Ndiéjunʼ gándoo matani̱ índo̱ nakháñuu mbáa rá. rí ma̱ndoo matani̱

Á mu natayáʼ rí mambáyaaʼ mu maʼni̱i̱ a̱jkia̱a̱nʼ mataxkamaa mbaʼa wéñuuʼ, mú rígá tikhuu rí ma̱ndoo mambáyaaʼ itháán. Xó má ndiʼyáá rí mámbáa xa̱bu̱ mixtiʼkhu xóo egawúunʼ índo̱ nakháñuu mbáa bi̱ nandoo kaʼyoo. Ikha jngóo rí gámbáyaaʼ ikháán xándoo mambáyúu imba̱a̱ xa̱bu̱.

Maski ajndu xúʼko̱, rígá tikhu rí ma̱ndoo mambáyaaʼ dí eʼwíinʼ nimbáñúún, ga̱jma̱a̱ rígi̱ nuthi xa̱bu̱ bi̱ numbañún bi̱ nuraʼníí mbá ga̱jmá, ma̱ngaa tikhuu ku̱ma̱ rúʼko̱ na̱ʼkha̱ raʼthí náa mbóoʼ libro dí nigumaraʼmáʼ asndu nákha wájyuuʼ, ikhaa nindxu̱u̱ Biblia.

1: ATATSÍÑÁMINAʼ MUMBAYÁAʼ BI̱ XTAÑÚN GA̱JMA̱A̱ MÍGIAAʼ

• 

  Tikhun xa̱bu̱ bi̱ ninigajma̱a̱ ga̱jma̱a̱ numuu rúʼko̱ nuthi dí rígi̱ gándoo mambáyaaʼ índo̱ nakháñuu mbáa bi̱ nandaaʼ xtayáá. Maski ajndu xúʼko̱ mbáa marigá mbiʼi dí ikháán maʼndaaʼ maraxtaa mbáwíín rí asndu makiʼnáa xtañún bi̱ nandún mumbayáaʼ. Xáxmiéjuanʼ numuu dí xígi̱ má eguáʼníí xúgíinʼ bi̱ nunimbáti̱ga̱a̱ mbáa bi̱ nandún kuyáá.

• Xátatsaʼwamínáʼ rí ndayóoʼ maraxtaa má xúʼko̱ gajmiáanʼ eʼwíinʼ, mú ma̱ngaa xátani̱ tsíngumi̱na̱ʼ náa ikhiin. Mbáa nda̱wa̱á mbaʼyáaʼ rí mumbayáaʼ. Arathún dí ndayáaʼ o dí tséʼyáaʼ má, mú atani̱ ga̱jma̱a̱ gamajkhu.

• Mu matani̱ rí gáʼyáaʼ awa̱án gátani̱ xúgíʼ, xóo índo̱ xtáa gajmiáanʼ eʼwíinʼ o índo̱ xtáa mbáwíín.

IKHA RÍ NA̱ʼKHA̱ NÁA BIBLIA: “Itháan májánʼ dí a̱jmi̱i̱n ki xóo mbáwíi [...]. Numuu rí á mu mbáa rí ikhiin naxpátri̱ga̱a̱, bi̱ imba̱a̱ ma̱ndoo mambáyúu ndxájuu mu matujxi̱i̱” (Eclesiastés 4:9, 10).

2: ATATSIʼTSU MÁJÁNʼ GA̱JMA̱A̱ ATANI̱ EJERCICIO

• Rí matatsiʼtsu májánʼ mambáyaaʼ mu xáraxtaa gíná wéñuuʼ, ataniminaʼ miʼtsu fruta, verdura ga̱jma̱a̱ ganitsu rí na̱nguá gíʼdoo wéñuʼ grasa.

• Agi̱i̱n wéñuuʼ iyaʼ ma̱ngaa i̱ʼwáʼ rí ma̱ndoo mambáyaaʼ.

• Á mu tséxkidxa̱a̱ʼ ataniminaʼ miʼtsu mámbá chíʼgíiʼ nángi eʼni. Ma̱ngaa ma̱ndoo matanda̱ʼa̱a̱ mbáa doctor mu maʼtháanʼ ndiéjunʼ gándoo miʼtsu.a

• Rí matagayáaʼ ga̱jma̱a̱ rí matani̱ i̱ʼwáʼ ejercicio mambáyaaʼ mu xáxmiéjuanʼ wéñuuʼ. Tikhun índo̱ nuni̱ ejercicio nundxa̱ʼwa̱míjna̱ ga̱jma̱a̱ numuu bi̱ nikháñuu, mú eʼwíinʼ nunimíjna̱ dí xúndxa̱ʼwa̱a̱ edxu̱ún ga̱jma̱a̱ numuu rúʼko̱.

