Xú káʼnii gárasngún e̱jña̱ʼ

Índo̱ Jeobá niʼnii bi̱ kuwa náa mbá guʼwíin, bi̱ a̱nún e̱ji̱n nixnúún ñajunʼ rígi̱ muni, rí muñewu̱u̱n e̱jñún (Colosenses 3:20). Ikháánʼ dí ni̱ndxa̱ʼ anu̱ún e̱ji̱n, kaʼyaʼ marasngúún rí maʼndún kuyáá Jeobá mu xúʼko̱ índo̱ gáʼni xa̱bu̱ wanii majmañún xóo muni (2 Timoteo 1:5; 3:15). Ma̱ngaa gíʼmaa ma̱ta̱ya̱a̱ ndiéjunʼ rí gíwanʼ náa a̱jkiún. Mú, magiʼdoo wéñuʼ numuu á mu rí ikháánʼ natagíiʼ májánʼ xkri̱da. Itháan májánʼ rí ikháánʼ ginii maraʼdáá náa a̱jkia̱nʼ Ajngá rawunʼ Dios mu xúʼko̱ ma̱ndoo marasngúún e̱jña̱ʼ (Salmo 40:8).

1 ATAMBÁÑÚN E̱JÑA̱ʼ MUTAMIJNÁ GA̱JMA̱Á NI̱NDXA̱ʼ

RÍ E̱ʼKHA̱ RAʼTHÍ NÁA BIBLIA: “Mamba su icanʼla guiʼma nacha maguiʼ ñajun maʼdxaun ri ajŋga ñajunʼ ŋacun, mañu guiʼma maʼtin” (Santiago 1:19). Gajkhun má rí ikháánʼ maʼndaʼ rí e̱jña̱ʼ maʼndún mutamíjná ga̱jma̱á ni̱ndxa̱ʼ. Mú mbaʼyóoʼ rí ikháánʼ matasngajmúún rí nandaʼ matadxun rí ethi mbámbá rí ikhiin gáʼñunʼ. Xákiʼnán mú xúʼko̱ e̱jña̱ʼ maʼndún mutamijná ga̱jma̱á ni̱ndxa̱ʼ (Santiago 3:18). Á mu ikhiin nduyáá rí nakiʼnán o naratá númun, mbáa ikhiin xútha̱nʼ mbájmbúún. Gaʼngo̱o̱ a̱jkia̱nʼ ga̱jma̱a̱ arathún má xúʼko̱ rí nandaʼ xtañún (Mateo 3:17; 1 Corintios 8:1).

RÍ MA̱NDOO MATANI:

• Araxtaa xawii índo̱ e̱jña̱ʼ gáʼndún maratamíjna̱ gajmiáanʼ

• Aratámíjná má xúʼko̱ gajmiáanʼ e̱jña̱ʼ raʼkháa i̱ndó índo̱ narígá xkujndu

2 ATAGÍʼ MAKRUAʼAʼ NDIÉJUNʼ RÍ PHÚ EÑÚN GÚTHI

RÍ E̱ʼKHA̱ RAʼTHÍ NÁA BIBLIA: “Bi̱ ndaʼyoo dí gáʼkha̱ nda̱wa̱á náa mbóo rí nandoo maʼni, makhánúu rí májánʼ” (Proverbios 16:20). Nguáná mataʼgíiʼ ma̱ta̱ya̱a̱ náa numuu ethi xúʼko̱ kaʼnii mu ma̱ta̱ya̱a̱ ndiéjunʼ rí phú endxa̱ʼwa̱a̱ edxu̱ún. Nguáná jiáma ga̱jma̱a̱ wa̱ʼxa̱ʼ mbaaʼ nuthi o nuthi mbá rí tsindxa̱ʼwa̱a̱ edxu̱ún. “Índo̱ mbáa nariʼña nákha xóó tseʼdxuun dí xtáa rarígá, xúʼko̱ esngájma dí skágunʼ nindxu̱u̱.” (Proverbios 18:13.) Ikha jngó xákiʼnán nacha̱ (Proverbios 19:11).

