LESEN 26
Aukam Ol Nugudting i Apen ane Aukam Pipol i Sapa?
Wen samting mina nadakain nugud apen, plenti pipol go ask: “Aukam diskainting bin apen?” Mipla mina api da Baibol gibe klia ansa po demkain kwestin!
1. Wanem Satana bin mekem so ol nugudting bin stat po apen lo wold?
Da Debol Satana bin gense God. Satana bin wande ruloba ebribodi, so em bin blape demtu pas pipol, Adam ane Ib, po pole em ane gense God tu. So wanem Satana bin mekem, em spik lai po Ib. (Zenasis 3:1-5) Em bin meke Ib tingk Zeoba no wande em po gad samting gud. Em kasa sake tok dat pipol no nid po lisen po God po bi moapi. Satana bin spik da pas lai, dat Ib nogo ded. So, i meke sens Baibol spik Satana “mata spik ol laitok. Laip blo em i mata blo ol lai. Em i da papa blo mata lai.”—Zon 8:44.
2. Wanem Adam ane Ib suz po mekem?
Zeoba bin gibe ebriting po Adam ane Ib. Em spik demtu ken kaikai prom ebri tri wea da gadan blo Iden, bat mata wan tri, ol no lau po kaikai prom. (Zenasis 2:15-17) Bat demtu bin meke main po mata kaikai da prut blo dat tri eniwei. Ib “bin nake sam prut ane em bin kaikai.” Apta, Adam “bin kaikai tu.” (Zenasis 3:6) Demtu no lisen po God. Adam ane Ib nogad nating rong wea bodi ane main, dasmin demtu ken meke wanem i rait. Bat bikoz demtu no wande lisen po God, demtu bin suzem po stanap gense God. Wanem demtu mekem i sin, ol wantaim tane baik lo rul blo God. Nau, ol gad saparing prom wanem ol bin suzem.—Zenasis 3:16-19.
3. Wanem i apen po mipla prom wanem Adam ane Ib bin suzem?
Bikoz Adam ane Ib bin sin, nau ol pamle ane pikinini blo demtu gad sin tu. Baibol spikbaut Adam diskain: “Bat den dat man, neim blo em Adam, i bin meke nugudting ane prom dat taim sin i bin kam po dis wold. Ane ded i bin kam bikoz prom sin. So nau yumpla ebribodi mas ded bikoz ebri pipol blo dis wold meke ol nugudting, ane demting i sin.”—Rom 5:12
I gad dipren rizan yumpla i sapa. Samtaim yumi sapa bikoz yumi suz po meke rong samting, o nada pipol suz po meke rong samting. Samtaim yumi sapa bikoz yumi wea rong ples wea rong taim.—Rid Iklaziastis 9:11.
TINGBAUT MO NAU
Tingbaut aukam God no da wan po bleim po ol nugudting ane saparing lo wold tidei, ane wiskain em pil wen yumi sapa.
4. Da wan uda mas gede bleim po ol saparing
Plenti pipol bilib God kontrol da wold. Wiswei, i tru a? Plei da BIDYO.
Rid Zemes 1:13 ane 1 Zon 5:19, ane tokbaut dis kwestin ya:
Saparing ane ol nugudting i polt blo God a?
5. Wanem bin apen po wold, wen Satana stat po rul?
Rid Zenasis 3:1-6, ane tokbaut dem kwestin ya:
Wanem lai Satana bin spik?—Rid Zenasis 3:4, 5.
Wiskain Satana bin sake tok po meke Ib tingk, Zeoba bloke gudsamting prom pipol?
Prom wanem Satana i spik, pipol nide Zeoba po Rul, sole ol gobi api a?
Rid Iklaziastis 8:9, ane tokbaut dis kwestin ya:
Wanem bin apen raun da wold, bikoz Zeoba no Rul?
Adam ane Ib gad nating rong wea main ane bodi blo demtu ane ol bin stap lo Paradais. Bat demtu bin lisen po Satana ane stanap gense Zeoba
Apta ol bin gense God, da wold i gad sin, saparing, ane pipol pasawei
Bambai Zeoba go tekemaut sin, saparing, ane pipol nomo go pasawei. Pipol nogo gad eniting rong wea main ane bodi gen ane ol go stap lo Paradais ert
6. Zeoba mina kea baut ol saparing blo mipla
Wiswei, yu tingk God i no kea wen mipla sapa a? Tingbaut wanem King Deibid ane misnareman Pita bin raitem. Rid Song blo Sam 31:7 ane 1 Pita 5:7, ane tokbaut dis kwestin ya:
Wiskain i meke yu pil, po sabe Zeoba tekenotis ane kea baut saparing blo yumi?
7. God go pinis ol saparing blo ol pipol pogud
Rid Aizaia 65:17 ane Rebaleisan 21:3, 4, ane tokbaut dis kwestin ya:
Zeoba promis po tekemaut ol nugudting ane saparing pipol i gad. Wiswei, i meke yu pilgud po sabe Zeoba promis diskain a? Aukam?
Yu bin sabe a?
Wen Satana bin spik da pas lai, em bin min po daune Zeoba. Dasmin, Satana bin rabis gud neim blo Zeoba. Satana meke pipol tingk ol nugudting baut Zeoba, dat em no soe peawei o lab wea Rul blo em. Bambai Zeoba go tekemaut ol trabol dat meke pipol sapa, ane neim blo em, nomo spoil nau. I min diskain, em go prube rul blo em, i mina da bes wei. Po klia oli neim blo Zeoba, i mina impotant, moden eniting wea eben ane ert.—Matiu 6:9, 10.
SAM PIPOL SPIK: “God teste pipol wen em meke dempla sapa.”
Wanem yu go spik?
WANEM YU BI LAN
Da Debol Satana ane dem pas pipol, Adam ane Ib, mas gede bleim po state ol nugudting lo wold. Zeoba mina kea, ane i no long nau, em go kamaut ol saparing blo mipla.
Wiskain Yu Go Spik
Wanem lai da Debol Satana bin spik po Ib?
Wiskain i erte yumpla bikoz Adam ane Ib bin go gense God?
Wiskain yumi sabe Zeoba kea baut ol saparing blo mipla?
PAINDAUT MO
Lan wanem sin i min prom Baibol.
Rid mo baut da trabol da Debol Satana bin mekem wea da gadan blo Iden.
“Why Does God Allow Suffering?” (The Watchtower, January 1, 2014)
Paindaut ol nais ansa po wan ad kwestin.
“Why Did the Holocaust Happen? Why Didnʼt God Stop It?” (Web article)
Paindaut wanem wan man bin lanbaut ol saparing em bin luk raun lo em.