Jeobá naʼthúlú dí Ku̱ba̱ʼ maʼni̱i̱ mitsaanʼ

1. Ndiéjunʼ niʼthúún israelitas Isaías rá.

PROFETA Isaías nixná mbiʼyuu Jeobá “Dios bi̱ gajkuwiin”. Náa ajngáa hebrea rí ajngáa “gajkhun” nandoo gáʼthúu̱n “amén” (Is. 65:16; nota). Amén nandoo gáʼthúu̱n xúʼko̱ gáʼni” o “gajkhun”. Náa Biblia na̱ʼkha̱ mbaʼa nuthu ajngáa Amén mu maʼthí dí Jeobá o Jesús nuni̱ o nuthi dí gajkhun. Isaías rí phú nindoo maʼthúún israelitas: Dí Jeobá naʼthí, gajkhun na̱jkha̱nú nambánuu. Jeobá nisngájma rí xúʼko̱ káʼnii naʼnimbánuu xúgíʼ rí ikhaa nakudaminaʼ.

2. Náá numuu ma̱ndoo muʼnimbulú náa dí naʼthúlú Jeobá maʼni nda̱wa̱á rá.

² Ikháanʼlu rá. Lá ma̱ndoo muʼnimbulú dí nikudaminaʼ Jeobá maʼni nda̱wa̱á ráʼ. Xóo mbá 800 tsiguʼ nda̱wa̱á dí nixtáa Isaías, apóstol Pablo niʼthí náá numuu rí ma̱ndoo muʼnimbulú dí Jeobá gajkhun maʼnimbánuu rí naʼthí. Pablo niʼthí: “Dios xándoo maʼninduwaʼ” (Heb. 6:18). Lá ma̱ndoo rí náa iduu iyaʼ; magajnúu iyaʼ rí muʼwan ga̱jma̱a̱ magajnúu iyaʼ miríná ma̱ngaa ráʼ. Xúʼko̱ má kayuuʼ Jeobá ma̱ngaa, náa ikhaa rígá dí gajkhun, ikha jngóo xándoo maʼni nduwaʼ. Ikháanʼ ma̱ndoo muʼnimbulúʼ kuʼyáá kájxi̱ dí xúgíʼ dí naʼthí gajkhun mambanúu nda̱wa̱á. Náa artículo rígi̱ muriʼña̱a̱ graxe̱ rígi̱: Ndiéjunʼ nikudaminaʼ maʼni Jeobá nda̱wa̱á rá. Ga̱jma̱a̱, xú káʼnii naʼni dí gajkhun mambanúu rí naʼthí xá.

NDIÉJUNʼ NIKUDAMINAʼ JEOBÁ

3. a) Ndiéjuunʼ rí kua̱ʼthi̱i̱n marigá nda̱wa̱á eʼyáá ikháánʼ rá. (Apocalipsis 21:​3, 4.) b) Ndiéjuunʼ ethi tikhuun índo̱ nuraxnuu ajngáa rígi̱ rá.

³ Dí kuáʼthiin marigá gíʼdoo wéñuuʼ numuu náa xa̱bi̱i̱ Dios bi̱ kúwá náa xúgíʼ numbaaʼ (atraxnuu Apocalipsis 21:​3, 4). Jeobá nakudaminaʼ rí “ni xákháñún itháan, ni xárígá itháan tsingíná ni má xtambi̱ya̱ʼ ni má ga̱ʼkhu̱”. Náa nuʼtáraʼa najmulú mbaʼa nuthu versículo rígi̱, mu xúʼko̱ muʼni̱i̱ a̱jkiu̱ún xa̱bu̱ ga̱jma̱a̱ nuʼthúún xú káʼnii gakuwáanʼ náa Ku̱ba̱ʼ mitsaanʼ. Ndiéjunʼ ethi tikhuun índo̱ nudxawíín ajngáa rígi̱ rá. “Mitsaanʼ naʼthí, mú tsiánguá á mu gajkhun mambanúu”.

4. a) Ndiéjuunʼ rí a̱jma̱ ndaʼyoo Jeobá rá. b) Ndiéjunʼ dí imbo̱o̱ niʼni Jeobá rá.

