KÍXNUU 8

Arasngáa ga̱jma̱a̱ xkri̱da

Mateo 13:34, 35

RÍ NAGÁJNURIYOʼ: Mu marasngáa májánʼ gajmaaʼ xkri̱da dí ra̱mingíjyúuʼ rí mambáñún makru̱ʼu̱u̱n rí itháan gíʼdoo numuu bi̱ kuwa rudxawaanʼ.

Atraʼwíí xkri̱da dí ra̱mingíjyúuʼ. Atani xó má niʼni Jesús, gajmaaʼ xkri̱da rí ma̱jkha̱ʼ mu marasngáa rí mba̱ʼu̱, ikhaa nijmuu xkri̱da dí ra̱mingíjyúuʼ mu maʼsngáa dí mingíjyúuʼ, xárata i̱ʼwáʼ xkri̱da rí maʼni mingíjyúuʼ makru̱ʼu̱u̱n. Atayáá májánʼ rí xkri̱da rí gájma̱ʼ nambánii ga̱jma̱a̱ rí xtaa rarasngáa mu bi̱ kuwa rudxawanʼ xáʼnijngi̱i̱n.

Atayáá májánʼ. Atayáá xúgíʼ dí xtáa rarígá náa xtaa, atanigajmaa̱ i̱yi̱i̱ʼ rí nagájnuu náa Biblia ga̱jma̱a̱ atadxawíín rí nuthi bi̱ nakru̱ʼu̱u̱n májánʼ. Índo̱ gátani xúʼko̱, ataniraʼmáʼ xkri̱da rí ma̱ndoo majmaʼ mu marasngáa májánʼ. Atiéxi̱i̱ náa xtaʼdáá rí najmaʼ.
Atayáá tsíin xtaa raratún. Atraʼwíí xkri̱da rí nambánii ga̱jma̱a̱ ñajunʼ rí nuni, ma̱ngaa rí naʼni maxmiéjunʼ bi̱ kuwa rudxawan. Tsumáá gátani ga̱jma̱a̱ xkri̱da rí gajmaaʼ mu xáʼni rí matiñuunʼ o maʼni gawúúnʼ.
Arasngáa rí itháan gíʼdoo numuu. Arathá dí itháan gíʼdoo numuu náa xkri̱da rí gájma̱ʼ, raʼkháa dí ragíʼdoo numuu. Atani rí bi̱ kuwa rudxawanʼ raʼkháa i̱ndó marmáʼáan a̱jkiu̱ún xkri̱da, rí phú gíʼmaa mbuyáá ndiéjunʼ eʼsngúún.