KÍXNUU 40
Xóo gáʼyoo Dios dí ni̱ndxu̱lú mikaʼwáánʼ rá.
Atatsaʼwáminaʼ rí mbáa ru̱dúu̱ ada̱ xtáa raʼnirataa a̱ʼdióo maʼga̱a̱ escuela. Ikhaa ndaʼyoo á mu niwan, á mu kaʼwu xtíñuu ga̱jma̱a̱ á mu nakujmaa májánʼ a̱ʼdióo. Índo̱ naʼni xúʼko̱, ada̱ na̱nguá eyoo kháñuu wéñuʼ ga̱jma̱a̱ rúʼko̱ naʼni mbuyáá eʼwíinʼ dí anu̱u̱ ga̱jma̱a̱ ru̱dúu̱ ada̱ buʼko̱ naxmiéjúnʼ kuʼyáá. Jeobá bi̱ nindxu̱u̱ Anu̱lú nandoo kaʼyulú, ikhaa ma̱ngaa nandoo dí manindxu̱lú mikaʼwáanʼ dí mbájníí ma̱ngaa xóo endxaʼwáá edxu̱lúʼ. Dí manindxu̱lú mikaʼwáanʼ nambáyulúʼ má ikháanʼ ga̱jma̱a̱ eʼwíinʼ muthi dí májánʼ ga̱jma̱a̱ numuu Dios.
1. Xóo ganindxu̱lúʼ mikaʼwáanʼ dí mbájníí rá.
Jeobá naʼthúlú: “Gíʼmáanʼ manindxala mikaʼwáanʼ” (1 Pedro 1:16). Mu manindxu̱lú mikaʼwáanʼ, gíʼmaa maʼni kaʼwu xóo kuwáánʼ dí mbájníí ga̱jma̱a̱ xóo endxaʼwamíjnaʼ. Nusngajmá dí ni̱ndxu̱lú mikaʼwáánʼ dí mbájníí índo̱ nuʼna xúgíʼ mbiʼi, kaʼwu xtíñúlúʼ, kaʼwu kárriulú ga̱jma̱a̱ kaʼwu guʼwúlú ga̱jma̱a̱ májánʼ kurngujxi̱i̱ xúgíʼ. Ma̱ngaa á mu nuyambáá maguma kaʼwii náa Guʼwá nagimbáanʼ. Á mu kaʼwáánʼlu, rúʼko̱ gáʼni dí eʼwíinʼ munimba̱a̱ Jeobá (2 Corintios 6:3, 4).
2. Ndiéjunʼ gíʼmaa muniʼñááʼ mu maʼni mikaʼwáanʼ rá.
Náa Biblia naʼtulúʼ: “Guʼni kaʼwumijnáa náa xúgíʼ rí naʼni gachúu xuyulúʼ ga̱jma̱a̱ náa a̱jkiu̱lú” (2 Corintios 7:1). Ikha jngóo, nuʼni xúgíʼ xóo eʼngo̱o̱ mu xúʼni nimbá rí maʼnigachúu xuyulúʼ ga̱jma̱a̱ edxu̱lúʼ. Ga̱jma̱a̱ numuu rí nandulú dí Jeobá maʼdxuu ga̱jma̱a̱ numuu rí nundxaʼwamíjná, nuʼni mbá tsiakii rí xúndxaʼwamíjna dí xkawiʼ (Salmo 104:34). Ma̱ngaa, nuʼnimi̱jna̱ dí xúgíʼ rí nuʼthá mani̱ndxu̱u̱ kaʼwu (atraxnuu Colosenses 3:8).
