Xátatsiʼñáminaʼ matani dí ra̱májánʼ

1. Ndiéjunʼ ekumún mbaʼin xa̱bu̱ rá.

KUWÁANʼ náa mbá numbaaʼ náa na̱nguá eyamajkuíí xtángoo ndrígóo Dios. Mbá xkri̱da, mbaʼin xa̱bu̱ nakumu̱ún rí nda̱a̱ nditháan dí raʼkhí rí mubúu̱nʼ gajmiún xa̱bu̱ maski ajndu xóó tsedamijná o rí mubúnʼ kanikhiin xa̱bekha o kanikhiin gu̱ʼu̱. Náa películas, libros, ajmúú ga̱jma̱a̱ náa i̱ʼwáʼ i̱yi̱i̱ʼ nakujmiin má xúʼko̱ o timii xa̱bu̱ bi̱ nuni rígi̱ (Sal. 12:8). Mú Jeobá ma̱ndoo mambáyulúʼ makuwáanʼ xóo eyoo ikhaa. Maski ajndu numbaaʼ rígi̱ mixkawiʼ wéñuʼ, ikháanʼ ma̱ndoo makuwáanʼ mikaʼwu (atraxnuu 1 Tesalonicenses 4:3-5).

2, 3. a) Ndíjkha rí gíʼdoo wéñuʼ numuu muʼni gaʼduunʼ ku̱ma̱ dí ra̱májánʼ rá. b) Ndiéjunʼ gúʼyáá náa artículo rígi̱ rá.

² Xúgiáanʼ ñajunlú xa̱bu̱ aʼkhá. Ikha jngó mbáa maʼga̱nú manigulúʼ dí ra̱májánʼ, xó má e̱gi̱ʼ naxumiin mu̱phu̱ xuwiʼ rí nudriyaʼ náa kajchún. Ndiéjunʼ gíʼmaa muʼni á mu nundxa̱ʼwa̱míjna̱ dí raʼkhí rá. Nacha̱ guríyaʼ ku̱ma̱ rúʼko̱ náa edxu̱lúʼ. Á mu tséʼni xúʼko̱, rí nagua̱ʼa̱ muʼni maʼni itháan gakhi̱i̱, ga̱jma̱a̱ índo̱ gándoo, mbáa asndu maʼga̱ kaguáanʼ muxuʼdámíjná aʼkhá (atraxnuu Santiago 1:14, 15).a Ikha jngó á mu nandulúʼ rí Jeobá maxtáa gagi ga̱jma̱á ni̱ndxu̱lú, gíʼdoo wéñuʼ numuu muʼni gaʼduunʼ dí raʼkhí rí nundxaʼwáá edxu̱lúʼ.

³ Xó má eʼyáá, ndayóoʼ muñeumíjna̱lú ga̱jma̱a̱ rí nundxa̱ʼwáá edxu̱lúʼ. Á mu nuʼni gaʼduunʼ ku̱ma̱ dí raʼkhí, xúxuʼdámíjnálú aʼkhá rí muʼbúlú gajmiúlú mbáa asndu má xumiʼníʼlú (Gál. 5:16). Náa artículo rígi̱ mbuʼyáá ajtsú enii rí mambáyulúʼ muʼni gaʼduunʼ dí ra̱májánʼ rí nandulúʼ muʼni. Timbá, rí nambáxulúʼ gajmiúlú Jeobá. Raga̱jma̱, xtágabu rí na̱ʼkha̱ náa Biblia. Ragajtsú, rí mumbayúlú a̱ngiu̱lú bi̱ najmañún itháan.

