Rí muʼtájkháan: Xú káʼnii embáyulú rá.

Índo̱ rígá rí nandaʼ matani, mbáa natraximinaʼ. “Ndiéjunʼ lá gambáyuʼ rá.” Lá ra̱májánʼ matraxi̱ rígi̱ ga̱jma̱a̱ numuu rí muʼtájkháan ráʼ. Nguáná na̱nguá. Májánʼ má nindxu̱u̱ rí nandulúʼ mbuʼyáá ndiéjunʼ gámbayulú rí muʼtá kháñii Dios. Asndu Job mbáa xa̱bu̱ jmbii niraximinaʼ: “Á mu nathu̱u̱n, lá mariʼñuʼ xáʼ.” (Job 9:16.)

Náa artículo rí ninújngoo ndiʼyáá rí nuʼtájkháan nindxu̱u̱ itháan ki xóo rí naguʼún nuni náa mbá religión o xóo mbá thana. Dios bi̱ gajkhun naʼdxun rí nuʼtájkháan. Á mu nuʼtájkháan xóo gíʼmaa, ikhaa maʼdxaunlú. Ma̱ngaa naʼthúlúʼ rí mu̱ʼgua̱ kanuu náa ikhaa (Santiago 4:8). Mú ndiéjunʼ gándoo gambáyuluʼ á mu nuʼtájkháan nángi eʼni rá. Guʼyáá.

Tsímáá

Índo̱ natraʼníí xkujndu, lá naku̱ma̱ʼ rí naxmiéjuanʼ wéñuʼ rá. Náa Biblia naxná xtágabu rí ma̱ndoo muʼni: “Gutajkháan má xúʼko̱” ga̱jma̱a̱ “gunda̱ʼa̱a̱ xúgíʼ rí eyála” (1 Tesalonicenses 5:17; Filipenses 4:6). Bi̱ nunda̱ʼa̱a̱ rí mambáñun, náa Biblia nakudaminaʼ: “Tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxaʼwamíjna” (Filipenses 4:7). Ma̱ndoo makuwáanʼ itháan tsímáá índo̱ guʼtháán Anu̱lú bi̱ xtáa mekhuíí xúgíʼ rí gíwanʼ náa a̱jkiu̱lú. Náa Biblia naʼthúlúʼ muʼni rígi̱: “Atadaʼ náa Jeobá xkujndu ndrígáʼ, ga̱jma̱a̱ ikhaa má gambáyaʼ” (Salmo 55:22).

Náa xúgíʼ numbaaʼ, mbaʼin wéñuʼ xa̱bu̱ nduyáá rígi̱ índo̱ nutajkháan. Mbáa a̱ʼgu̱ bi̱ xtáa náa Corea del Sur, bi̱ nagumbiʼyuu Hee Ran, naʼthí: “Maski ajndu gúʼdoo xkujndu gakhii, índo̱ natajkháan ga̱jma̱a̱ numuu rígi̱ nakumuʼ asndu xóo naʼni̱i̱ a̱jkiu̱nʼ ga̱jma̱a̱ rí maʼngoʼ maraʼnuu”. Cecilia, bi̱ xtáa náa Filipinas, naʼthúlúʼ: “Naxmiéjunʼ ka̱ñu̱u̱n wéñuʼ waʼxioʼ. Ma̱ngaa nañewu̱u̱n ru̱dúʼ, maski ajndu nánguá eniniúnʼ. Ga̱jma̱a̱ numuu rí natajkháan nandoo mani ñajunʼ dí rígá guʼwáá itháan tsímáá. Nda̱yo̱o̱ rí Jeobá mambáyuʼ mañewu̱u̱n e̱ji̱nʼ”.

Naʼni̱i̱ a̱jkiu̱lú ga̱jma̱a̱ naxnúlú tsiakii náa mbiʼi rí mingíjyúuʼ

Lá naxmiéjuanʼ wéñuʼ, naxmiéjuanʼ xtayaminaʼ o natraʼníí mbá xkujndu mingíjyúuʼ wéñuʼ rá. Á mu naratájkháan “Dios bi̱ naʼni̱i̱ a̱jkiu̱lú”, maʼni̱i̱ a̱jkia̱nʼ. Náa Biblia naʼthí rí ikhaa “naʼni̱i̱ a̱jkiu̱lú náa xúgíʼ gamiéjunʼ rí kuaʼdáá” (2 Corintios 1:3, 4). Mbá xkri̱da, Jesús, mbóo mbiʼi rí ikhaa nixmiéjunʼ wéñuʼ, “nismatigo niʼni tsakun”. Ndiéjunʼ nirígá rá. “Nisjngajmaminaʼ mba ángel tsi naʼka mikui naʼ inu, numu ri maxna tsiake” (Lucas 22:41, 43). Nehemías, imba̱a̱ xa̱bu̱ jmbii, ma̱ngaa nimínuʼ numuu rí xa̱bu̱ bi̱ ra̱míjínʼ wéñuʼ ninimiñíí mu maniñuʼ raʼni ñajunʼ Dios. Ikhaa niʼtá kháñuu Dios rí maxnúu tsiakii. Dí nirígá nda̱wa̱á nasngájma rí Dios nimbáyúu mu xámiñuu ga̱jma̱a̱ maʼnimbánuu ñajunʼ rí nijuixnáá (Nehemías 6:9-16). Reginald, bi̱ xtáa náa Ghana, naʼthí: “Índo̱ natajkháan, itháan índo̱ gúʼdoo xkujndu rí mingíjyúuʼ wéñuʼ, nakumuʼ rí asndu xóo nithu̱u̱n xkujndu ndrígóʼ mbáa bi̱ ma̱ndoo mambáyúu ga̱jma̱a̱ rí ikhaa naʼthúu̱n dí ragíʼmaa mamiñúʼ”. Nakujmaa kaʼwu rí á mu nuʼtákáñii Dios, ikhaa gáʼni̱i̱ a̱jkiu̱lú.

