Rí matiejunʼ nindxu̱u̱ xóo dí matani ejercicio xúgíʼ mbiʼi: Mambáyáaʼ xúgi̱ ga̱jma̱a̱ nda̱wa̱á.
NA̱JKHA̱ INÚN JIÁMÁ GA̱JMA̱A̱ WA̱ʼXA̱ʼ
11 Ganindxa̱a̱ʼ bi̱ nañajunʼ májánʼ
NDIÉJUUNʼ EYOO GÁʼTHÚU̱N RÁ.
Xa̱bu̱ bi̱ nañajunʼ na̱nguá míñuu eʼni ñajunʼ. Ikhaa naniguuʼ mañajunʼ, naʼni itháan xó má rí kaʼyoo ga̱jma̱a̱ nambáñún eʼwíinʼ, maski ajndu tsékujmaa dí naʼni.
NDÍJKHA RÍ GÍʼDOO NUMUU RÁ.
Maski ajndu nanigulúʼ o na̱nguá, mú náa kuwáánʼ kuaʼdáá wéñuʼ ñajunʼ. Ikha jngóo dí mbiʼi xúgi̱ nayambáá wéñuʼ rí matiejunʼ, numuu rí xa̱bu̱ tsénigu̱u̱nʼ muñajunʼ gakhi̱i̱ (Eclesiastés 3:13).
“Índo̱ nañajunʼ wéñuʼ naniguʼ ga̱jma̱a̱ naʼni maxtáá májánʼ. Ikha jngóo mámbá mbiʼi naniguʼ mañajunʼ itháan. Ma̱ngaa rí matiejunʼ májánʼ naʼni dí eʼwíinʼ muthi dí májánʼ ga̱jma̱a̱ numaaʼ” (Román).
IKHA RÍ NA̱ʼKHA̱ NÁA BIBLIA: “Náa xúgíʼ ñajunʼ rí gakhi̱i̱ na̱jkha̱nú narígá rí májánʼ” (Proverbios 14:23).
NDIÉJUUNʼ GÁNDOO MATANI̱ RÁ.
Ikha rí na̱ʼkha̱ gi̱i̱ mambáyáaʼ ma̱ta̱ya̱a̱ dí májánʼ nindxu̱u̱ rí matiejunʼ.
Gajmañaaʼ matani májánʼ rí natani. Atagíʼ edxa̱a̱ʼ dí xtaa ratani, tséʼniuu á mu xtaa ratani mbá ñajunʼ náa guʼwáá, náa escuela o asndu náá má xtaa ratiejunʼ. Á mu najmañaaʼ natani májánʼ mbá ñajuunʼ, atayáʼ matani itháan májánʼ o itháan nacha̱. Itháan má gániguaaʼ índo̱ natayáá dí natani̱ májánʼ.
IKHA RÍ NA̱ʼKHA̱ NÁA BIBLIA: “Nitayáá mbáa xa̱biya̱ bi̱ nañajunʼ májánʼ wéñuʼ ráʼ. Náa inún reyes gáxtáa rañajunʼ; xáxtáa náa inún xa̱bu̱ bi̱ nda̱a̱ numún” (Proverbios 22:29).
Atatsaʼwáminaʼ ga̱jma̱a̱ numún eʼwíinʼ. Índo̱ natanimbánii dí kaʼyaaʼ matani, eʼwíinʼ ma̱ngaa nambáñún. Mbá xkri̱da, á mu natanimbánii ñajunʼ dí nuxnaaʼ matani náa guʼwáá, eʼwíinʼ bi̱ kúwá náa guʼwáaʼ ní xáʼniún wéñuʼ gakhi̱i̱.
IKHA RÍ NA̱ʼKHA̱ NÁA BIBLIA: “Rígá itháan gagi dí maraxna̱ ki xóo dí makánaa’” (Hechos 20:35).
Xátani ga̱jma̱a̱ xtájkháan ñajunʼ. Xátani i̱ndó dí nutha̱nʼ matani, atani̱ itháan. Xúʼko̱ gáʼni dí ikháán natayáá xóo matani. Gajkhun má rí matiejunʼ itháan, mú maʼni numuu rí ikháán nandaaʼ, raʼkháa numuu dí eʼwíinʼ nutsudáánʼ (Mateo 5:41).
IKHA RÍ NA̱ʼKHA̱ NÁA BIBLIA: “Xátani̱ xóo katsudáán ñajunʼ májánʼ rígi̱, matani̱ ga̱jma̱a̱ xúgíʼ a̱jkia̱a̱nʼ” (Filemón 14).
Awáán gátayaa rí matani. Dí matiejunʼ wéñuʼ, raʼkháa rúʼko̱ eyoo gáʼthí dí i̱ndó ndayóoʼ matiejunʼ. Gíʼmaa matani awáán ñajunʼ ga̱jma̱a̱ xúʼko̱ má rí mbi̱ya̱a̱ jxa̱a̱ʼ ma̱ngaa.
IKHA RÍ NA̱ʼKHA̱ NÁA BIBLIA: “Itháan májánʼ mbá ñawáanʼ rí mbi̱ya̱a̱ xa̱a̱ʼ ki xóo a̱jma̱ ñawáanʼ rí matiejunʼ gakhi̱i̱ ga̱jma̱a̱ rí matagayáaʼ raxkáá giñánʼ” (Eclesiastés 4:6).