Gumbáñún bi̱ nuʼsngúún mu muraʼwi̱i̱ mu̱ni̱ ñajuunʼ Jeobá

1, 2. a) Ndíjkha dí tikhuun bi̱ nuniga̱jma̱a̱ Biblia naʼni a̱jma̱ a̱jkiu̱ún mani̱ndxu̱ún testigo de Jeobá rá. b) Ndiéjunʼ gúʼyáá náa artículo rígi̱ rá.

LÁ NIRÍGÁ mbá dí ikháán niʼni a̱jma̱ a̱jkia̱a̱nʼ índo̱ nindaaʼ mani̱ndxa̱a̱ʼ testigo de Jeobá ráʼ. Mbáa nimíñaaʼ dí bi̱ natiajunʼ gajmiáanʼ, bi̱ nambájxáaʼ gajmiáanʼ o bi̱ kúwá náa guʼwáaʼ makiʼníin kuyaaʼ. O mbáa nikumaaʼ dí xáʼnga̱a̱ʼ matani xúgíʼ dí Jeobá e̱nda̱ʼa̱ matani̱. Á mu mangán nikumaaʼ xúʼko̱ kaʼnii, mbáa makrua̱ʼa̱a̱ʼ xtañún itháán májánʼ bi̱ kúwá runigajma̱a̱ Biblia ga̱jma̱a̱ xóó tségími̱jna̱ mani̱ndxu̱ún testigo de Jeobá.

² Jesús ndiʼyoo dí rígi̱ ma̱ndoo marikhoo mbáa xa̱bu̱ maʼni ñajuunʼ Jeobá (Mat. 13:​20-22). Mú ikhaa tániñuuʼ rambáñún xa̱bi̱i̱ bi̱ niʼni a̱jma̱ a̱jkiu̱ún magún kidxuuʼ ikhaa. Á mu nduʼyaridáá Jesús, ma̱ndoo mumbáñún bi̱ nuʼsngúún mu mbuyáá ndíjkha dí naʼniún gakhi̱i̱ muraʼwíí mu̱ni̱ ñajuunʼ Jeobá, mu maʼndún kuyáá itháan, mu mugíʼ muni̱ ginii ñajuunʼ Jeobá ga̱jma̱a̱ mu mbuyáá ndiéjunʼ gúni índo̱ eʼwíinʼ gákiʼníin kuñún. Guʼyáá xú káʼnii gúʼyaridáá Jesús ga̱jma̱a̱ xú káʼnii gájmulúʼ libro ¡Araxtaa gagi kámuu mbiʼi! mu mumbáñún bi̱ nuʼsngúún mu mani̱ndxu̱ún testigo de Jeobá.

ATAMBÁYÍÍ MBAʼYOO NDÍJKHA DÍ NAʼNIUU GAKHI̱I̱ MARAʼWÍÍ MAʼNI ÑAJUUNʼ JEOBÁ

3. Ndíjkha rí niʼniuu gakhi̱i̱ Nicodemo mani̱ndxu̱u̱ xa̱bi̱i̱ Jesús rá.

³ Nicodemo ninindxu̱u̱ mbáa bi̱ gíʼdoo numuu náa xa̱bu̱ judíos. Mú ikhaa nirígá mbá dí nirikhoo mu mani̱ndxu̱u̱ xa̱bi̱i̱ Jesús. Kááʼ majun igu̱nʼ nda̱wa̱á dí Jesús nigíʼdu̱u̱ niʼtáráʼa, Nicodemo ndiʼyoo dí Jesús ninindxu̱u̱ Mesías (Juan 3:​1, 2). Maski ajndu xúʼko̱ ikhaa niraʼwíi maʼtáminaʼ nguʼwáá ga̱jma̱a̱ Jesús “numuu rí namíñuu eni̱ judíos” (Juan 7:13; 12:42). Mbáa ikhaa nindxa̱ʼwáminaʼ náa xúgíʼ dí mandátígo̱o̱ á mu nanindxu̱u̱ xa̱bi̱i̱ Jesús.a

