LESEN 11

Wiskain Yu Ken Gede Mo Gudsamting prom Ride Baibol

Samting Yu Ken Printem

Wiswei, wen i taim po meke big pisting, i ken pil ad po sabe wea po statem a? So yu no wori tumas, mait yu go splitemap dem zob po mekem moizi po yu. Da seim i tru wen i kam po ride Baibol. Mait yu go ask, ‘Wea ai go stat?’ Lo dis lesen, yumi go tingbaut sam gudwei po elpe yu enzoi Baibol stadi ane riding.

1. Aukam yumi mas ride Baibol ebritaim?

Samwan uda ebritaim ride Baibol, o “da lo blo Zeoba,” gobi api ane gad gudlaip. (Rid Song blo Sam 1:1-3.) Kasa po statem, trai po ridem po 2 o 3 minit ebridei. Da mo yu go yuze Baibol, da mo yu go enzoi po ridem.

2. Wanem go elpe yu po gede mo gudsamting prom ride Baibol?

Po elpe yu mo wea Baibol riding, yumi mas teke taim ane tingk pas baut wanem yu rid. Yumi mas ridem ane “prapa tingk” baut em. (Zosua 1:8, putnot) Wen yu ridem, ask yuselp ol kwestin wase: ‘Wanem diswan lane mi baut Zeoba God? Wiskain ai ken yuzem wea laip blo mi? Wiskain ai ken yuze dem skripsa po elpe nada pipol?’

3. Wen ken yu meke taim po ride Baibol?

Wiswei, yu stragal po paine taim po ride Baibol a? I ad po yumi ebriwan. Trai po “yuze ebri sans po meke gudsamting.” (Episis 5:16) Wea dei blo yu, plane taim po ride Baibol, sole yu ken mekem ebridei. Sam pipol ride Baibol lo moningtaim. Ol nada pipol suze aptanuntaim. Nada pipol ridem naittaim bipo ol go slip. Wanem i gud taim po yu?

TINGBAUT MO NAU

Lan wiskain po meke Baibol riding blo yu sole yu ken enzoi em mo. Luk wiskain yu ken redi yuselp so yu ken gede plenti gudsamting prom Baibol stadi blo yu.

Piksa: Wan smol boi gro po lan po enzoi dipren kaikai. 1. Da smol boi plei lo em kaikai. 2. Apta wen da boi i big, em kaikai em. 3. Wen da boi i mobig, em enzoi dat kaikai nau. — Seimkainwei wase yumi ken lan po enzoi dipren kaikai, yumi ken lan po enzoi ride Baibol tu

4. Lan po enzoi Baibol riding

Mait i no izi po stat po ride Baibol. Bat, yumi ken kam “prapa anggre” po ridem, wase samwan ken kam po enzoi niu kaikai ol no bi traiem bipo. Rid 1 Pita 2:2, ane tokbaut dis kwestin ya:

Ip yu ride Baibol ebridei, yu tingk yu ken kam po enzoi em ane wande mekem mo a?

Plei da BIDYO po luk wiskain sam pipol bin stat po enzoi ride Baibol. Den tokbaut dem kwestin ya.

BIDYO: Yangpipol Lan Po Lab Wod blo God (5:33)

Lo da bidyo, wanem sam stragal dem yangpipol bin gad?
Wanem bin elpe dempla no gibap ane kipgo wea Baibol riding ebridei?
Wanem ol bi mekem po enzoi Baibol riding mo?

Trai dis po elpe yu stat:

Suze Baibol wea i olgeda tok stret ane tru, ane no yuze oul langus. Trai da New World Translation.
Stat po ride wan pat blo da Baibol yu tingk yu go enzoi. Po sam aidia, luk da plan “Ride Baibol Ebridei.”
Raitemdaun wanem yu bin pinis rid. Yuze “Mak daun Baibol Riding Blo Yu” plan wea dis buk.
Yuze da JW Library^® app. Lo da app, yu ken rid ane lisen po Baibol eniwea, lo smatpon o nada samting laidat.
Yuze da appendixes lo da New World Translation. I gad ol map, piksa ane diksoneri dat ken meke riding blo yu mogud.

5. Redi yuselp po Baibol stadi blo yu

Rid Song blo Sam 119:34, ane tokbaut dis kwestin ya:

Aukam i gud po prea bipo yu ride Baibol o wen yu meke redi po Baibol stadi?

Wanem ken elpe yu mo wea dem stadi taim? Wen yu redi yuselp po dem lesen, trai dis:

Rid da pas pat blo da lesen.
Paine dem skripsa ane ridem, ane trai po meke sens baut wiskain dem skripsa i lainap wea da lesen.
Mak dem mein wod wea ol i ansa dem kwestin; i go elpe yu po tokbaut da lesen wea tisa blo yu.

Piksa: Wan oman redi emselp po Baibol stadi blo em. A. Em ride pas peiz blo da lesen. B. Em ride dem skripsa da lesen i gad. C. Em mak dem mein wod lo da lesen.

Yu bin sabe a?

Ol Witnis blo Zeoba yuze ol dipren Baibol. Bat, mipla mina laik da New World Translation of the Holy Scriptures bikoz i olgeda tok stret ane tru, i kliawan, ane i yuze neim blo God.—Luk da Web article “Do Jehovahʼs Witnesses Have Their Own Bible?”

SAM PIPOL SPIK: “Baibol stadi i tumas adwok. Ai taiat ane nogad taim.”