KÍXNUU 24
Ndiéjunʼ eʼthí náa Biblia ga̱jma̱a̱ numún ángeles rá.
Jeobá nandoo rí muniʼnúnʼ bi̱ xtáa gajmíi̱n náa mekhuíí. Ikhí kúwá ángeles, bi̱ mangiin najmanún xóo “e̱ji̱i̱n Dios” (Job 38:7). Ndiéjunʼ eʼsngáa náa Biblia ga̱jma̱a̱ numún ángeles rá. Xú káʼnii embañún xa̱bu̱ xá. Lá xúgíinʼ ángeles kúwá gajmiún Dios ráʼ.
1. Tsíin ni̱ndxu̱ún ángeles rá.
Nákhá xóó tséʼni Ku̱ba̱ʼ, Jeobá ginii niʼniwíin ángeles. Xóo má ikhaa, ángeles mangiin tsékujmiin ga̱jma̱a̱ kúwá mekhuíí (Hebreos 1:14). Kúwá mbaʼin wéñuuʼ ángeles ga̱jma̱a̱ mámbáa dí ikhiin mixtiʼkuiin (Apocalipsis 5:11). Ikhiin “nudxawíín ga̱jma̱a̱ nunimbu̱ún rí naʼthí ikhaa [Jeobá]” (Salmo 103:20). Nákhá wájyúuʼ, Jeobá nguáná nikuʼmiin ángeles muthi ajngáa, mumbañún ga̱jma̱a̱ muni kríyaaʼ xuajñuu. Rí mbiʼi xúgi̱, ángeles nuxnún ikha cristianos mu muxkamiin xa̱bu̱ bi̱ nandún mbuyáá itháan ga̱jma̱a̱ numuu Dios.
2. Tsáa nindxu̱u̱ Gixa̱a̱ ga̱jma̱a̱ tsíin ni̱ndxu̱ún xa̱bu̱ wéñiʼ rá.
Tikhun ángeles nánguá niguájun jmbu náa Jeobá. Timbáa bi̱ táʼnimbo̱o̱ nindxu̱u̱ “bi̱ nuxna mbiʼíí Gixa̱a̱, bi̱ xtáa raʼni nduwiinʼ xúgíinʼ xa̱bu̱ bi̱ kúwá náa tsu̱du̱u̱ ku̱ba̱ʼ” (Apocalipsis 12:9). Gixa̱a̱ nindoo rí maʼtáñajúúnʼ eʼwíinʼ, ikha jngóo niʼni rí timbíin xa̱bu̱ numbaaʼ bi̱ nikúwá xúnimbu̱ún kuyáá Dios xóo má ikhaa. Nda̱wa̱á niʼngo̱o̱ niʼni rí asndu eʼwíinʼ ángeles mangiin xúnimbu̱ún. Ángeles bi̱ túnimbu̱ún nagumbiʼñún xa̱bu̱ wéñiʼ. Jeobá nixkawíin mekhuíí ga̱jma̱a̱ nisngútíguíin náa tsu̱du̱u̱ Ku̱ba̱ʼ mu nda̱wa̱á maguma gámbíin (atraxnuu Apocalipsis 12:9, 12).
3. Xú káʼnii eyoo maʼni nduwáanʼlu Gixa̱a̱ gajmíi̱n xa̱bu̱ wéñiʼ rá.
Gixa̱a̱ gajmíi̱n xa̱bu̱ wéñiʼ nuninduwiinʼ mbaʼin xa̱bu̱ índo̱ najmiún xa̱bu̱ xawan o xúgíʼ náa najmaa tsiakii ndrígu̱ún xa̱bu̱ wéñiʼ. Mbá xkri̱da tikhun xa̱bu̱ nagún náa bi̱ nunigajmaa numún a̱ʼgua̱a̱n mu mbuyáá ga̱jma̱a̱ numún, náa bi̱ najmañún magia, náa bi̱ muraxi̱ numún, náa bi̱ nduyáá rí marigá nda̱wa̱á, náa bi̱ nuni̱i̱ xtambáá ga̱jma̱a̱ náa brujo. Eʼwíinʼ ndu̱ya̱ʼ maguma thanún ga̱jma̱a̱ rí na̱ʼkha̱ náa xa̱bu̱ wéñiʼ. Ma̱ngaa kúwá xa̱bu̱ bi̱ nunimbún rí nandoo mutamijná gajmiún bi̱ nikháñúún. Mú Jeobá naʼthúlú: “Xúʼgua̱ gúñu̱u̱n bi̱ nutamijná gajmiún bi̱ nikháñúún ni má bi̱ najmañún magia” (Levítico 19:31). Ikhaa naʼthúlú rígi̱ mu muñeumíjna̱ náa Gixa̱a̱ ga̱jma̱a̱ náa xa̱bu̱ wéñiʼ, numuu rí ni̱ndxu̱ún xa̱bu̱ sia̱nʼ ndrígióo ma̱ngaa nandún muniulúʼ dí raʼkhí.
