LESEN 49
Wiskain Pamle Blo Yu Ken Kese Apilaip?—Pat 1
Dat weding dei blo man ane oman, meke demtu mina api ane ol wande pil demkain api poeba. Ane wa, demtu ken. Ol Kristian uda bin maret po longtaim ane uda wok ad po pole wanem Baibol spikbaut maret, mina sabe ol ken bi api.
1. Wanem adbais Baibol gibem po ol maretman?
Zeoba bin setemap man po lide pamle blo em. (Rid Episis 5:23.) Zeoba wande em po suze ol raitwei wea i gud po em pamle. Da Baibol spik ol maretman: “Mas prapa labe oman blo [dempla].” (Episis 5:25) Wanem diswan min? Wan maretman uda labe maretoman blo em, go trite em naiswei, wen ol de lo aus o tugeda wea nada pipol tu. Em trai po meikso oman blo em i seip ane api, ane lukapta em lo wanem em nidem. (1 Timoti 5:8) Ane i mina impotant em mas kipe amensamting prant po elpe oman blo em po stap klostupren wea Zeoba. (Matiu 4:4) Wanwei em mekem, i wen em prea ane ride Baibol tugeda wea oman blo em. Wen maretman kea baut em oman lo diskain labing wei, em ken stap klostupren wea Zeoba tu.—Rid 1 Pita 3:7.
2. Wanem adbais Baibol gibem po ol maretoman?
Wod blo God spik dat “maretoman mas rispekt man blo dempla.” (Episis 5:33) Wiskain em ken mekem? Em ken tingbaut dem gudpasin maretman blo em i soem, ane wiskain em traiad po lugaut em ane pikinini blo demtu. Da maretoman ken soe rispekt tu, wen em elp ane sapot man blo em, tok naiswei po em, o yan baut em, iben ip em no wosip Zeoba.
3. Wanem maretman ane em oman go mekem po meke maretlaip mostrong?
Da Baibol spik dat maretman ane oman: “Go kamwan.” (Matiu 19:5) Dasmin demtu traiad po no laue lab blo demtu po kam wik. Maret blo demtu gobi strong, wen ol spene plenti taim tugeda ane sere wanem ol tingk o pil lo labing wei wea wananada. Demtu no laue eniting o enibodi, anles i Zeoba, po bi mo impotant den dempla maretmet. Demtu mina meikso dat ol no stat po laik po nada man o oman.
TINGBAUT MO NAU
Luk sam Baibol tising dat ken elpe maretlaip blo yu kam mostrong.
4. Maretman—lugaut ane labe oman blo yu
Da Baibol spik dat “maretman i mas prapa labe oman blo dempla, seimkain wiskain dem maretman i prapa labe bodi blo dempla.” (Episis 5:28, 29) Wanem diswan i min? Plei da BIDYO, den tokbaut dis kwestin ya.
Wanem sam wei ol maretman ken soe em lab ane kea baut maretoman blo em?
Rid Kolosi 3:12, ane tokbaut dis kwestin ya:
Wiskain wei ol maretman ken soe demkain pasin lo maretlaip blo em?
5. Maretoman—rispekt ane labe man blo yu
Da Baibol inkariz ol maretoman po rispekt maretman blo em, nomata em man serbe Zeoba o no serbe em. Rid 1 Pita 3:1, 2, ane tokbaut dem kwestin ya:
Ip man blo yu no serbe Zeoba, wa gar, yu mas wande em po wosip Zeoba wandei. Wanem da bes wei po elpe man blo yu po wande lanbaut Zeoba? Yu tingk i wen yu ebritaim pris po em, o i dem gudpasin yu soem ane wiskain yu soe rispekt? Aukam?
Maretman ane oman ken suz tugeda wanem i gud po da pamle. Bat, sam taim da oman mait no gri wea man blo em. So da oman ken spik po em man wanem em tingk wea kuaiatwei ane soe rispekt, bat em mas rimemba dat Zeoba bin gibe da man da rait po spik wanem i bes po pamle blo demtu. Den, da oman go traiad po sapot wanem em man wande mekem. Wen em mekem diskain, em elpe em pamle po bi api. Rid 1 Pita 3:3-5, ane tokbaut dis kwestin ya:
Wiskain Zeoba go pil wen ol maretoman soe rispekt po em maretman?
6. Maretlaip ken wok iben ip i gad sam problem
Maretlaip i no stret ebritaim. So, ol maretmet mas wok tugeda ane no gibap wen ol adtaim i kam. Plei da BIDYO, den tokbaut dem kwestin ya.
Lo da bidyo, wanem bin apen po soe demtu bin drep lelbet prom wananada?
Wanem ol bin mekem po meke maretlaip blo demtu kam strong gen?
Rid 1 Korint 10:24 ane Kolosi 3:13. Apta yu ride dem skripsa, tokbaut dis kwestin ya:
Wiskain yu ken pole dem skripsa po meke maretlaip blo yu kam mostrong?
Da Baibol spik yumi mas soe ona po wananada. Dasmin yu go trite sambodi wea rispekt ane soe gudpasin po dempla. Rid Rom 12:10, den tokbaut dem kwestin ya:
Wiswei, maretman o oman mas weit po maretmet po soe dempla ona pas, bipo ol go soe ona gobaigen a? Wa o no? Aukam?
SAM PIPOL SPIK: “Mitu seinz, mitu no meke pan ane lap enimo.”
Wiskain yu go eksplein dat Baibol ken elpe dempla?
WANEM YU BI LAN
Maretman ane oman ken bi api wen demtu lab wananada, rispekt wananada, ane yuze Baibol wea maretlaip.
Wiskain Yu Go Spik
Wanem maretman ken mekem sole em pamle ken bi api?
Wanem maretoman ken mekem sole em pamle ken bi api?
Ip yu maret, wanem Baibol skripsa ken elp maretlaip blo yu kam mostrong?
PAINDAUT MO
Lan sam gud aidia dat ken elpe yu gede moapi pamle laip.
Luk wan miusik bidyo dat soe yu ol nais blesing i kam, wen yu pole Baibol wea maretlaip.
Lanbaut wanem i min po rispekt wiskain God bin gibe man da wok po lide da pamle.
“Women, Why Submit to Headship?” (The Watchtower, May 15, 2010)
Luk wiskain wan man ane oman bin sotemaut ol big problem ane dibos, wea maretlaip blo demtu.