⁴ Índo̱ Jeobá nixnúu espíritu santo Juan mu maʼnirámáʼ dí marigá mbá Ku̱ba̱ʼ mitsaanʼ, ga̱jma̱a̱ ikhaa ndaʼyoo rí majmulú dí mbiʼi xúgi̱ náa nuʼtáraʼa. Ma̱ngaa ndiʼyoo dí mbaʼin xa̱bu̱ maʼniún gakhi̱i̱ munimbu̱ún náa “nuxi̱ʼ” rí ikhaa naʼthí (Is. 42:9; 60:2; 2 Cor. 4:​3, 4). Á mu xúʼko̱, xú káʼnii gándoo gúmbáñún eʼwíinʼ mu munimbu̱u̱n dí gajkhun mambanúu dí naʼthí náa Apocalipsis 21:​3, 4 rá. Ga̱jma̱a̱ xú káʼnii ma̱ndoo muʼni rí muʼnimbulú kuʼyáá itháán Jeobá ga̱jma̱a̱ náa rí nakudaminaʼ rá. Jeobá raʼkháa i̱ndó niʼthí ndiéjunʼ rí nakudaminaʼ, ma̱ngaa naʼni mbuʼyáá náá numuu rí ma̱ndoo muʼnimbulú dí gajkhun mambanúu. Ndiéjunʼ nindxu̱u̱ ikhaa rá.

JEOBÁ NAʼTHÍ DÍ NIKUDAMINAʼ GAJKHUN MAMBANÚU

5. Ndiéjunʼ versículo ndrígóo Biblia nambáyulú mbuʼyáá dí gajkhun nindxu̱u̱ dí nakudaminaʼ Jeobá ga̱jma̱a̱ ndiéjunʼ eʼthí rá.

⁵ Náa versículo rí xóó na̱ʼkha̱, nduʼyáá ndíjkha rí ma̱ndoo muʼnimbulú rí niʼthí Jeobá ga̱jma̱a̱ numuu Ku̱ba̱ʼ mitsaanʼ. Ikhí nuraxnuu: “Bi̱ nigi̱ʼi̱ náa xílí niʼthí: ‹¡Atayáá! Xtáá ra̱ni̱ xúgíʼ nuxi̱ʼ›. Ma̱ngaa niʼthí: ‹Ataniraʼmáʼ ajngáa rígi̱, numuu rí nindxu̱u̱ gajkhun ga̱jma̱a̱ jmbu›. Ga̱jma̱a̱ niʼthúnʼ: “¡Nimbánuu má! Ikhúún ñajunʼ Alfa ga̱jma̱a̱ Omega, bi̱ ginii ga̱jma̱a̱ bi̱ iwáá kayuuʼ” (Apoc. 21:​5, 6a).

6. Xú káʼnii embáyulú Apocalipsis 21:​5, 6, mu mbuʼyáá dí gajkhun mambanúu dí nikudaminaʼ Dios rá.

⁶ Náá numuu rí nuʼnimbulú dí gajkhun maʼnimbánuu rí nikudaminaʼ Jeobá ajngáa rígi̱ rá. Náa libro Apocalipsisb naʼthí xígi̱ ga̱jma̱a̱ numuu versículo rígi̱: “Asndu xóo mínaaʼ Jeobá naʼthúún xa̱bu̱ bi̱ naguajún jmbu, rí gajkhun nindxu̱u̱ ga̱jma̱a̱ numuu xóo maguma tsajkurámiin nda̱wa̱á”. Náa apocalipsis 21:​3, 4; nuraxnuu dí nakudaminaʼ Jeobá ga̱jma̱a̱ náa versículo 5, 6 naʼni mbuʼyáá rí asndu xóo naxnúu firma Jeobá, ga̱jma̱a̱ naʼthí rí gajkhun maʼnimbánuu. Rí xúgi̱, guʼyáá itháán xóo mixtiʼkhu eʼthí maʼni Jeobá.

