Xú káʼnii eʼni gachíin internet rí nundxaʼwamíjna̱ rá.

Xúgíinʼ xa̱bu̱ ñajmañún má xúʼko̱: Xóo índo̱ nagún náa escuela, náa ñajunʼ o i̱ʼwáʼ. Mú ma̱ngaa internet najmaa wéñuʼ. Rí mbiʼi xúgi̱ nánguá gakhii kayuuʼ xóo náa ma̱ndoo ma̱ta̱ya̱a̱ o maratamijná gajmiáanʼ eʼwíinʼ rí asndu xatagajnaa náa guʼwáaʼ o xatujxa̱a̱ʼ náa xiliaaʼ.

Xa̱bu̱ bi̱ najmún wéñuʼ internet ma̱ndoo maguaʼdáá xkujndu xóo rígi̱:

Tségíʼ edxu̱ún índo̱ nuraxnuu.
Naʼniún gakhii rí muni̱ mbóó ñajunʼ.
Naskún índo̱ kúwá ndajkuíín.

DÍ GÍʼMAA MA̱TA̱YA̱A̱

Mbáa dxáʼgú naʼni mbaʼa ñajunʼ mbá miʼtsu: Nakuʼma mensaje náa celular, naʼtámijná ga̱jma̱a̱ mbáa náa videollamada ma̱ngaa naʼnigajmaa náa computadora ga̱jma̱a̱ náa mbá libro.

NURAXNUU

Tikhuun xa̱bu̱ mbá nacha̱ eraxnuu ga̱jma̱a̱ tséʼngo̱o̱ a̱jkiu̱ún ma̱ngaa tségíʼ edxu̱ún dí nuraxnuu.

Májánʼ má nindxu̱u̱ dí matraxnuu nacha̱ mu mataxkamaa graxe̱ dí natayáʼ. Mú tsembáyaaʼ majmañaaʼ itháán.

ATRAJXI̱MÍNÁʼ RÍGI̱: Naʼniaaʼ gakhii matraxnuu texto rí mba̱a̱ ráʼ. Náá numuu ku̱ma̱a̱ʼ ikháán á mu natraxnuu mambáyaaʼ mu majmañaaʼ rá. (PROVERBIOS 18:15.)

ATAGÍʼ EDXA̱A̱ʼ

Tikhuun xa̱bu̱ nuthi̱ rí núma̱aʼ má internet nandoo nuni a̱jma̱ ñajunʼ mbá miʼtsú: Mbá xkri̱da, índo̱ kúwá runigajmaa nandoo nuxuʼma mensaje náa mígiún. Índo̱ mbáa naʼni xúʼko̱, tségíʼ edxu̱u̱ dí xtáa raʼni ga̱jma̱a̱ nda̱a̱ rí eʼni nimbá.

Mu mataʼgíʼ edxa̱a̱ʼ ndayóoʼ matiewa̱a̱n wéñuʼ rí matani. Xánindxu̱u̱ ndíí tsiakii rí matani. Mbáa dxáʼgú bi̱ mbiʼyuu Grace naʼthí: “Xúʼko̱ tsejngawa̱a̱n wéñuʼ ga̱jma̱a̱ na̱nguá exmiéjuaanʼ. Ni̱jkhánú ndi̱yo̱o̱ rí itháán májánʼ matani mbóó ñajunʼ ki xóo matani mbaʼa mbá miʼtsú”.

ATRAJXI̱MÍNÁʼ RÍGI̱: Índo̱ natani mbaʼa ñajunʼ mbá miʼtsu, lá naʼniaa gakhii makruaʼa̱a̱ ga̱jma̱a̱ marmáʼáan a̱jkia̱a̱nʼ dí nitraxnuu ráʼ. (PROVERBIOS 17:24.)

ÍNDO̱ XTÁA MBAWÍÍN

Tikhuin xa̱bu̱ tsínigu̱u̱n makuwá rí asndu nda̱a̱ dí gúni. Ikha jngóo najmún internet. Mbáa a̱ʼgu̱ bi̱ mbiʼyuu Olivia naʼthí: “Tséʼngo̱ʼ ganiʼñu̱u̱n asndu 15 minutos rí xáyoo celular, tablet o rí maskamuu tele. Numuu rí naskoʼ”.

Xúgíinʼ, jiámá o wa̱ʼxa̱ʼ, xabuanii ndayulu rí makuwáán ndajkuáanʼ mu ma̱ndoo mundxawamíjna̱ dí najmañulú. Rígi̱ gíʼdoo wéñuʼ numuu mu majmañulú.

ATRAJXI̱MÍNÁʼ RÍGI̱: Najmaa mbiʼi índo̱ xtaa mbawíín mu matandxawamínaʼ ráʼ. (1 TIMOTEO 4:15.)

RÍ MA̱NDOO MATANI

ATATSAʼWAMÍNAʼ MÁJÁNʼ XÓO NAJMAAʼ INTERNET

Xú káʼnii gándoo gámbáyaaʼ internet mu majmañaaʼ itháán rá. Xú káʼnii gáʼni jngrigáan índo̱ xtaa ratanigajmaa rá.

IKHA NDRÍGÓO BIBLIA: “Atatsaʼwáminaʼ májánʼ ga̱jma̱a̱ gani̱ndxa̱ʼ mbáa xa̱bu̱ bi̱ najmañuu wéñuʼ” (PROVERBIOS 3:21).

ATRAJXI̱MÍNÁʼ:

Naʼniuʼ gakhii maʼgíʼ edxu̱ʼ dí xtaa raguxnuu índo̱ ndayo̱o̱ náa mbá pantalla ráʼ. Á mu xúʼko̱ ndiéjuunʼ rí naʼni jngrigu̱u̱n rá.
Ndiéjuunʼ ma̱ndoo mani mu xáʼni jngrigu̱u̱n ndítháán rá.

Rí ma̱ndoo matani: Atagíʼdi̱i̱ matraxnuu texto rí ma̱jkha̱ʼ ga̱jma̱a̱ xúʼko̱ ma̱ndoo midxuʼ ratraxnuu itháán rí mba̱ʼu̱. Atraxnuu xígú, mu mañu matagíʼ edxa̱a̱ʼ dí natraxnuu.

Ndiéjuunʼ gándoo mani mu magúʼdoo itháán mbiʼi mandxaʼwamínaʼ dí naguxnuu rá.

Rí ma̱ndoo matani: Índo̱ xtaa ratanigajmaa, atriyaʼ mbiʼi mbá xóo 10 minutos mu matatsaʼwáa edxa̱a̱.

Náá phú mbiʼi na̱ni̱ mbaʼa ñajunʼ rá.
Ndiéjuunʼ gáʼyoo mariʼkhuu mu mani mbóó ñajunʼ rá.

Rí ma̱ndoo matani: Mu xátani mbaʼa ñajunʼ mbá miʼtsu, atriyamijnaʼ wajíí náa nda̱a̱ dí maʼni jngarigáan.

IKHA NDRÍGÓO BIBLIA: “Araʼdáá ku̱ma̱ ga̱jma̱a̱ gakruaʼaʼ” (PROVERBIOS 4:5).