GRAXE̱ 9

Lá gíʼmaa manimbo̱ʼ náa evolución ráʼ.

NDÍJKHA GÍʼDOO NUMUU

Á mu gajkhun nindxu̱u̱ evolución, xa̱bu̱ i̱ndó ma̱ndoo maxtáa nguáthá tsiguʼ. Mú lá rúʼko̱ numuu kuwáanʼ ráʼ. Lá gíʼdoo numuu vida ráʼ. Á mu nigumáanʼ, ma̱ndoo muxkamaa rí maxtiʼña̱a̱.

NDIÉJUNʼ GÁTANI IKHÁÁNʼ RÁ.

Atatsaʼwáminaʼ rígi̱: Alex nánguá eʼyoo rí mandxa̱ʼóo edxu̱u̱. Ikhaa nikumu̱u̱ má xúʼko̱ rí Dios niʼni numbaaʼ. Mú rí xúgi̱, bi̱ naʼsngóo Biología naʼthí má xúʼko̱ rí evolución gajkhun rígá numuu rí xúʼko̱ ethi científicos. Alex tsíyoo makujmaa xóo mbáa skágunʼ ga̱jma̱a̱ nandxa̱ʼwáminaʼ: “Á mu científicos nuthi rí evolución nindxu̱u̱ gajkhun, tsáa ni̱ndxu̱ʼ ikhúúnʼ mu mata dí ragájkhun rá.”

Á mu ikháánʼ ni̱ndxa̱ʼ Alex, lá matatsimbaʼ náa evolución i̱ndó numuu rí libros nuthi rí nindxu̱u̱ gajkhun ráʼ.

ATATSAʼWÁMINAʼ MBÉGU̱ʼ

Kuwa xa̱bu̱ bi̱ nuthi rí nunimbu̱ún náa evolución o rí niguma xúgíʼ, mú tsíjmañún muthi náa numuu rí nundxa̱ʼwa̱a̱ edxu̱ún xúʼko̱ kaʼnii.

Tikhun nunimbu̱ún rí niguma xúgíʼ numuu rí xúʼko̱ niguaʼsngúún náa guʼwá ndxajkun.
Eʼwíínʼ nunimbu̱ún náa evolución numuu dí rúʼko̱ nijmañún náa escuela.

MAJUN GRAXE̱ RÍ GÍʼMAA MATANIMINAʼ

Hebreos 3:4 naʼthí: “Xúgíʼ guʼwá xtáa tsáa niʼni, mú Dios niʼni xúgíʼ dí rígá”. Lá ikhí rí naʼthí náa Biblia ráʼ.

Mbáa dxámá ndaʼyoo mbá guʼwá — Rí muʼthá rí nda̱wa̱a̱ mbáa bi̱ niʼni xúgíʼ dí rígá nindxu̱u̱ xóo muʼthá rí guʼwá rígi̱ niguma ikháá.

RÍ NAJUIʼTHÁ: Xúgíʼ dí rígá náa numbaaʼ ni̱jkha̱nú nirígá numuu rí nijmídá, rí najmaʼnuʼ xóo Big Bang.

1. Ndiéjunʼ o tsáa niʼni Big Bang rá.

2. Ndiéjunʼ rí itháan májánʼ: Rí mundxaʼwamíjna̱ rí xúgíʼ mbaaʼ niguma o xtáa mbáa bi̱ niʼni ráʼ.

RÍ NAJUIʼTHÁ: Xa̱bu̱ numbaaʼ naguwaʼ náa xujkhúʼ.

3. Á mu xa̱bu̱ numbaaʼ naguwáʼ náa xujkhúʼ, mbá xkri̱da, náa chango. Náa numuu rí itháán najmañulúʼ ikháanʼ ki xóo ikhiin xá.

4. Náa numuu rí asndu xujkhúʼ bi̱ itháan majkhinʼ nigumiin mingíjyúuʼ wéñuʼ rá.

RÍ NAJUIʼTHÁ: Evolución nindxu̱u̱ gajkhun.

