Rebaleisan
Da Smolsip opene da skrol
5 Apta demting, ai bin luk man sidaun lo tron kare skrol wea raitan blo em. Dis skrol em i wan long peipa wea ol i rolem. Ane i gad raiting lo tu said. Ane da skrol i bin gad seben lok wea i lokem. 2 Nau ai bin luk gen ane bin luk wan prapa strong einzel ane em i ala mina laudwan, ‘Uda gad rait po kam ane broke dem seben lok ya ane po opene dis skrol?’ 3 Bat no wan ya lo eben, o lo wold, o lo el, bin gad rait po kam ane opene dis skrol ane rid wanem i spik insaid lo da skrol.
4 Den ai bin base mina bigkrai bikoz ol kan paine eni man uda i gad rait po opene dis skrol ane rid wanem i spik insaid lo em. 5 Nau wan prom dem tuenti po elda ya em i spik lo mi diskain, ‘Man, yu no krai! Yu sabe uda dat man ya? Em dat Laian, dat prapa strong lida uda i kam prom pamlelain blo Zuda. Ane prapa bigate blo em, i King Deibid. Em bin win. Em nau da wan uda i gad rait po broke dem seben lok ane po opene dis skrol.’
6 Nau ai bin luk wan Smolsip wea em i stanap prant wea dat tron ane dem po laipsamting ane dem tuenti po elda tu, i bin stanap raun lo em. Ane da Smolsip em i luk wase sambodi i bin kile em. Em i gad seben on lo em ane seben ai tu. Diswan i dem seben spirit blo God wea em i sane dempla goaut ebriwea insaid lo da wold. 7 Da Smolsip i bin kam prant ane i tekemaut da skrol prom raitan blo da wan uda i sidaun lo dat tron. 8 Wen em bin teke da skrol, dem po laipsamting ane dem tuenti po elda i bin nildaun prant lo da Smolsip. Ebribodi dempla i bin kare ol gita wea i kolem ap. Ane dempla i bin kare gold boul ol i pulap lo insens. Ane dem insens i dem prea blo ebridem pipol blo God. 9 Ane dempla ebribodi i bin sing wan niu sing diskain po dat Smolsip:
‘Yu da rait man po go ane teke da skrol
ane broke dem lok ane openem.
Bikoz ol i bin kile yu, yu bin ded,
ane blad blo yu i bin sakripais po
ebridem pipol blo God.
Ol i kam prom ebri pamlelain, ebri langus,
ebri pipol ane ebri kantri lo da wold.
10 Ane nau yu bin meke dempla kam king,
ane po kam prist ya.
Ane dempla go kam bos blo dis wold.’
11 Distaim ai bin luk gen, ane ai bin lisen sing blo prapa plenti milion einzel. Dem einzel i bin mina plenti, i kan kauntem. Dempla i bin stanap raun lo da tron ane raun lo dem po laipsamting ane dem tuenti po elda. 12 Ane dempla i bin sing wea prapa nadakain laud bois dis sing ya:
‘Da Smolsip i gad rait, dat wan wea ebridem
pipol i bin kile em.
Em i da wan uda gad rait po gede strongpaua
ane po gede ebridem prapa plasting,
ane em i gad rait po gad prapa sabe
ane po bi prapa strong.
Em i gad rait po gede ona, truglori ane preiz
ebritaim.’
13 Nau ai bin lisen ebri tok blo ebridem samting wea God i bin mekem. Ebridem samting wea i stap insaid lo eben ane lo da wold ane lo el ane lo solwata, ane ebribodi i bin goed po sing diskain:
‘Dem blesing ane ona ane truglori ane paua,
demting i blo demtu, i mas gobaigen
po da wan uda i sidaun de lo da tron
ane po da Smolsip.
Dem blesing ane ona ane truglori ane paua
i go mata kipgo, no sabe pinis.’
14 Nau dem po laipsamting i bin spik, ‘Amen!’ Ane dem tuenti po elda i bin poldaun ane wosip God ane da Smolsip.