RÍ NAMBÁXULÚ GAJMIÚLÚ JEOBÁ

4. Ndíjkha rí gíʼdoo numuu mambaxúlúʼ gajmiúlú Dios rá.

⁴ Náa Biblia naʼthúún bi̱ nandún mambáxu̱u̱n gajmiún Dios: “Uniʼŋaʼ runi rí ramejanʼ muri xuʼcui maʼni micaʼju aʼcunʼla” (Sant. 4:8). Rígi̱ eyoo gáʼthúu̱n rí bi̱ nambáxulúʼ gajmiúlú Dios nuʼni ga̱jma̱a̱ nundxa̱ʼwáá edxu̱lúʼ rí naniguʼ ikhaa. Numuu rí nambáxulúʼ gajmiúlú, tsíyulú muʼni mbá rí magawúnʼ. Ikha jngó nuʼnimi̱jna̱ mundxaʼwáá edxu̱lúʼ i̱ndó rí mikaʼwu (Sal. 24:3, 4; 51:6; Filip. 4:8). Jeobá ndaʼyoo rí ñajunlú xa̱bu̱ aʼkhá ga̱jma̱a̱ nguáná naʼniulú mingíjyúuʼ rí muniʼñáaʼ rundxaʼwámíjna̱ dí ra̱májánʼ. Mú numuu rí tsíyulú muʼni gawíinʼ, nuʼni mbá tsiakii rí muʼni gaʼduunʼ dí ra̱májánʼ ga̱jma̱a̱ nundxa̱ʼwáá edxu̱lúʼ i̱ndó rí májánʼ (Gén. 6:5, 6).

5, 6. Xú káʼnii embáyuluʼ rí muʼtájkáan mu muʼni gaʼduunʼ dí ra̱májánʼ rí nagua̱ʼa̱ muʼni rá.

⁵ Á mu nuʼtákáñii má xúʼko̱ Jeobá ikhaa mambáyulúʼ rí xundxaʼwa̱míjna̱ dí raʼkhí. Ikhaa maxnúlúʼ xi̱ʼ kaʼwu ndrígóo ga̱jma̱a̱ tsiakii mu makuwáanʼ mikaʼwu. Índo̱ nuʼtájkáan ma̱ndoo muʼthán rí i̱ndó nandulúʼ mundxaʼwamíjna̱ rí naniguʼ ikhaa (Sal. 19:14). Ma̱ngaa ma̱ndoo muraxi̱i̱lú á mu rígá mbá dí ra̱májánʼ náa ikháanʼ rí maʼga̱ kaguáanʼ muxuʼdámijnalú aʼkhá (Sal. 139:23, 24). Ma̱ngaa ma̱ndoo munda̱ʼa̱a̱ rí mambáyulúʼ rí xuxuʼdamíjna̱ aʼkhá xóo rí muʼbulú gajmiúlú mbáa, itháan índo̱ nagadríga̱ dí ra̱májánʼ (Mat. 6:13).

⁶ Mbáa nákha xóó tsenindxu̱lú xa̱bi̱i̱ Jeobá nanigulúʼ muʼni tikhuu dí ra̱májánʼ ga̱jma̱a̱ nguáná xóó nagua̱ʼa̱ muʼni. Mú Jeobá mambáyulúʼ muriʼkhumijná, rúʼko̱ nigíʼnuu rey David. Ikhaa nibóo̱ʼ ga̱jma̱a̱ mbáa a̱ʼgu̱ bi̱ raʼkháa a̱ʼgiu̱u̱. Mú, nda̱wa̱á nigáwiinʼ a̱jkiu̱u̱n ga̱jma̱a̱ nindo̱ʼo̱o̱ Jeobá rí maxnúu ‹mbá a̱jkiu̱u̱n kaʼwu› ga̱jma̱a̱ mambáyúu mu maʼnimbo̱o̱ (Sal. 51:10, 12). Ikha jngó, á mu ikháánʼ xtaa rataniminaʼ ga̱jma̱a̱ dí ra̱májánʼ, atanda̱ʼa̱a̱ Jeobá rí mambáyaʼ. Ikhaa gámbáyaʼ rí maʼngaaʼ matani gaʼduunʼ rí natatsaʼwáminaʼ ga̱jma̱a̱ rí natani (Sal. 119:133).

XTÁGABU RÍ NA̱ʼKHA̱ NÁA BIBLIA

7. Xú káʼnii embáyuluʼ Biblia mu muʼni gaʼduunʼ dí ra̱májánʼ rí nagua̱ʼa̱ muʼni rá.

⁷ Jeobá nariʼña̱a̱ rí nuʼtájkáan náa Biblia, ikhí nuxkamaa ku̱ma̱ ndrígóo Dios, rí nindxu̱u̱ mikaʼwu (Sant. 3:17). Á mu nuraxnuu Biblia xúgíʼ mbiʼi, náa edxu̱lúʼ ma̱jti̱ i̱ndó ku̱ma̱ rí májánʼ (Sal. 19:7, 11; 119:9, 11). Ma̱ngaa náa Biblia nuxkamaa xtágabu ga̱jma̱a̱ xkri̱da rí mambáyulúʼ muʼni gaʼduunʼ dí ra̱májánʼ rí nagua̱ʼa̱ muʼni.

