KÍXNUU 42
Ndiéjunʼ eʼthí náa Biblia ga̱jma̱a̱ numún xa̱bu̱ gajmii ma̱ngaa bi̱ kúwá ndajkuíín rá.
Náa tikhu xuajen xa̱bu̱ nakumu̱ún mu makuwá tsímáá ndayóoʼ rí mudamijná. Mú, raʼkháa má xúgíinʼ bi̱ nidamijná nakúwá tsímáá ga̱jma̱a̱ bi̱ ndajkuíín na̱nguá. Numuu rí náa Biblia naʼthí dí nindxu̱u̱ mbá regalo tséʼniuu á mu kúwá ndajkuíín o nudamijná.
1. Ndiéjunʼ dí májánʼ rígá índo̱ mbáa tsénigúnʼ o tsénújúnʼ rá.
Náa Biblia naʼthí: “Bi̱ nanigúnʼ o nanújúnʼ májánʼ má eʼni, mu itháan májánʼ eʼni bi̱ tsénigúnʼ o tsénújúnʼ” (atraxnuu 1 Corintios 7:32, 33, 38). Ndiéjunʼ eyoo gáʼthi dí “itháan májánʼ eʼni” bi̱ tsénigúnʼ o tsénújúnʼ rá. Cristiano bi̱ mbáwíi na̱nguá exmiéjuunʼ xóo rí maʼni mbaʼwi̱i̱ ajmbio̱o̱ o a̱ʼgiu̱u̱. Ikhaa rígá mbaʼa rí ma̱ndoo maʼni. Tikhun nduyáá dí xúʼko̱ na̱nguá eʼniún gakhii muni itháan ñajuunʼ Jeobá, mbá xkri̱da dí magún náa mixtiʼkhu xuajen gútaraʼa ajngáa rí májánʼ. Rí itháan gíʼdoo numuu rí nuni bi̱ ndajkuíín rí nandoo nuri̱ya̱ʼ itháan mbiʼi mu mambáxu̱u̱n itháan májánʼ gajmiún Jeobá.
2. Ndiéjunʼ dí májánʼ rígá índo̱ nanújngúún náa inuu i̱yi̱i̱ʼ bi̱ nudamijná rá.
Xó má bi̱ ndajkuíín xúʼko̱ má rígá dí májánʼ náa bi̱ nidamijná ma̱ngaa. Náa Biblia naʼthí: “Itháan májánʼ dí a̱jmi̱i̱n ki xóo mbáwíi” (Eclesiastés 4:9). Narígá xúʼko̱ índo̱ xa̱bu̱ gajmii nunimbánii ikha dí na̱ʼkha̱ náa Biblia. Xa̱bu̱ bi̱ nanújngúún náa inuu i̱yi̱i̱ʼ nuxna ajngún rí maʼndún kuyamijná, rí mbuyamajkumijná ma̱ngaa rí muñeumíjna̱ ga̱jma̱a̱ ngajua. Ikha jngóo ikhiin nakúwá májánʼ ki xóo bi̱ tanújngúún náa inuu i̱yi̱i̱ʼ. Ma̱ngaa rúʼko̱ nambáñún e̱ji̱n mu makuwá májánʼ.
3. Ndiéjunʼ rí nandoo Jeobá náa xa̱bu̱ bi̱ nidamijná rá.
Índo̱ Jeobá niʼni rí makuwá timbíin xa̱bu̱ gajmii, niʼthí: “Xa̱biya̱ maniñuuʼ anu̱u̱ ga̱jma̱a̱ ru̱dúu̱ mu maxtáa ga̱jma̱a̱ a̱ʼgiu̱u̱” (Génesis 2:24). Nákha xóó kúwá xa̱bu̱ bi̱ nidamijná Jeobá nandoo rí nájmi̱i̱n maʼndún kuyamijná ga̱jma̱a̱ rí makuwá mbá kambáxu̱u̱n. Mú, i̱ndó naniñuuʼ murujturiga̱a̱ i̱yi̱i̱ʼ á mu mbáa dí ikhiin nakudaminaʼ aʼkhá ga̱jma̱a̱ imba̱a̱ xa̱bu̱. Ga̱jma̱a̱ Dios naniñuuʼ rí xa̱biya̱ o a̱ʼgu̱ bi̱ ragíʼdoo aʼkhúun dí ikhaa má garaʼwíí dí maʼni á mu naniña̱a̱nʼ bi̱ ndiyáa (Mateo 19:9).a Jeobá tsíyoo dí cristianos mudiin a̱jmi̱i̱n o itháan gu̱ʼu̱ (1 Timoteo 3:2).
GAJMAÑAAʼ ITHÁAN
Tséʼniuu á mu káʼnii mbáwiin, nitatsigúnʼ o nitanujún má, guʼyáá ndiéjunʼ gándoo matani̱ mu maraxtaa gagi ga̱jma̱a̱ matani rí maxtáa gagi Jeobá.
