Taim Blo Big Pladwata —Uda Bin Lisen? Uda No Bin Lisen?

Plenti pipol wande meke nugudting lo taim blo Noa. Zenasis 6:5

Adam ane Ib bin gad pikinini ane pipol kam plenti wea ert. Apta nau, sam einzel bin zoine Satana ane gense God tu.

Ol bin kam po ert ane seinze bodi po kam man sole dempla ken maret ol oman. Dem oman bin bone pikinini uda i nadakain wail ane mo strong den man.

Wold bin kam po gad pipol uda wande meke rapwei. Baibol spik “wei blo ebri pipol i bin kam prapa nugud, ane ebriting wea ebri pipol bin tingk ane mekem, i bin ebritaim mata ol nugudting.”

Noa bin lisen po God ane bilde da ak. Zenasis 6:13, 14, 18, 19, 22

Noa i wan gud man. Zeoba bi spik po Noa em go distroi ol nugudpipol wea wan big pladwata.

God bin spik po Noa po bilde wan bigbot ane kolem ak, ane teke pamle blo em go insaid ane teke olkain dipren animal tu.

Noa bin wone dem pipol baut da Big Pladwata, bat dempla no wande lisen. Sam pipol lap lo Noa ane ol nada pipol eite em.

Wen Noa pinis bilde da ak, em bin teke dem animal go insaid.