8, 9. a) Xó má e̱ʼkha̱ raʼthí náa capítulo 7 náa Proverbios, ndíjkha rí mbáa dxámá nikudaminaʼ mbá aʼkhá ga̱jma̱a̱ mbáa a̱ʼgu̱ bi̱ nagujuamínaʼ rá. b) Náa mbi̱ʼi̱i̱ rí migamíi muxuʼdámijnalú aʼkhá rá.

⁸ Náa Proverbios 5:8, Biblia naʼthúlúʼ rí muʼni tsíngunʼ náa aʼkhá xóo rí muʼbúlú gajmiúlú mbáa. Náa capítulo 7 ndrígóo Proverbios nuraxnuu historia ndrígóo mbáa dxámá bi̱ nigájnuu pasía mbruʼun, mijngii náa xtáa mbáa a̱ʼgu̱ bi̱ nagujuamínaʼ. Ikhaa wíji̱ náa mbá esquina, kagúwunʼ mbá xtíin rí nasngájma xuyuʼ. Índo̱ ndiʼyoo dxámá nikuʼmaminaʼ náa ikhaa, ni̱ʼkhu̱ rawunʼ ga̱jma̱a̱ niʼthúu̱n mbaʼa rí maʼniuu maxkaxi̱i̱ rí maʼndoo mabóoʼ ga̱jma̱a̱. Índo̱ dxámá nigájnuu náa goʼwóo na̱nguá endxa̱ʼwáminaʼ makudaminaʼ mbá aʼkhá. Numuu rí ikhaa na̱nguá niʼni gaʼduunʼ dí ra̱májánʼ, ikhú nikudaminaʼ aʼkhá. Nda̱wa̱á nimínuuʼ ga̱jma̱a̱ numuu aʼkhá rígi̱. Á mu nindxa̱ʼwáminaʼ dí magíʼnuu mbá dí ra̱májánʼ, ikhaa matsíngunʼ náa a̱ʼgu̱ buʼko̱ (Prov. 7:6-27).

⁹ Mangáanʼ mu̱ʼgua̱nú muʼni mbá dí ra̱májánʼ á mu tsendxaʼwáá edxu̱lúʼ rí migamíi nindxu̱u̱ tikhuu rí muʼni. Mbá xkri̱da, migamíi wéñuʼ nindxu̱u̱ rí mi̱dxu̱ʼ ratrikui̱i̱ canal ndrígóo televisión mu ma̱ta̱ya̱a̱ mámbá rí na̱ʼkha̱. Ndíjkha rá. Numuu rí gamíi mbuʼyáá tikhuu programa náa kuwa rubúu̱nʼ xa̱bu̱. Ga̱jma̱a̱ á mu kuwáanʼ ruʼyáá Internet, gamíi wéñuʼ nindxu̱u̱ á mu nuʼni clic náa mbá ináa rí tseʼniʼnuʼ, o rí mata̱ʼa̱ʼ náa ináa rí nusngajma mbuyáá xúgínʼ rí náa kuwa nubúunʼ o náa na̱ʼkha̱ pornografía. Á mu nduʼyáá rígi̱ maʼni rí magua̱ʼa̱ muʼni dí raʼkhí ga̱jma̱a̱ maʼga̱ kaguáanʼ rí ní xúʼnimbulú náa Jeobá.