4. Ndiéjunʼ niʼni Jesús mu mambáyúu Nicodemo makro̱ʼo̱o̱ ndiéjunʼ gíʼthu̱u̱n Dios dí maʼni rá.

⁴ Nicodemo naninuʼ má májánʼ Xtángoo ndrígóo Moisés, mú ndiyóoʼ dí maxtáa mbáa bi̱ mambáyúu mu makro̱ʼo̱o̱ ndiéjunʼ dí gíʼthu̱u̱n Jeobá rí ikhaa maʼni. Ndiéjunʼ niʼni Jesús mu mambáyúu xá. Nixtáa xawii mu maʼtáminaʼ ga̱jma̱a̱ maski ajndu mbruʼun má, ma̱ngaa niʼthúu̱n mbájmbu ndiéjunʼ dí ndayóoʼ maʼni mu mani̱ndxu̱u̱ xa̱bi̱i̱: Rí matanga̱a̱ a̱jkiu̱u̱n, majngúun iyááʼ ga̱jma̱a̱ dí masngájma dí gíʼdoo fe náa A̱ʼdióo Dios (Juan 3:​5, 14-21).

5. Ndiéjunʼ gúʼni mu mumbáyíí bi̱ nuʼsngáa mu mbaʼyoo ndiéjunʼ dí erikhoo maʼni ñajuunʼ Jeobá rá.

⁵ Á mu mbáa bi̱ naʼnigajma̱a̱ ndaʼyoo má dí na̱ʼkha̱ náa Biblia, mbáa i̱ndó má ndaʼyóoʼ rí mixtambáyíí mu mbaʼyoo ndíjkha dí naʼniuu gakhi̱i̱ maraʼwíí maʼni ñajuunʼ Jeobá. Mbáa nañajunʼ wéñuuʼ o bi̱ kúwá náa goʼwóo na̱nguá eñún dí mani̱ndxu̱u̱ Testigo. Xú káʼnii gándoo gátayaridáá Jesús ikháán rá. Atríyáʼ wájíʼ mbiʼi mu maratamínaʼ ga̱jma̱a̱ʼ, ma̱ndoo maratha̱a̱n dí maʼga gákuiʼtsu náa guʼwáaʼ, muwa̱a̱nla café, mu xúʼko̱ ma̱ndoo mutamijnálá májánʼ, mbáa asndu maʼtháanʼ dí xkujndu xtáa raraʼnuu. Rígi̱ gámbáyáaʼ ikháán mu matambáyíí mbaʼyoo ndiéjunʼ eyóoʼ mariʼkhuu mu masngájmaa dí nandoo kaʼyoo Jeobá, raʼkháa rí mariʼkuminaʼ mu ikháán maraxtaa gagi.

6. Xú káʼnii gátambáyíí bi̱ narasngáa mu xámíñuu magíʼ maʼnimbánuu dí xtáa rajmañuu rá. (1 Corintios 16:13.)

⁶ Mu bi̱ narasngáá magíʼ maʼnimbánuu dí xtáa ramajñuu, ndayóoʼ maʼni kañiiʼ a̱jkiu̱u̱n dí Jeobá má gámbáyúu mu maʼnimbánuu ikha ndrígóo (atraxnuu 1 Corintios 16:13). Xú káʼnii gándoo gátambáyíí xá. Atatsaʼwáminaʼ índo̱ ikháán nidxu̱ʼ escuela. Xú káʼnii nindxu̱u̱ maestro bi̱ ninigua̱a̱ʼ xóo niʼsngáaʼ rá. Mbáa ikhaa naʼngo̱o̱ a̱jkiu̱u̱n ga̱jma̱a̱ naʼtháanʼ dí ikháán maʼngaaʼ matanimbáníí xúgíʼ dí nadxuʼ rajmañaaʼ. Atani̱ tsiakimínáʼ mani̱ndxa̱a̱ʼ xóo maestro buʼko̱. Raʼkháa i̱ndó matrasngáá ndiéjunʼ endaʼaa Dios rí maʼni, atambáyíí mbaʼyoo dí maʼngo̱o̱ maʼnimbánuu dí xtáa rajmañuu numuu dí Jeobá má gámbáyúu. Ndiéjunʼ imbo̱ʼ ma̱ndoo matani mu matambáyíí bi̱ narasngáa rá.

