Nguáná gáʼtañajunʼ Reino ndrígóo Dios náa tsu̱du̱u̱ Ku̱ba̱ʼ rá.

NDIÉJUNʼ RÍ NIʼTHÍ MARIGÁ JESÚS RÁ.

Ikhaa niʼthí: “Xuajen mba̱ʼu̱ magi̱ʼdu̱u̱n gajmiún i̱ʼwáʼ xuajen mba̱ʼu̱, xa̱bu̱ ñajunʼ magi̱ʼdu̱u̱n gajmiún eʼwíinʼ xa̱bu̱ ñajunʼ. Marigá gaʼxma, ma̱ngaa marigá ewiʼ” (Lucas 21:10, 11). Xó má mbá huella nasngájma tsáa nindxu̱u̱ mbáa xa̱bu̱, xúʼko̱ má xúgíʼ rí xtáa rarígá náa mbóó tiempo nasngájma dí Reino ndrígóo Dios gíʼ mijngii. Lá nduʼyáá rígi̱ ráʼ. Lá xtáa rarígá náa xúgíʼ numbaaʼ ráʼ. Ndiéjunʼ esngájma rí xtáa rarígá rá.

1. GUERRAS

Nákha tsiguʼ 1914 nirígá mbá guerra xóo rí nimbá miʼtsú tárígá ikhú. Bi̱ nduyáá nuthi rí tsiguʼ rúʼko̱ ninindxu̱u̱ kiejunʼ, numuu rí ikhú nigi̱ʼdu̱u̱ timbá guerra dí niʼni mumíniiʼ xúgínʼ xa̱bu̱. Nákha ikhú nijmún wéñuʼ tanques, bombas rí na̱jkha̱ rijma̱a̱, ametralladoras, gúní mbiiʼ ga̱jma̱a̱ i̱ʼwáʼ ajua̱nʼ rí nagudíin xa̱bu̱ xóo nimbá miʼtsú tárígá. Nda̱wa̱á, índo̱ nirígá Raga̱jma̱ guerra náa xúgíʼ tsu̱du̱u̱ Numbaaʼ, nigi̱ʼdu̱u̱ nirígá bombas atómicas. Asndu nákha 1914 xa̱bu̱ nduyáá guerras asndu náá, ga̱jma̱a̱ nakháñun mbaʼin wéñuʼ xa̱bu̱.

2. GAʼXMA GAKHI̱I̱

Xó má nasngájma náa Encyclopædia Britannica, mámbá tsiguʼ narígá mbá ciento gaʼxma gakhi̱i̱ rí “naʼni gámbáa” mbá xúgíʼ. Ma̱ngaa Servicio Geológico dí rígá náa Estados Unidos naʼthí dí “registros dí rígá asndu nákha tsiguʼ 1900, naguaʼthi̱i̱n marigá náa xúgíʼ tsiguʼ mbá gu̱wa̱ʼ imajun gaʼxma gakhi̱i̱”. Tikhun nakumu̱ún rí xúgi̱ nakujmaa itháan gaʼxma ikha jngó nandoo nduʼyáá rí naʼxma itháan. Maski ajndu xúʼko̱, nakujmaa kaʼwu rí xúgi̱ narígá itháan tsingíná ga̱jma̱a̱ nakháñun itháan xa̱bu̱ ga̱jma̱a̱ numuu gaʼxma gakhi̱i̱.

3. NARÍGÁ EWIʼ

Rí naʼni marigá ewiʼ nindxu̱u̱ guerras, rí nuni kuʼwáʼ, nda̱a̱ mbújkha̱a̱, tsíñewa̱a̱n ganitsu o tsiñewu̱u̱n xujkhúʼ ga̱jma̱a̱ tségajnuu májánʼ awan índo̱ naxtiʼkhuu mbiʼi. Mbá informe rí nasngájma Programa Mundial de Alimentos nákha tsiguʼ 2018 naʼthí: “Náa xúgíʼ numbaaʼ mbá 821 millón xa̱bu̱ numíniiʼ numuu ewiʼ, ga̱jma̱a̱ mbá 124 millones xa̱bu̱ gamíi makhañún”. Mbá 3,1 millones e̱ji̱n nakháñun numuu rí tsephiʼtsu májánʼ. Rígi̱ naʼni rí mbá 45% e̱ji̱n makhañún náa xúgíʼ numbaaʼ.