10. Náa numuu rí migamíi wéñuʼ muʼni xngaʼun rá. (Atayáá timbá xtiʼkhu.)

¹⁰ Náa Biblia naʼthúlúʼ xóo gíʼmaa mbuyamajkumijná xa̱bekha gajmiún gu̱ʼu̱ (atraxnuu 1 Timoteo 5:2). Xa̱bi̱i̱ Jeobá gíʼmaa masngájma rí i̱ndó bi̱ ndiyáa manigiuʼ kaʼyoo o magíʼdoo wéñuʼ numuu náa ikhaa. Ga̱jma̱a̱ xa̱bi̱i̱ Jeobá bi̱ xóó tsenigúnʼ o tsenújunʼ i̱ndó masngájma rí nanigiuʼ kaʼyoo bi̱ nandoo mbayáa. Tikhun nakumún rí á mu a̱jmi̱i̱n xa̱bu̱ tsiruguami̱jna̱ nda̱a̱ rí gáʼniuu á mu káaʼ nuni xngaʼun o nuxingíiʼ ga̱jma̱a̱ xú káʼnii eyamijná. Mú á mu a̱jmi̱i̱n xa̱bu̱ nuni rígi̱ maʼni rí mundxaʼwamíjna̱ dí ra̱májánʼ ga̱jma̱a̱ maguanu muxuʼdami̱jna̱ aʼkhá. Nigíʼniin má rígi̱ tikhun xa̱bu̱, ga̱jma̱a̱ mangáanʼ ma̱ndoo mugíʼnii. Ikha jngó xa̱bi̱i̱ Dios ragíʼmaa muni rígi̱.

11. Ndiéjunʼ ejmañuluʼ náa xkri̱da ndrígóo José rá.

¹¹ Rígá mbaʼa rí majmañúlú náa xkri̱da ndrígóo José. A̱ʼgiu̱u̱ xa̱bu̱ náa xtáa rañajunʼ nindoo rí maʼnirájáa mu mabóoʼ ga̱jma̱a̱ ikhaa. José niʼthúu̱n rí na̱nguá, mu a̱ʼgu̱ niʼtákáñuu má xúʼko̱. Xúgíʼ mbiʼi na̱ndo̱ʼo̱o̱ rí maguanún ndajkuíin (Gén. 39:7, 8, 10). Mbáa xa̱bu̱ bi̱ najmañuu wéñuʼ niʼthí rí a̱ʼgu̱ nindxa̱ʼwáminaʼ rí á mu naguanún ndajkuíín, José maʼndoo mabóoʼ ga̱jma̱a̱. Mú José na̱nguá nindxa̱ʼwáminaʼ xúʼko̱ kaʼnii. Xúʼko̱ niʼni rí xágiʼdoo náa edxu̱u̱ ku̱ma̱ dí ra̱májánʼ. Mbá mbiʼi, a̱ʼgu̱ nigujtun xtíñuu José ga̱jma̱a̱ niʼniuu tsiakii rí mabóoʼ ga̱jma̱a̱. Mú ikhaa ‹niniñuʼ xtíñuu náa a̱ʼgu̱› ga̱jma̱a̱ ningátiyaʼ ragáyúu (Gén. 39:12).

12. Xú káʼnii eʼyáá rí nuyexi maʼni magua̱ʼa̱ muʼni dí ra̱májánʼ rá.

¹² Rí nduʼyáá maʼni rí magua̱ʼa̱ muʼni dí raʼkhí. Jesús niʼthí rí á mu mbáa xa̱bu̱ ndaʼyoo mbáa a̱ʼgu̱ bi̱ raʼkháa a̱ʼgiu̱u̱ ga̱jma̱a̱ rí nagua̱ʼa̱ mabóoʼ ga̱jma̱a̱, nikudaminaʼ má aʼkhá náa a̱jkiu̱u̱n (Mat. 5:28). Rúʼko̱ nindxu̱u̱ rí nigíʼnuu rey David. Náa Biblia naʼthí rí asndu náa tsu̱du̱u̱ goʼwóo “ndiʼyoo mbáa a̱ʼgu̱ bi̱ xtáa rawan” (2 Sam. 11:2). Ikhaa má ninújunʼ ga̱jma̱a̱ imba̱a̱ xa̱bu̱, mú David tayexi kaníí, ndiʼyoo má xúʼko̱ a̱ʼgu̱ ma̱ngaa nindxa̱ʼwáminaʼ ga̱jma̱a̱ numuu. Nda̱wa̱á nibóo̱ʼ ga̱jma̱a̱.

