KÍXNUU 36

Guʼthá rí gajkhun ga̱jma̱a̱ guʼni xóo gíʼmaa náa xúgíʼ

Edición impresa

Xúgíinʼ xa̱bu̱ nandún mambáxu̱u̱n gajmiún bi̱ nuthi dí gajkhun ga̱jma̱a̱ nuni xóo gíʼmaa, ma̱ngaa Jeobá nandoo dí xúʼko̱ gánindxu̱ún bi̱ nambáxu̱u̱ gajmíi̱n. Mú náa numbaaʼ rí kuwáánʼ naʼni mingíjyúuʼ muʼni xúʼko̱ numuu dí kúwá mbaʼin wéñuʼ xa̱bu̱ bi̱ nuninduwiinʼ eʼwíinʼ. Lá nayambáá marata má xúʼko̱ dí gajkhun o matani xóo gíʼmaa náa xúgíʼ ráʼ. Ndiéjunʼ nindxu̱u̱ rá.

1. Ndíjkha rí gíʼdoo wéñuʼ numuu muʼthá dí gajkhun ga̱jma̱a̱ muʼni xóo gíʼmaa rá.

Índo̱ nuʼthúún dí gajkhun ga̱jma̱a̱ nuʼni xóo gíʼmaa náa eʼwíinʼ, nusngajmáá Jeobá dí nandulúʼ kuʼyáá ga̱jma̱a̱ rí nduʼyamajkuíí. Garmáʼáan a̱jkia̱a̱nʼ dí Jeobá ndaʼyoo xúgíʼ dí nundxaʼwamíjná ga̱jma̱a̱ dí nuʼni (Hebreos 4:13). Índo̱ nuraʼwíí muʼni xóo gíʼmaa, ikhaa ndaʼyoo ga̱jma̱a̱ ndaʼyoo rí gíʼdoo wéñuʼ numuu. Náa Ajngá rawuunʼ naʼthí: “Numuu rí Jeobá nawiyuʼ kaʼyoo xa̱bu̱ bi̱ narkaʼwu múʼúun rí eʼni, mú Ikhaa nambáxu̱u̱ gajmíi̱n bi̱ nuni rí jmbu” (Proverbios 3:32).

2. Náá gándoo muʼthá dí gajkhun ga̱jma̱a̱ muʼni má xúʼko̱ xóo gíʼmaa rá.

Jeobá nagi̱ʼthu̱u̱n rí “muʼthúún rí gajkhun eʼwíinʼ” (Zacarías 8:16, 17). Ndiéjunʼ eyoo gáʼthi rúʼko̱ rá. Dí xúʼni nduwaʼ ni má xúʼthúún dí ragájkhun bi̱ kuʼñúún, bi̱ nuñajunʼ gajmiúlú ni má a̱ngiu̱lú bi̱ nagimbáánʼ gajmiúlú ni ma xa̱bu̱ ñajunʼ. Xa̱bu̱ bi̱ nuni xóo gíʼmaa, na̱nguá eni kuʼwáʼ ni má tséninduwaʼ (atraxnuu Proverbios 24:28 ga̱jma̱a̱ Efesios 4:28). Ma̱ngaa nuni numáá impuestos (Romanos 13:5-7). Náa xúgíʼ rígi̱ ga̱jma̱a̱ náa i̱ʼwáʼ nandulúʼ “muʼtálu rí gajkhun o muʼni rí jmbu náa xúgíʼ” (Hebreos 13:18).

3. Ndiéjunʼ eyambáá rí muʼthá dí gajkhun ga̱jma̱a̱ muʼni xóo gíʼmaa rá.

Índo̱ najmaʼniáanʼ dí nuʼthá dí gajkhun ga̱jma̱a̱ nuʼni xóo gíʼmaa, naʼni rí eʼwíinʼ maku̱mu̱ún kuyulúʼ. Ma̱ngaa naʼni rí náa nagimbáánʼ manindxu̱lúʼ xóo mbá guʼwáánʼ numuu rí kuwáánʼ tsímáá ga̱jma̱a̱ nakumulúʼ kuʼyamijná. Ma̱ngaa nadxuu a̱jkiu̱lú numuu rí naguáʼdáá mbá ku̱ma̱ májánʼ. Índo̱ nuʼni xóo gíʼmaa, mu xúʼko̱ “muni tsíʼyáa xúgíʼ kiʼsngáa ndrígóo Dios Bi̱ naʼni káwáanʼlu” ga̱jma̱a̱ mbáa ma̱ndoo maʼni dí eʼwíinʼ maʼndún muni ñajuunʼ Jeobá (Tito 2:10).