7. Tsáá eʼthí ga̱jma̱a̱ numuu náa versículo 5, ga̱jma̱a̱ ndíjkha rí nindxu̱u̱ kiejuunʼ rá.

⁷ Náa versículo 5 nagi̱ʼdu̱u̱ naʼthí xígi̱: “Bi̱ nigi̱ʼi̱ náa xílí niʼthí” (Apoc. 21:5a). Ajngáa rígi̱ nindxu̱u̱ kiejuunʼ, numuu rí xígi̱ nagi̱ʼdu̱u̱ naʼthí náa rí niwasngájma rí na̱ʼkha̱ náa Apocalipsis náa Jeobá niʼthí bájmbu. Rígi̱ nindxu̱u̱ dí niʼthí mínaaʼ Jeobá, raʼkháa mbáa ángel ni má Jesús. Ga̱jma̱a̱ rígi̱ naʼni muʼnimbulú náa ajngáa rí xóó na̱ʼkha̱ raʼthí nda̱wa̱á, numuu rí Jeobá nindxu̱u̱ mbáa “Dios bi̱ tséʼni nduwaʼ” (Tito 1:2). Gíʼma muʼnimbulú ga̱jma̱a̱ xúgíʼ a̱jkiu̱lú dí naʼthí náa Apocalipsis 21:​5, 6.

“¡ATAYÁÁ! XTÁÁ RA̱NI̱ XÚGÍʼ NUXI̱ʼ”

8. Ndiéjunʼ eʼthí Jeobá mu mbuʼyáá dí gajkhun mambanúu dí nikudaminaʼ xá. (Isaías 46:10)

⁸ Rí xúgi̱ guʼyáá ndiéjunʼ eyoo gáʼthúu̱n ajngáa “¡Atayáá!” (Apoc. 21:5). “¡Atayáá!” náa ajngáa griego najuiʼtájuíi xígi̱ kaʼnii ajngáa rígi̱, dí na̱ʼkha̱ mbaʼa nuthu náa Apocalipsis. Náa mbá Biblia naʼthí rí ajngáa rígi̱ najmún mu “muxkajxi̱i̱ a̱jkiu̱u̱n bi̱ naguxnuu mu xúʼko̱ manigu̱u̱ʼ mbaʼyoo xóó itháán dí na̱ʼkha̱ raʼthí”. Ndiéjunʼ dí xóó na̱ʼkha̱ raʼthí rá. Dios naʼthí: “Xtáá ra̱ni̱ xúgíʼ nuxi̱ʼ”. Maski ajndu Jeobá xtáa raʼthí dí maʼni̱i̱ nda̱wa̱á, mú ikhaa naʼthí dí asndu xóo xtáa raʼni má xúgi̱ (atraxnuu Isaías 46:10).c

9. a) Ndiéjuunʼ eyoo gáʼthúu̱n ajngáa xtáá ra̱ni̱ xúgíʼ nuxi̱ʼ rá. b) Ndiéjuunʼ gagíʼnuu “mekhu”, “ku̱ba̱ʼ” dí rígá xúgi̱ rá.

⁹ Guʼyáá xóó itháán dí naʼthí gi̱i̱ náa Apocalipsis 21:5: “Xtáá ra̱ni̱ xúgíʼ nuxi̱ʼ”. Náa capítulo rígi̱, na̱ʼkha̱ a̱jma̱ enii rí naʼni Jeobá: Mariʼkuriya̱a̱ʼ ga̱jma̱a̱ maʼni májáanʼ. Ginii muʼthá ndiéjuunʼ dí mariʼkuriya̱a̱ʼ. Náa Apocalipsis 21:​1, naʼthí: “Mekhu dí nirígá nákha ginii ga̱jma̱a̱ ku̱ba̱ʼ dí nirígá nákha ginii nindáti̱ga̱a̱”. “Mekhu dí nirígá nákha ginii” nandoo gáʼthúu̱n xa̱bu̱ ñajunʼ bi̱ kúwá náa majñu̱u̱ʼ Gixa̱a̱ ga̱jma̱a̱ xa̱bu̱ wéñiiʼ (Mat. 4:​8, 9; 1 Juan 5:19). Nguáná náa Biblia índo̱ naʼthí ku̱ba̱ʼ nandoo gaʼthí ga̱jma̱a̱ numún xa̱bu̱ bi̱ kúwá náa numbaaʼ (Gén. 11:1; Sal. 96:1). Ikha jngóo “ku̱ba̱ʼ dí nirígá nákha ginii” nandoo gáʼthúu̱n xa̱bu̱ xkawiinʼ bi̱ kúwá rí mbiʼi xúgi̱. Rígi̱ nandoo gáʼthúu̱n rí Jeobá, xaʼni̱i̱ wáa kayuuʼ “mekhu” ga̱jma̱a̱ “ku̱ba̱ʼ”, rí phú gáʼni maʼni gámbáa kájxi̱ ga̱jma̱a̱ maʼni̱i̱ “nuxi̱ʼ mekhu ga̱jma̱a̱ mbá nuxi̱ʼ ku̱ba̱ʼ”, xóo muʼthá imba̱a̱ xa̱bu̱ ñajunʼ ga̱jma̱a̱ i̱mba̱ nuthu xóo gákúwíin xa̱bu̱.

