Xú káʼnii embáyulú Jeobá mu maʼngulú rá.

1. a) Ndíjkha rí naʼniulú mingíjyúuʼ makuwáanʼ rá. b) Tsáá gámbáyulú rá. (1 Pedro 5:10.)

KUWÁANʼ náa mbiʼi mingíjyúuʼ ga̱jma̱a̱ xúgiáanʼ guáʼdáálú xkujndu, tikhuun numíníiʼ ga̱jma̱a̱ numuu mbá nandii mbiiʼ, eʼwíinʼ nikháñúu mbáa bi̱ nandún kuyáá ga̱jma̱a̱ eʼwíinʼ naguma ngíníi enii bi̱ kuñúún o asndu xa̱bu̱ ñajunʼ nujxkún (Mat. 10:​18, 36, 37). Ikha jngóo tséʼniuu má asndu ndiéjunʼ xkujndu xtaʼdáá ma̱ndoo matayaa gajkhun dí Jeobá mambáyáaʼ mu xátatsiʼñááʼ ratani̱ ñajuunʼ (atraxnuu 1 Pedro 5:10).

2. Tsáá embáyulú mu maʼngulú rá.

² Rí maʼngo̱o̱ a̱jkiu̱lú nandoo gáʼthúu̱n dí muguajún jmbu náa Jeobá ma̱ngaa rí muʼni ñajuunʼ ga̱jma̱a̱ gagi maski ajndu kuaʼdáálú xkujndu, nu̱ni̱ gínáaʼlú o nuraʼníí tsáʼkhá. Naʼngulú nuraʼníí xúgíʼ rígi̱ numuu dí Jeobá naxnúlú “tsiakii dí itháan mba̱a̱ ki xóo dí gíʼdoo mbáa xa̱bu̱”, raʼkháa ga̱jma̱a̱ numuu tsiaki̱i̱ ndrígúlú ikháanʼ (2 Cor. 4:7). Náa artículo rígi̱ mbuʼyáá a̱jkhu̱ enii xóo Jeobá embáyulú mu maʼngulú ga̱jma̱a̱ mbuʼyáá ndiéjunʼ gúʼni̱ mu mambáyulú dí Jeobá naxnúlú.

DÍ MARATAJKÁAN

3. Ndíjkha rí nindxu̱u̱ mitsaanʼ dí nandoo nuʼtámíjná gajmiúlú Jeobá rá.

³ Jeobá naniñuuʼ dí muʼtámíjná gajmiúlú, maski ajndu nindxu̱lú xa̱bu̱ aʼkhá (Heb. 4:16). Rígi̱ eyoo gáʼthúu̱n dí ma̱ndoo muʼtámíjná gajmiúlú asndu náá má hora, ma̱ndoo muʼthán asndu ndiéjunʼ má, asndu náá má ajngáa, tséʼniuu má náá kuwáánʼlú, á mu ndajkuáanʼ o kuwáánʼlú náa guʼwá e̱jua̱nʼ (Jon. 2:​1, 2; Hech. 16:​25, 26). Ikhaa naʼngo̱o̱ nakro̱ʼo̱o̱ ndiéjunʼ eyulú gúʼthán, índo̱ na̱nguá ejmáánʼ gúʼthán májánʼ dí naʼni maxmiéjunlú (Rom. 8:​26, 27). Ra̱ʼkhá tháán mitsaanʼ dí nandoo nuʼtamíjná gajmiúlú Jeobá.

4. Ndíjkha jngóo ma̱ndoo munda̱ʼa̱a̱ Jeobá dí mambáyulú maʼngulú rá.

⁴ Jeobá naʼthúlú náa Ajngá rawuunʼ dí ma̱ndoo munda̱ʼa̱a̱ ‹asndu káʼnii má dí nambáni̱i̱ ga̱jma̱a̱ dí ikhaa nandoo, ga̱jma̱a̱ ikhaa maʼdxawunlúʼ› (1 Juan 5:14). Ikha jngóo ma̱ndoo munda̱ʼa̱a̱ rí mambáyulú maʼngulú numuu dí rígi̱ nambríguíiʼ ga̱jma̱a̱ dí ikhaa nandoo. Náa Biblia naʼthí dí índo̱ naʼngulú nuraʼníí tsáʼkhá, Jeobá ma̱ndoo masngájma dí Gixa̱a̱ naʼthí rí nduwaʼ (Prov. 27:11). Ma̱ngaa náa Biblia naʼthí dí Jeobá nandoo “mambáñún bi̱ nuni̱ ñajuunʼ ga̱jma̱a̱ xúgíʼ a̱jkiu̱ún” (2 Crón. 16:9). Ikha jngóo nduʼyáá gajkhun dí Jeobá nandoo ga̱jma̱a̱ maʼngo̱o̱ mambáyulú (Is. 30:18; 41:10; Luc. 11:13).

