“Guxu̱ʼmámíjná náa Dios ga̱jma̱a̱ ikhaa makuʼmaminaʼ náa ikháanʼ” (Santiago 4:8).
Lá naʼdxawuun Dios índo̱ nuʼtákáñii ráʼ.
Lá nitraximínáʼ mbá miʼtsú á mu Dios naʼdxawuun rí naratájkáan ráʼ. Á mu xúʼko̱ etraximínáʼ, raʼkháa i̱ndó ikháán xtaa ratani̱ rígi̱. Mbaʼin xa̱bu̱ nunda̱ʼa̱a̱ Dios rí mambáñún índo̱ naguáʼdáá xkujndu. Mú xkujndu ndrígu̱ún rígá má xúʼko̱. Lá rúʼko̱ nandoo gáʼthúu̱n rí Dios tseʼdxawunlúʼ ráʼ. Raʼkháa xúʼko̱, mú náa Biblia naʼthí rí Dios nagruigú tsajkhun á mu nunda̱ʼa̱a̱ mbá rí nanigu̱u̱ʼ. Guʼyáá rí naʼthí.
DIOS GAJKHUN NAʼDXAWUNLÚʼ
“Ikhaa bi̱ naʼdxawun índo̱ nugríga̱a̱, náa ikháán gaguwáʼ xúgínʼ xa̱bu̱” (Salmo 65:2).
Tikhun xa̱bu̱ nutajkáan ga̱jma̱a̱ numuu dí rúʼko̱ nambáñun mu maʼni̱i̱ a̱jkiu̱ún, maski ajndu nakumu̱ún rí nda̱wa̱a̱ nimbáa bi̱ magruigú. Mú rí maratajkáan nindxu̱u̱ itháan ki xóo mbá thana rí mambáyáaʼ matraʼníí xkujndu. Mú náa Biblia naʼthí rí “Jeobáa xtáa mijngii náa xúgínʼ xa̱bu̱ bi̱ nutakáñii, náa xúgínʼ xa̱bu̱ bi̱ nutháán rí gajkhun [...]; maʼdxawun índo̱ gutakáñii rí mambáñun” (Salmo 145:18, 19).
Ikha jngó, Jeobá naʼdxawúún xa̱bi̱i̱ bi̱ nduyamajkuíí índo̱ nutakáñii. Ikhaa naʼthí: “Ikháanʼ mundxa̱ʼwo̱ʼ ga̱jma̱a̱ mutakháñuʼ, ga̱jma̱a̱ ikhúúnʼ madxawanlaʼ” (Jeremías 29:12).
DIOS NANDOO RÍ MARATAKÁÑII
“Xuniʼñáánʼ rutajkháanʼ” (Romanos 12:12).
Náa Biblia naʼthúlú rí gíʼmaa muʼtákáñii má xúʼko̱ Dios asndu náa má kuwáanʼ. Rúʼko̱ nasngájma rí Jeobá nandoo dí muʼtákáñii (Mateo 26:41; Efesios 6:18).
Ndíjkha jngó rí Dios nandoo dí maratakáñii rá. Atatsaʼwáminaʼ náa xkri̱da rígi̱: Tsáa xa̱bu̱ nikhi̱i̱ tsénigu̱u̱ʼ rí a̱ʼdióo maʼthúu̱n: “Lá ma̱ndoo matambáyuʼ ráʼ papá”. Xúʼko̱, mbáa xa̱bu̱ nikhi̱i̱ ndaʼyoo má rí naku̱mu̱u̱ a̱ʼdióo ga̱jma̱a̱ rí ndayóoʼ, mú índo̱ naʼdxun ajngáa rúʼko̱, nasngájma rí a̱ʼdióo naku̱mu̱u̱ kaʼyoo ga̱jma̱a̱ nambájxu̱u̱ ga̱jma̱a̱. Xúʼko̱ má kayuuʼ, índo̱ nuʼtháán Jeobá, nusngajmá rí nakumulú kuʼyáá ga̱jma̱a̱ rí nandulú muniʼniiʼ itháan (Proverbios 15:8; Santiago 4:8).
DIOS GAJKHUN NAXMIÉJUNʼ KAʼYAAʼ
“Gutha̱a̱n xúgíʼ Dios rí naxmiéjuanla, numuu rí ikhaa naxmiéjunʼ kaʼyala” (1 Pedro 5:7).