10. Ndiéjuunʼ eyoo gáʼthúu̱n ajngáa dí Jeobá maʼni̱i̱ “xúgíʼ nuxi̱ʼ” rá.

¹⁰ Náá i̱mba̱ xóó maʼni̱i̱ Jeobá “xúgíʼ nuxi̱ʼ rá.” (Apoc. 21:5.) Jeobá maʼni májáanʼ ku̱ba̱ʼ ga̱jma̱a̱ xa̱bu̱ maʼni rí nánguá maguaʼdáá aʼkhá. Xó má niʼtáriyaʼ Isaías, rí náa xúgíʼ numbaaʼ maʼni̱i̱ mitsaanʼ. Maʼni mitsaanʼ wéñuuʼ xó má ninindxu̱u̱ ixi̱ ri̱ʼi̱ Edén. Xúʼko̱ má mangáánʼ maʼni̱i̱ nuxiáanʼlú. Jeobá maʼni thanún xa̱bu̱ bi̱ guʼxíinʼ, bi̱ tsékruigu̱u̱n ga̱jma̱a̱ bi̱ tsédxuun asndu maʼnigabiín xa̱bu̱ bi̱ nikháñúún (Is. 25:8; 35:​1-7).

“¡NINDXU̱U̱ GAJKHUN GA̱JMA̱A̱ JMBU!”

11. Ndiéjuunʼ niʼthúu̱n Jeobá Juan ga̱jma̱a̱ náá numuu rá.

¹¹ Ndiéjunʼ xóó niʼthí Dios rí ma̱ndoo muʼnimbulú rá. Jeobá niʼthúu̱n Juan dí na̱ʼkha̱ raʼthí náa Apocalipsis 21:5: “Ataniraʼmáʼ ajngáa rígi̱, numuu rí nindxu̱u̱ gajkhun ga̱jma̱a̱ jmbu”. Raʼkháa i̱ndó niʼthúu̱n Juan dí maʼnirámáʼ ajngá rawuunʼ, ma̱ngaa niʼthúu̱n náá numuu maʼni. Niʼthúu̱n: “Numuu rí nindxu̱u̱ gajkhun ga̱jma̱a̱ jmbu”, xóo muʼthá ajngóo Dios kaʼnii matatsimbaʼ ga̱jma̱a̱ naʼthí bájmbu. ¡Ra̱ʼkhá tháán májánʼ dí Juan niʼnimbo̱o̱ kiʼtáñajunʼ ndrígóo Jeobá ga̱jma̱a̱ niʼnirámáʼ! Núma̱aʼ má rúʼko̱, ma̱ndoo muraxnuu náa rí nikudaminaʼ Dios maxnulú mbá Ku̱ba̱ʼ mitsaanʼ ga̱jma̱a̱ mundxa̱ʼwa̱míjna̱ xóo mitsaanʼ gaguma tsajkurámáánʼ nda̱wa̱á.

12. Náá numuu ma̱ndoo maʼthí Jeobá “¡Nimbánuu má!” rá.

¹² Ndiéjunʼ dí xóo na̱ʼkha̱ raʼthí rá. “¡Nimbánuu má!” (Apoc. 21:6). Jeobá naʼthí xúgíʼ dí maʼni náa Ku̱ba̱ʼ mitsaanʼ rí asndu xóo niʼnimbánuu má. Numuu rí nda̱a̱ nimbá dí marikhoo mu xáʼnimbánuu rí nandoo. Ndiéjunʼ dí naʼthí xóó Jeobá mu muʼnimbulú dí gajkhun naʼthí xá.