ATAMBÁYÍÍ MU MAʼNDOO KAʼYOO ITHÁAN JEOBÁ

7. Ndiéjunʼ niʼni Jesús mu mambáñún xa̱bu̱ mu maʼndún kuʼyáá itháan Jeobá rá.

⁷ Jesús ndiʼyoo rí á mu xa̱bi̱i̱ nandún kuyáá Dios xáʼniún gakhi̱i̱ munimbáníí rí nagún rajmañún. Ikhaa jngóo mbaʼa nuthu niʼsngúún dí maʼni rí maʼndún kuyáá Anu̱ún bi̱ xtáa Mekhuíí. Jesús niʼni mbríguíi Jeobá ga̱jma̱a̱ mbáa xa̱bu̱ nikhi̱i̱ bi̱ naxnúu rí májánʼ a̱ʼdióo (Mat. 7:​9-11). Tikhuun xa̱bu̱ bi̱ nidxawíín dí niʼthí Jesús mbáa na̱nguá niguáʼdaa mbáa anu̱ún bi̱ nindoo kaʼñún ikha jngóo nindúún dí maxtáa mbáa bi̱ masngájmún dí nandoo kaʼñún. Xú káʼnii ku̱ma̱a̱ʼ ikháán dí nikumu̱ún índo̱ nidxawíín ga̱jma̱a̱ numuu xa̱bu̱ nikhi̱i̱ bi̱ nigruiguíi májánʼ a̱ʼdióo índo̱ nitanga̱a̱ a̱jkiu̱u̱n ga̱jma̱a̱ numuu xúgíʼ dí raʼkhí dí niʼni xá. Ga̱jma̱a̱ xkri̱da rígi̱ ikhiin nikru̱ʼu̱u̱n dí Jeobá ra̱ʼkhá tháán eyoo kaʼñún xa̱bu̱ numbaaʼ (Luc. 15:​20-24).

8. Xú káʼnii gándoo gátambáyíí bi̱ narasngáa mu maʼndoo kaʼyoo itháan Jeobá rá.

⁸ Ikháán mangáán ma̱ndoo matambáyíí bi̱ narasngáa mu maʼndoo kaʼyoo itháan Jeobá, á mu mámbá índo̱ narasngáá natasngájmáá dí Jeobá mbaʼa enii xóo esngájma dí májánʼ a̱jkiu̱u̱n, arasngáá xú káʼnii embríguíi dí xtáa rajmañuu ga̱jma̱a̱ dí Jeobá nandoo kaʼyoo. Índo̱ gúniga̱jma̱a̱ xú káʼnii Dios nixnájxi̱i̱ A̱ʼdióo ga̱jma̱a̱ numulú, atambáyíí mbaʼyoo dí Jeobá niʼni rígi̱ numuu rí nandoo kaʼyoo ikhaa (Rom. 5:8; 1 Juan 4:10). Índo̱ mbáa bi̱ xtáa rajmañuu na̱jkha̱nú nakro̱ʼo̱o̱ nguáthá mba̱a̱ eyoo kaʼyoo Jeobá, rígi̱ gámbáyúu mu ikhaa maʼndoo kaʼyoo itháan (Gál. 2:20).