5. Xú káʼnii eʼni makuwaanʼ tsímáá dí nuʼtájkáan rá. (Isaías 26:3.)

⁵ Biblia naxkajxáanʼlú muʼtájkáan ga̱jma̱a̱ numuu rí naʼni maxmiéjunlú ‹mu xúʼko̱ tsímáá ndrígóo Dios dí rígá itháan ñúʼún rí nimbáa xa̱bu̱ numbaaʼ tséʼngo̱o̱ gíkro̱ʼo̱o̱ mañewu̱u̱n a̱jkiu̱lú, mañewu̱u̱n ku̱ma̱ ndrígulú› (Filip. 4:7). ¡Ra̱ʼkhá tháán nuxnáa núma̱aʼ Jeobá ga̱jma̱a̱ numuu regalo rígi̱! Numuu dí xa̱bu̱ bi̱ na̱nguá eni̱ ñajuunʼ nduyáʼ dí muni̱ mu mambumún xkujndu ndrígu̱ún ma̱ngaa mu makuwá tsímáá, mú rí nuni̱ gamíi maʼni dí xa̱bu̱ wéñíiʼ muni̱ gachíí xóo endxaʼwamíjna̱ (atanimbríguíiʼ ga̱jma̱a̱ Mateo 12:​43-45). Ma̱ngaa, bi̱ nuni̱ rígi̱ nditháan xáʼngu̱u̱n gáguaʼdáá tsímáá dí naxnúlú Jeobá índo̱ nuʼtájkáan. Ikháánʼlú nakumulú kuʼyáá kájxi̱ Jeobá ga̱jma̱a̱ ikha nañewu̱u̱n ku̱ma̱ ndrígulú ga̱jma̱a̱ a̱jkiu̱lú mu marigá “má xúʼko̱ tsímáá” (atraxnuu Isaías 26:3). Mbá dí ikhaa naʼni nindxu̱u̱ dí nambáyulú marmáʼáan a̱jkiu̱lú textos ndrígóo Biblia náa nasngájma dí nandoo kaʼyulú ga̱jma̱a̱ nandoo mambáyulú (Sal. 62:​1, 2).

6. Ndiéjunʼ gátani̱ mu mambáyáaʼ dí naratájkáan rá. (Atayáá ma̱ngaa xtiʼkhuu.)

⁶ Ndiéjunʼ gátani̱ rá. Índo̱ gátraʼníí mbá xkujndu aratákáñíí Jeobá mu matatsiʼñáʼ náa ñawúunʼ rí naʼni maxmiéjuanʼ ga̱jma̱a̱ atanda̱ʼa̱a̱ dí maxnáa tsímáá ma̱ngaa ku̱ma̱ mu matayaa ndiéjunʼ gátani̱ (Sal. 55:22; Prov. 2:​10, 11). Índo̱ gátanda̱ʼa̱a̱ dí mambáyáaʼ xámbumaaʼ maraxnáa núma̱aʼ (Filip. 4:6). Araxtaa xawii mu matayaa xú káʼnii embáyáaʼ, atatsaʼwáminaʼ tsejtsíí mbiʼi ndiéjunʼ eʼni ga̱jma̱a̱ numaaʼ ma̱ngaa araxnáa núma̱aʼ. Xátatsiʼñáʼ dí xkujndu dí xtaʼdáá maʼni rí mambumaaʼ dí Jeobá xtáa rambáyáaʼ (Sal. 16:​5, 6).

