Lá nuʼsngáa májánʼ ga̱jma̱a̱ numuu Biblia ráʼ.

1. Ndiéjunʼ ñajunʼ kuaʼdáá xúgiáanʼ publicadores bi̱ nuʼsngáa ga̱jma̱a̱ numuu Biblia rá.

¹ Nimbáa xándoo maʼga̱nú mani̱ndxu̱u̱ xa̱bi̱i̱ Dios á mu raʼkháa ikhaa “gaʼka jaya” (Juan 6:44). Maski ajndu xúʼko̱, ikháanʼ kaʼyulúʼ mumbañún xa̱bu̱ mu magún kanuu náa Anu̱ún bi̱ xtáa mekhuíí (Sant. 4:8). Mu muʼni rígi̱ ndayóoʼ rí muʼniratamijná májánʼ. Mu mumbáñuun makru̱ʼu̱u̱n Ajngáa rawunʼ Dios ga̱jma̱a̱ mu muni ñajunʼ ikhaa, raʼkháa i̱ndó ndayóoʼ mundu̱ʼu̱u̱n dí muraxnuu kutriga̱ ga̱jma̱a̱ rí muriʼña̱a̱ graxe̱ rí tima náa i̱yi̱i̱ʼ.

2. Ndiéjunʼ eyóoʼ muʼni mu muʼsngáa májánʼ ga̱jma̱a̱ numuu Biblia rá.

² Mu miʼsngáa májánʼ ga̱jma̱a̱ numuu Biblia, publicador gíʼmaa mambáyúu xa̱bu̱ bi̱ naʼsngóo mu maʼni rígi̱: 1) Makro̱ʼo̱o̱ rí naʼsngáa náa Biblia, 2) maʼnimbo̱o̱ rí naʼsngáa Biblia ga̱jma̱a̱ 3) maʼnimbánuu xó má xtáa rajmañuu (Juan 3:16; 17:3; Sant. 2:26). Ma̱ndoo mbajyúuʼ mbaʼa igu̱nʼ mu maʼni rígi̱, mú mámbá rí naʼni rígi̱ ndayóoʼ mu xúʼko̱ xa̱bu̱ bi̱ najuiʼsngáá mambaxúu itháan ga̱jma̱a̱ Jeobá ma̱ngaa rí maʼndoo maxnáximinaʼ náa ikhaa.

3. Ndiéjunʼ graxe̱ gíʼmaa muʼni á mu nandulúʼ muʼsngáa itháan májánʼ ga̱jma̱a̱ numuu Biblia, ga̱jma̱a̱ náa numuu rá.

³ Ndiéjunʼ endxa̱ʼwáminaʼ xa̱bu̱ bi̱ nuʼsngáá numuu Biblia rá. Mu mbuʼyáá á mu bi̱ nuʼsngáá ga̱jma̱a̱ numuu Biblia nakro̱ʼo̱o̱ ga̱jma̱a̱ naʼnimbo̱o̱ rí xtáa raʼsngáa náa Biblia, gíʼmaa muniʼñáaʼ rí ikhaa maʼthí, raʼkháa i̱ndó ikháanʼ gúʼthá xúgíʼ (Sant. 1:19). Lá nakro̱ʼo̱o̱ dí naʼthí náa Biblia ga̱jma̱a̱ numuu tema rí xtáa rajmañuu xáʼ. Lá ma̱ndoo maʼthí ga̱jma̱a̱ ajngóo xáʼ. Xú káʼnii endxa̱ʼwáminaʼ ga̱jma̱a̱ numuu rí xtáa rajmañuu xá. Lá ndaʼyoo rí Biblia naʼsngáa rí gajkhun ga̱jma̱a̱ rí naʼthí jmbu ráʼ. (1 Tes. 2:13.) Lá nakro̱ʼo̱o̱ rí gíʼmaa mariʼkuminaʼ xáʼ. (Col. 3:10.) Mu mbuʼyáá ndiéjunʼ phú endxa̱ʼwáminaʼ bi̱ nuʼsngáá, gíʼmaa mbuʼyáá májánʼ ndiéjunʼ graxe̱ gúʼni̱i̱, mú gíʼmaa muʼni ga̱jma̱a̱ gamajkhu, ga̱jma̱a̱ nda̱wa̱á muʼdxawíín rí gáʼthi (Mat. 16:13-16).

4. Ndiéjunʼ gíʼmaa muʼni á mu bi̱ nuʼsngáá naʼniu mingíjyúuʼ makro̱ʼo̱o̱ o naʼniu mingíjyúuʼ maʼnimbánuu tikhuu kiʼsngáa ndrígóo Biblia rá.

⁴ Rí xú káʼnii endxa̱ʼwáminaʼ mbáa xa̱bu̱ ga̱jma̱a̱ costumbre ndrígóo gíwanʼ náa a̱jkiu̱u̱n asndu nákha chíʼgíʼ, ikha jngó mbajyúuʼ mu mariʼkhu̱u̱ (2 Cor. 10:5). Ndiéjunʼ gúʼni á mu xa̱bu̱ bi̱ nuʼsngáá ndajyúuʼ mu maʼnimbo̱o̱ o magíʼ maʼni rí ejmañuu xá. Ndaʼyóoʼ maʼngo̱o̱ a̱jkiu̱lú ga̱jma̱a̱ gíʼmaa muguaʼthi̱i̱nlú mu Ajngáa rawunʼ Dios ga̱jma̱a̱ xi̱ʼ kaʼwu gáʼni rí mariʼkhu̱u̱ a̱jkiu̱u̱n xa̱bu̱ (1 Cor. 3:6, 7; Heb. 4:12). Á mu naʼniuu mingíjyúuʼ makro̱ʼo̱o̱ o magíʼ maʼni mbá kiʼsngáa rí na̱ʼkha̱ náa Biblia, mbáa itháan májánʼ rí manújngulú imbo̱o̱ tema. Á mu naʼngo̱o̱ a̱jkiu̱lú índo̱ nuʼsngáá ma̱ngaa nuʼtháán ga̱jma̱a̱ májáánʼ rí naʼsngáa náa Biblia, mbáa nda̱wa̱á maʼga̱nú mariʼkuminaʼ.