9. Ndiéjunʼ nimbáyúu Michael mu mariʼkhuu xóo nixtáa rá.

⁹ Gundxaʼwamíjna̱ dí nigíʼnuu Michael bi̱ xtáa náa Indonesia. Ikhaa asndu nákha chíʼgíiʼ naninuuʼ má dí na̱ʼkha̱ náa Biblia mú na̱nguá nijngúun iyááʼ. Índo̱ ikhaa nigiʼdoo 18 tsiguuʼ, ni̱jkha̱ gáñajunʼ náa i̱mba̱ xuajen mu majngruigoo kayóo camión. Tsiguʼ nda̱wa̱á nitanga̱a̱ náa Indonesia, ninigúnʼ ga̱jma̱a̱ nigiʼdaa mbáa wáxióo mú tániñuuʼ ñajunʼ ndrígóo dí gíʼdoo náa imbooʼ xuajen. Mbayuuʼ tsiguʼ nda̱wa̱á, a̱ʼgiu̱u̱ ga̱jma̱a̱ wáxióo niguáʼdi̱i̱ ninigajmaa ma̱ngaa niriʼkhu̱u̱ xóo nikúwá. Índo̱ ru̱dúu̱ Michael nikháñúu, ikhaa nitanga̱a̱ náa xuajñuu mu mañewu̱u̱n anu̱u̱ ga̱jma̱a̱ nigíʼdu̱u̱ niʼnigajmaa Biblia. Índo̱ ni̱jkha̱nú náa kíxnuu 27 ndrígóo libro Araxtaa gagi, rí nijmañuu náa “Gajmañaa’ itháan” ni̱jkha̱nú asndu náa a̱jkiu̱u̱n. Nigíʼdu̱u̱ nimbi̱ya̱ʼ índo̱ nindxaʼwáminaʼ xóo nikumu̱u̱ Jeobá índo̱ ndiʼyoo rí A̱ʼdióo nimínuuʼ. Ni̱jkha̱nú ndiʼyoo dí Jeobá ga̱jma̱a̱ Jesús ra̱ʼkhá tháán eñún kuyáá ga̱jma̱a̱ ikhaa niriʼkhuu xóo xtáa, nijngúun iyááʼ mu maxníin núma̱aʼ.

ATAMBÁYÍÍ MU MAGÍʼ MA’NI GINII ÑAJUUNʼ JEOBÁ

10. Ndiéjunʼ ni’ni Jesús mu mambáñún xa̱bi̱i̱ muriʼkhu̱u̱ xóo kúwá mu muni̱ itháan ñajuunʼ Jeobá rá. (Lucas 5:​5-11; atayáá ma̱ngaa xtiʼkhuu.)

¹⁰ Timbíin xa̱bi̱i̱ Jesús niguánu ndiyá dí ikhaa nindxu̱u̱ Mesías bi̱ nijuiʼthá ma̱ʼkha̱, mú ndiyóoʼ mixtambáñún mu makru̱ʼu̱u̱n dí gíʼdoo wéñuuʼ numuu mutaraʼa ga̱jma̱a̱ gagi. Pedro ga̱jma̱a̱ Andrés mba̱yu̱u̱ʼ má eʼni dí nindxu̱ún xa̱bi̱i̱ Jesús, índo̱ ikhaa niʼthúún dí muniñaaʼ xúgíʼ dí guáʼdáá ga̱jma̱a̱ magún kidxuuʼ (Mat. 4:​18, 19). Ikhiin niñajunʼ mbóó gajmiún Santiago ga̱jma̱a̱ Juan nurawíin e̱gi̱ʼ náa nudaaʼ májánʼ (Mar. 1:​16-20). Índo̱ Pedro ga̱jma̱a̱ Andrés “niniña̱a̱ʼ amaʼ”, mbáa niriyaʼ awan mu bi̱ kúwá náa guʼwún xáʼñúunʼ nimbá índo̱ ikhiin kúwá ragún kidxuuʼ Jesús. Ndiéjunʼ nimbáñún mu mbuyáá dí itháan gíʼdoo numuu dí mutaraʼa ki xóo rí muguaʼdáá itháan mbújkha̱a̱ xá. Jesús niʼni mbá milagro náa nisngájmún dí Jeobá maxnún xúgíʼ rí gáʼñúunʼ (atraxnuu Lucas 5:​5-11).