4. NANDII MBIIʼ

Mbá informe ndrígóo Organización Mundial de la Salud naʼthí: “Náa siglo mbá skíñúʼ i̱mba̱ nigi̱ʼdu̱u̱ nikujmaa nandii mbiiʼ. Nandii rí nirígá nákha ginii nikujma̱a̱ mbu̱júu̱ xóo cólera, mijkha, ga̱jma̱a̱ narígá i̱ʼwáʼ nandii rí nuxi̱ʼ xóo rí naʼni gakhi̱i̱ mbu̱ya̱ xi̱ʼ rí asndu nakháñun xa̱bu̱, nda̱ta̱ʼa̱ xíngíʼ, ébola ga̱jma̱a̱ zika”. Ga̱jma̱a̱ nandii rí núkhu nirígá COVID-19. Maski ajndu científico ga̱jma̱a̱ médicos nagún ruyáá itháan ga̱jma̱a̱ numuu nandii, mú na̱nguá exkamaa mbá thana rí mayambáá náa xúgíʼ nandii.

5. NAJUIʼTÁRAʼA ASNDU NÁÁ

Jesús niʼthí ga̱jma̱a̱ numuu i̱mba̱ tsinaʼ índo̱ niʼtáriyaʼ: “Majuiʼtáraʼa ajngáa rí májánʼ ga̱jma̱a̱ numuu Xa̱bu̱ Ñajunʼ ndrígóo Dios náa xúgíʼ tsu̱du̱u̱ ku̱ba̱ʼ mu mudxawíín xúgíinʼ xa̱bu̱, ga̱jma̱a̱ ikhú martumuu mbiʼi” (Mateo 24:14). Maski ajndu narígá mbaʼa xkujndu náa xúgíʼ numbaaʼ, itháan rí migiñuʼ millón xa̱bu̱ náa xúgíʼ xuajen nutaraʼa ajngáa rí májánʼ ga̱jma̱a̱ numuu Reino ndrígóo Dios náa mbá 240 xuajen mba̱ʼu̱ ga̱jma̱a̱ náa mbaaʼ rí kaʼyoo, ma̱ngaa náa mbá mil ajngáa. Nditháan tsírígá rígi̱ nákha ginii.

LÁ GÍʼMAA MAXMIÉJUNLÚ NUMUU RÍGI̱ RÁʼ.

Xúgíʼ rí niʼthí Jesús marigá xtáa rambánuu mbiʼi xúgi̱. Ndíjkha jngó gíʼdoo numuu rígi̱ náa ikháanʼ rá. Garmáʼáan a̱jkiu̱lú rí niʼthí Jesús: “Índo̱ gúya̱a̱ xúgíʼ rígi̱, gu̱ya̱a̱ dí Xa̱bu̱ Ñajunʼ ndrígóo Dios xtáa mijngii” (Lucas 21:31).

Tsinaʼ rí Jesús niʼthí ga̱jma̱a̱ xóo ni̱ʼkha̱ rarígá nákha wajyúúʼ nasngájma rí Dios nigíʼ Reino ndrígóo mekhuíí nákha tsiguʼ 1914.a Tsiguʼ rúʼko̱ nigíiʼ A̱ʼdióo, Jesucristo xóo rey (Salmo 2:2, 4, 6-9). Índo̱ Reino ndrígóo Dios gáʼtáñajunlú, maʼni gámbíin xúgínʼ Xa̱bu̱ Ñajunʼ ga̱jma̱a̱ maʼni̱i̱ mitsaanʼ Ku̱ba̱ʼ náa makuwáanʼ kámuu mbiʼi.

Inuu má mambanúu tsajkhun rí Jesús niʼsngúlúʼ mu̱ʼni̱: “Ga̱ʼkha̱ rí naratáñajunʼ. Gaguma rí nandaaʼ ikháán, xó má mekhuíí xúʼko̱ má náa tsu̱du̱u̱ ku̱ba̱ʼ ma̱ngaa” (Mateo 6:10). Mú, ndiéjunʼ xtáa raʼni Reino mekhuíí asndu nákha tsiguʼ 1914 rá. Ga̱jma̱a̱ ndiéjunʼ gáʼni índo̱ gáʼtáñajúúnʼ xa̱bu̱ numbaaʼ rá.