4. Gajmaaʼ májánʼ mbiʼi ndrígáaʼ nákha xtaa mbáwiin
Jesús ndiʼyoo dí maraxtaa mbáwiin nindxu̱u̱ mbá regalo (Mateo 19:11, 12). Guraxnuu Mateo 4:23 ga̱jma̱a̱ gutamíjnála rígi̱:
Ga̱jma̱a̱ numuu rí tánigúnʼ Jesús, xú káʼnii nijmuu mbiʼi mu maʼni ñajuunʼ anu̱u̱ ga̱jma̱a̱ rí mambáñún eʼwíinʼ xa̱bu̱ xá.
Cristianos bi̱ kúwá ndajkuíín ma̱ndoo makuwá gagi a mu najmún májánʼ mbiʼi ndrígu̱ún, xó má niʼni Jesús. Gu̱ya̱a̱ VIDEO ga̱jma̱a̱ gutamíjnála rígi̱:
Xú káʼnii gándoo gájmúún májánʼ mbiʼi ndrígu̱ún cristianos bi̱ kúwá ndajkuíín rá.
Lá natayáá má ráʼ.
Náa Biblia tséʼthi nguáthá tsiguúnʼ gíʼmaa munuju̱nʼ o munigu̱nʼ xa̱bu̱. Mú naʼthí rí gíʼmaa magiʼthu̱u̱n asndu índo̱ “nánguá nindxu̱u̱ dxámaá o dxáʼguú”, numuu rí ikhú nagua̱ʼa̱ wéñuuʼ mubúúnʼ gajmiún mbáa ga̱jma̱a̱ xóó tsendxaʼwa̱a̱ májánʼ edxu̱ún (1 Corintios 7:36).
5. Atayáaʼ májánʼ bi̱ mbi̱ya̱a̱
Rí mataʼyáaʼ bi̱ mbi̱ya̱a̱ nindxu̱u̱ mbá rí gíʼdoo wéñuuʼ numuu rí matraʼwíí matani. Guraxnuu Mateo 19:4-6, 9 ga̱jma̱a̱ gutamíjnála rígi̱:
Ndíjkha rí mbáa cristiano gíʼmaa mandxaʼwáminaʼ májánʼ nákha xóó tsénigúnʼ o tsénujúnʼ rá.
Biblia mambáyáaʼ ma̱ta̱ya̱a̱ xkáʼnii xa̱bu̱ gíʼmaa mani̱ndxu̱u̱ mbáa xa̱biya̱ ga̱jma̱a̱ a̱ʼgu̱. Mú itháan gíʼmaa mataʼyáaʼ mbáa bi̱ nandoo kaʼyoo Jeobá.b Guraxnuu 1 Corintios 7:39 ga̱jma̱a̱ 2 Corintios 6:14. Nda̱wa̱á gutamíjnála rígi̱:
Á mu mbáa cristiano nandoo manigúnʼ o manújunʼ, ndíjkha rí gíʼmaa mbayáa mbáa bi̱ na̱jkha̱ náa religión dí na̱jkha̱ má ikhaa xá.
Á mu ndayáa mbáa bi̱ na̱nguá eyoo kaʼyoo Jeobá, xú káʼnii gákumu̱u̱ ikhaa xá.
Á mu nuxnún muñajunʼ mixtiʼkuiin xujkhú náa ikháá má yoko, numíniiʼ mbá nájmi̱i̱n. Xúʼko̱ má kayuuʼ, cristiano bi̱ ndayáa mbáa bi̱ na̱nguá eyoo kaʼyoo Jeobá magiʼdoo mbaʼa xkujndu.
6. Atayáá mangáán xó má eʼyoo Jeobá rí nudamijná xa̱bu̱
Nákha wajyúuʼ náa xuajen Israel, tikhun xa̱bu̱ bi̱ nidamijná niniñu̱u̱ guʼñún numuu rí i̱ndó nindxaʼwamíjna̱ ga̱jma̱a̱ numuu ikhiin. Guraxnuu Malaquías 2:13, 14, 16 ga̱jma̱a̱ gutamíjnála rígi̱:
Ndíjkha rí Jeobá nditháan tsénigu̱u̱ʼ rí xa̱bu̱ bi̱ nidamijná murujturiga̱a̱ i̱yi̱i̱ʼ ga̱jma̱a̱ mbá numuu dí na̱nguá eʼthí náa Biblia rá.
Índo̱ mbáa naʼni aʼkhá ga̱jma̱a̱ imba̱a̱ ma̱ngaa índo̱ nurujturi̱ga̱a̱ i̱yi̱i̱ʼ naʼni rí magawúun wéñuʼ a̱ʼgu̱ o xa̱biya̱ bi̱ ragíʼdoo aʼkhúun mangiin e̱ji̱n.
Gu̱ya̱a̱ VIDEO ga̱jma̱a̱ gutamíjnála rígi̱:
Á mu ikháán xtaa ga̱jma̱a̱ʼ mbáa bi̱ na̱nguá eyoo kaʼyoo Jeobá, ndiéjunʼ gáʼyóoʼ matani mu makuwáanʼ gagi rá.