11. Ndiéjunʼ gúʼni mu ma’ni gújkhúʼ fe ndrígóo bi̱ nuʼsngáa rá.

¹¹ Ikháanʼlú na̱nguá eʼni milagro xóo niʼni Jesús, mú ma̱ndoo muʼthán bi̱ nuʼsngáá dí Jeobá mambáyúu á mu nagíʼ naʼni ginii ñajuunʼikhaa. Mbáa ikháán nákha ginii natiajunʼ wéñuuʼ o natiewu̱u̱n xujkiáaʼ ga̱jma̱a̱ rígi̱ naʼni dí xáʼngo̱o̱ midxuʼ reunión, ikha jngóo ndiyóoʼ matriʼkhu̱u̱ hora dí nadxuʼ gátiejunʼ mu xúʼko̱ ma̱ndoo midxuʼ reunión. Aratháán bi̱ narasngáá dí índo̱ nitani̱ rígi̱ nitayáá xóo Jeobá nimbáyaaʼ ga̱jma̱a̱ fe ndrígáaʼ ni̱ʼni̱ itháan gújkhúʼ.

12. a) Ndíjkha rí májánʼ gáʼni dí muʼthúún eʼwíinʼ a̱ngiu̱lú mu magún ga̱jma̱a̱ nindxu̱lú índo̱ gúʼgua gúʼsngáá mbáa rá. b) Ndiéjunʼ ma̱ngaa ma̱ndoo matani̱ mu matambáyíí bi̱ narasngáa maʼni ginii ñajuunʼ Jeobá rá. Atagíʼ mbá xkri̱da.

¹² I̱mba̱ dí ma̱ndoo mambáyúu bi̱ narasngáa nindxu̱u̱ dí mbaʼyoo ndiéjunʼ nimbáñún eʼwíinʼ a̱ngiu̱lú mu mugíʼ muni̱ ginii ñajuunʼ Jeobá, ma̱ndoo midxu̱ʼ gajmiáanʼ tikhuun a̱ngiu̱lú bi̱ mixtiʼkhu̱u̱ dí niraʼníí. Arathún muthi xóo niguánú nijmañún rí gajkhun ga̱jma̱a̱ ndiéjunʼ ndiyóoʼ muriʼkui̱i̱ mu muni̱ ñajuunʼ Jeobá ma̱ngaa ma̱ndoo mbu̱ya̱a̱la videos rí na̱ʼkha̱ náa “Gajmañaaʼ itháan” o náa “Atayáá itháan” dí rígá náa libro Araxtaa gagi. Índo̱ gúniga̱jma̱a̱ kíxnuu 37 ma̱ndoo maratha̱a̱n tikhu ikha dí na̱ʼkha̱ náa video Jeobá má gáxnulú rí ndayúlú.

ATAMBÁYÍÍ MU MBAʼYOO DÍ GÁʼNII ÍNDO̱ GÁKIʼNÍIN KUYÁÁ

13. Ndiéjunʼ ni’ni Jesús mu ma’ni rathiin xa̱bi̱i̱ mu maʼngu̱u̱n índo̱ eʼwíinʼ gákíʼníin kuñún xá.

¹³ Mbaʼa nuthu Jesús niʼthúún xa̱bi̱i̱ rí makuwá xa̱bu̱ bi̱ makiʼníin kuñún asndu bi̱ kúwá náa guʼwún (Mat. 5:11; 10:​22, 36). Nákhá inu makhañúu niʼthúún dí makuwá xa̱bu̱ bi̱ maʼndún muradíin (Mat. 24:9; Juan 15:20; 16:2). Niʼthúún ma̱ngaa dí gíʼmaa muñewa̱a̱n dí gúni̱ ga̱jma̱a̱ dí gúthi ma̱ngaa dí xúgiʼdu̱u̱n gajmiún bi̱ nakiʼníin kuñún mu xúʼko̱ xúniña̱a̱n rutaraʼa.