BIBLIA

7. Xú káʼnii embáyulú maʼngulú rí muʼnigajmaa dí eʼthí náa Biblia rá.

⁷ Jeobá nixnúlú Ajngá rawuunʼ mu mambáyulú maʼngulú. Náa Biblia rígá mbaʼa versículo dí naʼsngúlú dí Jeobá mambáyulú. Guʼyáá mbá xkri̱da. Mateo 6:8 naʼthí: “Ana̱la ndaʼyoo má rí eyála asndu nákha ikháanʼ xóó tsénda̱ʼa̱a̱la”. Jesús nindxu̱u̱ bi̱ niʼthí ajngáa rígi̱ ga̱jma̱a̱ ndáwáa i̱mba̱a̱ bi̱ naniniiʼ itháan májánʼ Jeobá ki xóo ikhaa. Ikha jngóo xáʼni a̱jma̱ a̱jkiu̱lú dí índo̱ numíniiʼlú, Jeobá ndaʼyoo dí eyulú ga̱jma̱a̱ mambáyulú. Náa Biblia na̱ʼkha̱ mbaʼa dí Jeobá nikudaminaʼ maʼni dí naxnáaʼlú tsiaki̱i̱ mu maʼngulú (Sal. 94:19).

8. a) Aratá mbá ikha dí na̱ʼkha̱ náa Biblia dí nambáyulú maʼngulú. b) Ndiéjunʼ gámbáyulú mu marmáʼáan a̱jkiu̱lú mbá ikha dí mambáyulú rá.

⁸ Ma̱ngaa náa Biblia na̱ʼkha̱ consejo dí nambáyulú maʼngulú náa mbiʼi mingíjyúuʼ. Numuu dí naʼsngúlú xú káʼnii gúraʼwi̱i̱ májánʼ dí mu̱ʼni̱ (Prov. 2:​6, 7). Naʼthúlú dí xáxmiéjunlú wéñuuʼ ga̱jma̱a̱ numuu dí gárígá nda̱wa̱á, itháán májánʼ dí makumulú kuyáá Jeobá tsejtsíí mbiʼíí dí ikhaa má gámbáyulú ga̱jma̱a̱ gamiéjunʼ dí kuáʼdáálu mbiʼi rúʼko̱ (Mat. 6:34). Á mu naguʼwúnlú nuraxnuu Biblia ga̱jma̱a̱ nundxaʼwamíjna̱ dí nuraxnuu, itháan má xáʼniulú gakhi̱i̱ marmáʼáan a̱jkiu̱lú ikha dí mambáyulú.

9. Xú káʼnii embáyulú dí mundxaʼwamíjna̱ ga̱jma̱a̱ numuu dí nuraxnuu rá.

⁹ Náa Biblia ma̱ngaa naʼthí ga̱jma̱a̱ numún xa̱bu̱ bi̱ nikumu̱ún kuyáá Jeobá ga̱jma̱a̱ ikhaa nimbáñún (Heb. 11:​32-34; Sant. 5:17). Índo̱ nundxaʼwamíjna̱ ga̱jma̱a̱ numún xa̱bu̱ bugi̱ nakumulú kuʼyáá itháan Jeobá, dí ma̱ndoo mumbayumíjná náa ikhaa ga̱jma̱a̱ maxnúlú tsiaki̱i̱, mambáyulú má xúʼko̱ náa mbiʼi dí narígá gamiéjunʼ (Sal. 46:1). Índo̱ nduʼyáá dí xa̱bi̱i̱ Jeobá nisngajma dí nikumu̱ún kuyáá índo̱ nikúwá náa mbiʼi mingíjyúuʼ, naxkajxáanʼlu mu̱ʼni̱ xó má nini̱ ikhiin (Sant. 5:​10, 11).

10. Ndiéjunʼ gátani̱ mu mambáyáaʼ dí natraxnuu náa Biblia rá.

¹⁰ Ndiéjunʼ gátani̱ rá. Atraxnuu Biblia xúgíʼ mbiʼi ga̱jma̱a̱ atani̱ mbá lista ndrígóo textos dí nambáyaaʼ. Mbaʼin a̱ngiu̱lú nuraxnuu mámbá miʼcha̱ texto rí kaʼyoo mbiʼi rúʼko̱, numuu dí naxnún tsiaki̱i̱ náa mbiʼi rúʼko̱. Rúʼko̱ dí nigíʼnuu mbáa ndxájulú bi̱ mbiʼyuu Marie.a Anu̱u̱ ga̱jma̱a̱ ru̱dúu̱, nijuiʼthúún dí guáʼdáá cáncer ga̱jma̱a̱ ikhaa ndiyóoʼ mañewu̱u̱n náa nguáthá gu̱nʼ dí nikúwá xóó. Marie naʼthí ndiéjunʼ nimbáyúu mu maʼngo̱o̱: “Mámbá miʼcha̱ nagu̱ʼu̱nʼ magúxnuu texto dí kaʼyoo muʼnigajmaa tsejtsíí mbiʼi ga̱jma̱a̱ nandxa̱ʼwa̱mínáʼ dí nigúxnuu, rúʼko̱ nimbáyúʼ dí i̱ndó maku̱mu̱ʼ ka̱yo̱o̱ Jeobá ga̱jma̱a̱ xúgíʼ dí nikudaminaʼ maʼni náa Ajngá rawuunʼ, raʼkháa náa gamiéjunʼ dí gúʼdoo” (Sal. 61:2).