GAJMAÑAAʼ ITHÁAN

Guʼyáá xú káʼnii eyambáá rí muʼthá dí gajkhun ga̱jma̱a̱ muʼni xóo gíʼmaa índo̱ nuʼni ñajuunʼ Jeobá ga̱jma̱a̱ xú káʼnii gándoo musngajmá rúʼko̱ náa mixtiʼkhu enii rí kuwáánʼ.

4. Jeobá nandoo kaʼñúún xa̱bu̱ bi̱ nuthi dí gajkhun ga̱jma̱a̱ nuni xóo gíʼmaa

Guraxnuu Salmo 44:21 ma̱ngaa Malaquías 3:16 ga̱jma̱a̱ gutamíjnála rígi̱:

Lá májánʼ nindxu̱u̱ rí xúʼthá dí gajkhun rá. Náá numuu tatsaʼwáminaʼ xúʼko̱ rá.
Á mu nuʼthá dí gajkhun maski asndu maʼniulú gakhii, xú káʼnii gákumu̱u̱ Jeobá kumaaʼ ikháán rá.

Mbáa dxáʼgú naʼtámijná ga̱jma̱a̱ anu̱u̱ bi̱ nigi̱ʼi̱tiga mu maʼni mbrígúminaʼ ga̱jma̱a̱. Nigadíí mbá vaso dí kajni̱ʼ jugo náa mesa. — Índo̱ e̱ji̱n nuthi dí gajkhun nuni rí maʼdxuu a̱jkiu̱ún anu̱ún ga̱jma̱a̱ rudún. Índo̱ ikháanʼlu nuʼthá rí gajkhun, nuni dí maʼdxuu a̱jkiu̱u̱n Jeobá.

5. Guʼthá má xúʼko̱ dí gajkhun ga̱jma̱a̱ guʼni xóo gíʼmaa

Maski ajndu mbaʼin xa̱bu̱ nakumu̱ún dí xáʼyóoʼ má muʼthá dí gajkhun o muʼni xóo gíʼmaa náa xúgíʼ, mú rígá mbá numuu rí muʼni xó má kaʼyoo xúgíʼ mbiʼi. Atayáá náá numuu. Gu̱ya̱a̱ VIDEO.

VIDEO: Ndiéjunʼ gambáyulú mu makuwáanʼ gagi rá. Dí maguaʼdáá mbá ku̱ma̱ májánʼ (2:32)

Xtiʼkhu dí na̱ʼkha̱ náa video ‹Ndiéjunʼ gambáyulú mu makuwáanʼ gagi rá. Dí maguaʼdáá mbá ku̱ma̱ májánʼ›. Ben ga̱jma̱a̱ patrón ndrígóo nurajximijna. Ben ndiʼkhún niʼthúu̱n mbá dí ikhaa nikiéʼkúun náa ndayóoʼ maʼni numaaʼ mitsídánʼ wéñuʼ empresa.

Guraxnuu Hebreos 13:18 ga̱jma̱a̱ gutamíjnála xú káʼnii gándoo marata dí gajkhun ga̱jma̱a̱ matani xóo gíʼmaa…

. . . náa bi̱ xtañúún.
. . . náa ñajunʼ o náa escuela.
. . . o náa i̱ʼwáʼ.

6. Rí muʼthá rí gajkhun ga̱jma̱a̱ dí muʼni xóo gíʼmaa nambáyulúʼ

Mbáa nguáná ga̱jma̱a̱ numuu dí nuʼthá rí gajkhun o nuʼni xóo gíʼmaa maʼni dí maguaʼdáá tikhu xkujndu, mú índo̱ ganújngoo mbiʼi mbuʼyáá rí niraʼwíí muʼni ninindxu̱u̱ itháan májánʼ. Guraxnuu Salmo 34:12-16 ga̱jma̱a̱ gutamíjnála rígi̱:

Xú káʼnii gándoo mariʼkhuu xóo kuwáánʼ rí muʼthá dí gajkhun ga̱jma̱a̱ muʼni xóo gíʼmaa rá.