IKHA RÍ NA̱ʼKHA̱ NÁA BIBLIA: “Nimbáa na̱nguá ewiyu̱u̱ʼ kaʼyoo xuyuuʼ, rí naʼni naxnúu rí mi̱khu̱ ga̱jma̱a̱ nañewu̱u̱n májánʼ” (Efesios 5:29, Santa Biblia: Dios habla hoy).

3: ANUʼ MÁJÁNʼ

• 

  Rí minuʼ gíʼdoo wéñuuʼ numuu, itháan náa mbáa bi̱ naʼnimbáti̱ga̱a̱ bi̱ nandoo kaʼyoo, numuu rí índo̱ nakháñuu mbáa naʼni néʼnga̱a̱ʼ wéñuuʼ.

• Xágíi̱n wéñuuʼ dí gíʼdoo cafeína, xóo café o i̱ʼwáʼ ga̱jma̱a̱ iya najnga̱a̱, numuu dí rúʼko̱ gáʼni rí xáʼndaaʼ gínúʼ.

IKHA RÍ NA̱ʼKHA̱ NÁA BIBLIA: “Itháan májánʼ mbá ñawáanʼ rí mbi̱ya̱a̱ xa̱a̱ʼ ki xóo a̱jma̱ ñawáanʼ rí matiejunʼ gakhi̱i̱ ga̱jma̱a̱ rí matagayáaʼ raxkáá giñánʼ” (Eclesiastés 4:6).

4: AWA̱ÁN GÁTANI̱ XÚGÍʼ

• 

  Numuu rí mámbáa xa̱bu̱ mixtiʼkhu xóo egawúunʼ índo̱ naʼnimbáti̱ga̱a̱ mbáa, ikha jngóo ikháán ndayóoʼ matraʼwíí májánʼ dí matani̱.

• Mbaʼin nambáñúún dí muthúún eʼwíinʼ xú káʼnii ku̱mu̱ún, mú eʼwíinʼ tsíñún gúni̱. Bi̱ ninigajma̱a̱ ga̱jma̱a̱ numuu rígi̱ nuthi rí itháan májánʼ rí marata̱ xóo eku̱ma̱a̱ʼ índo̱ natanimbáti̱ga̱a̱ mbáa bi̱ xtayáá. Á mu ikháán nandaaʼ marata̱ xóo eku̱ma̱a̱ʼ, ndiéjuunʼ gátani̱ á mu naʼniaaʼ mingíjyúuʼ rá. Ma̱ndoo maratha̱a̱n mañu mañúú mbáa bi̱ nambájxáaʼ ga̱jma̱a̱ʼ.

• Kúwá bi̱ ndayóoʼ mumbi̱ya̱ʼ mu maʼni̱i̱ a̱jkiu̱ún, mú tikhun na̱nguá.

IKHA RÍ NA̱ʼKHA̱ NÁA BIBLIA: ‹Mámbáa xa̱bu̱ naninuuʼ ga̱ʼkhu̱ ndrígóo› (Proverbios 14:10, Nueva Versión Internacional).

5: XÁTANI̱ RÍ MAʼNI GACHÍÍN ITHÁAN

• 

  Tikhuin xa̱bu̱ naʼwa̱a̱n iya najnga̱a̱ índo̱ kúwá ngíná o najmún droga mu maʼni̱i̱ a̱jkiu̱ún. Mú rí matani̱ rígi̱ maʼni gachíín ga̱jma̱a̱ káaʼ mbá xngaa gámbáyaaʼ, nda̱wa̱á maʼni rí matamíniiʼ. Atayáʼ rí mambáyaaʼ rí xáʼni gachíín mu xúʼko̱ xáxmiéjuanʼ wéñuuʼ.

IKHA RÍ NA̱ʼKHA̱ NÁA BIBLIA: ‹Gu̱ʼni̱ kaʼwumijnáa náa xúgíʼ rí naʼni gacháánʼ› (2 Corintios 7:1).