A̱NGIU̱LÚ

11. Ndíjkha dí naʼni̱i̱ a̱jkiu̱lú índo̱ nduʼyáá dí a̱ngiu̱lú naguájun jmbu maski ajndu nuraʼníí gamiéjunʼ rá.

¹¹ Jeobá nimínáanʼ a̱ngiu̱lú bi̱ kúwá náa xúgíʼ numbaaʼ mu mumbayúlú maʼngulú. Índo̱ nduʼyáá dí “xúgíinʼ a̱ngiu̱lú kúwá rumíniinʼ ikha̱á xó má ikháanʼlu” naʼni̱i̱ a̱jkiu̱lú (1 Ped. 5:9). Numuu rí índo̱ nduʼyáá rí mangiin nuraʼníí gamiéjunʼ xó má ikháánʼlú ga̱jma̱a̱ naʼngu̱u̱n naguájun jmbu, rígi̱ nambáyulú mangáánʼ numuu dí nduʼyáá dí maʼngulú muraʼníí asndu ndiéjuunʼ má (Hech. 14:22).

12. Xú káʼnii gándoo gúmbáyumijnalú rá. (2 Corintios 1:​3, 4.)

¹² A̱ngiu̱lú ma̱ndoo muxnúlú tsiaki̱i̱ mu maʼngulú ga̱jma̱a̱ dí nuthi ma̱ngaa dí nuni̱. Xúʼko̱ nimbayíí apóstol Pablo, náa carta dí niʼnirámáʼ ikhaa niʼthí mbiʼñún bi̱ nimbayíí índo̱ ikhaa na̱nguá nindoo magajnún náa goʼwóo, ikha jngóo nixníin núma̱aʼ ga̱jma̱a̱ numuu rí nini̱i̱ a̱jkiu̱u̱n ga̱jma̱a̱ nixnáá tsiaki̱i̱ (Filip. 2:​25, 29, 30; Col. 4:​10, 11). Ga̱jma̱a̱ xúʼko̱ má dí mbiʼi xúgi̱, a̱ngiu̱lú ma̱ndoo muni̱i̱ a̱jkiu̱lú ga̱jma̱a̱ mumbayulú mu maʼngulú muraʼníí xkujndu ga̱jma̱a̱ xúʼko̱ má mangáánʼ ma̱ndoo mumbañún índo̱ gáʼñúunʼ (atraxnuu 2 Corintios 1:​3, 4).

13. Ndiéjunʼ nimbáyúu ndxájulú Maya mu maʼngo̱o̱ rá.

¹³ Guʼyáá dí nigíʼnuu ndxájulú Maya bi̱ xtáa náa Rusia. Nákha tsiguʼ 2020 policía bi̱ kúwá náa Rusia nitu̱ʼu̱u̱n náa goʼwóo ga̱jma̱a̱ ndiyáʼ dí gíʼdoo. Nda̱wa̱á nigún kuya̱a̱ náa inún xa̱bu̱ ñajunʼ ga̱jma̱a̱ numuu dí naʼni ñajuunʼ Dios. Ndiéjuunʼ nini a̱ngiu̱lú mu mumbayíí xá. Ikhaa niʼthí rígi̱: “Índo̱ niku̱mu̱ʼ dí nánguá eʼngo̱ʼ, xtáá ngíná, nixmiéjunʼ, mbaʼin a̱ngiu̱lú nitaroʼoʼ nixuʼma mensaje ga̱jma̱a̱ carta náa inuʼ náa nithunʼ dí nandún kuyoʼ”. Niʼthí xóó: “Nda̱yo̱o̱ má dí kúwíin mbaʼin a̱ngiu̱lú bi̱ nandún kuyoʼ, mú índo̱ niraʼnuu gamiéjunʼ nákha 2020, mínuuʼ ndi̱yo̱o̱ dí gajkhun nandún kuyoʼ”.

