Ndíjkha dí xa̱bu̱ nánguá eyamajkumijná rá.

NDÍJKHA DÍ GÍʼDOO NUMUU MBUʼYAMAJKUMIJNÁ

Xa̱bu̱ bi̱ nduyamajkumijná naʼngu̱u̱n nuraʼníí xkujndu rí na̱ʼkha̱nú inún.

Xa̱bu̱ bi̱ najmañún niguánu ndiyáá dí xa̱bu̱ bi̱ tséndxáʼwáminaʼ májánʼ ga̱jma̱a̱ numuu, nagiʼdoo itháán nandii náa ngáñúuʼ numuu rí nujngo̱ó exmiéjuunʼ, naxtáa ngíná wéñuuʼ ma̱ngaa nuraʼníí gamiéjunʼ ga̱jma̱a̱ numuu ganitsu. Ma̱ngaa mbaʼin dí ikhiin naʼwa̱a̱n iya najngaa, naʼphu̱ thana ga̱jma̱a̱ najmún droga.
Xa̱bu̱ bi̱ namajkhún kuyamijná tséni mbrígumijná gajmiún eʼwíinʼ ga̱jma̱a̱ rúʼko̱ nambáñúún mu mambáxu̱u̱n itháán májánʼ gajmiún eʼwíinʼ. Mú xa̱bu̱ bi̱ tsémajkhuu kaʼyaminaʼ, ikhaa naʼthá númúún eʼwíinʼ, ga̱jma̱a̱ rúʼko̱ tsémbáyúu mu mambájxu̱u̱ májánʼ gajmíi̱n eʼwíinʼ.
Xa̱bu̱ bi̱ namajkhún kuyamijná tsékaguabiinʼ índo̱ nuraʼníí xkujndu ga̱jma̱a̱ tséniña̱a̱ʼ rí nimbá marikhúún munimbáníí dí niraʼwi̱i̱ muni̱. Mú xa̱bu̱ bi̱ tsémajkhuu kaʼyaminaʼ índo̱ rígá mbá dí tséʼngo̱o̱ gáʼni, naku̱mu̱u̱ rí nda̱a̱ dí ejmaa mbá kayuuʼ ga̱jma̱a̱ nánguá eʼniminaʼ itháan.

DÍ MA̱NDOO MATANI̱ IKHÁÁN

Gambaxáaʼ gajmiáanʼ bi̱ mumbayáaʼ. Araxtaa gajmiáanʼ xa̱bu̱ bi̱ guáʼdáá gamajkhu ga̱jma̱a̱ bi̱ gajkhun nandún dí maraxtaa májánʼ ga̱jma̱a̱ bi̱ muxnaaʼ tsiaki̱i̱.

“Bi̱ gajkhun nambájxa̱a̱ʼ ga̱jma̱a̱ʼ ma̱ʼndoo kaʼyaaʼ xúgíʼ mbiʼi ga̱jma̱a̱ nindxu̱u̱ mbáa ndxájuaʼ bi̱ nigumaa mu mambáyaaʼ índo̱ narígá gamiéjunʼ” (Proverbios 17:17).

Atambáñúún eʼwíinʼ xa̱bu̱. Á mu ikháán májáanʼ a̱jkia̱a̱nʼ ga̱jma̱a̱ natambáñúún eʼwíinʼ, ikháán maraxtaa gagi maski ajndu ikhiin xándoo murtanga̱a̱ munia̱a̱ʼ rí májánʼ. Maʼdxaaʼ maski má nimbáa ndawa̱a̱ tsáá eʼyoo rí natani̱.

“Rígá itháán gagi dí maraxna̱ ki xóo dí makhánáaʼ” (Hechos 20:35).

