Wiskain Pamle Blo Yu Ken Kese Apilaip?—Pat 2

Ebri pikinini i gipt prom Zeoba. Em prapa wande mam ane dad po lugaut pikinini blo demtu. Zeoba bin gibe ol waiz adbais po mam ane dad sole ol sabe wiskain po groemap dempla. Ane wen pikinini lisen po adbais blo Zeoba, ol ken elp po meke pamle laip mogud tu.

1. Wanem adbais Zeoba gibem po ol mam ane dad?

Zeoba wande ol mam ane dad po labe pikinini ane spene plenti taim wea dempla. Em wande mam ane dad po protekt pikinini prom eniting dat mait erte dempla ane em wande demtu po oltaim yuze Baibol skripsa po lane pamle tu. (Proberb 1:8) Em spik ol papa: “Gro [pikinini blo yu] po kam big . . . po meke raitting wanem [Zeoba] i wandem.” (Rid Episis 6:4.) Zeoba i api ip ol mam ane dad pole diswei wen ol groemape pikinini blo dempla, ane no gibe dis impotant wok po nada pamle po mekem.

2. Wanem adbais Zeoba gibem po ol pikinini?

Zeoba spik po pikinini: “Yupla . . . mas lisen po papa ane mama blo yupla.” (Rid Kolosi 3:20.) Wen ol pikinini rispekt ane obei mam ane dad, dempla meke Zeoba mina api ane mam ane dad gobi api tu. (Proberb 23:22-25) Wen Zizas bin smolboi, em bin soem wanem i raitwei po polem. Nomata wei blo em i mina stret, wa, em gad nating rong wea main ane bodi, bat em stil lisen po em mam ane dad ane soe rispekt po demtu.—Luk 2:51, 52.

3. Wiskain ol pamle ken go moklostu po God?

Ip yu gad pikinini, yu wande pikinini blo yu po labe Zeoba seimkain wase yu. Wiskain yu ken elpe dempla labe Zeoba? Yu ken meke wanem Baibol i spik: “Yu mas ebritaim lane dem wod [blo Zeoba] po boi blo yu, wen yu sidaun wea aus blo yu ane wen yu wagbaut lo rod.” (Dutaronami 6:7) “Ebritaim lane” i min yu tise samting gen ane gen. Wa, yu sabe pikinini wad, sole ol rimemba wanem wi tise dempla, yu mas ripit em, gen ane gen. Dis skripsa i min, yu go luk po ebri sans po lane pikinini blo yu baut Zeoba. I gud po ol pamle po meke taim ebri wik po stadi baut Zeoba tugeda. Ip yu nogad pikinini, i stil gud po yu po meke taim po stadi Wod blo God ebri wik tu.

TINGBAUT MO NAU

4. Soe lab wen yu lane pikinini blo yu

I no izi po lane pikinini. Wiskain da Baibol ken elp? Rid Zemes 1:19, 20, ane tokbaut dem kwestin ya:

• Wiskain ol mam ane dad ken soe lab wen ol tok po pikinini blo dempla?

• Ip pikinini meke rong samting, aukam mam ane dad mas neba strete dempla wen ol wail?a

5. Protekt pikinini blo yu

Po protekt pikinini blo yu, i mina impotant yu tok po dempla baut seks. Yu mait pil sem po tokbaut demkainting. Plei da BIDYO, den tokbaut dem kwestin ya.

BIDYO: Protekt Pikinini blo Yu Prom Ol Nugud Samting (2:58)

• Aukam i ad po sam mam ane dad po tok po pikinini baut seks?

• Wanem sam diprenwei, sam mam ane dad eksplein seks po dempla pikinini?

Baibol pinis spik, wold blo Satana go kam mo ane mo nugud. Rid 2 Timoti 3:1, 13, ane tokbaut dis kwestin ya:

• Sam dem nugudpipol wea 2 Timoti 3:13 i tokbaut, erte pikinini wea nugud sekswei. So, aukam i impotant mam ane dad lane pikinini blo dempla baut seks ane soe dempla wiskain po protekt demplaselp prom demkain nugudpipol?