14. Ndiéjunʼ gátani̱ mu a̱ngiu̱lú ma̱ndoo mumbayáaʼ rá. (Atayáá ma̱ngaa xtiʼkhuu.)

¹⁴ Ndiéjuunʼ gátani̱ rá. Índo̱ gátraʼníí mbá gaʼkhu gíʼdoo wéñuuʼ numuu dí maratamíjná gajmiáanʼ a̱ngiu̱lú ga̱jma̱a̱ atríyáʼ mbiʼi mu maraxtaa mbóó gajmiáanʼ. Garmáʼáan a̱jkia̱a̱nʼ dí ma̱ndoo matandu̱ʼu̱u̱n anciano dí mumbayáaʼ, bi̱ nindxu̱ún “xóo náa mumbayumíjná índo̱ naxnúu giñánʼ, náa mumbayumíjná índo̱ na̱ʼkha̱ ruʼwambiʼ” (Is. 32:2). Xámbumaaʼ dí a̱ngiu̱lú mangiin nuraʼníí gamiéjunʼ, á mu natambáñúún náa nda̱ñúunʼ ikháán maraxtaa gagi ga̱jma̱a̱ rígi̱ maʼni rí maʼnga̱a̱ʼ matraʼníí xkujndu dí xtaʼdáá (Hech. 20:35).

RÍ KUAʼTI̱I̱NLÚ MARIGÁ NDA̱WA̱Á

15. a) Xú káʼnii nimbáyúu Jesús dí nikudaminaʼ maʼni Jeobá ga̱jma̱a̱ numuu rá. b) Xú káʼnii embáyulú ikháanʼ rí kuaʼti̱i̱nlú marigá nda̱wa̱á rá. (Hebreos 12:2.)

¹⁵ Jeobá nikudaminaʼ maʼni dí gajkhun mambanúu nda̱wa̱á, rúʼko̱ nambáyulú maʼngulú (Rom. 15:13). Gármáʼáan a̱jkiu̱lú dí Jesús niʼngo̱o̱ niraʼnuu xúgíʼ dí nini̱i̱ índo̱ ikhaa nixtáa náa tsu̱du̱u̱ Ku̱ba̱ʼ, numuu rí nindxa̱ʼwa̱mínáʼ náa dí Jeobá nikudaminaʼ maʼni ga̱jma̱a̱ numuu (atraxnuu Hebreos 12:2). Ndiʼyoo dí á mu ikhaa nawi̱ji̱ jmbu maʼni kaʼwi̱i̱ mbiʼyuu Jeobá. Ma̱ngaa nindoo matanga̱a̱ náa mekhuíí mu maxtáa ga̱jma̱a̱ Anu̱u̱ ma̱ngaa dí maʼga̱nú mbiʼi dí maʼtáñajunʼ gajmíi̱nʼ bi̱ kaxtaʼwíin. Ikhaa má kayuuʼ dí kua̱ʼthi̱i̱n makuwáanʼ asndu kámuu náa numbaaʼ nuxi̱ʼ dí maʼtáñajunʼ Dios nambáyulú maʼngulú asndu ndiéjuunʼ má gúraʼníí náa numbaaʼ dí naʼtáñajunʼ Gixa̱a̱.

16. a) Xú káʼnii nimbáyúu mbáa ndxájulú rí kuaʼti̱i̱nlú marigá nda̱wa̱á rá. b) Ndiéjunʼ eʼsngáa ikháán dí niʼthí xá.

¹⁶ Guʼyálú xú káʼnii dí kua̱ʼthi̱i̱n makuwáanʼ asndu kámuu náa numbaaʼ nuxi̱ʼ nixnúu tsiaki̱i̱ ndxájulú Ana, bi̱ xtáa náa Rusia. Índo̱ nigún kuya̱ ajmbio̱o̱ náa guʼwá e̱jua̱nʼ ga̱jma̱a̱ nákhá xóó tsétháán ndiéjunʼ gágíʼnuu, ikhaa niʼthí: “Rí matajkáan ga̱jma̱a̱ mandxa̱ʼwa̱mínáʼ xú káʼnii gákuwáanʼ nda̱wa̱á nimbáyúʼ mu xákaguabúnʼ, nda̱yo̱o̱ rí xájyúuʼ má mbayuʼ gamiéjunʼ dí nuraʼníí ma̱ngaa dí nda̱wa̱á makuwáánʼ májánʼ, rí Jeobá maʼni gámbíin xa̱bu̱ sia̱nʼ ndrígióo ga̱jma̱a̱ dí ikhaa maʼni tsajkurámáánʼlú”.