“IKHÚÚN ÑAJUNʼ ALFA GA̱JMA̱A̱ OMEGA”

13. Ndíjkha naʼthí Jeobá rí ikhaa ñajuunʼ ñajunʼ Alfa ga̱jma̱a̱ Omega rá.

¹³ Xóo má niʼthá nángii dí Jeobá niʼthí mbá ajtsú nuthu náa rí niwasngájmáá Juan (Apoc. 1:8; 21:​5, 6; 22:13). Jeobá niʼthí: “Ikhúún ñajunʼ Alfa ga̱jma̱a̱ Omega”. Alfa, náa letra griego nindxu̱u̱ timbá letra dí nagi̱ʼdu̱u̱, mú Omega nindxu̱u̱ rí naguámbáa iwáá. Jeobá naxná mbiʼyuu “Alfa ga̱jma̱a̱ Omega”, numuu rí índo̱ ikhaa nagi̱ʼdu̱u̱ mbá na̱jkha̱nú naguámbóo.

14. a) Arathá mbá xkri̱da nguáná niʼthí Jeobá “Alfa” ga̱jma̱a̱ nguáná gaʼthí “Omega” xá. b) Ndiéjunʼ naʼthúlú Jeobá náa Génesis 2:​1-3 rá.

¹⁴ Nda̱wa̱á rí niʼnii Adán ga̱jma̱a̱ Eva, Jeobá niʼthúún ndiéjuunʼ rí nandoo maʼni ga̱jma̱a̱ numún xa̱bu̱ ma̱ngaa Ku̱ba̱ʼ. Náa Biblia naʼthí: “Dios niʼni tsajkurámíinʼ ga̱jma̱a̱ niʼthún: ‹Gaguaʼdiin mbaʼin e̱jña̱la, gaʼni mbaʼáanʼla, gakuwáanʼla náa xúgíʼ tsu̱du̱u̱ ku̱ba̱ʼ, ku̱ba̱ʼ gaʼni ndrígála ikháanʼ›” (Gén. 1:28). Índo̱ Jeobá niʼthúu̱n rí nandoo maʼni, ninindxu̱u̱ asndu xóo niʼthí “Alfa”. Maʼga̱nú mbá mbiʼi dí bi̱ naguwáʼ náa Adán ga̱jma̱a̱ Eva majthíínʼ náa tsu̱du̱u̱ Ku̱ba̱ʼ ga̱jma̱a̱ muni̱i̱ maʼni mitsaanʼ. Mbiʼi rúʼko̱ Jeobá maʼthí “Omega”. Ajngáa “mekhu, ku̱ba̱ʼ ga̱jma̱a̱ xúgíʼ dí rígá ikhí”, Jeobá naʼthí dí gajkhun maʼnimbánuu rí nandoo. Xú káʼnii niʼni xá. Niʼthí rí maʼni juwan mbiʼi nindxu̱u̱ mitsúʼkháan (atraxnuu Génesis 2:​1-3).d Ndiéjuunʼ eyoo gáʼthúu̱n rígi̱ rá. Dí Jeobá niríyáʼ dí maʼni juwan mbiʼi mu maʼni rí nandoo náa xa̱bu̱ numbaaʼ ga̱jma̱a̱ Ku̱ba̱ʼ. Índo̱ gámbá rí maʼni juwan mbiʼi, rí nindoo maʼni nimbánuu kájxi̱ gáʼni.