GAJMAÑAAʼ ITHÁAN
Guʼthá rí májánʼ dí nuni ángeles ga̱jma̱a̱ guʼyáá ndiéjunʼ gamíi rí na̱ʼkha̱ náa xawan. Guʼyáá ma̱ngaa xú káʼnii gándoo muñeumíjna̱ náa Gixa̱a̱ ga̱jma̱a̱ náa xa̱bu̱ wéñiʼ.
4. Ángeles numbañún xa̱bu̱ muniʼniiʼ Jeobá
Ángeles ndrígióo Dios na̱nguá etaruʼúún xa̱bu̱, mú nuxnún ikha xa̱bi̱i̱ Dios mu muxkamiin xa̱bu̱ bi̱ nandún muniʼniiʼ Dios. Guraxnuu Apocalipsis 14:6, 7 ga̱jma̱a̱ gutamíjnála rígi̱:
Ndíjkha rí ndayúlú ángeles mu mumbayulúʼ náa nuʼtáraʼa rá.
Lá nadxaanʼ ikháánʼ rí ángeles nandoo nuxnaaʼ ikha mu mataxkamiin xa̱bu̱ bi̱ nandún mudxawíín rí naʼsngáa náa Biblia ráʼ. Náá numuu rá.
5. Atani gaʼduunʼ xúgíʼ rí na̱ʼkha̱ náa xawan ga̱jma̱a̱ rí na̱ʼkha̱ náa xa̱bu̱ wéñiʼ
Gixa̱a̱ gajmíi̱n xa̱bu̱ wéñiʼ ni̱ndxu̱ún bi̱ sia̱nʼ gajmíi̱n Jeobá, ga̱jma̱a̱ bi̱ sia̱nʼ gajmiúlú mangáanʼ. Guraxnuu Lucas 9:38-42 ga̱jma̱a̱ gutamíjnála rígi̱:
Ndiéjunʼ eni̱ xa̱bu̱ wéñiʼ náa xa̱bu̱ rá.
Tsíyulú muʼni nimbá rí maxúmiin xa̱bu̱ wéñiʼ náa kuwáánʼ. Guraxnuu Deuteronomio 18:10-12 ga̱jma̱a̱ gutamíjnála rígi̱:
Xú káʼnii eni̱ xa̱bu̱ wéñiʼ mu muʼni rí nandún ikhiin ma̱ngaa rí mutamijná ga̱jma̱á ni̱ndxu̱lú xá. Ndiéjunʼ eni dí najmaʼnuuʼ náa xtaa ikháán rí na̱ʼkha̱ náa xawan rá.
Lá nakumaaʼ ikháán dí gíʼdoo numuu rí Dios maʼthúlú muʼni gaʼduunʼ xúgíʼ dí na̱ʼkha̱ náa xawan ráʼ. Náá numuu rá.
Guya̱a̱ VIDEO ga̱jma̱a̱ gutamíjnála rígi̱:
Nakumaaʼ ikháán dí migamíi rí gídáʼ náa ñawúunʼ a̱ʼdióo Palesa ráʼ. Náá numuu rá.
Ndiéjunʼ niʼni Palesa mu mañeuminaʼ náa xa̱bu̱ wéñiʼ rá.