13. Ndíjkha rí gíʼdoo numuu ‹mambanúlú› ga̱jma̱a̱ idulú ma̱ngaa ndiéjunʼ eyoo gáʼthúu̱n rá.

¹³ Ma̱ngaa rígá mbaʼa wéñuʼ rí majmañulúʼ náa xkri̱da ndrígóo Job. Ikhaa niʼthí: “Nimbánuʼ ga̱jmu̱ʼ iduʼ” (Job 31:1, 7, 9). Gíʼdoo wéñuʼ numuu rí mbuʼyaridáá ga̱jma̱a̱ ‹mambanúlú› ga̱jma̱a̱ idulú. Náa numuu rá. Numuu dí rúʼko̱ mambáyulúʼ mu xágua̱ʼa̱ muʼni dí ra̱májánʼ. Mú ndiéjunʼ eyoo gáʼthúu̱n ‹mambanúlú› ga̱jma̱a̱ idulú rá. Nandoo gáʼthúu̱n rí mataʼgíiʼ rí xáta̱ya̱a̱ nimbá rí mataba̱ʼ ga̱jma̱ʼ mbáa. Á mu nduʼyáá náa pantalla rí nagájnún xa̱bu̱ bi̱ kuwa rubúunʼ o náa mbá cartel, náa mbá revista o asndu náa má, núkhu guyexi i̱mba̱ níʼkhá.

14. Ndiéjunʼ eyóoʼ muʼni mu maʼni mikaʼwáanʼ rá.

¹⁴ Ga̱jma̱a̱ índo̱ nundxa̱ʼwa̱míjna̱ rí ndiʼyáá asndu xúgi̱, mbáa na̱dxu̱ʼnú natayáá rí ndayóoʼ matriʼkuminaʼ. Á mu xúʼko̱, atani mbá nacha̱. Á mu nuʼnimbulúʼ náa Jeobá, ma̱ndoo muʼni gaʼduunʼ rí muxuʼdámíjná aʼkhá xóo rí muʼbúlú gajmiúlú mbáa ga̱jma̱a̱ xúʼko̱ makuwáanʼ kaʼwu (atraxnuu Santiago 1:21-25).

RÍ MUMBAYÚLÚ A̱NGIU̱LÚ BI NAJMAÑÚN ITHÁAN

15. Á mu rí ikháánʼ naʼniaʼ mingíjyúuʼ rí matatsiʼñáanʼ ratani̱ dí ra̱májánʼ, ndíjkha rí gíʼdoo numuu matanda̱ʼa̱ rí mixtambáyaʼ rá.

¹⁵ Á mu rí ikháánʼ naʼniaʼ mingíjyúuʼ rí matatsiʼñáanʼ ratani̱ dí ra̱májánʼ rí nagua̱ʼa̱ matani, atanda̱ʼa̱ rí mambáyaʼ mbáa ndxájulú bi̱ najmañuu itháan mu ma̱ndoo maxnáʼ mbá xtágabu rí na̱ʼkha̱ náa Biblia. Gajkhun, mingíjyúuʼ nindxu̱u̱ rí muʼthá ga̱jma̱a̱ numuu rígi̱, mú gíʼdoo numuu matani (Prov. 18:1; Heb. 3:12, 13). Náa numuu rá. Numuu rí a̱ngiu̱lú bi̱ najmañún itháan ma̱ndoo majmúún Biblia mu mumbayáaʼ matriʼkuminaʼ náa tígo̱o̱. Xúʼko̱ ma̱ndoo matambaxáʼ itháan ga̱jma̱a̱ Jeobá.

16, 17. a) Ga̱jma̱ʼ mbá xkri̱da mu marata̱ xú káʼnii bi̱ kuya̱ edxu̱u̱ embañún bi̱ nuni gaʼduunʼ dí ra̱májánʼ. b) Ndíjkha rí gíʼdoo numuu rí bi̱ nduyáá pornografía munda̱ʼa̱ rí mixtambáñuun mbá nacha̱ rá.