15. Náá numuu nikumu̱u̱ Gixa̱a̱ dí Jeobá nánguá maʼngo̱o̱ maʼnimbánuu dí nandoo rá.

¹⁵ Nda̱wa̱á rí índo̱ Adán ga̱jma̱a̱ Eva nikiéʼkhun, ninindxu̱ún xa̱bu̱ aʼkhá ga̱jma̱a̱ nini dí e̱jñu̱ún maguaʼdáá aʼkhá ga̱jma̱a̱ rí makhañún (Rom. 5:12). Ga̱jma̱a̱ numuu rígi̱, lá maʼni dí xambánuu rí nandoo Dios dí maʼni majthíín xa̱bu̱ bi̱ nunimbu̱ún ga̱jma̱a̱ bi̱ raguaʼdáá aʼkhá ráʼ. Mbáa ma̱ndoo makujmaa dí Gixa̱a̱ niʼngo̱o̱ dí Jeobá ni xáʼthí Omega. Mbáa ma̱ngaa nindxaʼwáminaʼ dí Jeobá nda̱a̱ mbaʼa xóo ma̱ndoo maʼni. Mbá xkri̱da, mbá dí ikhaa nindxu̱u̱ dí maʼni gámbáa Adán ga̱jma̱a̱ Eva, mu xúʼko̱ maʼnii eʼwíinʼ, mu ma̱ndoo mambanúu rí nandoo ga̱jma̱a̱ numún xa̱bu̱ numbaaʼ. Á mu dí Jeobá niʼni xúʼko̱, Gixa̱a̱ ma̱ndoo maʼthúu̱n rí nindxu̱u̱ mbáa bi̱ minduwaaʼ. Náá numuu rá. Xó má naʼthí náa Génesis 1:​28, Jeobá niʼthúu̱n Adán ga̱jma̱a̱ Eva rí e̱jñu̱ún muni matjhíínʼ náa tsu̱du̱u̱ Ku̱ba̱ʼ.

16. Náá numuu nindxa̱ʼwáminaʼ Gixa̱a̱ dí ma̱ndoo maʼni tsu̱du̱u̱ Jeobá dí tájmaa gáʼnimbánuu dí nikudaminaʼ rá.

¹⁶ Ndiéjunʼ imbo̱o̱ rí nikumu̱u̱ Gixa̱a̱ rá. Mbáa niku̱mu̱u̱ dí Jeobá maniñuuʼ dí Adán ga̱jma̱a̱ Eva maguaʼdíin e̱jñu̱ún, mú nditháan xáʼga̱nú mbiʼi dí mani̱ndxu̱ún xa̱bu̱ jmbiin (Ecl. 7:20; Rom. 3:23). Á mu xúʼko̱ nirígá, Gixa̱a̱ ma̱ndoo maʼthúu̱n Jeobá dí tájmaa rí niʼni. Náá numuu rá. Numuu rí nandoo maʼni gajmíi̱n xa̱bu̱ xambánuu; Ku̱ba̱ʼ xájthiinʼ xa̱bu̱ jmbiin.

17. Ndiéjunʼ niʼni Jeobá, nda̱wa̱á dí nikujximínaʼ Gixa̱a̱ mangiin timbíin xa̱bu̱ ga̱jma̱a̱ xú káʼnii garigá xúgíʼ rígi̱ rá. (Atayáá xtiʼkhu.)

¹⁷ Rí xóo Jeobá niʼnimbánuu rí nikujximínáʼ Gixa̱a̱ ga̱jma̱a̱ timbíin xa̱bu̱ bi̱ nikúwá, mbáa asndu niʼniuu tsiánguá Gixa̱a̱ (Sal. 92:5). Índo̱ niniñuuʼ dí Adán ga̱jma̱a̱ Eva maguaʼdíin e̱jñu̱ún, xúʼko̱ Jeobá nisngájma rí ikhaa tséʼninduwaʼ, ikhaa xúgíʼ rí naʼthí nambánuu. Ga̱jma̱a̱ dí xúgíʼ dí ikhaa naʼni nambánuu. Xú káʼnii rá. Niʼni rí maxtáa mbáa bi̱ “ma̱ʼkha̱” bi̱ maʼni káwíin e̱ji̱i̱n Adán bi̱ nigiʼdiin ga̱jma̱a̱ Eva, bi̱ nunimbu̱ún, ga̱jma̱a̱ xúʼko̱ mambanúu dí nindoo (Gén. 3:15; 22:18). Gixa̱a̱ nditháan tandxaʼwáminaʼ dí Jeobá maʼtsiwíin xa̱bu̱ mu maʼni káwíin. Náá numuu rá. Numuu rí índo̱ niʼtsiwíin, nisngájma rí gajkhun nandoo kaʼñúún (Mat. 20:28; Juan 3:16). Gixa̱a̱ i̱ndó nandxa̱ʼwáminaʼ ga̱jma̱a̱ numuu ikhaa, ikha jngóo na̱nguá eyoo kaʼñúún xa̱bu̱. Ndiéjuunʼ gáʼngo̱o̱ gárígá ga̱jma̱a̱ numuu rí nijuiʼtsiwáánʼ rá. Índo̱ gájngoo rí mbá mil tsiguʼ bi̱ naguwáʼ náa Adán ga̱jma̱a̱ Eva makuwíin náa mbá Ku̱ba̱ʼ mitsaanʼ, ikhú Jeobá maʼthí “Omega”.