Bi̱ ni̱ndxu̱ún cristianos gajkhun nunigaʼduunʼ náa xa̱bu̱ wéñiʼ. Guraxnuu Hechos 19:19 ma̱ngaa 1 Corintios 10:21 ga̱jma̱a̱ gutamíjnála rígi̱:
Á mu xtaʼdáá dí na̱ʼkha̱ náa xawan, ndíjkha rí gíʼdoo numuu matani gámbáa xúgíʼ rá.
6. Ga̱ʼnga̱a̱ʼ matani ga̱jma̱a̱ʼ Gixa̱a̱ ma̱ngaa xa̱bu̱ wéñiʼ
Gixa̱a̱ naʼtáñajúúnʼ xa̱bu̱ wéñiʼ. Mú arcángel Miguel, bi̱ ma̱ngaa nagumbiʼyuu Jesús, naʼtáñajúúnʼ ángeles bi̱ naguájun jmbu. Nguáthá mba̱a̱ tsiakii gíʼdoo Miguel rá. Guraxnuu Apocalipsis 12:7-9 ga̱jma̱a̱ gutamíjnála rígi̱:
Tsíin guaʼdáá itháan tsiakii: Miguel gajmíi̱n ángeles ndrígio̱o̱ o Gixa̱a̱ gajmíi̱n xa̱bu̱ wéñiʼ dxe̱ʼ.
Lá naku̱ma̱a̱ʼ rí xa̱bi̱i̱ Cristo gíʼmaa mamiñún kuyáá Gixa̱a̱ gajmíi̱n xa̱bu̱ wéñiʼ ráʼ.
Ikháán maʼnga̱a̱ʼ matani ga̱jma̱a̱ʼ Gixa̱a̱ mangiin xa̱bu̱ wéñiʼ. Guraxnuu Santiago 4:7 ga̱jma̱a̱ gutamíjnála rígi̱:
Xú káʼnii gándoo gatiewumínaʼ náa Gixa̱a̱ ga̱jma̱a̱ náa xa̱bu̱ wéñiʼ rá.
RÍ NUTHI TIKHUN: “Na̱nguá má nindxu̱u̱ raʼkhí dí maratsíin o ma̱ta̱ya̱a̱ película náa na̱ʼkha̱ magia o náa nagájnún xa̱bu̱ wéñiʼ. I̱ndó má nindxu̱u̱ náa matani gagiminaʼ mbá xngaa”.
Náá numuu rí migamíi matatsaʼwamínáʼ xúʼko̱ rá.
RÍ NAGÁJNURIYO̱O̱ʼ
Ángeles bi̱ guájun jmbu numbayúlúʼ. Gixa̱a̱ gajmíi̱n xa̱bu̱ wéñiʼ nindxúu̱n bi̱ sia̱nʼ gajmíi̱n Jeobá, ga̱jma̱a̱ najmún dí na̱ʼkha̱ náa xawan mu muninduwiinʼ xa̱bu̱.
Rí nijmañaaʼ
Ndiéjunʼ eni̱ ángeles mu xa̱bu̱ muniʼniiʼ Jeobá rá.
Tsáá nindxu̱u̱ Gixa̱a̱ ga̱jma̱a̱ xa̱bu̱ wéñiʼ rá.
Ndíjkha dí ragíʼmaa mi̱dxu̱ʼ náa nuni xawan xá.
ATAYÁÁ ITHÁAN
Atayáá náá numuu rí Jesús nindxu̱u̱ arcángel Miguel.
“Tsáá nindxu̱u̱ arcángel Miguel rá.” (Artículo dí rígá náa jw.org)
Atraxnuu mu ma̱ta̱ya̱a̱ dí Gixa̱a̱ raʼkháa i̱ndó nindxu̱u̱ mbá tsinaʼ rí matagíʼnii dí raʼkhí.
Atayáá xú káʼnii mbáa a̱ʼgu̱ niʼni kríyaminaʼ náa tsiakii ndrígu̱ún xa̱bu̱ wéñiʼ.
“Nixkamaa rí gíʼdoo numuu maxtáa” (Bi̱ Nayejngoo 1 ñajunʼ gu̱nʼ julio tsiguʼ 1993)
Atayáá xú káʼnii ejmuu xawan Gixa̱a̱ mu maʼninduwiinʼ xa̱bu̱.