Rí najmañuu wéñuʼ Dios

Rígá rí muraʼwíí muʼni rí ma̱ndoo mariʼkhuu xóo gakuwáanʼ, xó má ikháanʼ ga̱jma̱a̱ bi̱ kuwa náa guʼwúlú. Ndiéjunʼ gándoo muʼni mu xáʼni jngawáanʼ rá. Náa Biblia naʼthí: “Á mu rí mbáa dí ikháanʼla ndayóoʼ majmañuu xóó itháan [índo̱ natraʼníí xkujndu], gando̱ʼo̱o̱ má xúʼko̱ Dios, numuu rí ikhaa naxnún xúgínʼ rí ndayóoʼ ga̱jma̱a̱ xáʼthí kikháá rí nixnáʼ” (Santiago 1:5). Á mu nunda̱ʼa̱a̱ rí majmañulúʼ wéñuʼ, Dios najmuu xi̱ʼ kaʼwu mu mambáyulúʼ muraʼwíí rí májánʼ muʼni. Jesús niʼthúluʼ rí “Anaʼla tsi xta mikui [maxná] Espíritu Tsi Kaʼhui tsi mundaʼa” (Lucas 11:13).

Asndu Jesucristo nindo̱ʼo̱o̱ Anu̱u̱ rí mambáyúu mu maraʼwíí rí májánʼ rí maʼni. Índo̱ ndiyóoʼ maraʼwíin mbá 12 apóstoles, Jesús “jañi mbruʼun niʼtajañu Dios” (Lucas 6:12).

Xó má ikhaa, mbaʼin xa̱bu̱ nakuwa tsímáá índo̱ nduyáá rí Dios nambáñun mu muraʼwíí rí májánʼ muni. Regina, bi̱ xtáa náa Filipinas, naʼthúlúʼ mbaʼa xkujndu rí ikhaa nigiʼdoo: Nikháñu ajmbio̱o̱ ga̱jma̱a̱ ndiyóoʼ mañewu̱u̱n bi̱ kuwa náa goʼwóo, nindáti̱go̱o̱ ñajunʼ ga̱jma̱a̱ ndiyóoʼ maʼnimbanii e̱ji̱i̱n. Ndiéjunʼ nimbáyúu maraʼwíí májánʼ rí maʼni xá. Ikhaa naʼthí: “Rí matajkháan naʼni mambáyuminaʼ náa Jeobá”. Kwabena, bi̱ xtáa náa Ghana, naʼthúlúʼ náa numuu na̱ndo̱ʼo̱o̱ Dios rí mambáyúu: “Nigúʼdoo mbá ñajunʼ májánʼ náa naguma guʼwá mú nindáti̱go̱ʼ. Índo̱ nigúʼdoo mbaʼa rí mani, nindo̱ʼo̱o̱ má xúʼko̱ Dios rí mambáyuʼ maraʼwíí mani mbá rí májánʼ. Nda̱yo̱o̱ májánʼ rí Jeobá nimbáyuʼ maraʼwíí mbóo ñajunʼ rí ma̱ndoo mambáyuminaʼ ma̱ngaa mu mani ñajunʼ Dios”. Mangáán ma̱ndoo matrígú ikha ndrígóo Dios á mu narata kháñii ga̱jma̱a̱ numuu rí maʼni gachúu rí mambáxaʼ ga̱jma̱ʼ ikhaa.

I̱ndó niguámbulúʼ niʼthá ga̱jma̱a̱ numuu nguáthá rí ma̱ndoo mambáyaʼ á mu naratájkháan. (Mú ma̱ta̱ya̱a̱ i̱ʼwáʼ, atraxnuu kúgumaʼá “Rí muʼtájkháan nayambáá”.) Á mu nandaʼ rí maratajkháan mambáyaʼ, ginii ndayóoʼ matatsiʼniiʼ Dios ga̱jma̱a̱ xúgíʼ rí ikhaa nakudaminaʼ maʼni. Náa numuu rí tseratamíjná ga̱jma̱ʼ mbáa bi̱ naʼtáraʼa numuu Jeobá mu mambáyaʼ matatsiʼnuʼ Biblia rá.a Rígi̱ ma̱ndoo matani ginii mu ma̱ndoo mataxuʼmáminaʼ náa “bi̱ naʼdxawun índo̱ nugríga̱a̱” (Salmo 65:2).