Xú káʼnii eʼni gachíin internet mígiaaʼ rá.

Naguma xúgíʼ rígi̱, numuu dí najmún internet. Mú xa̱bu̱ bi̱ itháán najmún wéñuʼ internet mu mutamijná gajmiún mígiún ma̱ndoo muguánu maguaʼdáá xkujndu xóo rígi̱:

• Xáku̱mu̱ún xóo eku̱mu̱ún mígiún.

• Nakumu̱ún rí kúwá ndajkuíín ga̱jma̱a̱ tsékuwá gagi.

• I̱ndó naxmiéjúúnʼ kuyamijná ikhiin.

DÍ GÍʼMAA MA̱TA̱YA̱A̱

GAKUMA̱A̱ʼ XÓO KU̱MU̱U̱ IMBA̱A̱

Mu makumulú xóo eku̱mu̱ún eʼwíinʼ, ndayóoʼ dí maguajún mbáxngaa ga̱jma̱a̱ mundxaʼwamíjna̱ xóo phú ku̱mu̱u̱ imba̱a̱ xa̱bu̱. Mú xándoo mu̱ʼni̱ rígi̱ á mu kuwáánʼ ruʼyáá dí naxuda̱nʼ náa internet ga̱jma̱a̱ nacha̱ nuxuʼma mensaje.

Á mu internet eʼtáñajuaanʼ, ma̱ta̱ya̱a̱ dí matriʼña̱a̱ mensaje ndrígu̱ún mígiaaʼ nindxu̱u̱ xóo maraʼdáá itháán ñajunʼ ga̱jma̱a̱ maʼniaʼ gakhii. Á mu xúʼko̱, maʼni dí maʼndaaʼ matriʼña̱a̱ xúgíʼ mensaje mbá nacha̱ ki xóo matambáyii mígiaaʼ bi̱ xtáa ramínúuʼ.

ATRAJXI̱MÍNÁʼ RÍGI̱: Xú káʼnii gatasnga̱jmá dí naku̱ma̱a̱ʼ xóo ku̱mu̱u̱ mígiaaʼ índo̱ najmaa internet mu maratamíjná ga̱jma̱a̱ʼ rá. (1 PEDRO 3:8.)

XÁRAXTÁA GAGI

Náa mbá estudio dí niguma nijuiʼthá rí mbaʼin xa̱bu̱ bi̱ ndajñún mba̱yu̱u̱ʼ nduyáá internet, nda̱wa̱á nakúwá ngíná. Xa̱bu̱ bi̱ ndu̱ya̱ʼ ga̱jma̱a̱ numuu rígi̱ niguánú ndiyáá rí ma̱ta̱ya̱a̱ foto o rí nuthi̱ eʼwíinʼ náa internet “ma̱ndoo maʼni makumulú rí nditháan nda̱a̱ rí mitsaanʼ niʼni náa vida ndrígúlú ikháán”.

Ma̱ngaa índo̱ nduʼyáá foto rí mitsaanʼ dí nuni eʼwíinʼ náa vida ndrígu̱ún, á mu nuʼni mbrígumijná gajmiúlú, muʼgua̱nú mundxaʼwamíjna̱ dí xúgíinʼ xa̱bu̱ nuni gagimijná, mú ikháanʼ na̱nguá.

ATRAJXI̱MÍNÁʼ RÍGI̱: Xú káʼnii gátani mu xátani mbríguminaʼ gajmiáanʼ eʼwíinʼ náa internet rá. (GÁLATAS 6:4.)

I̱NDÓ MATATSAʼWAMÍNÁʼ GA̱JMA̱A̱ NUMAAʼ IKHÁÁN

Mbáa maestra niʼthí rí tikhuun e̱ji̱n bi̱ naʼsngúún tsixmiéjúún kuñún eʼwíinʼ ga̱jma̱a̱ i̱ndó nduñiiʼ mígiún bi̱ numbañún índo̱ ndañúunʼ.a Bi̱ nuni xígi̱ káʼnii, i̱ndó nduyáá náa rí ma̱ndoo mambáñún ikhiin. Ikha jngóo, mbáa ma̱ndoo maʼga̱nú mbaʼñún mígiuu xóo mbá aplicación dí ma̱ndoo majmuu índo̱ gáʼndoo ga̱jma̱a̱ mandijyúuʼ índo̱ gáʼyóoʼ.

ATRAJXI̱MÍNÁʼ RÍGI̱: Dí nataxudánʼ náa internet, lá nasngájma dí nandaaʼ matani mbríguminaʼ gajmiáanʼ eʼwíinʼ ga̱jma̱a̱ rí i̱ndó naxmiéjuanʼ xtayaminaʼ ikháán ráʼ. (GÁLATAS 5:26.)

RÍ MA̱NDOO MATANI

ATAYÁÁ XÓO MAJMAAʼ INTERNET

Á mu ikháán naratañajuíín internet ga̱jma̱a̱ tsétatsiñaminaʼ rí ikhaa maʼtáñajuaanʼ, ma̱ndoo maratamíjná gajmiáanʼ mígiaa o asndu mambajxáaʼ itháán májánʼ gajmiáanʼ.

Atatsaʼwáminaʼ ikha rí naniguaaʼ mataʼgí matanimbáníí o ataniráʼmá dí nandaaʼ ikháán:

• Dí matamínaʼ gajmíʼ ikhiin ki xóo makuʼmá mensaje correo electrónico.

• Magrígú kaníí celular o mani rí maxuwáán índo̱ xtáá ratamíjná gajmíʼ eʼwíinʼ.

• Nánguá mato̱ʼo̱ʼ wéñuʼ náa internet.

• Maʼgíʼ edxu̱ʼ madxawun rí nuthi̱ eʼwíinʼ.

• Matamíjná gajmuʼ itháán mígiúʼ bi̱ xtáa ramínúuʼ.