XÓO GÚʼNI RÍ MUʼNIMBULÚ ITHÁÁN DÍ MA̱ʼKHA̱ KU̱BA̱ʼ MITSAANʼ RÁ.

18. Xú káʼnii ajtsú numuu naʼni mbuʼyáá Jeobá dí gajkhun maʼnimbanúu dí nikudaminaʼ xá. (Atayáá náa kúgumaʼá “Ajtsú numuu mu muʼnimbulú náa rí nikudaminaʼ Jeobá”)

¹⁸ Náa artículo rígi̱ niʼniga̱jma̱a̱ dí Ku̱ba̱ʼ maʼni̱i̱ mitsaanʼ. Ndiéjunʼ gándoo muʼthúún eʼwíinʼ dí Dios gajkhun maʼnimbánuu dí naʼthí rá. Timbá: Mínaaʼ má Jeobá nakudaminaʼ. Náa Apocalipsis naʼthí: “Bi̱ nigi̱ʼi̱ náa xílí niʼthí: ‹¡Atayáá! Xtáá ra̱ni̱ xúgíʼ nuxi̱ʼ›”. Ikhaa nandoo maʼnimbánuu dí nikudaminaʼ ga̱jma̱a̱ gíʼdoo ku̱ma̱ ma̱ngaa tsiaki̱i̱ mu maʼngo̱o̱ maʼni. Ragajma: Jeobá ndaʼyoo dí gajkhun nindxu̱u̱ rí asndu xóo nimbánuu má dí niʼthí. Ikha jngóo naʼthí: “Nindxu̱u̱ gajkhun ga̱jma̱a̱ jmbu”. Ga̱jma̱a̱ niʼthí xóó: “¡Nimbánuu má!”. Ragajtsú: Índo̱ Jeobá nagíʼdu̱u̱ mbá, na̱jkha̱nú naguámbóo. Rúʼko̱ eyoo gáʼthúu̱n rígi̱ “Alfa ga̱jma̱a̱ Omega”. Jeobá masngájma rí Gixa̱a̱ naʼninduwaʼ ga̱jma̱a̱ rí tséjmaa.

19. Ndiéjunʼ gándoo matani̱ á mu mbáa naʼniuu mingíjyúuʼ maʼnimbo̱o̱ dí maʼni̱i̱ Ku̱ba̱ʼ mitsaanʼ rá.

¹⁹ Mámbá índo̱ gárathu̱u̱n xa̱bu̱ ga̱jma̱a̱ numuu rí nakudaminaʼ Dios maʼni. Rúʼko̱ maʼni rí ma̱ta̱ya̱a̱ dí gajkhun nindxu̱u̱ dí nakudaminaʼ Jeobá. Ikha jngóo á mu dí nda̱wa̱á dí nitraxnuu Apocalipsis 21:​4, á mu dí xa̱bu̱ gaʼtháanʼ “Mitsaanʼ eʼthí, mu tsiánguá á mu gajkhun mambanúu”, ndiéjuunʼ gátani rá. Mbáa májánʼ gáʼni dí matraxnuu ga̱jma̱a̱ maratha̱a̱n dí naʼthí náa versículo 5, 6. Atasngájmáá xa̱bu̱ mbaʼyoo dí xúʼko̱ káʼnii gáʼnimbánuu dí nikudaminaʼ Jeobá. Rí asndu xóo nixnúu mbá firma (Is. 65:16).