¹⁶ Bi̱ kuya̱ edxu̱u̱ náa congregación ikhiin bi̱ phú ma̱ndoo mumbayulúʼ (atraxnuu Santiago 5:13-15).b Guʼyáá xkri̱da ndrígóo mbáa dxámá bi̱ xtáa náa Brasil. Ikhaa naʼthí rí mba̱yu̱ʼ tsiguʼ nigiʼdoo xkujndu mu maʼni gaʼduunʼ dí ra̱májánʼ. Ikhaa naʼthí: “Nda̱yo̱o̱ rí xtáá randxa̱ʼo̱o̱ edxu̱ʼ tsínigu̱ʼ Jeobá mú nati̱yu̱ʼ wéñuʼ rí mathu̱u̱n mbáa”. Mbáa bi̱ kayá edxu̱u̱ ndiʼyoo rí dxámá ndayóoʼ mixtambáyii. Ikha jngó niʼthúu̱n rí maʼthúún bi̱ kuya̱ edxu̱u̱. Dxámá naʼthí: “Bi̱ kuya̱ edxu̱u̱ nithu̱nʼ májánʼ ga̱jma̱a̱ nikru̱ʼu̱u̱n xú káʼnii xtáá, rúʼko̱ niʼniuʼ tsiánguá numuu rí niku̱mu̱ʼ dí rakáʼyoʼ magumún xúʼko̱ kaʼnii. Nidxaunʼ májánʼ, nijmún Biblia mu marmáʼáan a̱jkiu̱nʼ rí Jeobá nandoo kaʼyoʼ ma̱ngaa nitajkáan ga̱jma̱á numuʼ. Xúgíʼ rúʼko̱ nimbáyuʼ mu magruígú xtágabu rí nixnuʼ”. Rí xúgi̱ ninújngoo má tsiguʼ ga̱jma̱a̱ ikhaa nambáxu̱u̱ májánʼ ga̱jma̱a̱ Jeobá. Ikhaa naʼthí: “Rí xúgi̱ ndayóoʼ rí itháan májánʼ mataʼyáaʼ rí mixtambáyaaʼ ki xóo rí mataniminaʼ mbáwiin mu matani gaʼduunʼ dí ra̱májánʼ”.

¹⁷ Á mu rí ikháánʼ naguʼwáanʼ natayáá pornografía, mbá nacha̱ gáʼyóóʼ matanda̱ʼa̱ rí mixtambáyaaʼ. Náa numuu rá. Numuu rí á mu naraʼthi̱i̱n, itháan ra̱mingíjyúuʼ gáʼni rí mataxuʼdáminaʼ aʼkhá rí mataba̱ʼ ga̱jma̱ʼ mbáa. Á mu xúʼko̱ rígá, matani rí magawúnʼ wéñuʼ bi̱ kuwa náa guʼwáaʼ ma̱ngaa bi̱ nambáxa̱ʼ gajmiáanʼ. Ga̱jma̱a̱ ma̱ngaa matani rí xa̱bu̱ mutanumáá Dios. Mbaʼin wéñuʼ nindu̱ʼu̱u̱n bi̱ kuya̱ edxu̱u̱ rí mumbañún ga̱jma̱a̱ nindrigú xtágabu ndrígu̱ún. Xúʼko̱ nini rí mambaxúún má xúʼko̱ gajmiún Jeobá ga̱jma̱a̱ bi̱ kuwa náa congregación (Sal. 141:5; Heb. 12:5, 6; Sant. 1:15).

ATANIMINAʼ MU MARAXTAA KAʼWU

18. Ndiéjunʼ rí gíʼmaa muʼni má xúʼko̱ rá.

¹⁸ Numbaaʼ ndrígóo Satanás na̱jkha̱ raʼni itháan mixkawiʼ. Mú xa̱bi̱i̱ Dios nuni mbá tsiakii mu muni gaʼduunʼ dí ra̱májánʼ rí nagua̱ʼa̱ muni ga̱jma̱a̱ makuwá mikaʼwu. Ga̱jma̱a̱ Jeobá ra̱ʼkhá tháán edxuu kaʼñúún. Ikha jngó, gajmulú nájtsu enii rí ma̱ndoo mambáyulúʼ: Rí nambáxulúʼ gajmiúlú Jeobá, xtágabu rí na̱ʼkha̱ náa Biblia mangiin a̱ngiu̱lú bi̱ najmañún itháan. Á mu nuʼni xúʼko̱ kaʼnii makuwáanʼ itháan gagi ga̱jma̱a̱ nda̱a̱ rí maʼni gawúnlú (Sal. 119:5, 6). Nda̱wa̱á Satanás mandáti̱ga̱a̱ ga̱jma̱a̱ ikháanʼ makuwáanʼ náa mbá numbaaʼ nuxi̱ʼ ga̱jma̱a̱ mikaʼwu.