Ndiéjunʼ imbo̱ʼ dí naʼni mitsagáanʼlu rá. Rígá tikhu dí naʼni gachúu xuyulúʼ. Ikha jngóo, na̱nguá tsiʼkhá ndíí, ni má na̱nguá eʼphu̱ ináa náa nagájnuu cocaína, ni má tséʼwanʼ wéñuʼ thana dí gakhii ni má tséxuʼdamijná droga. Índo̱ nuʼnigaʼduunʼ rígi̱, nuñewa̱a̱n xuyulúʼ ga̱jma̱a̱ xúʼko̱ nusngajmá dí nduʼyamajkuíí vida rí nikhánulú. Ma̱ngaa, mu maʼni mikaʼwáanʼ, nuʼni mbá tsiakii dí xúʼni ga̱jma̱a̱ xúʼyáá dí mitsaga, xóo dí matruguaʼ xuyuuʼ tsáʼkháanʼ rí asndu makumaaʼ dí xtaa ratabaʼ ga̱jma̱a̱ mbáa ma̱ngaa rí ma̱ta̱ya̱a̱ pornografía (Salmo 119:37; Efesios 5:5). Mbáa maʼni mingíjyúuʼ matatsiʼñáʼ tikhu xóo rúʼko̱, mú Jeobá xtáa xawii mambáyulú (atraxnuu Isaías 41:13).
GAJMAÑAAʼ ITHÁAN
Guʼyáá xóo ejkha̱ gamajkhu náa Jeobá rí maʼni mikaʼwáanʼ ga̱jma̱a̱ xóo gándoo muniʼñááʼ ru̱ʼni̱ dí raʼkhí.
3. Rí maʼni mikaʼwáanʼ na̱jkha̱ gamajkhu náa Jeobá
Índo̱ nuraxnuu náa xtángoo ndrígóo Jeobá rí nixnúún xa̱bu̱ Israel nákhá wájyúuʼ, na̱jkuánu nduʼyáá dí ikhaa ndaʼyoo dí gíʼdoo wéñuʼ numuu rí maʼni mikaʼwu. Guraxnuu Éxodo 19:10 ga̱jma̱a̱ 30:17-19 ga̱jma̱a̱ gutamíjnála rígi̱:
Ndiéjunʼ eʼsngáa náa versículo rígi̱ xóo eʼyoo Jeobá ga̱jma̱a̱ numuu dí gíʼmaa maʼni mikaʼwu rá.
Ndiéjunʼ rí májánʼ dí nuʼni xúgíʼ mbiʼi rí nambáyulúʼ maʼni mikaʼwáanʼ má xúʼko̱ rá.
Dí maʼni mikaʼwáanʼ ndayóoʼ mbiʼi ga̱jma̱a̱ tsiakii. Mú ma̱ndoo, tséʼniuu má náá kuwáánʼ o á mu kuaʼdáá mbújkha̱a̱ o á mu na̱nguá. Gu̱ya̱a̱ VIDEO ga̱jma̱a̱ gutamíjnála rígi̱:
Á mu xa̱bu̱ bi̱ na̱jkua̱ guʼtáruʼúún nduyáá dí kaʼwu rí ku̱ʼda̱, lá mayambáá rúʼko̱ dí mbuyamajkuíí itháan Jeobá xáʼ. Náá numuu rá.
4. Atatsíñaaʼ ratani̱ dí raʼkhí
Jeobá ma̱ndoo mambáyulúʼ muniʼñááʼ ru̱ʼni̱ o ruʼyáá xúgíʼ dí raʼkhí.
Á mu ikháán natatsika ndíí, nagiinʼ wéñuʼ thana dí gakhii o najmaa droga, mbáa natayáá xkáʼnii naʼni gakhii rí matatsiʼñáʼ mbá vicio. Mú, mbá rí mambáyaʼ nindxu̱u̱ rí mariejún mbáxngaa mu matatsaʼwamínáʼ ndiéjunʼ dí raʼkhí nagiʼnáaʼ ga̱jma̱a̱ numuu rúʼko̱. Guraxnuu Mateo 22:37-39 ga̱jma̱a̱ gutamíjnála numuu rí xú káʼnii gáʼni dí ndíí o rí migi̱i̱n wéñuʼ thana gakhii dí naʼni rí xaʼnda̱ʼ gátatsiʼñáaʼ migi̱i̱n má xúʼko̱, maʼni dí xárígá dí májánʼ. . .
. . . xóo embáxu̱u̱ ga̱jma̱a̱ Jeobá.
. . . náa bi̱ kaʼñúún ga̱jma̱a̱ eʼwíinʼ.