RÍ MA̱NDOO MATANI:

• Ginii atagíʼ matadxun xúgíʼ rí gáʼtháanʼ a̱ʼdiáaʼ, xátadxaʼwajmáa maski ajndu xánigua̱ʼ rí gáʼthi

• Garmáʼáan a̱jkia̱nʼ xú káʼnii niku̱ma̱ʼ ga̱jma̱a̱ ndiéjunʼ rí nigiʼdoo numuu nitayáá ikháánʼ nákha xtaʼdáá tsiguaʼ xóo ikhiin

3 MBÓÓ DÍ GUNDXAʼWA̱A̱ EDXA̱LA

RÍ E̱ʼKHA̱ RAʼTHÍ NÁA BIBLIA: “Atadxun, a̱ʼdióoʼ índo̱ naxpriguaʼ ana̱ʼ, ga̱jma̱a̱ xátatsiʼñáʼ xtángoo ndrígóo ru̱dáʼ” (Proverbios 1:8). Jeobá nirajkuáa ñawúúnʼ nájmi̱i̱n rí mutañajúnʼ e̱ji̱n. Nájmi̱i̱n gíʼmaa musngúún e̱jñún rí maguaʼdáá gamajkhún ga̱jma̱a̱ rí munimbu̱u̱n (Efesios 6:1-3). E̱ji̱n naguanu nduyáá índo̱ a̱nún na̱nguá ‹endxaʼwamíjna̱ mbóó› (1 Corintios 1:10). Ikha jngó, á mu rígá mbá rí na̱nguá embánala, xúgi̱ʼda̱la náa inún e̱jña̱la, numuu dí rígi̱ gáʼni rí ikhiin xúyamajkuala.

RÍ MA̱NDOO MATANI:

• Gutamíjnala xóo guxprigún e̱jña̱la

• Á mu na̱nguá endxa̱ʼwa̱míjna̱ mbóó rí xú káʼnii guxprígún e̱jña̱la, ataniminaʼ makruaʼaʼ ndíjkha jngó xúʼko̱ endxa̱ʼóo edxu̱u̱ bi̱ ndiyáa

4 ATRÍYAʼ MÁJÁNʼ AWAN

RÍ E̱ʼKHA̱ RAʼTHÍ NÁA BIBLIA: “Arasngáá dxámá maʼga̱ náa kamba̱a̱ rí kaʼyoo” (Proverbios 22:6). Á mu nandaʼ rí e̱jña̱ʼ majuiʼsngúún májánʼ. Ndayóoʼ matríyaʼ awan rí xú káʼnii marasngáá ga̱jma̱a̱ rí mataxpriguii (Salmo 127:4; Proverbios 29:17). Rí mataxpríguii a̱ʼdiáaʼ tsíyoo gáʼthi rí i̱ndó xáraxna̱a̱ dí naniguʼ ikhaa ma̱ngaa matambáyii makro̱ʼo̱o̱ náa numuu rí naratháán maʼni xúʼko̱ kaʼnii (Proverbios 28:7). Ma̱ngaa arasngúún manigunʼ muraxnuu Ajngá rawunʼ Dios ga̱jma̱a̱ mugíiʼ mbuyáá xú káʼnii nindxu̱u̱ ikha rí na̱ʼkha̱ ikhí (Salmo 1:2). Xúʼko̱ magún rundxa̱ʼwa̱míjna̱ rí májánʼ (Hebreos 5:14).

RÍ MA̱NDOO MATANI:

• Atani tsiakimínaʼ rí e̱jña̱ʼ mbuyáá Dios xóo mbáa bi̱ ndaʼya bi̱ ma̱ndoo maku̱mún kuyáá

• Atambáñún mawiñunʼ kuyáá rí maʼni gachúu rí xú káʼnii endxa̱ʼwa̱míjna̱, xóo dí nakujmaa náa Internet o índo̱ nutamijná gajmiún eʼwíínʼ náa Internet. Arathúún dí xúniñami̱jna̱ rí mbáa xa̱bu̱ maguguin o nandún mutsijmiin