17. Ndiéjunʼ gátani̱ mu matasnga̱jmá dí gíʼdoo numuu dí xtaʼti̱i̱n marigá nda̱wa̱á rá. (Atayáá ma̱ngaa xtiʼkhuu.)

¹⁷ Ndiéjuunʼ gátani̱ rá. Atríyáʼ mbiʼi mu matatsaʼwamínáʼ dí nikudaminaʼ maʼni Jeobá nda̱wa̱á. Atatsaʼwáminaʼ dí nadxaʼ xtaa náa numbaaʼ nuxi̱ʼ gajmiáanʼ bi̱ nambájxáaʼ ga̱jma̱a̱ bi̱ xtañún. Á mu natani̱ rígi̱, matayaa dí gamiéjunʼ dí xtaʼdáá ‹xájyúuʼ má mbayuʼ ga̱jma̱a̱ ragákhíi› (2 Cor. 4:17). Ma̱ngaa atani̱ xúgíʼ xó má eʼngo̱o̱ mu marathu̱u̱n eʼwíinʼ xúgíʼ dí nikudaminaʼ maʼni Jeobá nda̱wa̱á. Atatsaʼwáminaʼ xóo kúwá xa̱bu̱ bi̱ tséniʼniiʼ, ikhiin mangiin guáʼdáá gamiéjunʼ xóo ikháanʼlú, mú tséyáá dí gáʼni Jeobá nda̱wa̱á. Mbáa asndu i̱ndó ma̱ndoo muʼthúún kááʼ chíʼgíiʼ ga̱jma̱a̱ numuu dí gáʼni Reino ndrígóo Dios ga̱jma̱a̱ rúʼko̱ gáʼni dí maʼndún majmañún itháan.

18. Ndíjkha nduʼyáá rí gajkhun mambanúu dí nikudaminaʼ maʼni Jeobá rá.

¹⁸ Nda̱wa̱á rí Job niʼngo̱o̱ niraʼnuu mbaʼa gamiéjunʼ ga̱jma̱a̱ niwi̱ji̱ jmbu, ikhaa niʼthúu̱n Jeobá: “Na̱jkhánú nda̱yo̱o̱ dí maʼnga̱a̱ʼ matani̱ asndu ndiéjunʼ má ga̱jma̱a̱ xúgíʼ dí natatsaʼwáminaʼ matani̱, maʼnga̱a̱ʼ matani̱” (Job 42:2). Job ni̱jkha̱nú ndiʼyoo rí nda̱a̱ nimbá dí ma̱ndoo marikhoo Jeobá mu maʼnimbánuu dí nikudaminaʼ maʼni. Mangáánʼ ndayóoʼ makru̱ʼu̱lú rígi̱. Gundxaʼwamíjna̱ dí guʼwúlú niguma gámbáa ga̱jma̱a̱ numuu mbá ruʼwambiʼ. Mú, mbáa bi̱ nambájxulú gajmiúlú nakudaminaʼ mambáyulú maʼni májáanʼ, nduʼyáá dí ikhaa tséʼni nduwaʼ, nandoo mambáyulú, ikhaa najmañuu, ga̱jma̱a̱ gíʼdoo herramienta dí majmuu. Maski ajndu xóó tséguma májáanʼ guʼwúlú, mú, naʼni̱i̱ a̱jkiu̱lú dí kuaʼti̱i̱nlú muguaʼdáá mbá nuxi̱ʼ guʼwúlú. Ikháá má kayuʼ dí Jeobá nikudaminaʼ maʼni̱i̱ mitsaanʼ Ku̱ba̱ʼ nambáyulú mu maʼngulú muraʼníí gamiéjunʼ dí nakága inulú.

19. Ndiéjunʼ gámbáyulú mu maʼngulú rá.

¹⁹ Nijmañulúʼ dí Jeobá nambáyulú mu maʼngulú, ikhaa naniñuuʼ rí muʼtákáñíí, nixnúlú Biblia, a̱ngiu̱lú, rí kuaʼti̱i̱n marigá nda̱wa̱á. Á mu nuʼnimíjna̱ majmulú xúgíʼ dí naxnúlú Jeobá, ikhaa mambáyulú maʼngulú, tséʼniuu dí gamiéjunʼ gúraʼníí. Ikhaa mambáyulú asndu índo̱ Gixa̱a̱ ní xátáʼñájunʼ ga̱jma̱a̱ ní xúmíníin (Filip. 4:13).