7. Atanimbaaʼ ikha ndrígóo Jeobá náa naʼthí ndiéjunʼ gíʼmaa muni xa̱bu̱ gajmii
Mbáa tikhun naʼniún mingíjyúuʼ munimbánii ikha ndrígóo Jeobá náa bi̱ ndi̱ya̱a̱.c Mú ikhaa naʼni tsajkurámiinʼ bi̱ nuni mbá tsiakii munimbánii. Gu̱ya̱a̱ VIDEO.
Guraxnuu Hebreos 13:4 ga̱jma̱a̱ gutamíjnála rígi̱:
Lá naku̱ma̱a̱ʼ ikháán dí ikha ndrígóo Jeobá náa naʼthí ga̱jma̱a̱ numún xa̱bu̱ bi̱ nudamijná nindxu̱u̱ májánʼ ráʼ. Náá numuu tatsaʼwáminaʼ xúʼko̱ rá.
Á mu nudamijná cristianos, Jeobá nandoo dí manújngún náa inuu i̱yi̱i̱ʼ ga̱jma̱a̱ xúʼko̱ má á mu nuniñamijná ma̱ngaa, numuu rí nindxu̱u̱ mbá xtángoo dí rígá náa xúgíʼ numbaaʼ. Guraxnuu Tito 3:1 ga̱jma̱a̱ gutamíjnála rígi̱:
Á mu ikháán xtaa ga̱jma̱a̱ʼ xa̱bu̱, lá ninújngaaʼ náa inuu i̱yi̱i̱ʼ ga̱jma̱a̱ najmaniaʼlá náa inún xa̱bu̱ ñajunʼ ráʼ.
RÍ NURAJXI̱ TIKHUN: “Náá numuu ganújnguxu náa inuu i̱yi̱i̱ʼ rá. Lá i̱yi̱i̱ʼ gáxtáá ga̱jma̱a̱ ráʼ.”
Ndiéjunʼ rathá ikháán rá.
RÍ NAGÁJNURIYO̱O̱ʼ
Xa̱bu̱ bi̱ nidamijná ga̱jma̱a̱ bi̱ kúwá ndajkuíín nindxu̱u̱ mbá regalo ndrígóo Jeobá. Ikha jngóo tséʼniuu á mu kuwáánʼ ndajkuáánʼ o nidamijná ma̱ndoo makuwáánʼ tsímáá á mu nuʼni xó má nandoo Dios.
Rí nijmañaaʼ
Xú káʼnii gándoo mbáa bi̱ káʼnii xtaa mbáwíi majmuu májánʼ mbiʼi ndrígóo rá.
Ndíjkha naʼthí náa Biblia, dí cristianos gíʼmaa mbu̱ya̱a̱ mbáa bi̱ na̱jkha̱ ikháá má religión ndrígu̱ún rá.
Xó má naʼthí náa Biblia, náá numuu ma̱ndoo murujturiga̱a̱ i̱yi̱i̱ʼ bi̱ nidamijná rá.
ATAYÁÁ ITHÁAN
Ndiéjunʼ eyoo gáʼthí dí i̱ndó ma̱ndoo matatsiʼgúnʼ o matanujúnʼ náa “Tátá” rá.
“Graxe̱ rí nuni bi̱ nuraxnuu” (Bi̱ Nayejngoo, 1 ñajunʼ gu̱nʼ julio tsiguʼ 2004)
Atayáá a̱jma̱ video rí mambáyaaʼ matraʼwíí májánʼ dí matani numuu rí naʼthí ga̱jma̱a̱ numún novio ma̱ngaa índo̱ nudamijná xa̱bu̱.
Atayáá ndíjkha dí mbáa ndxájulú ndaʼyoo gajkhun dí Jeobá nixnúu mbá dí itháan májánʼ ki xóo dí niniñuuʼ tsu̱díí.
Nákha xóó tsérujturi̱ga̱a̱ i̱yi̱i̱ʼ o nákhá xóó tséniñamijna xa̱bu̱ gajmii, ndiéjunʼ gíʼmaa mbaʼyoo mbáa cristiano rá.
“Guʼyamajkuíí ‹rí Dios niruwa̱a̱›” (Bi̱ Nayejngoo, diciembre tsiguʼ 2018)
a Náa nota 4 mataxkamaa itháan náa naʼthí ga̱jma̱a̱ numuu rí nuniñami̱jna̱ (índo̱ nimbáa má na̱nguá niʼni aʼkhá ga̱jma̱a̱ imba̱a̱).
b Náa tikhu xuajen, xabuanii nduyáaʼ bi̱ mbayáa aʼdiún. Á mu xúʼko̱, xabuanii nduyáá ginii á mu ndxáʼgú o dxámá buʼko̱ nandoo kaʼyoo Jeobá. Ikhiin nduyáá dí rúʼko̱ gíʼdoo itháan numuu ki xóo bi̱ gíʼdoo mbújkha̱a̱ o mbá ñajunʼ májánʼ.
c Á mu ikháán xtaa ga̱jma̱a̱ʼ mbáa xa̱bu̱ mú na̱nguá ninújngaaʼ náa inuu i̱yi̱i̱ʼ, ikháán má gátraʼwíí dí matani á mu manújngaaʼ náa inu i̱yi̱i̱ʼ o matatsiʼñáaʼ xa̱bu̱.