14. Ndiéjunʼ gúʼnilu mu mumbáyíí bi̱ nuʼsngáa mu maʼnirataminaʼ maraʼnuu xkujndu rá. (2 Timoteo 3:12.)

¹⁴ Ikháanʼ mangáanʼlu ma̱ndoo muʼni xóo niʼni Jesús, ma̱ndoo muʼnirataa bi̱ nuʼsngáá mu mbaʼyoo ndiéjunʼ gáʼthúún bi̱ nañajunʼ gajmíi̱n, bi̱ nambájxu̱u̱ gajmíi̱n o bi̱ kaʼñún numuu rí naʼniminaʼ maxtáa xóo eʼthí náa Biblia (atraxnuu 2 Timoteo 3:12). Mbáa tikhuun bi̱ nañajunʼ gajmíi̱n mutsijmaa numuu rí niriʼkhu̱u̱ xóo xtáa. O mbáa bi̱ kaʼñún mutawéñííʼ, numuu rí naʼnimbo̱o̱ dí naʼthí náa Biblia. Ikha jngóo, itháán májánʼ dí wapháá gáratamíjná ga̱jma̱a̱ʼ bi̱ narasngáá mu xúʼko̱ índo̱ ikhaa gáraʼnuu xkujndu rígi̱ maxtáa xawii mu mbaʼyoo ndiéjunʼ gáʼthí ga̱jma̱a̱ ndiéjunʼ gáʼni̱.

15. Á mu a̱ngui̱i̱n bi̱ nuʼsngáá nakiʼníin kuyáá numuu rí naʼnigajma̱a̱, ndiéjunʼ gúʼni mu mumbáyíí xá.

¹⁵ Á mu a̱ngui̱i̱n bi̱ narasngáá nakiʼníin kuyáá, atambáyíí mu mandxaʼwáminaʼ ndíjkha dí nakiʼníin rí naʼnigajma̱a̱ gajmíi̱n Testigos. Lá nakumu̱ún dí nuninduwaaʼ xáʼ. O nakumu̱ún dí nindxu̱ún ra̱míjíinʼ xa̱bu̱ xáʼ. Jesús ma̱ngaa nigíʼnuu xúʼko̱ kaʼnii. A̱ngui̱i̱n nikumu̱ún dí niguajta skágui̱i̱nʼ (Mar. 3:21; Juan 7:5). Gíʼdoo numuu dí bi̱ narasngáá majmañuu maʼngo̱o̱ a̱jkiu̱u̱n ga̱jma̱a̱ dí majmuu ajngáa guabaʼ índo̱ gáʼtamijná gajmíi̱n bi̱ kúwá náa goʼwóo.

16. Ndiéjunʼ gúʼni mu mumbáyíí bi̱ nuʼsngáa mu xúʼko̱ maʼthí ga̱jma̱a̱ gamajkhu rí xtáa rajmañuu rá.

¹⁶ Ndiéjunʼ gáʼni bi̱ narasngáá á mu mbáa bi̱ kaʼyoo nandoo mbaʼyoo dí xtáa rajmañuu náa Biblia xá. Májánʼ gáʼni dí xáʼthúu̱n mbá xúgíʼ dí xtáa rajmañuu mu xúʼko̱ mikro̱ʼo̱o̱ ga̱jma̱a̱ maʼndoo maʼdxawuun mbu̱júu̱ nda̱wa̱á (Col. 4:6). Ma̱ngaa, ma̱ndoo maʼthúún ga̱jma̱a̱ numuu ináa jw.org mu xúʼko̱ ikhiin ma̱ndoo matu̱ʼu̱u̱n ga̱jma̱a̱ mbuyáaʼ ga̱jma̱a̱ numún testigos de Jeobá.

17. Ndiéjunʼ ma̱ndoo majmaa’ mu matambáyíí bi̱ narasngáa mu mariʼñaa grajxe̱ dí nuni̱ ga̱jma̱a̱ numún Testigos rá. (Atayáá ma̱ngaa xtiʼkhuu.)

