Xú káʼnii gándoo gambáyaaʼ rí maratajkáan rá.

Pamela nigiʼdoo nandii cancer ga̱jma̱a̱ ndiyáaʼ mbáa médico mu maʼni thanuu. Ga̱jma̱a̱ niʼtákáñuu Dios rí maxnúu tsiakii mu maʼngo̱o̱ maʼniminaʼ ga̱jma̱a̱ nandii rí gíʼdoo. Lá nimbáyúu rí niʼtájkáan xáʼ.

Ikhaa naʼthí: “Mbaʼa nuthu nimíñuuʼ, índo̱ nixtáá ranitanaminaʼ ga̱jma̱a̱ nandii rígi̱. Mú índo̱ nitakáñuu Jeobá, niku̱mu̱ʼ rí asndu xóo niʼni̱i̱ a̱jkiu̱nʼ ga̱jma̱a̱ nindoo nindxa̱ʼwa̱mínáʼ májánʼ. Mú, xóo má naʼni gínún nandii rígi̱, rí nani tsajkhun náa Dios nimbáyuʼ wéñuʼ rí xándxaʼwamínáʼ ga̱jma̱a̱ numuu rúʼko̱. Índo̱ xa̱bu̱ nurajxuʼ xú káʼnii xtáá, ikhú na̱thu̱u̱n: ‹Na̱nguá má xtáá májánʼ, mú nadxuʼ›”.

Gajkhun má rí xáʼyóoʼ magíʼnulú mbá dí ra̱májánʼ mu xúʼko̱ muʼtákáñii Dios. Xúgiáanʼ naguáʼdáá xkujndu ga̱jma̱a̱ nda̱yúlúʼ rí mbáa mambáyulúʼ. Lá nayambáá rí maratha̱a̱n Dios ráʼ.

Náa Biblia naʼthí: “Atadaʼ náa Jeobá xkujndu ndrígáʼ, ga̱jma̱a̱ ikhaa má gambáyaʼ. Ikhaa xaniñuʼ rí majpátriguíi xa̱bu̱ bi̱ xtáa jmbu” (Salmo 55:22). ¡Raʼkháa tháán exnúlúʼ tsiakii ajngáa rígi̱! Mú, xú káʼnii gándoo gambáyulú rí muʼtákáñii Dios rá. Índo̱ guʼtákáñii Dios xóo má rí ikhaa nanigu̱u̱ʼ, ikhaa maxnúlúʼ rí gáʼyulúʼ mu maʼngulú muraʼníí xkujndu rí kuaʼdáá (Atayáá “Rí maratajkáan nayambáá”).

Rí maratajkáan nayambáá

Maraxtaa tsímáá

“Gunda̱ʼa̱a̱ xúgíʼ rí eyála, ikhú tsímáá rí na̱ʼkha̱ náa Dios rí itháan gíʼdoo tsiakii, mañewu̱u̱n a̱jkia̱la ga̱jma̱a̱ rí nundxa̱ʼwa̱míjna̱ ga̱jma̱a̱ numuu Cristo Jesús” (Filipenses 4:6, 7). Á mu nuʼtháán Dios rí naʼni maxmiéjunlú, ikhaa gambáyuluʼ rí makuwáanʼ tsímáá ga̱jma̱a̱ mbuʼyáá májánʼ ndiéjunʼ gúʼni maski ajndu rígá rí naʼni maxmiéjunlú.

Ku̱ma̱

“Ikha jngó, á mu rí mbáa dí ikháanʼla ndayóoʼ majmañuu xóó itháan, gando̱ʼo̱o̱ má xúʼko̱ Dios, numuu rí ikhaa naxnún xúgínʼ rí nda̱ñúnʼ ga̱jma̱a̱ xáʼthí kikháá rí nixná” (Santiago 1:5). Índo̱ naxmiéjunlú wéñuʼ, rígi̱ naʼni dí nguáná na̱nguá ejmaa gúraʼwíí májánʼ dí muʼni. Á mu nunda̱ʼa̱a̱ ku̱ma̱ Dios, ikhaa mínaʼ gáʼni rí maʼni marmáʼáan a̱jkiu̱lú consejo rí mambáyulú rí na̱ʼkha̱ náa ajngóo, rí nindxu̱u̱ Biblia.

Tsiakii ga̱jma̱a̱ rí maʼni̱i̱ a̱jkia̱nʼ

“Gúʼdoo tsiakii mu mani xúgíʼ, núma̱a̱ má bi̱ naxnúʼ tsiakii” (Filipenses 4:13). Numuu rí Jeobá nindxu̱u̱ mbáa Dios bi̱ gíʼdoo xúgíʼ tsiakii, ikhaa gáxnulú tsiakii rí nda̱yúlúʼ mu maʼngulú muraʼníí gamiéjunʼ rí gáʼkha̱ náa inulu (Isaías 40:29). Náa Biblia naʼthí rí Jeobá nindxu̱u̱ mbáa “Dios bi̱ naʼni̱i̱ a̱jkiu̱lú. Ikhaa naʼni̱i̱ a̱jkiu̱lú náa xúgíʼ gamiéjunʼ rí kuaʼdáá” (2 Corintios 1:3, 4).

RÍ MARATAJKÁAN MAMBÁYAʼ MANGÁÁN

Gajkhun má rí Jeobá tsétsudáanʼlú rí muʼtákáñii, mú naʼtulúʼ ga̱jma̱a̱ gamajkhu rí muʼni (Jeremías 29:11, 12). Á mu niratákáñii má Dios nákha ginii ga̱jma̱a̱ niku̱ma̱a̱ʼ rí na̱nguá niriʼñaʼ. Araʼdáá tsiakii ga̱jma̱a̱ xakanájkáaʼ. Xabuanii bi̱ naxmiéjunʼ kuñún e̱jñún raʼkháa má núkhu exnún rí nda̱ñúnʼ náa mbiʼi rí ikhiin nandún. Mu mbáa xa̱bu̱ nikhi̱i̱ ndaʼyoo nguáná gaʼni. Mú rí gajkhun kúwá xabuanii bi̱ nandún mumbañún má xúʼko̱ e̱jñún.

Jeobá Dios, Anu̱lú bi̱ nandoo kaʼñún xúgínʼ xa̱bu̱, nandoo mambáyaʼ ikháán. Á mu natagíiʼ natanimbánii tikhu ikha rí na̱ʼkha̱ náa Biblia rí niguámbulú ndiʼyáá, ga̱ku̱ma̱a̱ rí Dios mariʼña̱a̱ (Salmo 34:15; Mateo 7:7-11).