Rí nundxa̱ʼwa̱míjna̱ mbaʼin xa̱bu̱ índo̱ nutakáñii Dios
“Índo̱ natakáñuu Dios, nda̱yo̱o̱ dí gi̱i̱ xtáa ga̱jma̱á ni̱ndxu̱ʼ, na̱jkha̱ kañun ga̱jma̱a̱ ñawúunʼ ma̱ngaa nambáyuʼ índo̱ tséyóo ndiéjunʼ gani” (MARÍA).
“A̱ʼgiu̱ʼ nikháñuu ga̱jma̱a̱ nandii cancer rí ndijyúuʼ mbá 13 tsiguʼ. Narmáʼáan a̱jkiu̱nʼ dí natakáñuu má xúʼko̱ Dios, ikhú ndi̱yo̱o̱ rí ma̱ngaa naku̱mu̱u̱ rí nagawúnʼ. Rúʼko̱ niʼni dí maxtáá tsímáá” (RAÚL).
“Rí muʼtájkáan, nindxu̱u̱ mbá regalo rí Dios nixnúlú” (ARNE).
Xóo má eʼwíinʼ xa̱bu̱, María, Raúl, Arne, nduyáá rí nindxu̱u̱ mbá regalo kiejunʼ dí mutakáñii Dios. Índo̱ nutakáñii Dios, nandoo nutamijná gajmiún, nuxna̱a̱ núma̱aʼ ga̱jma̱a̱ nduyáaʼ rí mambáñun. Ikhiin nunimbu̱u̱n rí naʼthí náa Biblia ga̱jma̱a̱ numuu rí mutajkáan náa Dios: “Rígi̱ jngó nakumulúʼ kuʼyáá ikhaa: Rí ma̱ndoo munda̱ʼa̱a̱ asndu ndiéjúúnʼ má rí kuajtuminaʼ ga̱jma̱a̱ rí ikhaa nandoo ga̱jma̱a̱ ikhaa naʼdxawúnlu” (1 Juan 5:14).
Mú mbaʼin xa̱bu̱ naʼniún mingíjyúuʼ munimbu̱ún rí naʼthí náa Biblia ga̱jma̱a̱ numuu rí mutajkáan náa Dios. Steve naʼthí rí nandxa̱ʼwáminaʼ: “Índo̱ nigúʼdoo 17 tsiguuʼ, ajtsíin bi̱ nambájxu̱u̱ʼ gajmíi̱nʼ nikháñúún: Mbáa nikháñuu náa niguma choque carro, bi̱ imbá gijmi̱i̱n nigu̱ʼwi̱i̱n náa lamáa”. Dí niʼni Steve rá. “Nitakáñuu Dios mu maʼthúu̱n náa numuu jngó nirígá xúʼko̱ káʼnii, mú na̱nguá niriʼñuʼ. Ikha jngó nirajximínáʼ: ‹Lá gajkhun nayambáá dí muʼtájkáan ráʼ.›” Mbaʼin xa̱bu̱ nakumu̱ún xúʼko̱, ga̱jma̱a̱ nurajximíjna̱ á mu gíʼdoo numuu rí mutajkáan.
Mu rígá i̱mba̱ numuu rí tikhun xa̱bu̱ nundxa̱ʼwa̱míjna̱ rí tseyambáá rí mutakáñii Dios. Mu tikhun nuthi rí Dios ndaʼyoo xúgíʼ ga̱jma̱a̱ ndaʼyoo xkujndu ndrígúlú ma̱ngaa rí ndayúlúʼ. Ikha jngó, lá magiʼdoo numuu rí muʼtákáñii Dios ndiéjunʼ eguáʼníí ráʼ.
Eʼwíinʼ nundxa̱ʼwa̱míjna̱ rí Dios na̱nguá eyoo gagruigú tsajkhun ndrígu̱ún ga̱jma̱a̱ numuu dí raʼkhí di nikúwá runi nákha ginii. Jenny naʼthí: “Mbá xkujndu gakhi̱i̱ rí gúʼdoo ikhúúnʼ, dí naku̱mu̱ʼ dí na̱nguá gúʼdoo numuʼ. Ga̱jma̱a̱ natanga̱a̱ a̱jkiu̱nʼ dí nini̱, ikha jngó naku̱mu̱ʼ dí Dios rakáʼyoo madxawunʼ rí natakáñuu”.
Dí etatsaʼwáminaʼ ikháán rá. Lá nidxa̱ʼnúʼ nitatsaʼwáá edxa̱ʼ mbá miʼtsu á mu nayambáá rí maratajkáan ráʼ. Á mu xúʼko̱, Biblia gambáyaaʼ mariʼña̱a̱ graxe̱ rí xtaʼdáá. Ma̱ndoo matanimbaaʼ rí na̱ʼkha̱ raʼthí náa Biblia ga̱jma̱a̱ numuu rí maratakáñii Dios.a Mambáyáaʼ ma̱ta̱ya̱a̱ xóo gáxti̱ʼña̱a̱ graxe̱ rígi̱:
Lá gajkhun nadxawuun Dios índo̱ naratájkáan ráʼ.
Náa numuu rí tsériʼña̱a̱ tikhu xá.
Xú káʼnii gíʼmaa muʼni mu Dios maʼdxawunlú rá.
Xú káʼnii gándoo gambáyaaʼ ikháán rá.
a Náa Biblia nuxkamaa tikhuu rí xú káʼnii nitakáñii Jeobá nákha wájyúuʼ xa̱bi̱i̱, asndu ma̱ngaa rí niʼni Jesús. I̱ndó náa Escrituras Hebreas najmaʼnuuʼ xóo Antiguo Testamento, ikhí na̱ʼkha̱ itháan rí mbá 150 rí xú káʼnii ikhiin nitakáñii Dios.