6: GAJMAAʼ MÁJÁNʼ MBIʼI

• Mbaʼin nambáñúún rí muthúún eʼwíinʼ rí naʼni maxmiéjúúnʼ ma̱ngaa dí muni̱ i̱ʼwáʼ ñajunʼ, mu xúʼko̱ xúndxa̱ʼwa̱a̱ edxu̱ún kikháá dí niguáʼníí.

• Ma̱ndoo maʼni̱i̱ a̱jkia̱a̱nʼ á mu natambájxa̱a̱ʼ itháan gajmiáanʼ mígiaʼ o mataʼñíinʼ eʼwíinʼ bi̱ mambájxa̱a̱ʼ gajmiáanʼ ga̱jma̱a̱ rí mataʼyáʼ i̱ʼwáʼ rí matani̱, xóo rí maratsíin.

• Xóo ejkha̱ ranújngoo mbiʼi ikháán ma̱ta̱ya̱a̱ ndiéjunʼ dí gíʼdoo numuu matani̱. Ikhú mi̱dxu̱ʼnú ma̱ta̱ya̱a̱ rí nánguá má xtaa ngíná wéñuuʼ numuu dí natani̱ má i̱ʼwáʼ ñajunʼ dí rígá, rígi̱ nasngájma rí na̱jkha̱ má raʼni̱i̱ a̱jkia̱a̱nʼ.

IKHA RÍ NA̱ʼKHA̱ NÁA BIBLIA: “Xúgíʼ na̱ʼkha̱nú mbiʼi ndrígóo [...]: Mbiʼi rí mumbi̱ya̱ʼ ga̱jma̱a̱ mbiʼi rí mundu̱ʼwa̱” (Eclesiastés 3:1, 4).

7: ATANI̱ RÍ NAGUʼWAANʼ MÁ NATANI̱

• 

  Xájyáaʼ wéñuuʼ matanga̱án matani̱ rí naguʼwaanʼ má natani̱.

• Á mu xtaʼdáá mbá hora dí minuʼ ga̱jma̱a̱ rí matiejunʼ o matani̱ i̱ʼwáʼ ñajunʼ, rúʼko̱ gámbáyáaʼ ma̱ta̱ya̱a̱ rí natanga̱án naraxtaa xóo nákha ginii.

• Rí matani̱ má xúʼko̱ ñajunʼ rí nanigua̱a̱ʼ, rúʼko̱ gámbáyaaʼ maʼni̱i̱ a̱jkia̱a̱nʼ.

IKHA RÍ NA̱ʼKHA̱ NÁA BIBLIA: “Xándxa̱ʼwáminaʼ wéñuuʼ ga̱jma̱a̱ numuu rí xóo xtáa, numuu rí Dios bi̱ gajkhun maʼni rí maxtáa gagi” (Eclesiastés 5:20).

8: XÁTRAʼWÍÍ MBÁ NACHA̱ MATANI̱ RÍ GÍʼDOO NUMUU

• Mbaʼin nuraʼwíí mbá nacha̱ rí gíʼdoo numuu muni̱ índo̱ nakháñuu mbáa bi̱ nandún kuyáá ga̱jma̱a̱ nda̱wa̱á natanga̱a̱ a̱jkiu̱ún.

• Á mu kaʼnii gáta̱ya̱a̱ xátriʼkhuíi mbá nacha̱ náa guʼwá rí xtaa, náa natiejunʼ o mataxi̱díí trástiu̱u̱ bi̱ nikháñuu.

IKHA RÍ NA̱ʼKHA̱ NÁA BIBLIA: “Awan rí naríya’ bi̱ nañajun’ magajnúu májánʼ, mú bi̱ nacho̱o̱ maʼni migínáa” (Proverbios 21:5).

9: GARMÁʼÁAN A̱JKIA̱A̱Nʼ XTAYÁÁ BI̱ NIKHÁÑUU

• 

  Mbaʼin nambáñúún muni̱ dí maʼni marmáʼáan a̱jkiu̱ún kuyáá bi̱ nikháñuu.

• Araʼdáá mijngii fotiu̱u̱ ga̱jma̱a̱ i̱ʼwáʼ, ma̱ngaa ataniraʼmáʼ náa libreta mbiʼi kiejunʼ rí niraxtaa ga̱jma̱a̱ʼ. Rúʼko̱ gámbáyaaʼ mu xágawáanʼ wéñuuʼ.

• Arajxi̱i̱ trástiu̱u̱ mu xúʼko̱ marmáʼáan a̱jkia̱a̱nʼ mbiʼi dí niraxtaa tsímáá ga̱jma̱a̱ʼ, ga̱jma̱a̱ atayáá índo̱ gátaʼyáaʼ.

