Ndíjkha jngó Dios tseriʼña̱a̱ xúgíʼ rí nutajkáan xa̱bu̱ rá.

Jeobá bi̱ xtáa mekhuíí, nanigu̱u̱ʼ wéñuʼ rí muʼtákáñii ga̱jma̱a̱ xúgíʼ a̱jkiu̱lúʼ. Mu Dios na̱nguá eriʼña̱a̱ xúgíʼ. Ndíjkha jngó rá. Dí gáʼyóoʼ muʼni rá. Atayáá rí naʼthí náa Biblia.

Mbá guéjmi̱i̱n xa̱bu̱ kúwá náa guʼwá ndxajkuun kuya̱ mbá libro náa nduyáá xú káʼnii gutajkáan.

“Índo̱ gáratajkháan, maxatangaánʼ marata kikáá ajngáa dí niratá má” (Mateo 6:7).

Jeobá tsénigu̱u̱ʼ rí muʼthán kikáá ajngáa ni má dí muraxnuu náa mbá libro. Ikhaa nandoo rí muʼthán dí nagájnuu náa a̱jkiu̱lú. Atatsaʼwáminaʼ rí xtaʼdaa mbáa amigo bi̱ naʼtháanʼ kikháá ajngáa xúgíʼ mbiʼi. ¡Phú ngíná! Mbáa amigo bi̱ gajkhun nambájxa̱a̱ʼ ga̱jma̱a̱, naʼtháanʼ gajkhun ga̱jma̱a̱ naʼtháanʼ xúgíʼ. Índo̱ nuʼtákáñii ga̱jma̱a̱ xúgíʼ a̱jkiu̱lú Anu̱lú bi̱ xtáa mekhuíí, nusngajmáá rí gajkhun nindxu̱u̱ amigo ndrígúluʼ.

Mbáa xa̱bu̱ xtáa rayexiraʼan rijma̱a̱ índo̱ xtáa raʼtsíin ga̱jma̱a̱ billete ndrígóo lotería.

“Índo̱ gajkhun nunda̱ʼa̱a̱, tsekhanun rí nandún, numuu dí raʼkhí xóo eñún munda̱ʼa̱ʼ” (Santiago 4:3).

Xáguaʼthi̱i̱n rí Dios mariʼña̱a̱ rí nutákáñii á mu ninda̱ʼa̱a̱ mbá rí tsénigu̱u̱ʼ. Mbá xkri̱da, atatsaʼwáminaʼ rí mbáa xa̱bu̱ na̱jkha̱ gáʼtsíin ga̱jma̱a̱ mbújkha̱a̱ ma̱ngaa na̱ndo̱ʼo̱o̱ Dios rí maxnúu suerte. Lá maʼdxawun Dios rí niʼtákáñuu xa̱bu̱ buʼko̱ rá. Na̱nguá, numuu rí Dios tsíyoo gáʼñun xa̱bu̱ bi̱ nanigu̱u̱nʼ maguaʼdáá wéñuʼ ni má bi̱ nuriyaʼ suerte (Isaías 65:11; Lucas 12:15). Xúguaʼthi̱i̱n rí Jeobá mariʼña̱a̱ rígi̱. Mú mariʼña̱a̱ rí nuʼtákáñii, gíʼmaa mbuʼyáá á mu náa Biblia naʼthí rí májánʼ nindxu̱u̱.

Mbáa xa̱bu̱ bi̱ kayá edxu̱u̱ náa mbá religión xtáa raʼtájkáan gajmíi̱n soldado.

“Á mu mbáa tsíyoo gáʼnimbo̱o̱ xtángoo, asndu rí naʼtájkáan ra̱májánʼ nindxu̱u̱” (Proverbios 28:9).

Nákha wájyúuʼ, Dios na̱nguá egíʼ edxu̱u̱ madxawun rí nutajkáan xa̱bu̱ bi̱ na̱nguá enimbu̱u̱n xtángoo ndrígóo, xúʼko̱ má endxa̱ʼwáminaʼ rí mbiʼi xúgi̱ (Isaías 1:15, 16; Malaquías 3:6). Á mu nandulúʼ rí Dios maʼdxawunlúʼ gíʼmáanʼ muʼni tsiakimíjna̱ muʼnimbulúʼ xtángoo ndrígóo. Á mu niʼni mbá dí ra̱májánʼ nákha ginii rá. Lá nandoo gáʼthúu̱n rúʼko̱ rí Jeobá nánguá gadxawunluʼ ráʼ. Na̱nguá, ikhaa maʼni mba̱a̱ a̱jkiu̱u̱n kaʼyulú á mu nusngájma rí gajkhun natanga̱a̱ a̱jkiu̱lúʼ ga̱jma̱a̱ á mu nuʼnimíjna̱ muʼni rí nanigu̱u̱ʼ (Hechos 3:19).

“Numuu rí bi̱ nakuʼmaminaʼ náa Dios, gíʼmaa maʼnimbo̱o̱ rí ikhaa xtáa ga̱jma̱a̱ rí ikhaa naʼni tsajkurámiinʼ bi̱ nduyáaʼ má xúʼko̱” (Hebreos 11:6).

Raʼkháa i̱ndó nuʼtájkáan mu maʼni̱i̱ a̱jkiu̱lúʼ índo̱ kuwáanʼ ngíná o índo̱ naxmiéjunlú. Nuʼtákáñii Dios mu musngajmáá rí nakumulú kuʼyáá, rí nuʼnimbulúʼ rí naʼthí ga̱jma̱a̱ rí nandulúʼ mbuʼyamajkuíí. Discípulo Santiago naʼthí rí á mu tsénda̱ʼa̱ ga̱jma̱a̱ fe, xándoo maraʼti̱i̱n rí Jeobá maxnáa ikhaa (Santiago 1:6, 7). Mu maraʼdáá fe náa Dios, gíʼmáanʼ muríyaʼ mbiʼi ga̱jma̱a̱ gíʼmáanʼ muʼnitsiekimijna̱ muraxnuu Biblia mu muniʼniiʼ. Rúʼko̱ gambáyuluʼ mbuʼyáá ndiéjunʼ rí nanigu̱u̱ʼ ga̱jma̱a̱ índo̱ guʼtajkáan maʼdxawunlúʼ.