¹⁷ Ma̱ndoo majmaaʼ “Graxe̱ dí naguma má xúʼko̱ ga̱jma̱a̱ numún bi̱ nutaraʼa numuu Jeobá” dí rígá náa jw.org mu matambáyíí bi̱ narasngáá mbaʼyoo ndiéjunʼ gáriʼña̱a̱ índo̱ bi̱ kúwá náa goʼwóo o bi̱ nañajunʼ gajmíi̱n gúrajxi̱i̱ (2 Tim. 2:​24, 25). Ga̱jma̱a̱ʼ kúgumaʼá dí na̱ʼkha̱ náa na̱jkha̱ raguámbáa mámbá kíxnuu ndrígóo libro Araxtáa gagi dí kayá edxu̱u̱ “Rí nuthi tikhun” mu matambáyíí bi̱ narasngáá mbaʼyoo ndiéjunʼ gáriʼña̱a̱ índo̱ gúrajxi̱i̱. Ataxkajxi̱i̱ bi̱ narasngáá mu maʼthí xóo ku̱mu̱u̱ ikhaa, ma̱ngaa ma̱ndoo maraxna̱a̱ i̱ʼwáʼ consejo, rígi̱ gámbáyúu mu maʼnirataminaʼ mu xámíñuu maʼthúún xa̱bu̱ dí xtáa rajmañuu.

18. Xú káʼnii gándoo gátambáyíí bi̱ narasngáa mu magíminaʼ maʼtáraʼa gajmíi̱n bi̱ kúwá náa congregación rá. (Mateo 10:27.)

¹⁸ Jesús niʼthúún xa̱bi̱i̱ dí mutaruʼún xúgíinʼ xa̱bu̱ ajngáa rí májánʼ (atraxnuu Mateo 10:27). Á mu bi̱ narasngáa asndu nákha wapháá naʼthí rí xtáa rajmañuu maʼga̱nú maku̱mu̱u̱ kaʼyoo itháan Jeobá ga̱jma̱a̱ mbaʼyoo xú káʼnii ikhaa xtáa rambáyúu. Á mu marigá mbá campaña dí majuiʼtáraʼa xóo índo̱ nuʼthúún xa̱bu̱ dí magún náa Conmemoración o dí magún náa asamblea, mbáa májánʼ gáʼni dí ma̱ndoo maratha̱a̱n bi̱ narasngáá mbaʼyoo ndiéjunʼ gáʼni mu mani̱ndxu̱u̱ publicador. I̱mba̱ dí ma̱ndoo mambáyúu nindxu̱u̱ dí manújngoo maxnájxi̱i̱ asignación náa reunión dí narígá ta̱pha̱ xmáná mu xúʼko̱ maʼga̱nú majmañuu ga̱jma̱a̱ xámíñuu maʼthí dí xtáa rajmañuu.

ATASNGÁJMÁÁ BI̱ NARASNGÁA DÍ NAKU̱MA̱A̱ʼ XTAYÁÁ

19. Xú káʼnii nisngájma Jesús dí nikumu̱u̱ kaʼñún xa̱bi̱i̱ ga̱jma̱a̱ ndiéjunʼ gúʼni mu mbuʼyaridáá xá.

¹⁹ Nakha Jesús xóó tsékháñuu ga̱jma̱a̱ tséjkha̱a̱ mekhuíí niʼthúún xa̱bi̱i̱ dí matanga̱a̱ maxtáa mbu̱júu̱ gajmíi̱n. Maski ajndu xa̱bi̱i̱ tákru̱ʼu̱u̱n xúgíʼ dí nijuiʼthúún, mú Jesús ndiʼyoo dí ikhiin nandún muni̱ dí naniguuʼ Jeobá (Juan 14:​1-5, 8). Jesús ndiʼyoo dí mbaʼyóoʼ mbayuʼ mbiʼi mu makru̱ʼu̱u̱n tikhu dí niʼthúún, xóo dí makuwá náa mekhuíí (Juan 16:12). Ikháanʼ mangáanʼlu ma̱ndoo muʼni xóo niʼni Jesús, gusngajmúún bi̱ nuʼsngúún dí nakumulú kuʼñúún ga̱jma̱a̱ rí ikhiin nandún muni̱ ñajuunʼ Jeobá.

