Xú káʼnii eʼni gachíin internet ejñaa rá.

Tikhun xa̱bu̱ nduʼyáá rí jiámá o wa̱ʼxa̱ʼ bi̱ najmún wéñuʼ internet ma̱ndoo maguaʼdáá xkujndu xóo rígi̱:

• Asndu nánguá eniña̱a̱ nditháan celular ndrígu̱ún.

• Nuthi ajngáaʼ mitsaga o ikhiin nuta wéñúúnʼ náa internet.

• Gamíi mbuyáá pornografía tséʼniuu á mu ikhiin nduyáʼ o na̱nguá.

DÍ GÍʼMAA MA̱TA̱YA̱A̱

RÍ XATATSIʼÑÁÁN INTERNET

Tikhu ñajunʼ dí naguma náa internet gamíi rí maʼniguʼwaanʼ, mbá xkri̱da xóo dí maratsíin ikhí. Rígi̱ ragíʼmaa maʼniulú tsiánguá. Náa Libro rí mbiʼyuu En defensa de la conversación naʼthí: “Xúgíʼ aplicaciones dí rígá náa awúu̱n celular niguma mu maʼni gájyáaʼ”. Índo̱ ndajyúlú itháán nduʼyáá aplicación náa nanújngoo anuncio, itháán mba̱a̱ mbújkha̱a̱ edaa empresas bi̱ nuxuda̱nʼ anuncio rígi̱.

ATRAJXI̱MÍNÁʼ RÍGI̱: Lá tséniñaaʼ kayuuʼ celular ejña̱a̱n ráʼ. Xú káʼnii gándoo gatambáñún mu majmúún májánʼ mbiʼi xá. (EFESIOS 5:15, 16.)

ÍNDO̱ NUXRUIGI̱I̱N NÁA INTERNET

Tikhun xa̱bu̱ índo̱ najmún internet nanindxuún itháán xkawi̱i̱nʼ, nda̱a̱ gamajkhún o asndu naʼni itháán gújkhúʼ a̱jkiu̱ún. Ga̱jma̱a̱ rígi̱ gáʼni rí mutsijmii o muxruigi̱i̱n eʼwíinʼ.

Tikhun xa̱bu̱ nuni xígi̱ numuu rí nuthúún wéñuʼ eʼwíinʼ o numuu rí najmaʼniún. Ga̱jma̱a̱ kúwi̱i̱n tikhun bi̱ nundxaʼwamíjna dí índo̱ nutsijmii numuu rí tséthún muni gajmiún mbóó ñajunʼ, mbá xkri̱da tséthún rí magún gajmiún náa ndxa̱a̱.

ATRAJXI̱MÍNÁʼ RÍGI̱: Lá nuñewa̱a̱n májánʼ xóo majmúún celular ejña̱a̱n ráʼ. (Efesios 4:31.) Xóo káʼnii ekumu̱ún índo̱ tséthún muni̱ gajmiún mbóó ñajunʼ xá.

PORNOGRAFÍA

Rí mbiʼi xúgi̱, internet asndu náá ma̱ta̱ya̱a̱ xóo náa maʼni magua̱ʼa̱ mataba̱ʼ ga̱jma̱a̱ʼ mbáa. Maski ajndu matiewa̱a̱n xóo rí mbuyáá ejña̱a̱n, mú xáʼngo̱o̱ má i̱ndó rúʼko̱.

Sexteo, xóo muʼthá mataxunguánʼ náa celular o matandrígú xtiʼkhu rí maʼni magua̱ʼa̱ mataba̱ʼ ga̱jma̱a̱ʼ mbáa, rígi̱ nindxu̱u̱ mbá xkujndu mba̱a̱ wéñuʼ. Nguáná tséʼniuu má xú káʼnii xtángoo dí rígá náa xuajen rí kúwi̱i̱n o tsigúun bi̱ nuni rígi̱, ma̱ndoo muxruigi̱i̱n numuu rí nuxunguán pornografía.

ATRAJXI̱MÍNÁʼ RÍGI̱: Xú káʼnii gándoo gátambáyii a̱ʼdiáaʼ mu xaxpátriguii mbaʼyoo o dí makuʼma ikhaa xtiʼkhu náa rí maʼni magua̱ʼa̱ mabóoʼ ga̱jma̱a̱ mbáa náa internet xá. (EFESIOS 5:3, 4.)

RÍ MA̱NDOO MATANI

ARASNGÚÚN MÁJÁNʼ EJÑA̱A̱N

Maski ajndu e̱ji̱n bi̱ “najmañún najmún celular” tséʼniún gakhii, mú ndañún mbáa bi̱ maxnún ikha. Náa libro Indistractable (Indistraíble), naʼthí dí gamíi maraxnáa celular mbáa ada̱ bi̱ xóó tséjmañuu májánʼ xóo majmuu, o dí mato̱ʼo̱o̱ náa internet.

Atraxníí ikha rí naniguaaʼ mataʼgí matanimbáníí o ataniráʼmá dí nandaaʼ ikháán:

• Rí mathu̱u̱n e̱ji̱nʼ xóo gíʼmaa majmúún internet.

• Mambáñún e̱ji̱nʼ rí xákúwá ngíná índo̱ na̱nguá ethúún muni gajmiún mbóó ñajunʼ.

• Mundijuíi wapháá celular náa dí rakaʼñún mbuyáá.

• Rí mba̱yo̱o̱ dí gajti náa celular ndrígóo aʼdióʼ.

• Mbaʼyóoʼ maʼgíʼ mbiʼi nguáthá mba̱yu̱u̱ʼ gájmuuʼ celular.

• Mathu̱u̱n dí xayéʼga̱a̱ celular náa cuartiu̱u̱ rí mbruʼun.

• Xaniʼñu̱u̱ dí majmúún celular índo̱ kúwá ruphiʼtsu.