Atambáñúún ejña̱a̱nʼ mu mamajkhún kuyamijná. Mbá rí ma̱ndoo matani̱, nindxu̱u̱ dí matatsiʼñún dí ikhiin má gúnimbáníí xkujndu ndrígu̱ún á mu naʼngu̱u̱n. Rúʼko̱ gámbáñún majmañún muraʼníí xkujndu mingíjyúuʼ ga̱jma̱a̱ mu mbuyamajkumijná, rígi̱ gámbáñún índo̱ gáʼnii.

“Arasngáá ada̱ maʼga náa kamba̱a̱ rí gíʼmaa maʼga ga̱jma̱a̱ índo̱ gíkhíi̱ xágájnutiyo̱o̱ʼ ikhí” (Proverbios 22:6).

Mbáa ndxájulú a̱ʼgu̱ naʼsngóo ga̱jma̱a̱ Biblia mbáa a̱ʼgu̱ náa naxtango̱jo̱o̱ café.

DÍ NUNI̱ TESTIGOS DE JEOBÁ

Reunión dí naguaʼdáá testigos de Jeobá ga̱jma̱a̱ rí nusngáa ga̱jma̱a̱ numuu Biblia nambáñun xa̱bu̱ mu makuwá itháán májánʼ ga̱jma̱a̱ mu majmañún mbuyamajkumijná.

REUNIÓN DÍ NAGUAʼDÁÁ MÁMBÁ XMÁNÁ

Náa reunión dí naguaʼdáá mámbá xmáná, ikhí najuixná discurso dí nagájnuu náa Biblia. Ikhí nundríguxu ikha rí nambáyuxuʼ mu mbuyamajkhu mijnáxu. Xáxtumáán dí mi̱dxu̱ʼ ikhí ga̱jma̱a̱ ma̱ndoo maʼga asndu tsáá má xa̱bi̱i̱. Mbá xkri̱da, ikhí majmañaaʼ. . .

náá numuu rí Dios ndaʼyoo dí ikháán xtaʼdáá numaaʼ.
ndíjkha jngóo kuwáanʼlu.
xú káʼnii gándoo mambajxáaʼ májánʼ gajmiáanʼ eʼwíinʼ.

Ma̱ngaa ikhí mataxkamiin bi̱ mambajxáaʼ gajmiáanʼ, bi̱ naxmiéjúúnʼ kuyamijná (1 Corintios 12:25, 26).

Mu ma̱ta̱ya̱a̱ itháán ga̱jma̱a̱ numuu reunión ndrígúxu̱, ata̱ʼa̱ʼ náa ináa jw.org ga̱jma̱a̱ atayáá video Ga̱jma̱a̱ Káʼnii erígá náa Guʼwá nagimbáanʼ rá.

NUSNGÚNXU XA̱BU̱ GA̱JMA̱A̱ NUMUU BIBLIA

Nusngúnxu xa̱bu̱ ga̱jma̱a̱ numuu Biblia ga̱jma̱a̱ tsírumiin, najmuxu̱ libro dí mbiʼyuu ¡Araxtaa gagi kámuu mbiʼi! Ikhí na̱ʼkha̱ grajxe̱ rí nambáñun xa̱bu̱ mundxaʼwamíjna̱ ga̱jma̱a̱ makru̱ʼu̱u̱n textos ndrígóo Biblia dí gíʼdoo numuu. Ma̱ngaa dí naʼthí náa libro rígi̱ ragákhíi makrua̱ʼa̱a̱ʼ, kagu̱ video ga̱jma̱a̱ imágenes rí mitsaanʼ. Dí xóo nusngúnxu xa̱bu̱, nambáñun mu makuwá májánʼ ga̱jma̱a̱ maku̱mu̱ún rí guáʼdáá numún.

Á mu nandaaʼ ma̱ta̱ya̱a̱ xú káʼnii gámbáyáaʼ rí matanigajma̱a̱ Biblia gajmiáanʼ testigos de Jeobá, ata̱ʼa̱ʼ náa ináa jw.org ga̱jma̱a̱ atayáá video Náa numuu rí gíʼmaa muʼnigajmaa Biblia rá.