblia ga̱jma̱a̱ najmañulúʼ ndiéjunʼ eyoo Jeobá muʼnilú (Is. 30:20, 21). Asndu xa̱bu̱ bi̱ na̱nguá eni ñajunʼ Jeobá bi̱ naguwaʼ náa reunión nduyáá rí ikhaa naxná ikha (1 Cor. 14:23-25). Numuu rí Jeobá naxná ikha náa reunión ga̱jma̱a̱ xi̱ʼ kaʼwu ndrígóo, rí najmañulúʼ ikhí na̱ʼkha̱ náa ikhaa. Ikha jngó índo̱ najkhualú náa reunión, ma̱ndoo mudxaʼwíín rí naʼthúlúʼ Dios ga̱jma̱a̱ makumulu rí nandoo kaʼyulú wéñuʼ. Xúʼko̱ káʼnii rí najkhua kanuu itháán náa ikhaa.

¹⁴ Jesús naxná ikha náa congregación cristiana. Ikhaa niʼthí: “Naʼ juhua ajmi o atsun nimbaxin gajma mbiʼ- yuʼ, iki naʼ majñu xtaloʼ” (Mat. 18:20). Ma̱ngaa náa Biblia naʼsngáa rí Jesús ‹xtáa náa majñuʼ› congregación (Rev. 1:20–2:1). Rígi̱ nandoo gáʼthúu̱n rí ikhaa naxná ikha. Ikha jngó índo̱ na̱jkua̱ náa reunión, na̱jkua̱ kanuu itháan náa Jesús. Nduʼyáá gajkhun rí Jeobá ga̱jma̱a̱ Jesús xtáa gajma̱áʼ nindxulúʼ ma̱ngaa nuxnulú tsiakii índo̱ kuwán náa reunión. Xú káʼnii tatsawaminaʼ ikháánʼ rí naku̱mu̱u̱ Jeobá índo̱ ndaʼyoo xúgíʼ tsiakii rí natani midxuʼ kanuu náa ikhaa ga̱jma̱a̱ náa A̱ʼdióo xá.

15. Ndiéjunʼ esngajmáá Jeobá índo̱ na̱jkua̱ náa reunión rá.

¹⁵ Numuu rí índo̱ najkhua reunión nusngajmá Jeobá rí nandulú munimbulú kuʼyáá. Ikhaa tsetsudánʼ munimbulú xtángoo rí magimbáan (Is. 43:23). Ndiéjunʼ gúʼni á mu jefe ndrígúlú nandaʼa rí muñajunʼ wéñuʼ rí asndu xándoo mu̱ʼgua̱ xúgíʼ reunión rá. Ndiéjunʼ gúʼni á mu Xa̱bu̱ Ñajunʼ naʼthulú rí á mu nagimbáanʼ, mbaʼyóoʼ muʼninumá mbá multa, mu̱ʼgua̱ guʼwá e̱jua̱nʼ o mudrigú mbá castigo itháán gakhii rá. Ndiéjunʼ gúʼni á mu nandulúʼ mandatígulú mbá reunión mu muʼni imbáa ñajunʼ rá. Ikhú guraʼwíí mbá rí muʼnilú (Hech. 5:29). Á mu nuraʼwíí munimbulú kuʼyáá Jeobá ga̱jma̱a̱ na̱jkua̱ náa reunión, musngájma rí nandulúʼ kuʼyáá ga̱jma̱a̱ rí ikhaa kaʼyoo matulú ndiéjunʼ gíʼmaa muʼni (Rom. 6:17). Rígi̱ maʼni rí maxtáa gagi (Prov. 27:11).

XUNIʼÑÁÁ RAGIMBÁAN

16, 17. a) Xú káʼnii eʼyáá rí reunión nigiʼdoo wéñuʼ numuu náa cristianos nákha timbá siglo rá. b) Xú káʼnii ndiʼyoo rí magimbáanʼ George Gangas rá.

¹⁶ Nda̱wa̱á rí ndxa̱a̱ Pentecostés tsiguʼ 33, bi̱ cristianos “nini má xúʼko̱ rí nisngáa apóstoles ma̱ngaa nagimbíin” (Hech. 2:42). Xó muʼthá, nini má xúʼko̱ reunión mu mbuyamajkuíí Jeobá. Ga̱jma̱a̱ tuniñaʼ ragimbiin maski ajndu nixkhún Xa̱bu̱ Ñajunʼ romano mangiin xa̱bu̱ ede̱ judíos. Niʼni mingijyuʼ, mú nini xó má eʼngoo mu magimbíin.

¹⁷ Rí mbiʼi xúgi̱, xa̱bi̱i̱ Jeobá nuxnálú numaʼ wéñuʼ rí nandoo nagimbáanʼ. Gundxaʼwámijna náa xkridoo ndxájulú George Gangas, bi̱ ninindxu̱u̱ mbáa bi̱ Cuerpo Gobernante itháán rí 22 tsiguʼ. Ikhaa niʼthí rí magimbáanʼ gajmiúlú a̱ngiu̱lú nixnúu wéñuʼ tsiakii ga̱jma̱a̱ rígi̱ ninigu itháán xúgíʼ mbiʼi rí nixtáá. Ikhaa naniguu maʼga̱nú ginii náa guʼwá nagimbáanʼ ga̱jma̱a̱ ikhaa máʼgaa nda̱wa̱á kayuʼ. Ra̱ʼkhá tháán naʼni maxtáa gagi índo natamijna gajmiin a̱ngiu̱lú, rí niʼthí: “Índo̱ xtáá gajminʼ ikhiin nakumu rí xtáá náa goʼwo gajminʼ bi̱ kuwa ikhí, náa paraíso rí na̱ʼkha̱ ná Dios”. Ga̱jma̱a̱ niʼthí xóo rí phú nandoo rí magimbíin gajmii a̱ngui̱in.

18. a) Ndiéjunʼ ekumaaʼ ikháánʼ ga̱jma̱a̱ numuu reunión rá. b) Ndiéjunʼ gataʼgíʼ matani rá.

¹⁸ Lá nakuma mangáán xóo ndxájulú Gangas rá. Á mu rí xúʼko̱, atani xóo má eʼngoo mu maraxtaa gajmiáanʼ a̱ngia̱nʼ náa reunión, maski nguáná maʼni mingíjyúuʼ. Atasngájmáá Jeobá rí ikháánʼ nakumaʼ xó ma rey David, bi̱ niʼthí rí nandoo kaʼyoo náa nduyamajkuíí Jeobá (Sal. 26:8).