A. Xa̱bu̱ gajmii nutamijná índo̱ kúwá raʼwa̱a̱n café.

B. Bi̱ naʼtáñajunʼ náa naguma májáanʼ carro naʼthúu̱n dí májánʼ eʼni mbáa mecánico ndrígóo.

Índo̱ xa̱bu̱ gajmii nuthi dí gajkhun ga̱jma̱a̱ nuni xóo gíʼmaa, naʼni rí maʼndún kuyamijná má xúʼko̱.
Índo̱ bi̱ nuñajunʼ nuthi rí gajkhun ga̱jma̱a̱ nuni xóo gíʼmaa, patrón ndrígu̱ún nakumu̱ún kuñún.
Índo̱ xa̱bu̱ bi̱ kúwá náa mbá xuajen nuthi rí gajkhun ga̱jma̱a̱ nuni xóo gíʼmaa, xa̱bu̱ ñajunʼ nuthi dí májánʼ ga̱jma̱a̱ numún.

RÍ NUTHI TIKHUN: “Nda̱wa̱a̱ má tsáa gakháñuu rí matani nduwaʼ mbá chíʼgíiʼ”.

Nakumaaʼ ikháán dí Jeobá tsíyoo gáʼyoo xúgíʼ mindu̱wa̱ʼ rá. Náá numuu tatsaʼwáminaʼ xúʼko̱ rá.

RÍ NAGÁJNURIYO̱O̱ʼ

Jeobá nagi̱ʼthu̱u̱n dí xúgíinʼ bi̱ nambáxu̱u̱ gajmíi̱n muthi rí gajkhun ga̱jma̱a̱ muni xóo gíʼmaa.

Rí nijmañaaʼ

Náá gándoo muʼthá dí gajkhun ga̱jma̱a̱ muʼni xóo gíʼmaa rá.
Ndíjkha dí ragíʼdoo numuu makumulúʼ rí ma̱ndoo muʼni nduwaʼ rá.
Ndíjkha rí ikháán nandaaʼ marata má xúʼko̱ dí gajkhun ga̱jma̱a̱ matani má xúʼko̱ xóo gíʼmaa rá.

Nguáná niguámbáaʼ kíxnuu rígi̱:

Rí ma̱ndoo matani

Atraxi̱mínáʼ “Lá ndaʼyoʼ Jeobá xóo mbáa bi̱ naʼthí dí gajkhun ga̱jma̱a̱ bi̱ naʼni xóo gíʼmaa ráʼ.” Nda̱wa̱á, atatsaʼwáminaʼ náá eyóoʼ matriʼkuminaʼ.

I̱ʼwáʼ:

Rí ma̱ndoo matani

ATAYÁÁ ITHÁAN

Xóo gándoo musngúún e̱jñún xabuanii muthi dí gajkhun ga̱jma̱a̱ muni xóo gíʼmaa rá.

Arathá má xúʼko̱ rí gajkhun (1:44)

Ndiéjunʼ dí májánʼ gundrígú bi̱ nunimbánii dí nuthi rá.

Atanimbánii dí naratá ga̱jma̱a̱ marigá dí májánʼ makhánáʼ (9:09)

Atayáá á mu gíʼmaa muʼni numáá impuesto maski ajndu na̱nguá ejmúún májánʼ mbújkha̱a̱.

“Gíʼmaa muʼni numáá impuesto ráʼ.” (Bi̱ Nayenjgoo, 1 ñajunʼ gu̱nʼ septiembre tsiguʼ 2011)

Ndiéjunʼ nimbáyúu mariʼkuminaʼ mbáa xa̱bu̱ mu maʼthí dí gajkhun ga̱jma̱a̱ maʼni xóo gíʼmaa bi̱ nákha ginii niʼninduwiinʼ eʼwíinʼ mu maʼni kúwúnʼ rá.

“Nijmañuʼ dí Jeobá nindxu̱u̱ májáanʼ ga̱jma̱a̱ naʼni mba̱a̱ a̱jkiu̱u̱n kaʼyulú” (Bi̱ Nayenjgoo, 1 ñajunʼ gu̱nʼ mayo tsiguʼ 2015)