Lá natayáá má ráʼ.

Xú káʼnii eʼyáá dí israelitas ndiyáá dí gíʼdoo numuu ajmúú rá.

ISRAELITAS ra̱ʼkhá tháán ninigu̱u̱nʼ ajmúú, nindxu̱u̱ mbá dí ikhiin niguʼwún nuni̱. Náa Biblia naʼthí mbaʼa nuthu ga̱jma̱a̱ numún xa̱bu̱ bi̱ nidi̱i̱ mbá ajua̱nʼ o bi̱ nini̱ ajmúú. Ga̱jma̱a̱ náa Biblia na̱ʼkha̱ itháan dí 10% ajmúú. Mbá xkri̱da, libro ndrígóo Salmos, El Cantar de los Cantares ga̱jma̱a̱ Lamentaciones nindxu̱u̱ ajmúú. Náa libro Music in Biblical Life (La música en la vida bíblica) naʼthí dí Biblia “nasngájma kaʼwu dí israelitas nuni̱ ajmúú náa mbaʼa ñajunʼ rí nuni̱ náa mbiʼi dí nikúwá”.

Ajmúú dí nuni̱ xúgíʼ mbiʼi. Israelitas nijmún ajmúú mu mu̱thi̱ xóo ekumu̱ún (Is. 30:29). Gu̱ʼu̱ nuni̱ ajmúú ga̱jma̱a̱ gagi, nutsia ga̱jma̱a̱ nudi̱i̱ pandereta índo̱ natri̱gi̱i̱n bi̱ mutañajunʼ, índo̱ nuni̱ ndxa̱a̱ ga̱jma̱a̱ índo̱ naʼngu̱u̱n náa nuxmijná (Juec. 11:34; 1 Sam. 18:​6, 7; 1 Rey. 1:​39, 40). Mu israelitas musngajmá dí kúwá ngíná índo̱ mbáa nakháñuu, nuni̱ ajmúú ngíná (2 Crón. 35:25). Xó má eʼthí náa mbá i̱yi̱i̱ʼ, nakujmaa kaʼwu dí “israelitas ndiyáá dí ra̱ʼkhá tháán gíʼdoo numuu ajmúú” (Cyclopedia, de McClintock y Strong).

Ajmúú dí nuni̱ náa xtáa rey. Reyes bi̱ nikúwá náa Israel ra̱ʼkhá tháán ninigu̱u̱nʼ ajmúú. Rey Saúl nindo̱ʼo̱o̱ David dí maʼdu̱u̱ arpa náa dí ikhaa xtáa (1 Sam. 16:​18, 23). Índo̱ David ni̱jkha̱nú ninindxu̱u̱ rey, niʼni mbaʼa ajua̱nʼ dí gíʼdoo cuérdóo, niguwíi ajmúú mitsaanʼ, niríya̱ʼ mbá awan dí muni̱ ajmúú ga̱jma̱a̱ nda̱wa̱á ajmúú rígi̱ nini̱ náa guʼwá rí nduyamajkuíí Dios (2 Crón. 7:6; Amós 6:5). Xúʼko̱ má rey Salomón ma̱ngaa nigiʼdiin xa̱bekha ga̱jma̱a̱ gu̱ʼu̱ bi̱ nini̱ ajmúú náa guʼwá rí ikhaa nixtáa raʼtáñajunʼ (Ecl. 2:8).

Ajmúú dí nuni̱ mu mbuyamajkuíí Jeobá. Nikúwíin mbá 4,000 bi̱ najmañún nuni̱ ajmúú náa guʼwá rí nduyamajkuíí Dios dí nirígá náa Jerusalén, ikhiin nudi̱i̱ címbalo, arpa ga̱jma̱a̱ trompeta (1 Crón. 23:5; 2 Crón. 5:12). Raʼkháa i̱ndó ikhiin nijmún ajmúú mu mbuyamajkuíí Jeobá. Mbaʼin israelitas nuni̱ ajmúú índo̱ kúwá ragún náa Jerusalén mu muniriya̱a̱ʼ ndxa̱a̱ ikhí (Sal. 120-134). Náa tikhuu i̱yi̱i̱ʼ dí nigumarámáʼ náa ajngáa judío, naʼthí dí israelitas nini̱ ajmúú Hallela índo̱ niniri̱ya̱a̱ʼ ndxa̱a̱ Pascua.

Xúʼko̱ má dí mbiʼi xúgi̱ ma̱ngaa, ikháanʼ bi̱ kuwáánʼ náa xuajñuu Jeobá nduʼyáá dí gíʼdoo wéñuuʼ numuu ajmúú (Sant. 5:13). Nu̱ʼni̱ ajmúú mu mu̱ʼni̱ mba̱a̱ Jeobá (Efes. 5:19). Ajmúú naʼni dí makuwáánʼ mbá kambájxulú gajmiúlú a̱ngiu̱lú ga̱jma̱a̱ naxnúlú tsiaki̱i̱ mu maʼngulú muraʼníí mbaʼa ga̱ʼkhu̱ (Hech. 16:25; Col. 3:16). Ajmúú nambáyulú musngajmá dí gajkhun kuaʼdáá fe náa Jeobá ga̱jma̱a̱ musngajmáá rí nandulúʼ kuʼyáá.