Atatsaʼwáminaʼ tikhu rí ma̱ndoo matani mu matatsiʼñáʼ dí raʼkhí dí naguʼwanʼ natani.a Gu̱ya̱a̱ VIDEO.
Guraxnuu Filipenses 4:13 ga̱jma̱a̱ gutamíjnála rígi̱:
Lá naku̱ma̱a̱ʼ rí á mu naguʼwaanʼ maratajkáan, matanigajmaa Biblia ga̱jma̱a̱ mi̱dxu̱ʼ reunión ma̱ndoo maxnúu tsiakii mbáa xa̱bu̱ mu maniñuuʼ dí raʼkhí naʼni ráʼ. Náá numuu xúʼko̱ kuma̱a̱ʼ rá.
5. Ataniminaʼ rí xátani ga̱jma̱a̱ xatatsaʼwamínáʼ dí xkawiʼ
Guraxnuu Colosenses 3:5 ga̱jma̱a̱ gutamíjnála rígi̱:
Xú káʼnii eʼyáá dí ma̱ta̱ya̱a̱ pornografía, dí mataxuʼmá foto náa nda̱a̱ xtíñaaʼ náa celular ga̱jma̱a̱ dí matrugua xuyuuʼ tsáʼkháanʼ rí asndu makumaaʼ dí xtaa ratabaaʼ ga̱jma̱a̱ mbáa nindxu̱u̱ xkawiiʼ o mitsaga eʼyoo Jeobá rá.
Lá nakumaaʼ ikháán dí májánʼ nindxu̱u̱ rí Jeobá mandu̱ʼu̱lú dí xúʼni ni má xúndxaʼwamíjna dí xkawiʼ rá. Náá numuu rá.
Atayáá xóo gátani mu xatatsaʼwamínáʼ dí xkawiʼ. Gu̱ya̱a̱ VIDEO.
Jesús nijmuu mbá xkri̱da mu maʼsngulúʼ dí gíʼmaa muʼni gaʼduunʼ mbá nacha̱ mbá rí maʼni múndxaʼwamíjna o muʼni dí xkawiʼ. Guraxnuu Mateo 5:29, 30 ga̱jma̱a̱ gutamíjnála rígi̱:
Jesús na̱nguá nindoo gáʼthí dí ndayóoʼ muʼni kambiyumijná, ikhaa nindoo gáʼthí rí ndayóoʼ mbuʼyáá ndiéjunʼ gíʼmaa muʼni. Ndiéjunʼ eyóoʼ muʼni mbá nacha̱ mu xúndxaʼwamíjna dí xkawiiʼ rá.b
Á mu ikháán natani mbá tsiakii rí xatatsaʼwamínáʼ dí xkawiiʼ, ma̱ndoo ma̱ta̱ya̱a̱ gajkhun rí Jeobá ndaʼyoo dí gíʼdoo wéñuʼ numuu tsiakii dí natani. Guraxnuu Salmo 103:13, 14 ga̱jma̱a̱ gutamíjnála rígi̱:
A mu naʼniaʼ miʼskhaa matatsiʼñáʼ dí xkawiiʼ, nakumaaʼ dí versículo rígi̱ maxnáaʼ tsiakii mataniminaʼ má xúʼko̱ ráʼ. Ndíjkha rá.
