LESEN 10
Wiskain Ol Miting Blo Ol Witnis Blo Zeoba Ken Elpe Yu?
Wiswei, eniwan bin aske yu po gopo miting blo ol Witnis blo Zeoba bipo? Ip yu no bin go miting bipo, mait yu apenap po go de. Mait yu tingk: ‘Wanem apen wea dem miting? Aukam i impotant? Aukam ai mas go?’ Lo dis lesen, yu go lan wen yu mit tugeda, yu ken kam moklostu po God ane i go elpe laip blo yu.
1. Wanem prapa impotant rizan po mit tugeda?
Tekenotis wanem wan Baibol raita bin spik i da mein rizan po mit tugeda wea ol nada pipol: “Ai go preize Zeoba lo da bigmob pipol.” (Song blo Sam 26:12) Seimkainwei, ol Witnis blo Zeoba mina enzoi wen ol kam tugeda. Ebriwea raun da wold, dempla mit tugeda ebri wik, wea ol grup, ol i kolem kongrigeisin, po preize God, po sing ane prea. I gad mo bigmiting lo dipren taim ebri iya, wea dempla kam tugeda po wosip tu.
2. Wanem yu go lan wea mipla miting?
Wea dem miting, mipla tis prom Wod blo God, “ekspleinem kliawan ane tise mining blo em.” (Rid Niamaia 8:8.) Wen yu go miting, yu go lanbaut Zeoba ane gudpasinwei blo em. Wen yu kam po sabe wiskain em labe yu, yu go kam moklostu po em. Yu go lan wiskain em ken elpe yu po gad apilaip.—Aizaia 48:17, 18.
3. Wiskain demwan yu mit ane tok po lo miting, go elpe yu?
Zeoba spik “yumpla mas paine wei po elpe wananada, elpe wananada po soe biglab, ane po mata meke ol gudting. Ane yumpla mas no stap prom kam pelosip tugeda.” (Ibrupipol 10:24, 25) Lo mipla miting, yu go mite pipol uda mina kea baut wananada ane wande lan mo baut God, wase yu wandem tu. Yu go lisen pipol tokbaut ol gudsamting prom Baibol lo da miting, ane bipo ane apta, wi ken tok ane inkariz wananada. (Rid Rom 1:11, 12.) Yu ken tok po pipol—man, oman, yangpipol, oulpipol, singgel pipol ane ol pamle—uda i api, nomata dempla gad problem. So, yumi ken sabe nau, aukam Zeoba no wande yumi po misaut prom miting tugeda!
TINGBAUT MO NAU
Lan wanem apen wea ol miting blo ol Witnis blo Zeoba, ane aukam i gud po yumi po traiad po go de.
4. Ol Miting blo ol Witnis blo Zeoba
Dem bipotaim Kristian bin mit tugeda ebritaim po wosip Zeoba. (Rom 16:3-5) Rid Kolosi 3:16, ane tokbaut dis kwestin ya:
Wiskain wei dem pas Kristian bin meke wosip po Zeoba?
Tidei, dem Witnis wosip ebritaim, lo eni ples wea ol i mit tugeda. Po luk wanem apen lo dem miting, plei da BIDYO. Den, luk da piksa blo wan kongrigeisin miting, ane tokbaut dem kwestin ya.
Wen yu rid Kolosi 3:16, wanem i apen de, i seimkainwei lo Kingdom Aus?
Lo da bidyo o piksa, wanem nada samting yu bi laik baut da miting?
Rid 2 Korint 9:7, ane tokbaut dis kwestin ya:
Aukam ol Zeoba Witnis no ask po mani wea miting blo dempla?
Tok po tisa blo yu, baut wanem go apen lo da miting blo dis wik.
Wanem pat blo dis miting yu tingk go elpe yu?
Yu bin sabe a?
Lo jw.org, yu ken paindaut wen ane wea dem ples i gad ol miting raun da wold.
Mipla miting gad ol Baibol tok, bidyo ane ol lesen po pris ane tis. Miting stat ane pinis wea mipla sing song ane prea
Midel da miting, wea i gad kwestin-ane-ansa pat, enibodi ken sere samting
Ebriwan i welkam po kam—ol pamle, singgel pipol, oulpipol, ane pikinini
Dem miting i pri. Ol Witnis blo Zeoba no pase pleit po koleksin
5. I impotant po trai prapa ad po go miting
Lan prom wei blo pamle blo Zizas. Ebri iya, ol bin wagbaut 100 km tru maunten kantri, prom Nazaret gopo tempol wea Zarusalem. Rid Luk 2:39-42, ane tokbaut dem kwestin ya:
Yu tingk i bin ad po dempla po go Zarusalem?
Wanem samting ken stape yu prom go miting, ane wanem samting yu ken mekem sole yu go go?
Wiswei, yu tingk i gud po go miting, nomata i ad a? Aukam?
Da Baibol spik miting tugeda po wosip, i prapa impotant. Rid Ibrupipol 10:24, 25, ane tokbaut dis kwestin ya:
Aukam yumi mas gopo miting ebritaim?
SAM PIPOL SPIK: “Yu no nid po mit tugeda wea nada pipol. I nap po meke Baibol stadi lo aus.”
Wanem skripsa o Baibol stori soe wanem Zeoba wandem?
WANEM YU BI LAN
Wen yu gopo miting i go elpe yu po lan mo baut Zeoba, po kam mo klostupren blo em, ane po wosip em tugeda wea ol nada pipol.
Wiskain Yu Go Spik
Aukam Zeoba inkariz yumi po mit tugeda?
Wanem yu go lan lo miting blo ol Witnis blo Zeoba?
Wanem nadawei i go elpe yu wen yu go miting?
PAINDAUT MO
Wiswei, yu wori po go miting? Luk wiskain wan man bi pil demkain tu, bat em bin kam po labe dem miting.
Luk wiskain wan yangman bin enzoi dem miting ane wanem em bin mekem po kipgo.
Lan wanem ol nada pipol spik baut ol miting.
Paindaut wiskain laip blo wan man, uda gad mina rapwei, bin seinz apta em bin go miting.
“I Never Went Anywhere Without My Gun” (The Watchtower, July 1, 2014)