Zenasis

 2 ‘Kam klostu ane lisen, yupla ol boi blo Zekop,

lisen po mi. Ai Izrael, papa blo yupla.

 3 ‘Ruben, yu pas pikinini blo mi

ane yu bin pikinini blo mi wen ai bin

prapa strong man.

Yu da prapa spesilwan ane strongwan

prom ebridem boi blo mi.

 4 Bat wailwei blo yu i wase pladwata wea i

kan stap.

Yu nomo gobi da nambawan

bikoz yu bin slip wea wan dem oman

blo mi

ane yu no bin rispekt bed blo papa blo yu.

 5 ‘Simion ane Libai, demtu tu bala. Demtu

gad seimkainwei.

Demtu man blo mata yuze sod po pait.

 6 Yagar. Ai nogo tingk ane meke samting

wanem demtu mekem,

ane ai nogo zoin wea dem nugud plan

blo demtu.

Wen demtu bin wail, demtu bin kile ol pipol,

ane kate leg blo ol buluk po pan;

mekem solong dem buluk kan wagbaut prapa.

 7 Simion ane Libai, demtu go gede kers

bikoz prom dem wailwei blo demtu,

bikoz demtu gad prapa nadakain

nugud wail.

Demtu go gede kers bikoz prom dem

peibaik wei blo demtu,

bikoz demtu prapa nogad piling wen

demtu i peibaik!

Ai go splitemap ol pamlelain blo demtu

ebriwea lo dat lan blo Izrael

ane meke pamlelain blo demtu stap

lo dem nada pamlelain blo Izrael.

 8 ‘Zuda, ol bala blo yu i go spik ol gudsamting

baut yu.

Yu go tere dem pipol uda pait ane

gense yu.

Yu gobi da bos blo ol pamlelain blo yu.

 9 Zuda, boi blo mi, yu wan strong yang laian,

uda i bin pinis kambaik prom kaikai

wanem em bin kilem.

Yu wase laian, nau em rilaks ane leidaun kuaiatwan.

Yu wase oman laian, nobodi gad

strong po boda em.

10 Da paua blo da king i nogo kamaut prom

yu Zuda,

ane da rait po kare lo antap,

i nogo kamaut prom ol pamlelain blo yu,

antil dat taim wen da wan uda i go

kam, bikoz i blo em.

Em da wan wea ebri pipol i go ona em.

11 Zuda i taiemape yang dongki blo em po greipbain,

dat yang dongki i taiemap lo wan spesil greipbain.

Em wase ol plasklos blo em wea bladred wain.

12 Ai blo Zuda i prapa modak den wain,

ane tit blo em i prapa mowait den milk.

13 ‘Zebulun i go stap lo da sanbis blo solwata.

Yu gobi da gud angkaples po ol bot,

ane baundri blo yu i gobi wea Sidon.

14 ‘Isaka em wan strong dongki,

wea em i leidaun melen wea ol baig

wea em bin kare ol samting insaid.

15 Bat em luk da ples wea em spel i bin

prapa naisples,

ane da lan i prapa gudwan.

Wa, em godaun meke redi po kare ebriting,

ane em redi po wok wase wan sleib.

16 ‘Dan i gobi bos po zaze ol pipol blo em,

seimkain wiskain dem nada pamlelain

blo Izrael i mekem.

17 Dan i gobi wan sneik lo said blo da rod,

wan bad sneik klostu po busrod,

wea em baite da leg blo os,

solong dat man uda raidem i go poldaun.

18 Ai weit po yu, plizgar po seibe mi, AntapGod!

19 ‘Gad, ol smol mob pipol uda stile samting,

go kam po stile ol samting blo em,

bat em go apte dempla ane em go kese dempla.

20 ‘Asa go gad lan po groe ol nadakain nais kaikai.

Dis kaikai em rait po gibe ol king po kaikai

21 ‘Naptali i wan red oman dia wea i ran pri,

ane i gad ol nais yang pikinini.

22 ‘Zosep i da mein brans blo wan bainplant

wea plenti brans i kamaut.

Zosep em bainplant klostu lo spring lo wata;

ol brans blo em i go gro oba da ston wol.

23 Dem bounaro man i prapa wail man.

Ol i bin kam po paite em;

dempla bin mata kip paia ol aro po em.

24 Bat bou blo em i bin mata stap stret, i no seik,

ane tu an blo em, i bin kam strong

prom da paua blo da prapa Strong

AntapGod blo Zekop,

wea ol kolem Bosman uda lugaut sip,

da Ston blo Izrael.

25 Lete da God blo ol ate blo mi elpe yu.

Lete da Strong AntapGod blese yu

wea ol rein po wete dem gadan kaikai blo yu,

ane wea dem spring wata

wea i go kamaut andanit prom graun.

Ane wea yu go gad plenti pikinini ane

ol plenti animal.

26 Da blesing wea papa blo yu i bin kesem

prom dem ate blo yu,

i mobig den blesing wea God i bin

mekem po dem maunten

wea i mata stap poeba,

ane da prapa nais samting prom dem il

wea i mata go poeba.

Wa. God i po meke ol gudsamting ya po Zosep,

wea i bin mekem po bi bos blo ol bala

blo em.

27 ‘Benzaman i wan prapa anggre wail bus dog.

Wea moningtaim em tere enami blo em,

ane wea naittaim em seremaut

wanem em bin stilem.’