Dios nanigu̱u̱ʼ rí muʼtákáñii numuu rí nandoo kaʼyulú ma̱ngaa naxmiéjuunʼ kaʼyulú. Ikhaa nandoo mambáyulú índo̱ nuraʼníí xkujndu.
Nákha mbiʼi rí nixtáa rey David ikhaa nindo̱ʼo̱o̱ Jeobá rí mambáyúu ga̱jma̱a̱ niʼthúu̱n rí xóo nindxa̱ʼwáminaʼ ga̱jma̱a̱ rí nikumu̱u̱ (Salmo 23:1-6). Ndiéjunʼ endxa̱ʼwáminaʼ Dios ga̱jma̱a̱ numuu David rá. Nindoo kaʼyoo wéñuʼ ga̱jma̱a̱ niʼdxawun xúgíʼ rí niʼtákáñuu (Hechos 13:22). Xúʼko̱ má kayuuʼ eʼni ga̱jma̱á ni̱ndxu̱lú numuu rí naxmiéjunʼ kaʼyulú.
“NANDOʼ KAYÓO JEOBÁ NUMUU RÍ NAʼDXAUN AʼWÓOʼ”
Ajngáa rígi̱ nuxkamaa náa salmo. Bi̱ niʼnirámáʼ nikumu̱u̱ rí niʼdxawun Jeobá rí niʼtákáñuu ga̱jma̱a̱ rúʼko̱ nimbáyúu wéñuʼ. Nikumu̱u̱ rí nimbáxu̱u̱ májánʼ ga̱jma̱a̱ Dios ga̱jma̱a̱ támiñuu maraʼnuu xúgíʼ xkujndu náa vida ndrígóo (Salmo 116:1-9).
Nduʼyáá gajkhun rí Dios naʼdxawunlúʼ, ikha jngó xúniʼñáaʼ ruʼtákáñii. Guʼyáá ndiéjunʼ nigíʼnuu mbáa xa̱bu̱ bi̱ xtáa náa norte ndrígóo España bi̱ mbiʼyuu Pedro. A̱ʼdióo bi̱ gíʼdoo 19 tsiguuʼ nikháñuu náa niguma choque carro. Náa mbiʼi mingíjyúuʼ rígi̱, Pedro niʼthúu̱n Dios ndiéjunʼ nikumu̱u̱ ga̱jma̱a̱ nindo̱ʼo̱o̱ má xúʼko̱ rí mambáyúu ma̱ngaa rí maʼni̱i̱ a̱jkiu̱u̱n. Dí nirígá rá. Pedro niʼthí: “Jeobá niriʼña̱a̱ rí nitakáñuu, índo̱ niguwáʼ guni̱i̱ a̱jkiu̱nʼxu bi̱ nimbájxu̱u̱ gajmíi̱n a̱ʼgiu̱ʼ”.
Nguáná rí nuʼtájkáan náa Dios naxtiʼña̱a̱ índo̱ numbayúlúʼ bi̱ nambájxú gajmiúlú.
Maski ajndu rí niʼtájkáan náa Dios táʼni rí magabi̱i̱ a̱ʼdióo, mu nimbáyúu wéñuʼ Pedro ga̱jma̱a̱ bi̱ kúwi̱i̱n náa goʼwóo. A̱ʼgiu̱u̱ bi̱ mbiʼyuu Maria del Carmen narmáʼáan a̱jkiu̱u̱n: “Rí matakáñuu Dios nimbáyúʼ wéñuʼ mu xaxmiéjunʼ. Nda̱yo̱o̱ rí Jeobá nakro̱ʼo̱o̱ kaʼyoʼ ga̱jma̱a̱ índo̱ na̱thu̱u̱n naxtáá tsímáá”.
Náa Biblia ga̱jma̱a̱ experiencia ndrígu̱ún mbaʼin xa̱bu̱ naʼsngúlú rí Dios gajkhun naʼdxawun rí nutakáñii. Mú, ikhaa na̱nguá eriʼña̱a̱ xúgíʼ. Náa numuu rí Dios nariʼña̱a̱ tikhuu ga̱jma̱a̱ i̱ʼwáʼ na̱nguá rá.
a Rí mbiʼyuu Dios nindxu̱u̱ Jeobá (Salmo 83:18).