RÍ KAYÁ EDXU̱U̱ NÁA INUU I̱YI̱I̱ʼ | LÁ MÁJÁNʼ MATANI RÍ JMBU RÁʼ
Lá xóó gíʼdoo numuu matani rí jmbu ráʼ.
Hitoshi nañajunʼ náa mbá departamento ndrígóo contabilidad náa mbá oficina dí rígá náa Japón. Mbá miʼtsú, índo̱ kuwa ruriyaʼ mbá cuenta, jefe ndrígóo niʼthí dí gíʼmaa maʼni nduwaʼ náa informe. Mú Hitoshi niʼthúu̱n rí xándoo maʼni numuu rí tsíyoo maʼni nduwaʼ. Ikhú, jefe ndrígóo niʼthúu̱n dí maxkriyaʼ ga̱jma̱a̱ xúʼko̱ má niʼni.
Gu̱nʼ nda̱wa̱á, Hitoshi nixtáa gíná wéñuʼ índo̱ niʼniminaʼ mbayáʼ mbá ñajunʼ náa xáʼni nduwaʼ. Mbá xkri̱da, náa ni̱jkha̱ gáyáʼ ñajunʼ niʼthí dí ikhaa xáʼni nimbá rí maʼga̱ kayáa maʼni nduwaʼ. Xa̱bu̱ bi̱ niʼniuu graxe̱ niʼthúu̱n: “¡Ra̱ʼkhá tháán mixtiʼkhu ku̱ma̱ʼ!”. Bi̱ kuwa goʼwóo ga̱jma̱a̱ bi̱ nambáxu̱u̱ gajmíi̱n nitháán rí xáʼni wabaminaʼ, mú ikhaa nánguá eʼyoo á mu rí májánʼ maʼthí rí gajkhun. Ikhaa má naʼthí: “Nigíʼdu̱u̱ niraximínáʼ á mu májánʼ mata rí nakumuʼ”.
Rí nigíʼnuu Hitoshi nasngájma dí raʼkháa xúgínʼ xa̱bu̱ numbaaʼ nduyáá rí gíʼdoo numuu manindxa̱ʼ xa̱bu̱ jmbii. Mú tikhun nduyáá rí tsimbáñun, mú itháan náa naxtangujua. Náa Sudáfrica, mbáa a̱ʼgu̱ niʼthí: “Náa nañajunʼ i̱ndó kuwa xa̱bu̱ bi̱ nuni nduwaʼ. Ga̱jma̱a̱ rí matani dí májánʼ naʼni itháan gakhii”.
Rí matani nduwaʼ nakujmaa itháan. Mbá rí ninigajmaa nákha nguáthá tsiguʼ doctor Robert Feldman, psicólogo náa Universidad ndrígóo Massachusetts, ikhaa ndiʼyoo rí mbá 60% xa̱bu̱ wanuu nuni nduwaʼ mbá miʼtsú índo̱ nutamijná gu̱wa̱ʼ minutos. “Niguánuxu tsiánguá índo̱ ndi̱ya̱a̱xu rígi̱ —niʼthí doctor Feldman—. Na̱nguá niguáʼthi̱i̱nxu mbu̱ya̱a̱ rí minduwaʼ naguma tsejtsi mbiʼi”. Náa numuu rí maski ajndu xúgínʼ xa̱bu̱ numbaaʼ tsínigu̱nʼ rí muni nduwiinʼ narígá wéñuʼ rí minduwaʼ rá.
Náa numuu dí rígá wéñuʼ rí minduwaʼ, rí naguma kuʼwáʼ ga̱jma̱a̱ i̱ʼwáʼ dí ra̱májánʼ rá. Xú káʼnii tsiyambáá rígi̱ náa mbá xuajen rá. Rí itháan gíʼdoo numuu, ndiéjunʼ gáʼyóoʼ muʼni mú xugíʼnii xúʼko̱ mangáanʼ rá.