Lá narmáʼáan a̱jkia̱nʼ ráʼ.

Lá nitraxnuu májánʼ artículos ndrígóo Bi̱ Nayejngoo ráʼ. Atayáá a mu majmañaaʼ matriʼña̱a̱ graxe̱ rígi̱:

Ndiéjunʼ exkamaa náa Biblia rí Dios naku̱mu̱u̱ xóo eku̱mu̱lú rá.

Índo̱ israelitas ninindxu̱ún ñumbáá náa Egipto, Dios ndiʼyoo rí kuwa rumíniʼ ga̱jma̱a̱ asndu nigawúnʼ (Éx. 3:7; Is. 63:9). Numuu rí ikháanʼ nigumáanʼ xó má nindxu̱u̱ Dios, ikha jngó nakumulú xóo ekumu̱u̱ ikhaa. Ikhaa naxmiéjunʼ kaʼyulú asndu nguáná índo̱ nduʼyáá rí na̱nguá kaʼyulú mundrigú ngajua ndrígóo (wp18.3, ináa 8 ga̱jma̱a̱ 9).

Xú káʼnii nimbáñun xa̱bu̱ Jesús rí xundxa̱ʼwa̱míjna̱ dí ra̱májánʼ ga̱jma̱a̱ numuu eʼwíínʼ rá.

Nákha mbiʼi rí nixtáa Jesús, mbaʼin judíos nindxa̱ʼwa̱míjna̱ dí ra̱májánʼ ga̱jma̱a̱ numún eʼwíínʼ. Cristo niʼthí rí itháan gíʼdoo numuu manindxu̱lúʼ xa̱bu̱ guabáanʼ ga̱jma̱a̱ ra̱májánʼ nindxu̱u̱ rí muʼthá rí itháan gíʼdoo numuu raza ndrígúlú. Niʼthí rí xa̱bi̱i̱ gíʼmaa mbuyamijná xóo kanikhiin (w18.06, ináa 9 ga̱jma̱a̱ 10).

Ndiéjunʼ eʼsngúlúʼ ga̱jma̱a̱ numuu Moisés rí Jeobá tániñuʼ mato̱ʼo̱o̱ náa ku̱ba̱ʼ rí niʼthí maxnúu xá.

Moisés nimbáxu̱u̱ májánʼ ga̱jma̱a̱ Jeobá (Deut. 34:10). Mbá a̱jma̱ skiñúʼ tsiguʼ nda̱wa̱á índo̱ inuu magajnún náa ku̱ba̱ʼ mixooʼ, mbu̱júu̱ nixieʼkhá ga̱jma̱a̱ numuu rí nda̱a̱ iyaʼ. Dios ni̱thu̱u̱n Moisés rí maʼthúu̱n itsí. Mú táʼni xúʼko̱, rí phú niʼni nixnúu itsí. Mbáa Jeobá ra̱ʼkhá tháán nikiʼnáa kaʼyoo numuu rí táʼnimbo̱o̱ ikha ndrígóo o ga̱jma̱a̱ numuu rí táʼyamajkuu milagro rí niʼni (Núm. 20:6-12). Rígi̱ naʼsngúlú rí gíʼdoo numuu muʼnimbulúʼ rí gaʼthí Jeobá ga̱jma̱a̱ muxnáá gamajkhu (w18.07, ináa 13 ga̱jma̱a̱ 14).

Náa gáʼni rí makiéʼkulú á mu nduʼyáá xóo kiexu̱u̱n xa̱bu̱ rá.

Rígá ajtsú enii rí xóo nundxa̱ʼwa̱míjna̱ ga̱jma̱a̱ numún eʼwíínʼ: Raza o náa xuajñún, mbújkha̱a̱ ga̱jma̱a̱ tsiguúnʼ. Gíʼdoo wéñuʼ numuu rí xundxa̱ʼwa̱míjna̱ dí ra̱májánʼ ga̱jma̱a̱ numún eʼwíínʼ, Xó má Jeobá eʼni (Hech. 10:34, 35) (w18.08, ináa 8 asndu 12).

Xú káʼnii gándoo gúyambáá a̱ngiu̱lú guanii náa Guʼwá nagimbáanʼ rá.

A̱ngiu̱lú guanii bi̱ nundrigú imbo̱o̱ ñajunʼ, Dios ndaʼyoo rí guaʼdáá numún má xúʼko̱ ga̱jma̱a̱ ma̱ndoo mumbañún eʼwíínʼ. Xóo bi̱ guáʼdiin ajmbiún bi̱ na̱nguá nindxúu̱n xa̱bi̱i̱ Jeobá, bi̱ nuniñaʼ runi ñajunʼ Jeobá, musngúún xa̱bu̱ ga̱jma̱a̱ Biblia ga̱jma̱a̱ rí mutaráʼa (w18.09, ináa 8 asndu 11).

Ndiéjunʼ e̱ʼkha̱ náa caja ndrígóo herramientas mu muʼsngáa rá.

Tikhuu caja ndrígóo herramientas nindxu̱u̱ tarjeta náa naʼthí tsíin ni̱ndxu̱lú, invitaciones, mbá migiñuʼ tratados rí nigumaratáá májánʼ ga̱jma̱a̱ revista Bi̱ Nayejngoo. Ma̱ngaa kuaʼdáá tikhuu folletos, a̱jma̱ libro rí nuʼsngáa ga̱jma̱a̱ numuu Biblia ga̱jma̱a̱ a̱jkhu̱ videos rí nayambáá wéñuʼ rí nindxu̱u̱, náa numuu rí gíʼmaa muʼnigajmaa Biblia rá (w18.10, ináa 16).

Ndiéjunʼ gíʼmaa maʼni mbáa cristiano mu ma̱ʼtsi̱ rí gajkhun, xó má eʼthí náa proverbios 23: 23 rá.

Na̱nguá má eyóoʼ muxná mbújkha̱a̱ mu muguaʼdáá rí gajkhun. Mú gíʼmaa muriyaʼ mbiʼi ga̱jma̱a̱ tsiakii mu makhánulúʼ (w18.11, ináa 4).

Ndiéjunʼ eʼsngúlúʼ ga̱jma̱a̱ numuu rí xóo niʼni Oseas ga̱jma̱a̱ a̱ʼgiu̱u̱ rá.

Mbaʼa nuthu, Gómer nikudaminaʼ aʼkhá gajmíi̱n mbaʼin xa̱bu̱. Mú Oseas niʼni mba̱a̱ a̱jkiu̱u̱n ga̱jma̱a̱ tániñaaʼ. Á mu xa̱bu̱ bi̱ gajmii gákudaminaʼ aʼkhá ga̱jma̱a̱ imba̱a̱ bi̱ raʼkháa a̱ʼgiu̱u̱ o ajmbio̱o̱, bi̱ táʼni aʼkhá ma̱ndoo maʼni mba̱a̱ a̱jkiu̱u̱n kaʼyoo. Mú, xa̱biya̱ o a̱ʼgu̱ naʼthí maxtáa ga̱jma̱a̱ má xúʼko̱ bi̱ nikudaminaʼ aʼkhá, ni xándoo muniñami̱jna̱a̱ mbáa kayuʼ (w18.12, ináa 13).