Rí xáni̱ndxa̱ʼ xa̱bu̱ jmbii naʼni gawúunʼ xúgínʼ

Lá naku̱ma̱ʼ xúʼko̱ mangáán ráʼ. Gajkhun má rí xúgiáanʼ niraʼníí mbaʼa xkujndu o mbaʼa rí ndiyóoʼ muʼnimbánii. Mú, rí xóo guʼnimbánii masngájma rí xú káʼnii phú xa̱bu̱ ni̱ndxu̱lú. Mbá xkri̱da, á mu rí itháan naxmiéjunlú rí maguanúlú májánʼ náa inún eʼwíínʼ, mbáa muʼthá mbá nduwaʼ. Mú índo̱ rí gajkhun nakujmaa kaʼwu, ikhú gáʼyóóʼ muraʼníí gaʼkhu numuu rí niʼni nduwaʼ. Rí xúgi̱ mbuʼyáá tikhu rí narígá ga̱jma̱a̱ numuu nduwaʼ.

RÍ MATANI NDUWAʼ NAʼNI RÍ XUNIMBU̱ÚN KUYAAʼ

Rí maku̱ma̱ʼ xtayáá mbáa naʼni rí matambaxáʼ ga̱jma̱ʼ. Mú tséja̱a̱ rígi̱ mbá nacha̱. Narígá índo̱ xa̱bu̱ nakuwa mbóó, nutamijná rí gajkhun ga̱jma̱a̱ tséyáʼ i̱ndó rí nandún ikhiin. Phú gíná índo̱ mbá nduwaʼ o i̱mba̱ dí ra̱májánʼ, naʼni rí mandáti̱ga̱ rí maku̱ma̱ʼ xtayáá mbáa. Ga̱jma̱a̱ índo̱ nandáti̱ga̱ naʼni mingíjyúuʼ matatsimbaʼ mbu̱júu̱ʼ.

Lá niʼni nduwánʼ mbá miʼtsú mbáa bi̱ xtayáá ráʼ. Á mu xúʼko̱, mbáa ikháánʼ nigawánʼ wéñuʼ. Nakujmaa kaʼwu rí matani nduwaʼ ma̱ndoo maʼni gachúu asndu náa xa̱bu̱ bi̱ nambáxu̱u̱n itháan májánʼ.

RÍ MATANI NDUWAʼ NAʼNI RÍ EʼWÍÍNʼ MUNI NDUWAʼ

Náa mbá rí niʼnigajmaa̱ Robert Innes, bi̱ naʼsngáa ga̱jma̱a̱ numuu Economía náa Universidad ndrígóo California, nikujmaa rí “minduwaʼ naʼni rí eʼwíínʼ muni xúʼko̱ kaʼnii”. Nindxu̱u̱ xóo mbáa virus: Índo̱ itháan mba̱yu̱ʼ kuwáanʼ gajmiúlú mbáa bi̱ naʼni nduwaʼ, mangáanʼ muʼni nduwaʼ.

Xú káʼnii gándoo muñawumíjna̱ rá. Biblia ma̱ndoo mambáyulúʼ. Nutha̱nʼxu ma̱ta̱ya̱a̱ tikhu ikha rí na̱ʼkha̱ náa Biblia.