20. Xú káʼnii nisngájma ndxájulú bi̱ xtáa náa Malaui dí nikumu̱u̱ kaʼyoo bi̱ naʼsngóo rá.

²⁰ Gíʼdoo numuu rí makumulú kuʼyáá bi̱ nuʼsngáá dí ikhaa nandoo maʼni rí nindxu̱u̱ májánʼ. Guʼyáá dí nigíʼnuu ndxájulú a̱ʼgu̱ bi̱ na̱ʼkha̱ náa Malaui bi̱ mbiʼyuu Chifundo ikhaa nigíʼdu̱u̱ niʼsngóo Alinafe, mbáa ndxáʼgú católica. Índo̱ kúwá runigajma̱a̱ náa kíxnuu 14 ndrígóo libro Araxtaa gagi, Chifundo nirajxu̱u̱ bi̱ naʼsngóo ndiéjunʼ endxa̱ʼwáminaʼ ga̱jma̱a̱ numuu dí najmaa xándú mu mbiʼyamajkuíí Dios. Alinafe nikiʼnáa ga̱jma̱a̱ nigawooʼ: “¡Ikhúún ma̱ndoo majmuʼ xándú á mu nandoʼ!”. Ikhú ndxájulú Chifundo nindxa̱ʼwáminaʼ rí Alinafe maniñuuʼ raʼnigajmaa Biblia, mú ndxájulú Chifundo tániñuuʼ raʼsngóo ga̱jma̱a̱ nigi̱ʼthu̱u̱n dí mbóoʼ mbiʼi maʼga̱nú makro̱ʼo̱o̱ dí ragíʼmaa majmiulú xándú. Nguáthá igu̱nʼ nda̱wa̱á Chifundo niʼniuu grajxe̱ dí na̱ʼkha̱ náa kíxnuu 34: “Ndiéjunʼ nimbáyaaʼ asndu xúgi̱ rí matanigajma̱a̱ Biblia ma̱ngaa rí matatsiʼniiʼ itháan májánʼ Jeobá bi̱ nindxu̱u̱ Dios gajkhun rá.” Chifundo naʼthí: “Alinafe niʼthí mbaʼa dí nindxu̱u̱ májánʼ mbá dí ikhaa nindxu̱u̱ rí Testigos tséni̱ mbá dí náa Biblia naʼthí dí nindxu̱u̱ ra̱májánʼ”. Nguáthá mbayuuʼ nda̱wa̱á Alinafe niniñuuʼ rajmiu xándú ga̱jma̱a̱ nindoo nijngúun iyááʼ.

21. Ndiéjunʼ gúʼni mu mumbáyíí bi̱ nuʼsngáa maraʼwíí ma’ni ñajuunʼ Jeobá rá.

²¹ Nduʼyáá má dí Dios nindxu̱u̱ “bi̱ naʼni mbaja̱a̱”, mú mangáanʼlu ma̱ndoo mumbáyíí bi̱ nuʼsngáa mu maʼni ñajuunʼ Jeobá (1 Cor. 3:7). Raʼkháa i̱ndó nuʼsngáá ndiéjunʼ dí Jeobá na̱nda̱ʼa̱a̱ dí maʼni ma̱ngaa numbáyíí maʼndoo kaʼyoo itháan. Ga̱jma̱a̱ nuxkaxi̱i̱ rí magíʼ maʼni ginii ñajuunʼ Jeobá mu masngájmaa dí nandoo kaʼyoo ma̱ngaa dí maku̱mu̱u̱ kaʼyoo índo̱ gáraʼnuu xkujndu. Índo̱ nusngajmaa bi̱ nuʼsngáá dí nakumulú kuʼyáá, nindxu̱u̱ xóo kuwáánʼ ruxnáá tsiaki̱i̱ mu xámíñuu maraʼwíí maʼni ñajuunʼ Jeobá.