IKHA RÍ NA̱ʼKHA̱ NÁA BIBLIA: “Garmáʼáan a̱jkia̱a̱nʼ mbiʼi dí nirígá nákha wajyúúʼ” (Deuteronomio 32:7).

10: ATRÍYAʼ MBIʼI MU MBI̱YA̱A̱ XA̱A̱ʼ

• Atríyaʼ mbiʼi mu mbi̱ya̱a̱ xa̱a̱ʼ.

• Á mu tsémbayáaʼ dí matríyaʼ mba̱yu̱u̱ʼ mbiʼi mu mbi̱ya̱a̱ xa̱a̱ʼ, ma̱ndoo matríyaʼ mbá mbiʼi o a̱jma̱ mu mi̱dxu̱ʼ pasiá náa xanáá o maníí.

• Maski ajndu chíʼgíiʼ dí gátriʼkuíí rí matani̱ rúʼko̱ gámbáyaaʼ mu xáraxtaa wéñuuʼ ngíná.

IKHA RÍ NA̱ʼKHA̱ NÁA BIBLIA: “Aguwaʼ ga̱jma̱á nindxu̱ʼ, guʼgua̱ i̱ndó ikháanʼ náa ndawi̱i̱n xa̱bu̱ mu mbuya̱a̱xala mbá xngaa” (Marcos 6:31).

11: ATAMBÁÑÚÚN EʼWÍINʼ

• 

  Dí matambáñúún eʼwíinʼ maʼni dí maraxtaa májánʼ mangáán.

• Ma̱ndoo matambáñúún bi̱ kúwá ngíná ga̱jma̱a̱ numuu rí nikháñuu mbáa bi̱ nandún kuyáá, xóo bi̱ nambájxáaʼ gajmiáanʼ o bi̱ xtañún. Ikhiin ndayóoʼ muthán mbáa rí xóo ekumu̱ún.

• Rí matambáñúún eʼwíinʼ ga̱jma̱a̱ rí matani̱i̱ a̱jkiu̱ún maʼni rí matanga̱án maraxtaa tsímáá. Rúʼko̱ gáʼni ma̱ta̱ya̱a̱ rí gíʼdoo numuu maraxtaa.

IKHA RÍ NA̱ʼKHA̱ NÁA BIBLIA: “Rígá itháan gagi dí maraxna̱ ki xóo dí makánaaʼ” (Hechos 20:35).

12: ATANGA̱ÁN MA̱TA̱YA̱A̱ RÍ GÍʼDOO ITHÁÁN NUMUU

• Rí maraxtaa ngíná naʼni ma̱ta̱ya̱a̱ dí rígá i̱ʼwáʼ rí gíʼdoo numuu matani̱.

• Índo̱ xtaa ngíná ma̱ndoo matraʼwún ma̱ta̱ya̱a̱ xú káʼnii ejmaaʼ mbiʼi ndrígáaʼ.

• Á mu ndayóoʼ gáta̱ya̱a̱, atriʼkuíí matani̱ rí gíʼdoo itháan numuu.

IKHA RÍ NA̱ʼKHA̱ NÁA BIBLIA: “Itháán májánʼ mi̱dxu̱ʼ náa guʼwá dí rígá ga̱jmá ki xóo mi̱dxu̱ʼ náa guʼwá dí rígá ndxa̱a̱, numuu dí xúgíinʼ xa̱bu̱ má nakháñúún, ikha jngóo xúgíinʼ bi̱ nduya gíʼma mundxa̱ʼwa̱míjna̱ ga̱jma̱a̱ numuu rúʼko̱” (Eclesiastés 7:2).

Rí phú gajkhun, nimbá xáʼngo̱o̱ gáʼni gámbóo ga̱ʼkhu̱ ndrígáaʼ. Mú mbaʼin niguánú ndiyáá rí muni̱ dí naʼthí náa artículo rígi̱ nimbáñun mu maʼni̱i̱ a̱jkiu̱ún. Mú raʼkháa i̱ndó rígi̱ dí mambáyaaʼ mu maʼni̱i̱ a̱jkia̱a̱nʼ. Mú, á mu natagíʼ natani̱ rígi̱ mi̱dxu̱ʼnú ma̱ta̱ya̱a̱ rí mambáyaaʼ wéñuuʼ.