Yu bin sabe a?

Ol Zeoba Witnis meke plenti ol buk ane bidyo po elpe ol mam ane dad tise pikinini baut seks ane protekt dempla prom ol nugudpipol uda wande erte dempla. Luk dem samting ya:

• Meikso Pikinini Blo Yu i Seip (bidyo)

• Learn From the Great Teacher, sapta 10 ane 32

• “Teaching Your Child About Sex” (Awake! Namba 5 2016)

6. Rispekt mam ane dad blo yu

BIDYO: Wiskain Ai Ken Tok Gudwei Po Mai Mam ane Dad? (2:19)

• Aukam i gud po ol yangpipol po soe rispekt wen ol tok po mam ane dad blo dempla?

• Wiskain wei yangpipol ken tok po mam ane dad, po soe rispekt ane ona po dempla?

Rid Proberb 1:8, ane tokbaut dis kwestin ya:

• Wanem pasin ol yangpipol mas soem po mam ane dad, wen ol spik dempla samting po mekem?

7. Pamle stadi Baibol tugeda

Ol Zeoba Witnis pamle meke taim ebri wik po stadi Baibol tugeda. Wanem ol pamle ken mekem lo dis taim? Plei da BIDYO, den tokbaut dem kwestin ya.

BIDYO: Pamle Baibol Stadi—Wanem Mekem Ad, Bat Wanem Blesing i Kam (8:04)

• Wiskain ol pamle ken meikso po meke Pamle Baibol Stadi ebri wik?

• Wanem ol mam ane dad ken mekem wea dem pamle Baibol stadi sole i elpe ebriwan ane i apitaim?—Luk piksa lo da stat blo da lesen.

• Wanem ken mekem ad po pamle blo yu po stadi tugeda?

Bipotaim lo Izrael, Zeoba bin wande ol pamle po spene taim po tokbaut dem Skripsa. Rid Dutaronami 6:6, 7, ane tokbaut dis kwestin ya:

• Wiskain yu ken pole dis skripsa?

Dipren aidia po pamle Baibol stadi:

• Stadi baut da neks amenmiting bipo yu go.

• Rid ane tokbaut wan Baibol stori pamle blo yu go enzoi.

• Ip yu gad smolpikinini, daunlod o printe ol pan samting prom jw.org.

• Ip yu gad big pikinini, paine ol stori o bidyo po yangpipol lo jw.org, ane tokbaut em tugeda.

• Aktemaut wan Baibol stori wea pikinini blo yu.

• Wase wan bidyo lo jw.org tugeda ane tokbaut em.

WANEM YU BI LAN

Zeoba wande ol mam ane dad po lab, protekt ane lane pikinini blo dempla; pikinini po rispekt mam ane dad; ane pamle po wosip em tugeda.

Wiskain Yu Go Spik

• Wiskain ol mam ane dad ken protekt ane lane pikinini blo dempla?

• Wiskain ol pikinini ken soe ona ane rispekt po mam ane dad?

• Wiskain i go elpe ol pamle po meke taim ebri wik po stadi Baibol tugeda?

PAINDAUT MO

Wanem pasin go elpe pikinini blo yu wen ol groap?

“Six Lessons Children Need to Learn” (Awake! No. 2 2019)

Lan wanem adbais Baibol i gibem po demwan uda lugaut mam ane dad wen ol kam oul.

“What Does the Bible Say About Caregiving for Elderly Parents?” (Web article)

Luk wiskain wan man uda no bin sabe wiskain po groemap pikinini prapa, bin kam wan gud papa.

Zeoba Lane Mitu Po Groemape Mitu Pikinini (5:58)

Luk wiskain ol dad ken kam moklostu po ol boi blo dempla.

“How Can Fathers Stay Close to Their Sons?” (The Watchtower, November 1, 2011)