¡Xákanájkhaaʼ! Rí nitani̱ mbu̱júu̱ʼ tsíyoo gáʼthi rí nindáti̱ga̱a̱ mbájkhu
Mbáa ra̱mingíjyúuʼ matatsaʼwamínáʼ “Nitangu̱ún nini mbu̱júu̱ʼ; xájmúún gániʼñúunʼ”. Mú, atatsaʼwáminaʼ ga̱jma̱a̱ numuu mbáa xa̱bu̱ bi̱ nagáyúu naxngujxi̱i̱ ga̱jma̱a̱ naxpátriga̱a̱, mú raʼkháa rúʼko̱ eyoo gáʼthí dí xáʼngo̱o̱ gágáyúu ni má rí mata̱nga̱a̱ magayúu asndu náa nigíʼdu̱u̱. Xúʼko̱ má kayuʼ, maski ajndu ikháán nitani̱ mbá tsiakii, mú nitangaánʼ nixpatriguín mbu̱júu̱ na̱nguá eyoo gáʼthí rí ni xáʼngaʼ gátatsiʼñááʼ ratatsikhá, ratani̱ o gátaya mbá dí raʼkhí. Ma̱ngaa, raʼkháa rúʼko̱ eyoo gáʼthí dí niʼni gachúu xúgíʼ dí májánʼ dí nitani̱ má. Rí natanga̱a̱ naʼni mbáa xa̱bu̱, xúʼko̱ má narígá, mú mañu mañú naniñuuʼ mbájkhu. Ikha jngóo ¡xákanájkhaaʼ! Jeobá má gambáyaaʼ matatsiʼñaaʼ asndu xkáʼnii má dí raʼkhí dí natani.
RÍ NUTHI TIKHUN: “Nindxu̱u̱ mbá dí xájmúún gániʼñúunʼ”.
Xkáʼnii texto ndrígóo Biblia gájmaaʼ mu matasngajmáá xa̱bu̱ buʼko̱ dí Jeobá má gámbáyúu maniñuuʼ dí raʼkhí dí naʼniuu miʼskhoo maniñuuʼ xá.
RÍ NAGÁJNURIYO̱O̱ʼ
Nuʼni maʼdxuu a̱jkiu̱u̱n Jeobá á mu nuʼni marigá kaʼwu xuyulúʼ, edxu̱lúʼ ga̱jma̱a̱ rí xóo nuʼni.
Rí nijmañaaʼ
Ndíjkha̱ rí gíʼdoo wéñuʼ numuu rí maʼni mikaʼwáanʼ rá.
Ndiéjunʼ eyóoʼ muʼni mu maʼni mikaʼwáanʼ dí mbájníí rá.
Ndiéjunʼ eyóoʼ muʼni mu rí xóo nundxaʼwamíjná ga̱jma̱a̱ rí xóo nuʼni maʼni má xúʼko̱ mikaʼwu rá.
ATAYÁÁ ITHÁAN
Maski ajndu na̱nguá kuaʼdáá wéñuʼ mbújkha̱a̱, ndiéjunʼ dí ma̱ndoo muʼni mu maʼni mikaʼwáanʼ rá.
Arajñáa ñawáanʼ ga̱jma̱a̱ araxtaa kaʼwu, mu xaʼniaa nandii (3:01)
Atraxnuu tikhu dí ma̱ndoo mambáyaaʼ matatsiʼñáʼ ratatsikhá ndíí.
“Xóo gátatsiʼñááʼ ratatsikhá ndíí rá.” (¡Awaxunʼ!, mayo tsiguʼ 2010)
Atayáá ndíjkha dí gamíi ma̱ta̱ya̱a̱ pornografía.
“Pornografía: Májánʼ o ra̱májánʼ dxe̱ʼ.” (Bi̱ Nayenjgóo, 1 ñajunʼ gu̱nʼ agosto tsiguʼ 2013)
Atayáá ndiéjunʼ niʼni mbáa xa̱biya̱ mu maniñuuʼ raʼyoo pornografía.
“Mbaʼa nuthu nitangu̱ún ndi̱yo̱o̱ mú nijmún niniʼñúunʼ” (Bi̱ Nayenjgóo, núm. 4 2016)
a Náa naʼthí “Atayáá itháan” dí na̱ʼkha̱ náa kíxnuu rígi̱, náa kayá edxu̱u̱ “Xóo gátatsiʼñááʼ ratatsikhá ndíí rá.” Naʼthí tikhu dí ma̱ndoo matani mu matatsiʼñáʼ.
b Mu matatsiʼñáʼ ratrugua xuyuuʼ tsáʼkháanʼ, atayáá náa capítulo 25 ndrígóo libro Lo que los jóvenes preguntan. Respuestas prácticas (volumen 1), náa kayá edxu̱u̱ “Lá maʼngoʼ maniʼñúunʼ raguguá xuyuuʼ tsaʼkhúnʼ ráʼ.”