5. Xa̱bu̱ bi̱ naʼthí rígi̱, lá ndiyáaʼ mbaʼyoo ikhaa xáʼ.

6. Nguáthi̱i̱n xa̱bu̱ nunimbu̱ún náa evolución i̱ndó numuu rí najuiʼthún rí xúgínʼ bi̱ najmañún nunimbu̱ún náa ikhaa rá.

“Atatsaʼwáminaʼ rí nadxuʼ náa xaná ga̱jma̱a̱ nataxkamaa mbá guʼwá ixi̱ rí mitsaan wéñuʼ. Mbáa xatatsaʼwamínáʼ: ‹¡Ra̱ʼkhá tháán májánʼ! Mbáa gi̱i̱ nijngutígú tikhuu ixi̱ ga̱jma̱a̱ nigumaa guʼwá rígi̱. Na̱nguá xóo marigá rígi̱. Ikha jngó, náa numuu rí gíʼmaa muʼnimbulúʼ rí xúgíʼ numbaaʼ mbaaʼ nirígá rá.” (Julia.)

“Á mu mbáa gáʼtháanʼ rí nijmídá náa imprenta, ma̱ngaa rí ñaʼñú nigadíí asndu náa ga̱jma̱a̱ ikhí nigájnuu mbá diccionario, lá matatsimbaʼ ráʼ.” (Gwen.)

NÁA NUMUU RÍ GÍʼMAA MANIMBO̱ʼ NÁA DIOS RÁ.

Náa Biblia naʼtháanʼ rí gíʼmaa majmaʼ ku̱ma̱ʼ ndrígáʼ (Romanos 12:1). Xó muʼthá, rí fe ndrígáʼ ma̱ʼkha̱ náa:

RÍ NAKU̱MA̱ʼ: “Rígá mbá rí naʼthúnʼ dí rígá mbá tsiakii itháan mba̱a̱”.
RÍ ENIMBU̱ÚN EʼWÍÍNʼ: “Xa̱bu̱ bi̱ kuwa mbájndi nuthi rí nunimbu̱ún náa Dios”.
RÍ NANDOO MBÁA MATATSIMBAʼ: “Náa goʼwóoʼ nuthu̱nʼ rí gíʼmaa manimbo̱ʼ náa Dios”.

Xátatsimbaʼ rí enimbu̱ún eʼwíínʼ, gíʼmaa ma̱ta̱ya̱a̱ náa numuu rí etanimbaʼ ikháánʼ rúʼko̱.

“Índo̱ maestro naʼthí xú káʼnii eñajunʼ xuyulúʼ, nda̱yo̱o̱ itháan májánʼ rí Dios xtáa. Mámbá enii xuyulúʼ rígá rí naʼni, maski ajndu xóo ragíʼdoo numuu kujmaa. Ikháanʼlu tséʼyáá ndiéjunʼ erígá náa awúu̱n xuyulúʼ. ¡Ra̱ʼkhá tháán májánʼ!”(Teresa).

“Índo̱ nda̱yo̱o̱ guʼwá rí mitsídaanʼ wéñuʼ, mbá barco o mbá carro, naraximínáʼ: ‹Tsáa niʼni rá.› Mbá xkri̱da, ndayóoʼ mbáa bi̱ najmañuu wéñuʼ mu maʼni mbá carro numuu rí gíʼdoo mbaʼa pieza ma̱jkha̱ʼ, ga̱jma̱a̱ rí xúgíʼ gíʼmaa mbuwa̱a̱ májánʼ ga̱jma̱a̱ mañajunʼ májánʼ. Ikha jngó, á mu xtáa tsáa niʼni carro, xúʼko̱ má xa̱bu̱ ma̱ngaa” (Richard).

“Índo̱ ni̱jkhá rajmañuʼ itháan ga̱jma̱a̱ numuu ciencias, nánguá enimbooʼ ga̱jma̱a̱ numuu evolución. [...] Nandxa̱ʼwa̱mínáʼ rí ndayóo muguaʼdáá itháan fe mu muʼnimbulúʼ ga̱jma̱a̱ numuu evolución ki xóo muʼnimbulúʼ rí xtáa mbáa bi̱ Niʼniáanʼ” (Anthony).

ATATSAʼWÁMINAʼ GA̱JMA̱A̱ NUMUU RÍGI̱

Maski ajndu científicos mba̱yu̱ʼ má tsiguʼ kuwa runigajmaa, mú mixtiʼkhu wéñuʼ ethi ga̱jma̱a̱ numuu evolución. Á mu na̱nguá embánuun ikhiin ga̱jma̱a̱ numuu rígi̱, maski ajndu ikhiin nduyáá itháan, lá maʼniuu, á mu ikháánʼ tsitatsimbaʼ ku̱ma̱ rígi̱ ráʼ.